Imba̱wíí rey májánʼ náa Israel

I̱NDÓ migiñuʼ tsiguʼ gíʼdoo Josías índo̱ ikhaa na̱jkha̱nú nanindxu̱u̱ rey náa a̱jma̱ xuajin ma̱jkha̱ʼ ndrígóo Israel. Tsiguʼ rúʼko̱ ra̱ʼkhá tháán lájuíin mbáa dxámá mu mani̱ndxu̱u̱ rey. Ikha jngó, xa̱bu̱ buanii numbayíí nákha ndiʼkhún egíʼdu̱u̱ maʼtáñajunʼ xuajin.

Índo̱ Josías xtáa má raʼtáñajunʼ mbá juwan tsiguʼ nagíʼdu̱u̱ nda̱yáaʼ Jeobá. Ga̱jma̱a̱ ndayárida xkri̱da ndrígu̱ún reyes bi̱ míjínʼ xóo ma David, Josafat ga̱jma̱a̱ Ezequías. Índo̱ Josías ñajunʼ xóó lájuíin naʼni mbá rí tsímiñu.

Mba̱yu̱ʼ tsiguʼ mbaʼin israelitas nanindxu̱ún ra̱míjínʼ wéñuʼ. Nduyamajkún dios bi̱ ragájkhun. Nusmbatígu̱u̱n náa xándú. Ikha jngó Josías gajmíi̱n xa̱bi̱i̱ nugi̱ʼdi̱i̱ nuni̱ gámbáa náa nduyamajkún xándú bi̱ ragájkhun dí rígá náa xuajin. Ñajunʼ rígi̱ ra̱ʼkhá tháán mba̱a̱, numuu rí mbaʼin xa̱bu̱ nduyamajkún dios bi̱ ragájkhun. Gi̱i̱ nandoo natayáá Josías gajmíi̱n xa̱bi̱i̱ bi̱ kuwa runigámbi̱i̱n xúgínʼ xándú.

Nda̱wa̱á, Josías naʼthúún ajtsúun xa̱bekha rí muni̱i̱ templo ndrígóo Jeobá. Nagímbóó mbújkha̱a̱ rí nuxna xa̱bu̱ xuajin mu muni̱ numún xa̱bekha bi̱ kuwa ruñajunʼ. Índo̱ ikhiin kuwa ruñajunʼ náa templo, xa̱bu̱ bi̱ kayá edxu̱u̱ náa ndxajkun bi̱ nagumbiʼyuu Hilquías naxkamaa mbá rí gíʼdoo wéñuʼ numuu ikhí: Ikhaa libro rígi̱ ñajunʼ xtángoo rí Jeobá niʼthúu̱n Moisés maʼnirámáʼ mba̱yu̱ʼ tsiguʼ kidíiʼ, ga̱jma̱a̱ rí i̱yi̱i̱ʼ rígi̱ nindáti̱ga̱ ginii.

Índo̱ nagún ku̱ñu̱u̱n libro náa Josías, ikhaa nanda̱ʼa̱ rí muraxnuu. Índo̱ naʼdxun, Josías ndaʼyoo rí xa̱bu̱ xuajin na̱nguá kuwa runimbaníí xtángoo ndrígóo Jeobá. Ga̱jma̱a̱ rígi̱ naʼni rí maxtáa gíná wéñuʼ, ikha jngó naxkuʼtu xtíñuu, xóo má tayáá gi̱i̱ náa kiʼniriyaʼ. Naʼthí: ‹Jeobá nakiʼnáa ga̱jma̱á nindxu̱lú, numuu rí ana̱lú na̱nguá niyexi̱i̱ xtángoo rí kiʼniraʼmáʼ náa libro rígi̱›.

Josías nakuʼmaa Hilquías bi̱ kayá edxu̱u̱ náa ndxajkun mu maraxi̱ ndiéjunʼ gáʼni Jeobá náa ikhiin. Hilquías na̱jkha̱ gáʼyoo Hulda a̱ʼgu̱ bi̱ naʼtíriyaʼ dí marigá, ga̱jma̱a̱ naraxe̱. Hulda naxnúu ajngáa rí na̱ʼkha̱ náa Jeobá mu maʼthúu̱n Josías: ‹Jerusalén ga̱jma̱a̱ xúgíʼ xuajin mundrigú castigo numuu rí ndiyamajkún dios bi̱ ragájkhun ga̱jma̱a̱ narígá dí ra̱májánʼ wéñuʼ náa tsu̱du̱u̱ ku̱ba̱ʼ. Numuu rí ikháánʼ, Josías, nitani̱ rí májánʼ, xáʼkha̱ castigo rígi̱ náa ikháánʼ xúgi̱, ma̱ʼkha̱ nda̱wa̱á índo̱ ikháánʼ gákhañaʼ›.