Lá ni̱ndxu̱ún mbá secta xa̱bi̱i̱ Jeobá ráʼ.

Na̱nguá, xa̱bi̱i̱ Jeobá na̱nguá ni̱ndxu̱xu̱ʼ mbá secta. Ni̱ndxu̱xu̱ʼ cristianos bi̱ nuʼgími̱jna̱ munixu xó má niʼni Jesús ga̱jma̱a̱ makuwáanʼxu xó má niʼsngáa ikhaa.

Ndiéjunʼ nindxu̱u̱ mbá secta rá.

Mbaʼa rí nuthi dí nindxu̱u̱ mbá secta. Guʼyáá a̱jma̱ enii ga̱jma̱a̱ náa numuu rí na̱nguá ni̱ndxu̱ún mbá secta xa̱bi̱i̱ Jeobá.

• Tikhun nakumu̱ún rí mbá secta nindxu̱u̱ mbá religión nuxi̱ʼ ga̱jma̱a̱ na̱nguá eni costumbre. Bi̱ ñajunxu xa̱bi̱i̱ Jeobá na̱nguá ninixu mbá religión nuxi̱ʼ. I̱ndó nduyaridáá xkri̱da ndrígu̱ún timbíi̱n cristianos ga̱jma̱a̱ nakúwáanʼxu xó má nisngáa rí na̱ʼkha̱ náa Biblia (2 Timoteo 3:​16, 17). Ndu̱ya̱a̱xu májánʼ rí náa Ajngá rawunʼ Dios na̱ʼkha̱ rí xú káʼnii gíʼmaa mbuʼyamajkuíí.

• Tikhun nakumu̱ún rí mbá secta nindxu̱u̱ mbá nguáthi̱i̱n bi̱ nagún ki̱dxu̱ʼ mbáa xa̱bu̱ bi̱ kayá edxu̱u̱. Timbá, xa̱bi̱i̱ Jeobá na̱nguá e̱jkuáxú ki̱dxu̱ʼ mbáa xa̱biya̱ o a̱ʼgu̱, numuu rí nunimbániixu ajngáa rí niʼthún Jesús xa̱bi̱i̱: “Numu ri mbahui Xabo Idi xta tsi ñajun Cristo” (Mateo 23:10).

Religión ndrígúxu̱ nambáyuxuʼ ga̱jma̱a̱ nambáñun eʼwíínʼ xa̱bu̱ ma̱ngaa na̱nguá migamíi. Mbá xkri̱da, ajngáa rí na̱ʼkha̱ náa Biblia rí na̱jkuá kuyuxu nambáñun mbaʼin xa̱bu̱ mu muniñaʼ iya najnga̱a̱ ga̱jma̱a̱ droga. Ma̱ngaa má nusngúúnxu xa̱bu̱ majmañún muraxnuu náa xúgíʼ tsu̱du̱u̱ Ku̱ba̱ʼ, rígi̱ naʼni rí mbaʼin xa̱bu̱ majmañún muraxnuu ga̱jma̱a̱ muniraʼmáʼ. Ma̱ngaa numbáñun bi̱ niraʼníí gamiéjunʼ asndu náa má xuajin. Nunixu mbá tsiakii mu muniu̱u̱nxu rí májánʼ xa̱bu̱ numbaaʼ xó má niʼsngáa Jesús (Mateo 5:​13-​16).