KÍXNUU 01

Xú káʼnii gándoo gámbáyaaʼ Biblia mu maraxtaa májánʼ rá.

Edición impresa

Mbaʼáanʼ nurajximíjnalú, náá numuu rí numíniiʼ, nakháñulu ga̱jma̱a̱ xú káʼnii gákuwáanʼ nda̱wa̱á rá. Ma̱ngaa naʼni maxmiéjunlu rí makuwáánʼ ga̱jma̱a̱ mámbá mbiʼi, xóo rí makhánúlu mbújkha̱a̱ mu makuwáánʼ ga̱jma̱a̱ o rí makuwáánlu gagi mbá guʼwáánʼ. Mbaʼin xa̱bu̱ naguánú nduyáá rí náa Biblia naxtiʼña̱a̱ graxe̱ rí gíʼdoo wéñuʼ numuu rígi̱. Ma̱ngaa ikhí na̱ʼkha̱ consejo rí ma̱ndoo mambáyulú. Lá ma̱ndoo mambáyaaʼ Biblia mu maraxtaa májánʼ ráʼ.

1. Xú káʼnii nindxu̱u̱ tikhu graxe̱ rí naxtiʼña̱a̱ náa Biblia rá.

Náa Biblia naxtiʼña̱a̱ tikhu graxe̱ rí gíʼdoo wéñuʼ numuu, xóo rígi̱. Xú káʼnii nigi̱ʼdu̱u̱ nikuwáánʼ rá. Náá numuu rí kuwáánʼlu gi̱i̱ rá. Náá numuu rí numíniiʼ xa̱bu̱ bi̱ májánʼ a̱jkiu̱ún rá. Ndiéjunʼ egíʼníí xa̱bu̱ índo̱ nakháñún rá. Náá numuu dí narígá wéñuʼ guerra á mu dí xa̱bu̱ nandún rí makuwíin tsímáá rá. Ga̱jma̱a̱ ndiéjunʼ gágíʼnuu numbaaʼ náa kuwáánʼlu nda̱wa̱á rá. Náa Biblia naxtiʼña̱a̱ xúgíʼ enii graxe̱ rígi̱ ga̱jma̱a̱ mbaʼin xa̱bu̱ nadxún numuu rí nixtiʼña̱a̱ graxe̱ ndrígu̱ún.

2. Xú káʼnii embáyulu Biblia mu makuwáánʼ tsímáá rá.

Biblia naxnúlu májánʼ consejo, mbá xkri̱da, naʼsngúlú xú káʼnii makuwáánʼlu gagi mbá guʼwáánʼ, naʼthúlú xú káʼnii gúʼni mu xáxmiéjunlu wéñuuʼ ga̱jma̱a̱ rí manigulú ñajunʼ rí nu̱ʼni̱. Índo̱ gákuwáánʼlu ruʼnigajma̱a̱ i̱yi̱i̱ʼ rígi̱, ikháán ma̱ta̱ya̱a̱ ndiéjunʼ eʼthí náa Biblia ga̱jma̱a̱ numuu rígi̱ ma̱ngaa i̱ʼwáʼ, midxu̱ʼnú ma̱ta̱ya̱a̱ “xúgíʼ rí Kiʼnirámáʼ [xúgíʼ dí naʼthí náa Biblia] [...] nayambáá” (2 Timoteo 3:16).

I̱yi̱i̱ʼ rígi̱ na̱nguá eriʼkuriya̱a̱ʼ Biblia, mú mámbayaaʼ matanigajma̱a̱ itháan. Ikha jngóo nutha̱a̱nʼxu rí matraxnuu xúgíʼ texto rí na̱ʼkha̱ náa mámbá kíxnuu ga̱jma̱a̱ atanimbrígui̱i̱ ga̱jma̱a̱ rí xtaa rajmañaaʼ.

GAJMAÑAAʼ ITHÁAN

Mbuʼyáá xú káʼnii Biblia nimbáñún mbaʼin wéñuuʼ xa̱bu̱ ga̱jma̱a̱ mbuʼyáá xú káʼnii gándoo manigulú muraxnuu itháan ma̱ngaa ndíjkha rí gíʼdoo wéñuuʼ numuu rí mbuʼyáaʼ mbáa bi̱ mambáyulu makru̱ʼu̱lú.

3. Biblia naxnúlu ikha

Biblia nindxu̱u̱ xóo mbá aguʼ rí nambiʼiti̱ga̱ náa kamba̱a̱ mu mu̱ʼgua̱lú, ma̱ndoo mambáyulu mu muraʼwíí májánʼ rí mu̱ʼni̱lú ga̱jma̱a̱ nambáyulu mu mbuʼyáá ndiéjunʼ kuaʼthiinʼlu marigá nda̱wa̱á.

Guraxnuu Salmo 119:105 ga̱jma̱a̱ gutamíjnála rígi̱:

Ndiéjunʼ nindxa̱ʼwáminaʼ ga̱jma̱a̱ numuu Biblia bi̱ niʼnirámáʼ Salmo rígi̱ rá.
Xú káʼnii etatsaʼwáminaʼ ikháán ga̱jma̱a̱ numuu dí naʼthí náa Biblia rá.

Mbáa xa̱bu̱ na̱jkha̱ kruígo̱o̱ náa rawúunʼ iyaʼ rí mbruʼun, kayá mbá lámpara rí naskámuu náa na̱jkha̱.

4. Biblia nariʼña̱a̱ graxe̱ ndrígúlú

Mbáa a̱ʼgu̱ nigiʼdoo mbá graxe̱ dí niʼni maxmiéjuunʼ mbayuuʼ tsiguʼ, mú náa Biblia niriʼña̱a̱ graxe̱ ndrígóo. Gu̱ya̱a̱ VIDEO ga̱jma̱a̱ gutamíjnála rígi̱:

VIDEO: Maʼga̱nú má mbiʼi (1:48)

Xú káʼnii graxe̱ nigiʼdoo a̱ʼgu̱ bi̱ ndiʼyáá náa video rá.
Xú káʼnii nimbáyúu dí maʼnigajmaa Biblia xá.

Náa Biblia naʼthúlú rí gíʼmaa mu̱ʼni̱ graxe̱. Guraxnuu Mateo 7:7 ga̱jma̱a̱ gutamíjnála rígi̱:

Lá naku̱ma̱a̱ʼ dí Biblia mambáyaaʼ mariʼña̱a̱ graxe̱ ndrígáaʼ ráʼ. Náá guaʼyaa nindxu̱u̱ rá.

5. Manigua̱a̱ʼ dí matraxnuu Biblia

Mbaʼin bi̱ nuraxnuu Biblia nanigu̱u̱nʼ ga̱jma̱a̱ nambáñún rí naʼthí ikhí. Gu̱ya̱a̱ VIDEO ga̱jma̱a̱ gutamíjnála rígi̱:

VIDEO: Nuraxnuu Biblia (2:05)

Ndiéjunʼ nithi jiámá ma̱ngaa wa̱ʼxa̱ʼ bi̱ niguwáʼ náa video ga̱jma̱a̱ numuu dí muraxnuu rá.
Xú káʼnii eʼni a̱jkiu̱ún índo̱ ikhiin nuraxnuu Biblia xá.

Náa Biblia naʼthí ajngáa rí maʼni̱i̱ a̱jkiu̱lú ga̱jma̱a̱ mbá rí muguaʼthi̱i̱n nda̱wa̱á. Guraxnuu Romanos 15:4 ga̱jma̱a̱ gutamíjnála rígi̱:

Lá nanigua̱a̱ʼ ma̱ta̱ya̱a̱ itháan ga̱jma̱a̱ numuu rí maʼni̱i̱ a̱jkiu̱lú ma̱ngaa dí muguaʼthi̱i̱n nda̱wa̱á ráʼ.

6. Rí mumbayúlú eʼwíinʼ ma̱ndoo makru̱ʼu̱lú itháan Biblia

Itháan májánʼ rí mumbayáaʼ eʼwíinʼ matanigajma̱a̱ Biblia numuu dí makrua̱ʼa̱a̱ʼ itháan, ki xóo rí matanigajma̱a̱ mbáwiin. Guraxnuu Hechos 8:26-31 ga̱jma̱a̱ gutamíjnála rígi̱:

Ndiéjunʼ gámbáyaaʼ mu makrua̱ʼa̱a̱ʼ itháan dí naʼthí náa Biblia rá. (Gu̱ya̱a̱ rí naʼthí náa versículo 30 ga̱jma̱a̱ 31).

Mbaʼa xtiʼkhuu: 1. Felipe xtáa raʼsngóo etíope rí na̱ʼkha̱ raʼthí náa Kiʼnirámáʼ. 2. Mbáa xa̱bi̱i̱ Jeobá xtáa raʼsngóo mbáa aʼgu̱ bi̱ gíʼdiin a̱jmi̱i̱n e̱ji̱i̱n. — Xa̱bu̱ bi̱ na̱ʼkha̱ náa Etiopía ndiyóoʼ rí mbáa mambáyúu mu makro̱ʼo̱o̱ rí naʼthí náa Biblia, xúʼko̱ má rí mbiʼi xúgi̱ mbaʼin xa̱bu̱ nambáñún rí maxtáa mbáa bi̱ maʼsngúún ga̱jma̱a̱ numuu Biblia.

RÍ NUTHI TIKHUN: “Na̱nguá gíʼdoo numuu rí matanigajmaa Biblia, i̱ndó natanimbatiga̱ mbiʼi”.

Ndiéjunʼ rathá ikháán rá. Náá numuu rá.

RÍ NAGÁJNURIYO̱O̱ʼ

Náa Biblia naxnúlú consejo xú káʼnii makuwáánʼ, nariʼña̱a̱ graxe̱ rí gíʼdoo wéñuuʼ numuu, naʼthí ajngáa dí maʼni̱i̱ a̱jkiu̱lú ga̱jma̱a̱ rí muguaʼthi̱i̱nlu nda̱wa̱á.