KÍXNUU 4

Atagíʼdi̱i̱ maratha májánʼ Ajngóo Dios

Mateo 22:41-45

RÍ NAGÁJNURIYOʼ: Atani mundxaʼwamíjna̱ bi̱ kuwa rudxawanʼ nákha xóó tsetraxnuu textos ndrígóo Biblia.

Atatsaʼwáminaʼ náá numuu matraxnuu texto. Nákha xóó tsetraxnuu, arathá mbá rí mambáñun bi̱ kuwa rudxawanʼ ndiéjunʼ nindxu̱u̱ rí eyaaʼ gárata náa versículo rúʼko̱.

Atayáá rí e̱ʼkha̱ raʼthí náa xúgíʼ rúʼko̱. Arathá rí e̱ʼkha̱ raʼthí ga̱jma̱a̱ tsáa phú niʼnirámáʼ.
Gajmaaʼ rí naʼthí náa Biblia. Índo̱ xtaa raratún xa̱bu̱ bi̱ nakumu̱ún kuyáá Dios, atani mbuyáá rí Biblia nindxu̱u̱ “Ajngá rawunʼ Dios”. Náa na̱ʼkha̱ xúgíʼ ku̱ma̱.
Ataxkaxi̱i̱ a̱jkiu̱ún ga̱jma̱a̱ rí naʼthí náa textos. Atani mbá graxe̱ rí maxtiʼña̱a̱ náa textos. Atagíʼ mbá xkri̱da rí texto ndrígóo Biblia mariʼña̱a̱, arathá mbá xkujndu rí náa Biblia mambáyaʼ mariʼña̱a̱ o arathá mbá ikha rí naʼsngáa náa relato rúʼko̱.

Atayáá rí bi̱ kuwa rudxawaanʼ nuniʼnuʼ má tema rúʼko̱ ga̱jma̱a̱ textos ndrígóo Biblia. Ataxkaxi̱i̱ a̱jkiu̱ún ga̱jma̱a̱ textos rí nuniʼnuʼ má, ga̱jma̱a̱ atambáñun mu makru̱ʼu̱u̱n itháan májánʼ.