KÍXNUU 10
Ndíjkha jngóo gíʼdoo numuu mi̱dxu̱ʼ náa Guʼwá nagimbáanʼ rá.
Lá nitha̱a̱nʼ mi̱dxu̱ʼ mbá miʼtsu náa guʼwá náa nagimbíi̱n xa̱bi̱i̱ Jeobá ráʼ. Á mu nimbá miʼtsu tídxúʼ mbáa mamiñáanʼ á mu natatsaʼwáminaʼ mi̱dxu̱ʼ timbá aphu, mbáa natraximínáʼ: “Ndiéjunʼ eni̱ xa̱bi̱i̱ Jeobá náa nagimbíi̱n rá. Ndíjkha rí gíʼdoo wéñuuʼ numuu eyáá ikhiin xá. Lá ndayóoʼ maʼgá mangúún ráʼ.” Náa kíxnuu rígi̱ majmañaaʼ dí reunión mambáyaaʼ rí mambajxáaʼ itháan ga̱jma̱a̱ʼ Dios ga̱jma̱a̱ xóo maraxtaa.
1. Náá numuu rí nagimbíi̱n xá.
Mbáa bi̱ niʼnirámáʼ Biblia niʼthí ndíjkha jngóo gíʼdoo numuu rí magimbíin: “Náa majñúnʼ mbaʼin xa̱bu̱ mani mba̱a̱ Jeobá” (Salmo 26:12). Rí mbiʼi xúgi̱ xa̱bi̱i̱ Jeobá nagimbíi̱n ga̱jma̱a̱ rúʼko̱ naʼni rí makuwá gagi. Náa xúgíʼ numbaaʼ nagimbíi̱n mambá xmáná mu muni mba̱a̱ Dios, muni ajmúú, mutajkáan mbá jnduʼ. Ga̱jma̱a̱ guata nuthu rí mbá tsiguʼ nagimbíi̱n gajmiún itháán mbaʼin.
2. Ndiéjunʼ gájmañaaʼ náa Guʼwá nagimbáanʼ rá.
Náa nagimbíi̱n nunigajmaa Ajngá rawuunʼ Dios, ikhí nutajuíi kaʼwu xóo eyoo gáʼthúu̱n (atraxnuu Nehemías 8:8). Á mu ikháán nadxuʼ ikhí, majmañaaʼ ga̱jma̱a̱ numuu Jeobá ma̱ngaa cualidad ndrígóo. Índo̱ gáta̱ya̱a̱ rí nandoo kaʼyaaʼ, itháan maʼndaaʼ mambajxáaʼ ga̱jma̱a̱ʼ ikhaa. Ma̱ngaa matayaa xú káʼnii gándoo gámbáyaaʼ mu maraxtaa itháan májánʼ (Isaías 48:17, 18).
3. Xú káʼnii gándoo gúmbayáaʼ bi̱ kúwá náa Guʼwá nagimbáanʼ rá.
Jeobá na̱ndu̱ʼu̱lú “dí maxmiéjunlú kuʼñúún eʼwíinʼ mu maxkajxáánʼ musngajmá ngajua ga̱jma̱a̱ mu̱ʼni̱ rí májánʼ, xúniʼñáánʼ ragimbáanʼlu” (Hebreos 10:24, 25). Náa guʼwá nagimbáanʼ matatsiʼnúunʼ bi̱ nandún kuyamijná gajkhun, xó má ikháán xúʼko̱ má eñún majmañún ga̱jma̱a̱ numuu Dios. Ikhí matadxawíín xú káʼnii gúthi rí na̱ʼkha̱ raʼthí náa Biblia dí maxnáa wéñuuʼ tsiakii (atraxnuu Romanos 1:11, 12). Ma̱ngaa matatsiʼnúunʼ bi̱ niraʼníí mixtiʼkhu xkujndu o gamiéjunʼ, bi̱ kúwi̱i̱n ndajkuíin o nidamijná. Rígi̱ nindxu̱u̱ tikhu rí Jeobá nandoo magimbáanʼlu.
GAJMAÑAAʼ ITHÁAN
Guʼyáá xóo nindxu̱u̱ reunión rí naguáʼdáá xa̱bi̱i̱ Jeobá ga̱jma̱a̱ guʼyáá ndíjkha rí gíʼdoo wéñuuʼ numuu muʼnimíjna̱ muʼgua.
4. Reunión rí naguáʼdáá xa̱bi̱i̱ Jeobá
Nákha siglo timbá, cristianos nigimbíin mu mbuyamajkuíí Jeobá (Romanos 16:3-5). Guraxnuu Colosenses 3:16 ga̱jma̱a̱ gutamíjnála rígi̱:
Xú káʼnii ndiyamajkuíí Jeobá cristianos bi̱ nikúwá nákha siglo timbá rá.
Rí mbiʼi xúgi̱, Xa̱bi̱i̱ Jeobá nagimbíi̱n mambá xmáná mu mbuyamajkuíí Dios. Mu ma̱ta̱ya̱a̱ itháan ga̱jma̱a̱ numuu reunión rúʼko̱, gu̱ya̱a̱ VIDEO. Nda̱wa̱á gu̱ya̱a̱ xtiʼkhuu rí kama náa narígá reunión ga̱jma̱a̱ gutamíjnála rígi̱:
Xú káʼnii mbríguii náa Guʼwá nagimbáanʼ ga̱jma̱a̱ rí xóo na̱ʼkha̱ raʼthí náa Colosenses 3:16 rá.
Índo̱ nitayáá video ga̱jma̱a̱ xtiʼkhu rí kama, ndiéjunʼ rí nanigua̱a̱ʼ itháan náa narígá reunión ndrígúxu̱ rá.
Guraxnuu 2 Corintios 9:7 ga̱jma̱a̱ gutamíjnála rígi̱:
Náá numuu rí tsextanda̱ʼa̱ mbújkha̱a̱ náa nagimbíi̱n xa̱bi̱i̱ Jeobá rá.
Atayáá mbóó ga̱jma̱a̱ʼ bi̱ naʼsngáaʼ ndiéjunʼ rí guyáá náa Guʼwá nagimbáanʼ xmáná rígi̱.
Ndiéjunʼ ku̱ma̱a̱ʼ ikháán rí mambáyaaʼ o dí nanigua̱a̱ʼ rí mbuyáá náa reunión xá.
Lá natayáá má ráʼ.
Náa ináa jw.org ma̱ndoo ma̱ta̱ya̱a̱ náá mínaaʼ ga̱jma̱a̱ náa mbiʼi erígá reunión náa xúgíʼ numbaaʼ.
Índo̱ nagi̱ʼdu̱u̱ reunión nuni ajmúú ga̱jma̱a̱ nutajkháan, xúʼko̱ má índo̱ naguámbá ma̱ngaa najuixná discurso, xkri̱da xóo majuiʼtáraʼa ga̱jma̱a̱ nduyáá videos.
Tikhu rí nanújngoo náa reunión, bi̱ kúwi̱i̱n ikhí ma̱ndoo muxuxi̱ ñawún mu muxna comentario.
Xúgíinʼ xa̱bu̱ ma̱ndoo magún náa Guʼwá nagimbáanʼ: Xa̱bekha, gu̱ʼu̱, xabuanii ga̱jma̱a̱ e̱ji̱n...
Náa nagimbíi̱n xa̱bi̱i̱ Jeobá xáxtumáán ga̱jma̱a̱ xúnda̱ʼa̱a̱ʼ mbújkha̱a̱.
5. Ndayóoʼ matani mbá tsiakii mu maraxtaa náa reunión
Gundxaʼwamíjna̱ ga̱jma̱a̱ numún a̱ngui̱i̱n Jesús, ikhiin nikúwá náa Nazaret, mu magúún náa templo dí rígá náa Jerusalén mambá tsiguʼ, ndiyóoʼ rí magún ajtsú mbiʼi ga̱jma̱a̱ rajkhúún náa kúbá. Guraxnuu Lucas 2:39-42 ga̱jma̱a̱ gutamíjnála rígi̱:
Lá ndiyóoʼ muni mbá tsiakii magún náa Jerusalén xáʼ.
Ndiéjunʼ eyóoʼ matraʼníí ikháán rí mi̱dxu̱ʼ náa Guʼwá nagimbáanʼ rá.
Lá magiʼdoo numuu rí matani mbá tsiakii mu mi̱dxu̱ʼ ráʼ. Náa numuu rá.
Náa Biblia naʼsngúlú rí gíʼdoo numuu makuwánlú reunión mu mbuʼyamajkuíí Jeobá. Guraxnuu Hebreos 10:24, 25 ga̱jma̱a̱ gutamíjnála rígi̱:
Náá numuu rí ndayóoʼ maguʼunlú rí muʼgua reunión rá.
RÍ NUTHI TIKHUN: “Tséyóoʼ má mi̱dxu̱ʼ náa mbá religión mu matayamajkuíí Dios. Mambáa má eʼyoo xú káʼnii eʼyamajkhuu Dios.”
Ndiéjunʼ xkri̱da o texto ndrígóo Biblia náa naʼthí rí Jeobá nandoo muʼnilú rá.
RÍ NAGÁJNURIYO̱O̱ʼ
Rí mi̱dxu̱ʼ reunión mambáyaaʼ mu matatsiʼniiʼ májánʼ Jeobá ma̱ngaa mambaxáaʼ májánʼ ga̱jma̱a̱ʼ ma̱ngaa matayamajkuíí mbóó gajmiáanʼ eʼwíinʼ xa̱bu̱.
Rí nijmañaaʼ
Ndíjkha jngóo naʼtulúʼ Jeobá rí muʼgualú náa reunión rá.
Ndiéjunʼ gájmañaaʼ náa reunión rí naguáʼdáá xa̱bi̱i̱ Jeobá rá.
Ndiéjunʼ i̱mba̱ rí ma̱ndoo mambáñún náa reunión ku̱ma̱a̱ʼ ikháán xá.
ATAYÁÁ ITHÁAN
Lá namíñaaʼ índo̱ natatsaʼwáminaʼ mi̱dxu̱ʼ náa reunión ráʼ. Xúʼko̱ nikumu̱u̱ mbáa xa̱bu̱ nákha ginii mú nda̱wa̱á ikhaa naniguuʼ wéñuuʼ rí maʼga reunión. Atayáá náá numuu.
Atayáá ga̱jma̱a̱ numuu mbáa dxámá bi̱ naniguuʼ maʼga reunión ma̱ngaa atayáá xú káʼnii niʼni mu maʼga má xúʼko̱ ikhí.
Atayáá rí nuthi tikhuun ga̱jma̱a̱ numuu reunión.
“Ndijkha jngóo gíʼdoo numuu mi̱dxu̱ʼ náa Guʼwá nagimbáanʼ rá.” (Artículo dí rígá náa jw.org)
Atayáá xú káʼnii niriʼkhuu’ xóo nixtáa mbáa cholo índo̱ ikhaa nijkha náa nagimbíi̱n xa̱bi̱i̱ Jeobá.
“Asndu náá má ejkhá, ka̱ya̱ má xúʼko̱ ajua̱nʼ” (Bi̱ Nayejngoo, 1 ñajunʼ gu̱nʼ julio tsiguʼ 2014)