RÍ KAYÁ EDXU̱U̱ NÁA INUU I̱YI̱I̱ʼ | MA̱NDOO MARAXTAA MIJNGII NÁA DIOS
Nda̱a̱ imbo̱o̱ rí májánʼ matani
Ndiéjunʼ gándoo muʼni mu makuwáanʼ mijngii náa Dios rá. Ndiʼyáá xú káʼnii gándoo gátani ikháánʼ mu mambaxáʼ májánʼ ga̱jma̱ʼ Dios. Rígi̱ nindxu̱u̱:
Rí matatsiʼnuʼ ga̱jma̱a̱ majmaʼ mbiʼyuu Dios, Jeobá.
Rí maratamíjná má xúʼko̱ ga̱jma̱ʼ ga̱jma̱a̱ índo̱ naratajkáan ma̱ngaa índo̱ gátra̱xnuu Biblia.
Rí matani má xúʼko̱ rí nandoo Jeobá.
Ataxuʼmaminaʼ náa Dios, ga̱jma̱ʼ mbiʼyuu, marata̱ káñii ikhaa, matanigajmaa Ajngóo ga̱jma̱a̱ matani rí nanigu̱ʼ
Ga̱jma̱a̱ xúgíʼ rí ndiʼyáá gi̱i̱, lá naku̱ma̱ʼ ikháánʼ rí xtaa ratani̱ rí kaʼyoo mu mi̱dxu̱ʼ mijngii náa Dios ráʼ. O rígá rí xóó ndayóoʼ matani dxe̱ʼ. Ndayóoʼ muʼni tsiakimijna, mú nduʼyáá rí mundrígú rí májánʼ.
“Rí muʼni mbá tsiakii mu mambaxúlúʼ gajmiúlú Dios mundrígulú rí májánʼ”, xúʼko̱ eʼthí Jennifer bi̱ xtáa náa Estados Unidos. “Rí mambaxáʼ ga̱jma̱ʼ Dios makhánáʼ rí májánʼ: Maku̱ma̱ʼ xtayáá itháan Dios, makruaʼaʼ itháan xú káʼnii xa̱bu̱ nindxu̱u̱ ikhaa, mu itháan rí maʼnda̱ʼ xtayáá. ¡Nda̱a̱ imbo̱o̱ rí májánʼ matani!”.
Á mu nandaʼ maraxtaa mijngii ga̱jma̱ʼ Dios, bi̱ nutaraʼa ga̱jma̱a̱ numuu Jeobá maʼdxun wéñuʼ rí mumbayáʼ. Ikhiin muriyaʼ awan mu matanigajmaa̱ Biblia gajmiáanʼ rí asndu xúrumán. Ma̱ngaa mutha̱nʼ mi̱dxu̱ʼ Guʼwá náa nagimbíi̱n náa ma̱ndoo mambaxáʼ gajmiáanʼ bi̱ nambáxu̱u̱n gajmiún Dios.a Índo̱ gátani rígi̱, ikháánʼ makumaaʼ xóo nikumu̱u̱ salmista bi̱ niʼthí: “Mú ikhúúnʼ ra̱ʼkhá tháán májánʼ rí maʼgá kanuu náa Dios” (Salmo 73:28).
a Mu matanda̱ʼa̱ rí musngááʼ ga̱jma̱a̱ numuu Biblia o mu ma̱ta̱ya̱a̱ náa rígá mbá Guʼwá náa nagimbíi̱n náa mijngii xtaa, aratháán xa̱bu̱ bi̱ nixnáʼ revista rígi̱ o ata̱ʼa̱ʼ náa Internet náa ináa ndrígúxu̱, www.jw.org/jw-tln. Atayááʼ náa naʼthí “Aratámíjná ga̱jma̱á nindxuxuʼ”, náa námbáa ináa rí nagi̱ʼdu̱u̱.