Lá ni̱ndxu̱ún bi̱ nutaraʼa numuu Jeobá mbá secta rí na̱ʼkha̱ náa Estados Unidos ráʼ.

Guʼwá dí naxnúlú ikha náa xúgíʼ tsu̱du̱u̱ numbaaʼ rígá náa Estados Unidos. Mú na̱nguá ni̱ndxu̱lú mbá secta rí na̱ʼkha̱ ikhí. Atayáá náa numuu:

• Tikhun nuthi rí secta nindxu̱u̱ mbá grupo rí nigájnuu náa mbá religión dí rígá má. Bi̱ nutaraʼa numuu Jeobá tseguwáʼ náa imbo̱o̱ religión. Rí phú nuni, nuñajunʼ má xúʼko̱ mu marigá cristianismo rí nirígá nákha siglo timbá.

• Xa̱bi̱i̱ Jeobá nutaraʼa náa itháan rí 230 xuajen mba̱ʼu̱ ga̱jma̱a̱ territorios. Tséʼniuu má náa kuwa, gíʼmaa muxnáá gamajkhu Jeobá ga̱jma̱a̱ Jesucristo, raʼkháa Xa̱bu̱ Ñajunʼ bi̱ xtáa náa Estados Unidos o imba̱a̱ (Juan 15:19; 17:15, 16).

• Nunimbuxu rí naʼsngáa náa Biblia, raʼkháa rí naʼnirámáʼ mbáa xa̱bu̱ ede̱ bi̱ na̱ʼkha̱ náa Estados Unidos (1 Tesalonicenses 2:13).

• Na̱jkua̱ ki̱dxu̱ʼ Jesucristo, raʼkháa náa mbáa xa̱bu̱ (Mateo 23:8-10).