Tsáa nindxu̱u̱ Dios rá.

Mbaʼin xa̱bu̱ nuthi rí nakumu̱ún kuyáá Dios, mú, índo̱ nuraxu̱u̱n tsáa nindxu̱u̱, raʼkháa xúgínʼ nuriʼña̱a̱ mbáníí. Tikhun nakumu̱ún rí Dios nindxu̱u̱ mbáa juez bi̱ naʼnimbánuu rí naʼthí, bi̱ naxnúu castigo xa̱bu̱ jma̱a̱ numuu rí nuʼni. Eʼwíínʼ nuthi rí nindxu̱u̱ mbáa Dios bi̱ nandoo kaʼyulú tséʼniuu rí asndu xú káʼnii má rí gúʼni, ikhaa naʼni mba̱a̱ a̱jkiu̱u̱n kaʼyulú má xúʼko̱. Eʼwíínʼ nuthi rí Dios xtáa mitsínguánʼ bi̱ na̱nguá exmiéjúnʼ kaʼñún xa̱bu̱ numbaaʼ. Ga̱jma̱a̱ numuu rí xóo mixtiʼkhu e̱ndxa̱ʼwá edxu̱ún, rúʼko̱ gáʼni mingíjyúuʼ muniʼniiʼ Dios.

Lá gíʼdoo numuu muniʼnííʼ Dios rá. Xúʼko̱. Rí matatsiʼnííʼ májánʼ Dios, maʼni rí magiʼdoo numuu náa vida ndrígáʼ (Hechos 17:26-28). Índo̱ itháan nadxuʼ kanuu náa Dios, itháan gáʼndáa xtayáá ga̱jma̱a̱ ikhaa mambáyaʼ itháan (Santiago 4:8). Gajkhun rí matatsiʼnííʼ májánʼ Dios maʼni rí maraxtaa kámuu (Juan 17: 3).

Xú káʼnii gaʼndoo gátatsiʼnííʼ Dios rá. Atatsaʼwáminaʼ ga̱jma̱a̱ numuu mbáa bi̱ natatsiʼniiʼ májánʼ bi̱ nambáxa̱ʼ májánʼ ga̱jma̱ʼ, xú káʼnii niʼni rí maʼga̱ ra̱ja̱a̱ rí nambáxa̱ʼ ga̱jma̱ʼ xá. Mbáa ginii nitatsiʼniʼ mbiʼyuu ga̱jma̱a̱ nda̱wa̱á, natatsiʼnuʼ i̱ʼwáʼ rí xóo xa̱bu̱ nindxu̱u̱, rí naniguʼ ga̱jma̱a̱ rí tsénigu̱ʼ rí niʼni ga̱jma̱a̱ rí nindxa̱ʼwáminaʼ maʼni. Rí matatsiʼnuʼ xóo nindxu̱u̱, rúʼko̱ niʼni rí mambaxáʼ ga̱jma̱ʼ.

Ikhaa kayuʼ, maʼndoo matatsiʼniiʼ Dios á mu natayáá xóo gáxti̱ʼña̱a̱ graxe̱ rígi̱.

• XÚ KÁʼNII MBIʼYUU DIOS RÁ.

• XÚ KÁʼNII NINDXU̱U̱ IKHAA XÁ.

• NDIÉJUNʼ NIʼNI XÁ.

• NDIÉJUNʼ GÁʼNI XÁ.

• XÚ KÁʼNII GAMBÁYAAʼ RÍ MATATSIʼNIIʼ DIOS RÁ.

Revista rígi̱ nariʼña̱a̱ graxe̱ rúʼko̱ ga̱jma̱a̱ Biblia. Náa i̱ʼwáʼ artículos raʼkháa i̱ndó mambáyaʼ mu ma̱ta̱ya̱a̱ tsáa nindxu̱u̱ Dios, mambáyaʼ ma̱ta̱ya̱a̱ xú káʼnii gambáxa̱ʼ májánʼ ga̱jma̱ʼ.