Ndíjkha dí xa̱bu̱ nánguá eyamajkhuíí vida rá.

NDÍJKHA DÍ GÍʼDOO NUMUU MBUʼYAMAJKUÍÍ VIDA NDRÍGULÚ

• Rí matatsika ndíí naʼni dí maraʼdáá cáncer, ma̱ngaa naʼni dí xáʼnga̱a̱ʼ gátaniminaʼ ga̱jma̱a̱ nandii. Naʼni xóo mbá 90% xa̱bu̱ bi̱ nikháñún ga̱jma̱a̱ numuu cáncer náa xtitiu̱u̱nʼ, nindxu̱u̱ ga̱jma̱a̱ numuu dí nákha niʼníí nutsikha ndíí o nikúwá náa kúwíin xa̱bu̱ bi̱ nutsikha ndíí.

• Mámbá tsiguʼ mbaʼin xa̱bu̱ numíniiʼ ga̱jma̱a̱ numuu dí niguáʼníí nákhá niʼníí, xóo índo̱ nurmidá ajua̱nʼ. Mbá informe náa Universidad ndrígóo Stanford (Estados Unidos) naʼthí: “Xa̱bu̱ bi̱ nduyáá, nuthi rí asndu bi̱ naʼngu̱u̱n nuni̱ kawúmíjná [náa nurmidá ajua̱nʼ náa escuela], itháán nda̱wa̱á numíniiʼ numuu rí naguáʼdáá nandii náa ngáñúunʼ”.

• Índo̱ mbáa xa̱bu̱ bi̱ najngaa o nijmuu droga na̱jkha̱ kayóo carro, gamíi dí maʼni kambiyuʼ mbáa bi̱ na̱jkha̱ náa kamba̱a̱ o bi̱ nanújngoo náa carretera. Mbaʼin xa̱bu̱ bi̱ nda̱a̱ aʼkhúún naguanu numíniiʼ ga̱jma̱a̱ numún xa̱bu̱ bi̱ nusngajma rí tséyamajkuíí vida.

RÍ MA̱NDOO MATANI̱ IKHÁÁN

Atie̱wa̱a̱n salud ndrígáaʼ. Ma̱ndoo mi̱dxu̱ʼnú matatsíʼñááʼ dí naʼni gachu̱u̱ xuyaaʼ, xóo rí matatsika ndíí, mataxmatráʼá gúní (vapear), migi̱i̱n wéñuuʼ iya najngaa o majmaaʼ droga. Xúgíʼ rígi̱ naʼni gachu̱u̱ salud ndrígóo mbáa xa̱bu̱ ga̱jma̱a̱ nasngájma rí tséʼyamajkhuu vida ndrígóo ni ma vida ndrígu̱ún bi̱ kúwá mijngii náa xtáa o familia ndrígóo.

Atiewumínáʼ. Atayáá náa ndayóoʼ matani̱i̱ guʼwáaʼ ga̱jma̱a̱ tsumáá gídxúʼ jcháa carro ma̱ngaa atie̱wa̱a̱n o atani̱ májáanʼ carro ndrígáaʼ. Xátatsiʼñááʼ dí eʼwíinʼ mutsudáán matani mbá dí gamíi maʼni makámbiyaaʼ o asndu makhañáaʼ.

Gani̱ndxa̱a̱ʼ májánʼ xa̱bu̱ náa eʼwíinʼ. Ma̱ngaa nusngajmá rí nduʼyamajkuíí vida índo̱ nuʼniún dí májánʼ eʼwíinʼ xa̱bu̱, tséʼniuu má xóo kaʼniún, náa eguwáʼ, á mu kuáʼdáá o na̱nguá. Numuu dí índo̱ xa̱bu̱ nuni̱ wajimijna náa eʼwíinʼ o rí tsíñún gúyamíjná i̱ndó naʼni dí marigá wéñuuʼ dí ra̱májánʼ ga̱jma̱a̱ naʼni dí marigá guerra náa xúgíʼ numbaaʼ.

DÍ NUNI̱ TESTIGOS DE JEOBÁ

Nuʼsngúún eʼwíinʼ mu makuwá májánʼ. Núma̱aʼ má ga̱jma̱a̱ numuu dí nuʼsngáa ga̱jma̱a̱ numuu Biblia, mbaʼin xa̱bu̱ bi̱ nákhá ginii najmún droga, naʼwán iya najngaa o nuni̱ i̱ʼwáʼ rí naʼni gachúu xuñúnʼ niʼngu̱u̱n niriʼkumijnáa.

Índo̱ nuñajunʼ náa naguma guʼwá, nuʼnimbáníí ikha náa naʼthí xóo gíʼmaa muñeumíjna̱lú. Bi̱ nuyambáá náa maguma Guʼwá dí nagimbáanʼ ga̱jma̱a̱ i̱ʼwáʼ, najuiʼsngúún xú káʼnii gíʼma muñeumíjna̱ mu xákambiñu̱u̱nʼ. Ma̱ngaa mámbá gíʼma najuiʼyáá náá ndayóoʼ maguma májáanʼ Guʼwá rí niguma má, mu xúʼko̱ xárígá mbá gamiéjunʼ.

Numbáñún bi̱ numíníiʼ ga̱jma̱a̱ numuu gamiéjunʼ. Xíjkhoo, náa mbá tsiguʼ xuajñuu Jeobá nigruigi̱i̱n bi̱ mayambáá náa narígá gamiéjunʼ mu mumbañún xa̱bu̱ bi̱ nimíniiʼ ga̱jma̱a̱ numuu mbá 200 gamiéjunʼ dí nirígá náa xúgíʼ numbaaʼ. Itháán maʼni dí 12 millón de dólares mbújkha̱a̱ dí nuxna a̱ngiu̱lú nijmaa mu mixtambáñún bi̱ nimíniiʼ.

Índo̱ nigíʼdúu nirígá nandii ga̱jma̱a̱ numuu virus ndrígóo Ébola, mbaʼin xa̱bu̱ náa África Occidental (2014) ga̱jma̱a̱ náa República Democrática del Congo (2018) niʼniún nandii rígi̱. Bi̱ nindxu̱xu̱ testigos de Jeobá nithún xa̱bu̱ xú káʼnii gíʼmaa muñewamíjna̱ mu xáʼniún nandii mbiiʼ rígi̱. Nixuʼmiin tikhuun a̱ngiu̱lú mu muxna mbá discurso náa kúwá mbaʼin xa̱bu̱, discurso rí mbiʼyuu “Rí matanimba̱a̱ʼ naʼni kríña̱a̱nʼ”. Náa guʼwá dí na̱jkua̱ mu mbuʼyamajkuíí Dios nindri̱ga̱ náa ma̱ndoo mujñáa ñawúúnʼ xúgíinʼ bi̱ nagún ikhí. Ma̱ngaa nithunxu̱ dí gíʼdoo wéñuuʼ numuu dí mujñáa ñawúúnʼ ga̱jma̱a̱ dí muñeumíjna̱ mu xúʼko̱ xáʼniún nandii.

Náa xuajin Sierra Leona xa̱bu̱ bi̱ nuthi náa radio nigrigu mbá audio náa nixníin núma̱aʼ testigos de Jeobá numuu dí nimbañúún a̱ngiu̱ún ga̱jma̱a̱ eʼwíinʼ xa̱bu̱ mu muñeumíjna̱ dí xáʼniún nandii ga̱jma̱a̱ numuu virus ndrígóo Ébola.