Xú káʼnii eʼni gachíin internet xa̱bu̱ gajmii rá.

Á mu tséjmún májánʼ internet gamíi maguaʼdáá xkujndu xóo rígi̱:

• Ma̱ndoo marígú kaʼñúún mbiʼi rí ma̱ndoo makuwá mbo̱o̱.

• Ma̱ndoo maʼni rí makuwá ruñajunʼ índo̱ tséyóoʼ.

• Ma̱ndoo maʼni rí murkaʼwumáʼán rí nuni mu xúnimbún kuyamijná ga̱jma̱a̱ dí muni nduwamíjná.

DÍ GÍʼMAA MA̱TA̱YA̱A̱

MBIʼI RÍ NAKÚWÁ MBÓÓ

Mbaaʼ xa̱bu̱ bi̱ mbiʼyuu Michael naʼthí: “Nguáná índo̱ xtáá mbóó gajmuʼ a̱ʼgiu̱ʼ asndu xóo ikhaa nda̱wa̱a̱ ikhí ku̱mu̱ʼ. Ikhaa i̱ndó celular xtaa raʼyoo ikhú naʼthí ‹ay atani mbáa a̱jkia̱a̱nʼ taguaphún kayuʼ mbayóo mensaje›”. I̱mba̱a̱ xa̱bu̱ bi̱ mbiʼyuu Jonathan naʼthí rí nguáná “xa̱bu̱ gajmii ma̱ndoo makuwa náa ikhaa má guʼwáaʼ, mú makumún rí tsínguánʼ xtáa mambáa”.

ATRAJXI̱MÍNÁʼ RÍGI̱: Mámbá guata mbayuuʼ xtáa ratani̱ llamada natáxuʼmaʼ mensaje náa inuu imbá xa̱bu̱ índo̱ ndayóo rí maratamíjná jma̱a̱ bi̱ ndiyáa rá. (EFESIOS 5:33.)

ÑAJUNʼ

Ga̱jma̱a̱ numuu ñajunʼ rí guáʼdáá tikhun xa̱bu̱ ndayóoʼ rí makuwá xawii mbiʼi mbruʼun mú muriʼña̱a̱ llamada o correo. Ga̱jma̱a̱ eʼwíinʼ mbáa guaʼdáá mbá ñajunʼ rí tséyóo má wéñuʼ, mu maski ajndu xúʼko̱, ikhiin naʼniún gakhii mu muniña̱a̱ ñajunʼ índo̱ nagu̱u̱n náa guʼwá. Mbáa xa̱bu̱ bi̱ mbiʼyuu Lee naʼthí: “Naʼniu gakhii rí xáyoo celular mu mba̱yo̱o̱ á mu na̱ʼkha̱nú llamadas o mensaje náa nañajunʼ mbiʼi dí niriyaʼ mu maxtáa gajmúʼ a̱ʼgiu̱ʼ.” Ga̱jma̱a̱ imba̱a̱ a̱ʼgu̱ bi̱ mbiʼyuu Joy naʼthí: “Numuu dí nañajunʼ asndu náa goʼwóʼ ikha jngóo naʼniu gakhii mu mba̱yo̱o̱ nguáná ganiʼñu̱u̱ rañajunʼ”

ATRAJXI̱MÍNÁʼ RÍGI̱: Índo̱ ajmbia̱a̱ʼ o a̱ʼgia̱a̱ʼ xtáa raʼthánʼ, lá natagíʼ edxa̱a̱ʼ ráʼ. (LUCAS 8:18.)

GANINDXA̱A̱ JMBII

Mbaʼin xa̱bu̱ nuthi̱ rí nagiʼdu̱u̱n gajmiún bi̱ ndi̱ya̱a̱ ga̱jma̱a̱ numuu rí nakudaanʼ náa internet mbáa dí ikhiin, ma̱ngaa rí asndu tikhuunʼ dí ikhiin nithi rí nguʼwa̱á nixuda̱nʼ náa internet, mbá rí bi̱ ndi̱ya̱a̱ na̱nguá eʼyoo.

Mbaʼin xa̱bu̱ naguánú nduyáá rí internet nindxu̱u̱ mbi̱i̱ wéñuʼ náa nidamijná rí asndu ma̱ndoo maʼni rí mbáa dí ikhiin ma̱ndoo makudaminaʼ aʼkhá ga̱jma̱a̱ imba̱a̱. Ikha jngóo tséʼniulú tsiánguá rí abogado nuthi̱ rí internet maʼni rí xa̱bu̱ muniñamijnáa.

ATRAJXI̱MÍNÁʼ RÍGI̱: Lá narkaʼwu ajmbia̱a̱ʼ o a̱ʼgia̱a̱ʼ rí naʼtámíjná gajmíi̱nʼ eʼwíinʼ ráʼ. (PROVERBIOS 4:23.)

RÍ MA̱NDOO MATANI

ATAYÁÁ RÍ ITHÁÁN NDAYÓOʼ MATANI

Mbáa xa̱bu̱ bi̱ tsiñéwu̱u̱n rí na̱ʼkhu̱ mbayóo nandii. Xúʼko̱ má mbáa xa̱bu̱ bi̱ tsériyaʼ mbiʼi mu maxtáa ga̱jma̱a̱ bi̱ ndiyáa magiʼdoo xkujndu (Efesios 5:28, 29).

Gu̱ya̱la mbóó ikha rí naniguala munimbánii o guniraʼmáʼ rí nandala ikháanʼ mu xaguaʼdáá xkujndu gajmiála xa̱bu̱ bi̱ ndiya̱a̱, gáʼni internet.

• Guríyala awan rí muphiʼtsu mbóó mbá mbiʼi.

• Guríyala mbiʼi mu makuwáanʼ mbóó ga̱jma̱a̱ xájmala celular.

• Guríyala mbiʼi mu muni̱ mbá rí naniguala.

• Gundijuíi celular rí mbruʼun ga̱jma̱a̱ gugrígula mitsínguánʼ.

• Gundijuíi celular mbá 15 minutos rí mbá mbiʼi mu xúʼko̱ nda̱a̱ rí gáʼni jngariga̱án mu mutamijná.

• Guʼgíʼ mbá hora dí muniʼñááʼ rajmala internet rí mbá mbiʼi.