Tsáa nindxu̱u̱ Rey náa Reino ndrígóo Dios rá.

• Dios gáyaaʼ. “Ikhúúnʼ mínuuʼ ni’gíʼ rey ndrígóʼ [...], ga̱jma̱a̱ maxna̱ʼ xuajen mba̱ʼo̱ xóo herencia ga̱jma̱a̱ asndu náa námbári̱go̱o̱ ku̱ba̱ʼ xóo mbayaaʼ” (Salmo 2:6, 8).

• Ikhaa gági̱ʼi̱ náa xíliu̱u̱ rey David. “Mbáa ada̱ nigumaa náa ikháanʼlú, mbáa ada̱ nikániulú [...]. Dí maʼtáñajunʼ mani̱ndxu̱u̱ mba̱a̱ wéñuʼ ga̱jma̱a̱ dí tsímáá xáʼga̱nú mambáa, náa xíliu̱u̱ David ma̱ngaa dí maʼtáñajunʼ magíʼ má xúʼko̱ ga̱jma̱a̱ maʼni xó má kaʼyoo” (Isaías 9:6, 7).

• Magumaa náa Belén. “Ikháánʼ, Belén [...], náa ikháánʼ gagajnúu bi̱ maʼga̱nú mani̱ndxu̱u̱ Xa̱bu̱ Ñajunʼ [...,] maʼga̱nú majmaʼniiʼ asndu náa nambári̱go̱o̱ ku̱ba̱ʼ” (Miqueas 5:2, 4).

• Xáʼndun gúyáá ga̱jma̱a̱ muxiyáa. “Niguiñun’ kuyáá, ga̱jma̱a̱ nduʼyáá rí asndu xóo ragíʼdoo numuu [...], nixkruaʼaa ga̱jma̱a̱ numuu aʼkhúlúʼ, nixujmbi̱i̱ ga̱jma̱a̱ numuu dí nakiéʼkulu” (Isaías 53:3, 5).

• Magabi̱i̱ ga̱jma̱a̱ maguma mba̱a̱. “Xátatsiʼñúʼ náa Iñá wa̱jinʼ. Xátatsiʼñáʼ rí bi̱ jmbi mbaʼyoo iñáʼ [...]; marigá má xúʼko̱ rí májánʼ náa ikháán asndu kámuu” (Salmo 16:10, 11).

Jesucristo nindxu̱u̱ bi̱ maʼtáñajunʼ májánʼ

Bi̱ nambríguii ga̱jma̱a̱ xúgíʼ rígi̱ nindxu̱u̱ Jesucristo. Mbáa ángel niʼthúu̱n María: “Dios maxnúu xíliu̱u̱ David bi̱ nindxu̱u̱ anu̱u̱ [...]. Xáʼga̱nú mambáa rí maʼtáñajunʼ”. (Lucas 1:31-33).

Jesús táʼtáñajunʼ índo̱ nixtáa náa tsu̱du̱u̱ Ku̱ba̱ʼ. Mú, maʼtáñajúúnʼ xa̱bu̱ numbaaʼ asndu mekhuíí xóo Rey náa Reino ndrígóo Dios. Náa numuu rí ikhaa maʼtáñajunʼ xá. Guʼyáá rí niʼni nákha nixtáa náa tsu̱du̱u̱ Ku̱ba̱ʼ.

• Jesús nixmiéjunʼ kaʼñún xa̱bu̱. Nimbáñun xa̱bekha ga̱jma̱a̱ gu̱ʼu̱, jiáma ga̱jma̱a̱ xa̱bu̱ guanii. Ikhaa táraʼwíin ga̱jma̱a̱ numuu xuajñún o á mu guáʼdáá (Mateo 9:36; Marcos 10:16). Índo̱ mbáa xa̱bu̱ bi̱ gíʼdoo lepra niʼthúu̱n: “Á mu nandaʼ ma̱ndoo matani kaʼwu̱u̱n”, Jesús nigáwiinʼ a̱jkiu̱u̱n ga̱jma̱a̱ niʼni thanuu (Marcos 1:40-42).

• Jesús niʼsngúlúʼ xóo gúʼni rí naniguuʼ Dios. Ikhaa niʼthí: “Xándoo mu̱ni̱ ñajuunʼ Dios ga̱jma̱a̱ ikhú má mbuʼyáʼ muguaʼdáá wéñuuʼ.” Ma̱ngaa nixkaxi̱i̱n xa̱bu̱ rí muniu̱u̱n eʼwíínʼ xóo eñún magumiin ikhiin. Ma̱ngaa niʼsngúlúʼ rí Dios raʼkháa i̱ndó naxmiéjunʼ ga̱jma̱a̱ rí nuʼni ma̱ngaa rí nundxa̱ʼwa̱míjna̱ ga̱jma̱a̱ rí nakumulú. Ikha jngó, mu muʼni rí nandoo Dios, gíʼmaa muñewa̱a̱n dí rígá náa a̱jkiu̱lú (Mateo 5:28; 6:24; 7:12). Ga̱jma̱a̱ niʼthí rí á mu nandulú makuwáanʼ tsímáá, gíʼmaa mbuʼyáá rí nandoo Dios muʼni ga̱jma̱a̱ muʼnimbánii (Lucas 11:28).

• Jesús niʼsngúlúʼ ndiéjunʼ eyoo gáʼthúu̱n rí maʼndulú kuʼyamijná. Rí niʼthí ga̱jma̱a̱ rí niʼni ni̱jkha̱nú asndu náa a̱jkiu̱ún xa̱bu̱. Náa Biblia naʼthí: “Xa̱bu̱ bi̱ kúwá ikhí asndu ni̱jkha̱ a̱jkiu̱ún ga̱jma̱a̱ rí xóo eʼsngáa. Numuu rí naʼsngúún xóo mbáa xa̱bu̱ bi̱ gíʼdoo numuu” (Mateo 7:28, 29). Mbá xkri̱da, niʼthún: “Gaʼndala ku̱ñu̱u̱n má xúʼko̱ bi̱ tsíñún gúyala”. Ga̱jma̱a̱ ikhaa mínaʼ niʼtájkháan ga̱jma̱a̱ numún bi̱ nixiyáa: “Anu̱ʼ, atani mba̱a̱ a̱jkia̱a̱nʼ xtañún, numuu rí tséyáá rí eni” (Mateo 5:44; Lucas 23:34).

Jesús maʼtáñajunʼ májánʼ numuu rí nigumarataa, nandoo kaʼyulú ga̱jma̱a̱ nandoo mambáyulúʼ. Mú, nguánáa gági̱ʼdu̱u̱ maʼtáñajunʼ xá.