Ndiéjunʼ enimbu̱ún xá.

Bi̱ nutaráʼaxu numuu Jeobá nakumuxu rí “xoguiʼ ri ajŋgo Dios nini xabu, Espíritu su Micaʼjui ndeyicun muni, ica riʼcui mambayuʼlu” (2 Timoteo 3:16). Najmuxu Biblia mu majmañuxu ga̱jma̱a̱ numuu bi̱ niʼniáanʼ ga̱jma̱a̱ naxnúxu ikha mu makuwáanʼxu májánʼ wéñuʼ.

Náa Escrituras naʼthí: “Xa̱bu̱ mbuyáá rí ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ” (Salmo 83:18). Ikha jngó, i̱ndó Jeobá Dios eyamajkuííxu. Ma̱ngaa nunixu mbá tsiakii mu iʼwíínʼ muniʼnuʼ mbiʼyuu numuu rí ni̱ndxu̱xu xa̱bi̱i̱ (Isaías 43:10-12).

Ni̱ndxu̱xu cristianos ga̱jma̱a̱ nunimbuxu rí Jesús “ñajun Ade Dios”,a bi̱ ni̱ʼkha̱ náa tsu̱du̱u̱ Ku̱ba̱ʼ ma̱ngaa ni̱jkha̱nú ninindxu̱u̱ Mesías (Juan 1:34, 41; 4:25, 26). Nda̱wa̱á rí nikháñu, Jesús nigabi̱i̱ ga̱jma̱a̱ nitanga̱a̱ mekhuíí (1 Corintios 15:3, 4). Nda̱wa̱á nigi̱ʼi̱ xóo Rey náa Reino ndrígóo Dios (Revelación [Apocalipsis] 11:15). Reino buʼko̱ nindxu̱u̱ mbáa Xa̱bu̱ Ñajunʼ bi̱ xtáa má, ga̱jma̱a̱ maʼni rí Ku̱ba̱ʼ maʼni̱i̱ mitsaan mbu̱júu̱ (Daniel 2:44). Náa Biblia naʼthí: “Xa̱bu̱ bi̱ májánʼ a̱jkiún makuwá náa tsu̱du̱u̱ ku̱ba̱ʼ, ga̱jma̱a̱ makuwá tsímáá wéñuʼ” (Salmo 37:11, 29).

Bi̱ nutaráʼaxu numuu Jeobá nunimbuxu rí naʼthí náa Biblia ma̱ndoo mambáñún xa̱bu̱ bi̱ kuwa xúgi̱ (Isaías 48:17, 18). Ikha jngó nunixu xúgíʼ rí naʼngo̱o̱ mu munimbuxu rí naʼtáñajunʼ. Mbá xkri̱da, numuu rí náa Biblia naʼthí dí ragíʼmaa muni gachíí xuyuxu ga̱jma̱a̱ rí nundxa̱ʼwáá edxu̱xuʼ, ikha jngó na̱nguá tsikhaxu ndíí ga̱jma̱a̱ drogas (2 Corintios 7:1). Ma̱ngaa tsenixu rí naʼthí náa Biblia dí nindxu̱u̱ ra̱májánʼ xóo rí majngáanʼ, o rí muʼbúxu gajmiúxu bi̱ xóó tséyáaxu ga̱jma̱a̱ rí muni kuʼwáʼ (1 Corintios 6:9-11).