KÍXNUU 4
Anu̱u̱ ga̱jma̱a̱ Jeobá nadxún wéñuʼ kuyáá
Ndiéjunʼ rí ekudaminaʼ Jefté náa Jeobá rá.
Maski ajndu niʼniuu mingíjyúuʼ, wáxioo Jefté niʼnimbánuu rí nikudaminaʼ maʼni anu̱u̱
Lá natayáá tsáa nindxu̱u̱ dxáʼgú chíʼgíʼ bi̱ kamaa náa xtiʼkhu ráʼ... Náa Biblia na̱nguá kama mbiʼyuu, mu naʼtúlú rí anu̱u̱ nigumbiʼyuu Jefté. Jeobá ga̱jma̱a̱ Jefté nidxún wéñuʼ ga̱jma̱a̱ numuu mbá rí niʼni ikhaa. Lá manigua̱ʼ matatsiʼniiʼ itháan Jefté ga̱jma̱a̱ wáxioo ráʼ.
Jefté ninindxu̱u̱ mbáa xa̱bu̱ bi̱ ra̱ʼkhá tháán májánʼ a̱jkiu̱u̱n. Ma̱ngoo mámbá gajtsi naʼsngóo wáxioo ga̱jma̱a̱ numuu Jeobá. Ma̱ngaa ninindxu̱u̱ mbáa xa̱bu̱ bi̱ mixkujiʼ bi̱ najmañuu naxnún ikha xa̱bu̱ xuajin. Ikha jngó xa̱bu̱ israelita nitháán: “Lá nandaʼ mayédxuʼ edxu̱u̱ náa muʼguáxu guerra ráʼ.”
Jefté nindo̱ʼo̱o̱ Jeobá rí mambáñun maʼngu̱u̱n muxmijná náa guerra. Niʼthúu̱n rí á mu naʼngu̱u̱n, ikhaa gáʼni rígi̱: Índo̱ gáʼkha̱núu goʼwóo, timbáa xa̱bu̱ bi̱ gagajnuu gagruiguíi maxnáxiu̱u̱ Jeobá. Ndiéjunʼ lá eyoo gáʼthi rígi̱ rá. Rí xa̱bu̱ buʼko̱ kámuu gáxtáa rañajunʼ náa tabernáculo ndrígóo Dios. Tabernáculo ninindxu̱u̱ náa nagún xa̱bu̱ gúyamajkuíí Jeobá. Niʼngo̱o̱ Jefté nixmínaʼ gajmíi̱n xáʼ. Niʼngo̱o̱. Índo̱ ni̱jkha̱núu goʼwóo, lá natayáá tsáa nigájnuu ginii gagruiguíi xáʼ...
¡Wáxioo nigájnuu! Mbáwíi ikhaa wáxioo gíʼdaa, xúgi̱ rá, Jefté gíʼmaa makunguanʼ rí maʼga̱ gáxtáa náa tabernáculo. Rúʼko̱ niʼniuu maxtáa gíná wéñuʼ, mú ikhaa nikudaminaʼ rí maxniúu Jeobá, lá narmáʼáan a̱jkia̱nʼ ráʼ. Ikha jngó, ikhaa niʼthí: “Anu̱ʼ, niratháán má Jeobá matani rígi̱, gíʼmaa matanimbánii”.
Bi̱ nambáxu̱u̱ gajmíi̱n wáxioo Jefté nagún ruyáá mámbá tsiguʼ
Ma̱ngaa nixtáa gíná índo̱ ndiʼkhún niʼdxuun rígi̱. Náa numuu rá. Numuu rí índo̱ gáxtáa náa tabernáculo, xándoo ganújúnʼ ga̱jma̱a̱ xándoo gagiʼdiin e̱ji̱n. Mú ikhaa nandoo maʼnimbánuu rí nikudaminaʼ maʼni anu̱u̱. Ma̱ngaa ikhaa nandoo rí Jeobá maʼdxuu kaʼyoo. Itháan má gíʼdoo numuu rúʼko̱ ndiʼyoo ikhaa ki xóo rí manújúnʼ ga̱jma̱a̱ magiʼdiin e̱ji̱n. Ikha jngó ni̱jkha̱ gaxtáa kayuʼ náa tabernáculo.
Lá naku̱ma̱ʼ rí Jeobá ga̱jma̱a̱ Jefté nidxún kuyáá xáʼ... ¡Xúʼko̱ kaʼnii! Ikháánʼ mangáán ma̱ndoo manindxa̱ʼ xóo wáxioo Jefté. Á mu natanimbaaʼ rí naʼthí Jeobá ga̱jma̱a̱ nandaʼ xtayáá wéñuʼ, ikhaa ra̱ʼkhá tháán gáʼdxuu kaʼyaʼ. Xúʼko̱ má ma̱ngaa ana̱ʼ ga̱jma̱a̱ rudáʼ maʼdxún wéñuʼ.