“Maraxtaa ga̱jma̱á nindxu̱ʼ náa ku̱ba̱ʼ mitsaanʼ”

1. Ndiéjunʼ niʼthúu̱n Jesús xa̱bu̱ ra̱májánʼ bi̱ kamaa níjniúu nákhá inuu makhañúu xá. (Lucas 23:39-43.)

JESÚS gajmíi̱n a̱jmi̱i̱n xa̱bu̱ ra̱míjíinʼ, bi̱ timii náa níjniúu ndiyáá xóo e̱jkha̱ rakháñuu mañu mañu̱ú (Luc. 23:32, 33). Nájmi̱i̱n xa̱bu̱ bugi̱ nikúwá rutsijmaa Jesús nikujmaa dí na̱nguá nindxu̱ún discípulos ndrígóo (Mat. 27:44; Mar. 15:32). Mú mbáa rí ikhaa niriʼkhu̱u̱ xóo endxa̱ʼwoo edxu̱u̱. Niʼthí: “Jesús, garmáʼáan a̱jkia̱a̱nʼ xtayoʼ índo̱ gáratañájunʼ”. Ga̱jma̱a̱ Jesús niriʼñuu: “Asndu xúgi̱ má e̱tha̱a̱nʼ: Maraxtaa ga̱jma̱á ni̱ndxu̱ʼ náa ku̱ba̱ʼ mitsaanʼ” (atraxnuu Lucas 23:39-43). Nda̱a̱ nimbá náa esngájma dí ni̱jkha̱nú nikro̱ʼo̱o̱ dí Reino dí rígá mekhuíí na̱ʼkha̱ rajngiyuu. Jesús na̱nguá niʼthí kayuuʼ rí xa̱bu̱ bugi̱ mata̱ʼa̱a̱ náa Reino (Mat. 4:17). Jesús xtáa raʼthí ga̱jma̱a̱ numuu ku̱ba̱ʼ mitsaanʼ dí marígá nda̱wa̱á. Xóo eʼyáá rá.

2. Ndiéjunʼ eʼni mundxa̱ʼwa̱míjna̱ dí xa̱bu̱ ra̱májáanʼ nindxu̱u̱ judío rá.

² Mbáa xa̱bu̱ bi̱ ra̱májáanʼ bugi̱ bi̱ nitanga̱a̱ a̱jkiu̱u̱n ninindxu̱u̱ judío. Xa̱bu̱ bugi̱ nirajxu̱u̱ i̱mba̱a̱ bi̱ kamaa níjniúu ga̱jma̱a̱ niʼthúu̱n: “Lá tsémíñaaʼ xtayáá Dios xúgi̱ rí mangáán natamíniiʼ ráʼ.” (Luc. 23:40.) Mú xa̱bu̱ bi̱ kúwá náa i̱ʼwáʼ xuajin nuni̱. Xa̱bu̱ judío ndiyamajkuíí mbáwíí Dios, mú xa̱bu̱ bi̱ kúwá náa i̱ʼwáʼ xuajin nunimbu̱ún kuñún mbaʼin dioses (Éx. 20:2, 3; 1 Cor. 8:5, 6). Á mu xa̱bu̱ ra̱míjíinʼ bugi̱ na̱nguá nindxu̱ún judío manidxu̱u̱ mixtiʼkhu kayuuʼ graxe̱ rí nini̱: “Lá na̱nguá míñaaʼ eni̱ dioses ráʼ”. Jesús kaxúʼmaa “ma̱ʼkha̱ gáñiinʼ xa̱bu̱ Israel bi̱ ni̱ndxu̱ún xóo mugu̱ bi̱ nindáti̱gi̱i̱n” raʼkháa xa̱bu̱ bi̱ naguwáʼ i̱mba̱ xuajin (Mat. 15:24). Ga̱jma̱a̱ Dios niʼthún israelita rí makujxi̱i̱n xa̱bu̱ bi̱ nikháñún. Mbáa xa̱bu̱ ra̱májáanʼ bi̱ nitanga̱a̱ a̱jkiu̱u̱n ndaʼyoo má xúgíʼ rígi̱ ga̱jma̱a̱ numuu rí niʼthí nandoo nduʼyáálú dí ikhaa nakro̱ʼo̱o̱ dí Jeobá maʼnigabi̱i̱ Jesús mu matañájunʼ náa mekhuíí. Xó má ekujmaa dí xa̱bu̱ bugi̱ gíʼthúu̱n dí Dios makujxi̱i̱ mangaa. Ga̱jma̱a̱ xúgíʼ rígi̱ nasngájma dí xa̱bu̱ ra̱májáanʼ nindxu̱u̱ judío.

3. Ndiéjunʼ nindxa̱ʼwáminaʼ xa̱bu̱ ra̱májáanʼ índo̱ Jesús niʼthí ga̱jma̱a̱ numuu ku̱ba̱ʼ mitsaanʼ rá. (Génesis 2:15.)

³ Numuu rí nindxu̱u̱ judío ndaʼyoo má dí nirígá ku̱ba̱ʼ rí Jeobá nixnúu Adán ga̱jma̱a̱ Eva. Ikha jngóo, ikhaa nindxa̱ʼwáminaʼ ga̱jma̱a̱ numuu ku̱ba̱ʼ mitsaanʼ dí niʼthí Jesús, dí marígá náa tsu̱du̱u̱ ku̱ba̱ʼ (atraxnuu Génesis 2:15).b

4. Ndiéjunʼ gíʼmaa maʼni mundxa̱ʼwa̱míjna̱ dí niʼthúu̱n Jesús xa̱bu̱ ra̱májáanʼ rá.

⁴ Dí niʼthúu̱n Jesús xa̱bu̱ ra̱májáanʼ gíʼmaa maʼni dí mundxa̱ʼwa̱míjna̱ xóo gáʼni índo̱ gákuwáánʼ náa ku̱ba̱ʼ mitsaanʼ. I̱mba̱ dí ma̱ndoo mambáyulú nindxu̱u̱ dí marmáʼáan a̱jkiu̱lú xóo niʼni tsímáá índo̱ niʼtáñajunʼ Salomón. Náa Biblia niʼthí ga̱jma̱a̱ numuu Jesús dí ikhaa “itháan gíʼdoo numuu ki xóo Salomón”. Ikha jngóo gíʼmaa maʼni kañiiʼ a̱jkiu̱lú dí Jesús ga̱jma̱a̱ bi̱ maʼtáñájunʼ gajmíi̱n muni̱ mbá ku̱ba̱ʼ mitsaanʼ (Mat. 12:42). Mú “eʼwíinʼ mugu̱” gíʼmaa majmañún dí gándoo muni̱ mu ma̱ndoo makuwíin kámuu mbiʼi náa ku̱ba̱ʼ mitsaanʼ (Juan 10:16).

XÚ KÁʼNII GÁKUWÁÁNʼ NÁA KU̱BA̱ʼ MITSAANʼ RÁ.

5. Xú káʼnii ku̱ma̱a̱ʼ maraxtaa náa ku̱ba̱ʼ mitsaanʼ rá.

⁵ Xú káʼnii ku̱ma̱a̱ʼ maraxtaa náa ku̱ba̱ʼ mitsaanʼ rá. Mbáa natatsaʼwáminaʼ ga̱jma̱a̱ mbá parque mitsaanʼ xóo ku̱ba̱ʼ mitsaanʼ Edén (Gén. 2:7-9). O mbáa narmáʼáan a̱jkia̱nʼ eʼni profecía ndrígóo Miqueas dí naʼthí dí xa̱bi̱i̱ Dios “mámbáa gági̱ʼi̱ náa agoo ixu̱u̱ uva ga̱jma̱a̱ náa agoo ixi̱ higo” (Miq. 4:3, 4). O mbáa natatsaʼwáminaʼ ga̱jma̱a̱ dí naʼthí náa Biblia dí marígá wéñuʼ ganitsu (Sal. 72:16; Is. 65:21, 22). Mbáa natatsaʼwáminaʼ dí xtaa náa mbóoʼ jardín mitsaanʼ ga̱jma̱a̱ náa inaaʼ wíji̱ mbá mesa rí trámáʼ wéñuʼ ganitsu dí miʼtsí wéñuʼ. Lá naʼnga̱a̱ʼ natayáá dí mitsaanʼ wéñuʼ ndataun ri̱ʼi̱ ga̱jma̱a̱ iná dí rígá ikhí ráʼ. Lá naʼnga̱a̱ʼ natadxawíín aʼwóo mígiaʼ o familia rí nunduʼwa ga̱jma̱a̱ rí nunigagimijná mbáxgaa xáʼ. Mbáa tikhun rí ikhiin, nitujxi̱ín raʼkháa mbooʼ xnuʼndaá nindxu̱u̱ rígi̱. Dí xóo niʼnga̱a̱ʼ nitatsaʼwáminaʼ nángii, marígá náa ku̱ba̱ʼ mitsaanʼ. Mú náa ku̱ba̱ʼ mitsaanʼ ma̱ngaa marígá mbaʼa ñajunʼ dí manigua̱a̱ʼ matani̱.

6. Ndiéjunʼ gúni̱ náa ku̱ba̱ʼ mitsaanʼ xá.

⁶ Jeobá niʼniánʼlú mu ma̱ndoo manigulú ñajunʼ dí kuaʼdáá (Ecl. 2:24). Índo̱ gáʼtañajunʼ Cristo mbá míí tsiguʼ muguaʼdáá wéñuʼ ñajunʼ mu̱ʼni̱. Xa̱bu̱ bi̱ gákawíin ga̱jma̱a̱ xúgíinʼ xa̱bu̱ mbaʼñúunʼ xtiin, ganitsu ga̱jma̱a̱ náa makuwíin. Mu ma̱ndoo maguma xúgíʼ rígi̱ mbaʼyooʼ dí muñajunʼ wéñuʼ ga̱jma̱a̱ phú mitsaanʼ gáʼni. Ikhaa xó má Adán ga̱jma̱a̱ Eva ndiyóoʼ muñewa̱a̱n ku̱ba̱ʼ mitsaanʼ Edén, mangáánʼ nadxulú dí ma̱ndoo mu̱ʼni̱ mbá ku̱ba̱ʼ mitsaanʼ náa makuwáánʼlú. Atandxa̱ʼwáminaʼ wáthá mba̱a̱ gáʼdxulú dí muʼsngúún xúgíinʼ xa̱bu̱ bi̱ magabiín bi̱ na̱nguá nininuwíinʼ wéñuʼ Jeobá ga̱jma̱a̱ dí nandoo maʼni ikhaa. Mangaa ma̱ndoo muʼthún xúgíinʼ xa̱bu̱ bi̱ niguájun jmbu bi̱ nikháñun nákha xóo tséʼkha̱ Jesús náa ku̱ba̱ʼ ga̱jma̱a̱ dí ni̱ʼkha̱ rarígá asndu mbiʼi xúgi̱.

7. Ndiéjunʼ gándoo mbuʼyáá rí gajkhun ga̱jma̱a̱ náá numuu rá.

⁷ Ma̱ndoo mbuʼyáá gajkhun rí náa ku̱ba̱ʼ mitsaanʼ marígá rí tsímáá, marígá wéñuʼ ganitsu ga̱jma̱a̱ mutañajunʼ májánʼ. Náá numuu rá. Numuu rí xóo niʼtáñajunʼ Salomón, Jeobá nambáyulú mbuʼyáá xú káʼnii gáʼni índo̱ gáxtáa raʼtáñajunʼ náa tsu̱du̱u̱ ku̱ba̱ʼ.

XÓO NIʼTÁÑAJUNʼ SALOMÓN NINDXU̱U̱ XÓO DÍ MARÍGÁ NDA̱WA̱Á NÁA KU̱BA̱ʼ MITSAANʼ

8. Xú káʼnii nimbánuu ajngáa dí na̱ʼkha̱ raʼthí náa Salmo 37:10, 11, 29 nda̱wa̱á dí rey David niʼnirámáʼ rá. (Atayáá náa naʼthí “Graxe̱ rí nuni bi̱ nuraxnuu” náa revista rígi̱.)

⁸ Jeobá niʼni dí David maʼnirámáʼ xú káʼnii gákuwáanʼ nda̱wa̱á índo̱ gáʼtañajunʼ mbawíí rey bi̱ najmañuu wéñuʼ ga̱jma̱a̱ jmbii (atraxnuu Salmo 37:10, 11,c 29).d Índo̱ nuʼtámijná gajmiúlú xa̱bu̱ ga̱jma̱a̱ numuu ku̱ba̱ʼ mitsaanʼ, mbaʼa nuthu nuraxnuu Salmo 37:11. Májánʼ má dí mu̱ʼni̱ numuu dí Jesús má nijmuu texto rígi̱ índo̱ nixná discurso náa kúbá. Xúʼko̱ nisngájma rí ajngáa rígi̱ mambanúu nda̱wa̱á (Mat. 5:5). Mú dí niʼnirámáʼ rey David ma̱ngaa nisngájma xóo káʼnii gáʼni índo̱ gáxtáa raʼtáñajunʼ Salomón. Nákha tsiguʼ rúʼko̱ xuajin Israel ra̱ʼkhá tháán tsímáá nikúwá ga̱jma̱a̱ ra̱ʼkhá tháán nirígá dí mu̱phu̱ náa mbóoʼ xuajin rí nijmáa wéñuʼ “yaʼdú ga̱jma̱a̱ jyááʼ”. Dios niʼthún: “Á mu nunimbáníí xtángoo ndrígóʼ ga̱jma̱a̱ nunimbalá, […] Ikhúún ma̱ni̱ rí makuwíin tsímáá náa xuajen rígi̱, ga̱jma̱a̱ ikháanʼla munuʼ tsímáá náa rí nimbáa xáʼnimíñala” (Lev. 20:24; 26:3, 6). Mbá xúgíʼ rígi̱ nimbánuu índo̱ nixtáa raʼtáñajunʼ Salomón (1 Crón. 22:9; 29:26-28). Ga̱jma̱a̱ Jeobá niʼthí rí xa̱bu̱ bi̱ nuni̱ dí ra̱májánʼ ga̱jma̱a̱ bi̱ nduyamajkhún eʼwíinʼ dioses magumaa gámbíin (Sal. 37:10). Xó má nijmañulú ajngáa dí na̱ʼkha̱ náa Salmo 37:10, 11, 29 nimbánuu nákha wájyúuʼ ga̱jma̱a̱ xúʼko̱ gámbanúu ma̱ngaa nda̱wa̱á.

9. Ndiéjunʼ niʼthí reina bi̱ na̱ʼkha̱ náa Saba ga̱jma̱a̱ numuu rí xóo eʼtáñajunʼ Salomón rá.

⁹ Índo̱ nixtáa raʼtáñajunʼ Salomón ra̱ʼkhá tháán nirígá rí tsímáá ga̱jma̱a̱ niguáʼdáá wéñuʼ dí asndu ni̱jkha̱nú niʼdxawun reina bi̱ na̱ʼkha̱ náa Saba. Ikhaa ni̱jkha̱ mitsínguánʼ wéñuʼ asndu Jerusalén mu mbaʼyoo xúgíʼ rígi̱ á mu gajkhun (1 Rey. 10:1). Nda̱wa̱á índo̱ ndiʼyoo xú káʼnii eʼtáñajunʼ Salomón, niʼthúu̱n xígi̱: “Na̱nguá nithunʼ mbá xúgíʼ. […] ¡Gagi kúwá xa̱bia̱a̱ʼ ga̱jma̱a̱ bi̱ nuñajunʼ náa ikháán, numuu rí ikhiin kúwi̱i̱n rudxawíín xúgíʼ ku̱ma̱ dí xtaʼdáá!” (1 Rey. 10:6-8). Mú rí xóo nirígá nákha nixtáa raʼtáñajunʼ Salomón nindxu̱u̱ mbá chíʼgíiʼ dí maʼni Jeobá índo̱ gáxtáa raʼtáñajunʼ Jesús.

10. Náá numuu dí Jesús nindxu̱u̱ itháan mba̱a̱ ki xóo Salomón rá.

¹⁰ Jesús nindxu̱u̱ bi̱ itháan mba̱a̱ ki xóo Salomón náa xúgíʼ. Salomón ninindxu̱u̱ xa̱bu̱ aʼkhá ga̱jma̱a̱ mbaʼa nuthu nijngawa̱a̱n rí asndu niʼni gachúu xuajñuu Dios. Mú mixtiʼkhu kayuuʼ nindxu̱u̱ Jesús bi̱ nindxu̱u̱ mbáa Xa̱bu̱ ñajunʼ jmbii ga̱jma̱a̱ na̱nguá ngawa̱a̱n (Luc. 1:32; Heb. 4:14, 15). Mangaa niʼngo̱o̱ niraʼnuu xúgíʼ tsáʼkhá rí Gixa̱a̱ nigrui̱ga̱. Cristo nisngájma dí nimbá miʼtsú xáʼni nimbá dí mangrádiinʼ bi̱ naguájun jmbu náa Dios. Ká gajkhun rí nadxulú dí ikhaa nindxu̱u̱ Rey ndrígulú xáʼ.

11. Tsíín gúmbayíí Jesús rá.

¹¹ Índo̱ gáʼtañajunʼ Jesús mumbayíí 144 mil reyes ga̱jma̱a̱ muñewu̱u̱n xúgíinʼ mangaa munimbánii dí niʼthí Jeobá maʼni náa tsu̱du̱u̱ ku̱ba̱ʼ (Apoc. 14:1-3). Xa̱bu̱ ñajunʼ bugi̱ mangiin niraʼníí mbaʼa xkujndu nákhá kaʼníí kúwá náa tsu̱du̱u̱ ku̱ba̱ʼ gi̱i̱. Ikha jngóo mikru̱ʼu̱u̱n kuyulú. Ndiéjunʼ ñajunʼ gáguaʼdáá xá.

NDIÉJUNʼ ÑAJUNʼ GÚGUAʼDÁÁ BI̱ KAXTAʼWÍIN RÁ.

12. Ndiéjunʼ ñajunʼ gáxnún Jeobá bi̱ mbá 144 mil rá.

¹² Jesús gajmíi̱n bi̱ 144 mil muguaʼdáá itháan ñajunʼ rí muni̱ ki xóo nigiʼdoo Salomón. Rey bugi̱ niʼtáñajúúnʼ káaʼ nguéjmi̱i̱n xa̱bu̱ náa mbá xuajin. Mú bi̱ mutañajunʼ náa Reino ndrígóo Dios mutañajúúnʼ itháan mbaʼin xa̱bu̱ náa xúgíʼ numbaaʼ. ¡Ra̱ʼkhá tháán mitsaanʼ ñajunʼ dí nixnún Jeobá bi̱ mbá 144 mil!

13. Ndiéjunʼ ñajunʼ kiejunʼ muguaʼdáá xa̱bu̱ bi̱ mutañajunʼ gajmiún Jesús rá.

¹³ Xó má Jesús, bi̱ 144 mil mani̱ndxu̱ún reyes ga̱jma̱a̱ ndxajkun (Apoc. 5:10). Náa Xtángoo ndrígóo Moisés naʼthí rí ndxajkun kajkuáa ñawúúnʼ muñewu̱u̱n xa̱bu̱ xuajin mu mbuyáá xóo kúwá ga̱jma̱a̱ rí xóo embájxu̱u̱n gajmiún Dios. “Numuu rí Xtángoo nindxu̱u̱ mbá ndájkua rí májánʼ dí wíji̱ ma̱ʼkha̱” ikhaa rúʼko̱ embáyulú mbuʼyáá dí bi̱ gáʼtañajunʼ gajmíi̱n guáʼdáá mbá ñajunʼ kiejunʼ: Dí muñewu̱nlú ga̱jma̱a̱ mbuyáá xóo embájxu̱lú gajmiúlú Dios (Heb. 10:1). Gajkhun má rí xóó tséʼyáá xú káʼnii reyes ga̱jma̱a̱ ndxajkun bugi̱ gútamijná gajmiún xa̱bu̱ bi̱ gákúwá índo̱ gáxtáa raʼtáñajunʼ Reino ndrígóo Dios náa tsu̱du̱u̱ ku̱ba̱ʼ gi̱i̱. Tséʼniúu asndu xkáʼnii Jeobá gáʼni, mú gakuwáánʼlú gajkhun dí bi̱ gákúwá náa ku̱ba̱ʼ mitsaanʼ rúʼko̱ muguaʼdáá ikha dí gáʼñúunʼ (Apoc. 21:3, 4).

DÍ GÁNDOO GÚNI̱ BI̱ EʼWÍINʼ MUGU̱ MU MA̱NDOO MAKUWÍIN NÁA KU̱BA̱ʼ MITSAANʼ RÁ.

14. Xú káʼnii embájxu̱u̱n “eʼwíinʼ mugu̱” gajmiún a̱ngui̱i̱n Cristo rá.

¹⁴ Jesús nixná mbiʼñún “mugu̱ bi̱ rambáʼiin” a̱ngiu̱lú bi̱ maʼtáñajunʼ gajmíi̱n mekhuíí (Luc. 12:32). Ma̱ngaa niʼthí ga̱jma̱a̱ numún “eʼwíinʼ mugu̱”. Nájmi̱i̱n grupo bugi̱ muwi̱i̱n ga̱jma̱a̱ imbawíí báxtúu ndrígu̱ún gáʼni (Juan 10:16). Kúwíin ruñajunʼ kambájxu̱u̱n ga̱jma̱a̱ muñajunʼ má xúʼko̱ kambájxu̱u̱n índo̱ gáʼni ku̱ba̱ʼ mitsaanʼ náa tsu̱du̱u̱ ku̱ba̱ʼ gi̱i̱. Mu “mugu̱ bi̱ rambáʼiin” maguáan mekhuíí ga̱jma̱a̱ “eʼwíinʼ mugu̱” makuwá náa tsu̱du̱u̱ ku̱ba̱ʼ gi̱i̱ kámuu mbiʼi. Mú rígá tikhu rí ndayóoʼ muni̱ “eʼwíinʼ mugu̱” mu xúʼko̱ ma̱ndoo makuwíin kámuu mbiʼi náa tsu̱du̱u̱ ku̱ba̱ʼ mitsaanʼ.

15. a) Xú káʼnii embañún “eʼwíinʼ mugu̱” a̱ngui̱i̱n Cristo rá. b) Xú káʼnii gándoo gátayaridáá ikháán xkri̱doo ndxájulú bi̱ kamaa náa foto rá.

¹⁵ Xa̱bu̱ ra̱májáanʼ bi̱ nitanga̱a̱ a̱jkiu̱u̱n na̱nguá nigiʼdoo mbiʼi mu maxnáa núma̱aʼ Jesús ga̱jma̱a̱ numuu rí niʼni ga̱jma̱a̱ numuu. Mú ikháánʼlú bi̱ nindxu̱lú “eʼwíinʼ mugu̱” kuaʼdáá mbiʼi mu mu̱ʼni̱. Mbá xkri̱da, nusngajmá rí nandulú kuʼyáá índo̱ nuʼniu̱u̱n rí májánʼ a̱ngui̱i̱n Cristo bi̱ kaxtaʼwíin. Ikhaa manda̱ʼa̱a̱ʼlú cuenta rí xóo niʼñu̱u̱n a̱ngui̱i̱n (Mat. 25:31-40). Mbá rí xóo mumbáñún a̱ngui̱i̱n Cristo nindxu̱u̱ dí muʼtáraʼa ga̱jma̱a̱ gagi ga̱jma̱a̱ dí mumbáñún xa̱bu̱ mu mani̱ndxu̱ún xa̱bi̱i̱ Dios (Mat. 28:18-20). Ikha jngóo nandulú majmulú i̱yi̱ʼ dí nurawíi ikhiin xó má libro ¡Araxtaa gagi kámuu mbiʼi! Á mu ikháán xóo tsérasngáá nimbáa ga̱jma̱a̱ numuu Biblia. Náá numuu dí tsétagíminaʼ marasngáá mbáa bi̱ nandoo rá.

16. Ndiéjunʼ gándoo mu̱ʼni̱ asndu nákha xúgi̱ mu ma̱ndoo makuwáánʼ índo̱ gáʼtañajunʼ Reino ndrígóo Dios rá.

¹⁶ Na̱nguá má eyooʼ makuwáánʼ náa ku̱ba̱ʼ nuxi̱ʼ mu manindxu̱lú mbáa xa̱bu̱ bi̱ nandoo Jeobá magiʼdaa ikhí. Asndu nákha xúgi̱ ma̱ndoo mu̱ʼni̱ tsiakimíjna̱ mu manindxu̱lú mbáa xa̱bu̱ májánʼ náa dí xóo nuʼthá ga̱jma̱a̱ rí xóo nu̱ʼni̱ ma̱ngaa dí xúʼyáʼ dí muguaʼdáá wéñuʼ. Ndayóoʼ manindxu̱lú xa̱bu̱ jmbii náa Jeobá, náa ajmbiu̱lú o aʼgiu̱lú ga̱jma̱a̱ náa a̱ngiu̱lú. Á mu asndu nákha xúgi̱ nu̱ʼni̱ rí nandoo Dios xáʼniulú miʼskhaa mu̱ʼni̱ dí májánʼ náa ku̱ba̱ʼ nuxi̱ʼ ma̱ngaa ma̱ndoo muʼnimi̱jna̱ muguaʼdáá cualidad dí nasngájma rí kuwáánʼ ruʼniratamijná mu makuwáánʼ ikhí. Atayáá artículo “Xtaa xawii ‹mbi̱ya̱a̱ ku̱ba̱ʼ ráʼ.›” dí na̱ʼkha̱ náa revista rígi̱.

17. Ndíjkha rí xáʼyoo muniʼñánʼ maʼnikáguabáánʼ aʼkhá dí nixuʼdámíjná nákha ginii rá.

¹⁷ Ma̱ngaa ndayóoʼ mu̱ʼni̱ tsiakimíjna̱ rí muniʼñánʼ rundxa̱ʼwa̱míjna̱ rí kuaʼdáá aʼkhúlú ga̱jma̱a̱ numuu aʼkhá mbiiʼ rí nixuʼdámíjnalú. Gajkhun má rí tsíyulú rí nijuiʼtsiwáanʼ ma̱ndoo maʼni rí ikháánʼ “nu̱ʼni̱ kiejunʼ aʼkhá” (Heb. 10:26-31). Á mu gajkhun nitanga̱a̱ a̱jkiu̱lú náa aʼkhá mbiiʼ dí nixuʼdámíjna ndiʼyáʼ rí Jeobá mambáyulú ga̱jma̱a̱ náa bi̱ kuya̱ edxu̱u̱ ma̱ngaa niriʼkumijnáaʼlu rúʼko̱ gáʼni dí makuwáánʼ gajkhun dí Jeobá niʼni mba̱a̱ a̱jkiu̱u̱n kaʼyulú (Is. 55:7; Hech. 3:19). Garmáʼáan a̱jkiu̱lú dí Jesús niʼthún bi̱ fariseos: “Ni̱ʼkhá gáñiinʼ xa̱bu̱ aʼkhá, raʼkháa xa̱bu̱ jmbiin” (Mat. 9:13). Ikha jngóo xúgíʼ aʼkhá ndrígulú ma̱ndoo magudi̱i̱ núma̱aʼ má ga̱jma̱a̱ numuu dí niʼtsiwáanʼ Jesucristo.

IKHÁÁN MA̱NDOO MARAXTAA KÁMUU NÁA TSU̱DU̱U̱ KU̱BA̱ʼ MITSAANʼ

18. Ndiéjunʼ rí nanigua̱ʼ maratamíjná ga̱jma̱a̱ʼ xa̱bu̱ ra̱májáanʼ bi̱ nikháñúu náa níjniúu Jesús rá.

¹⁸ Atsaʼwáminaʼ dí xtáa náa ku̱ba̱ʼ mitsaanʼ ga̱jma̱a̱ naratámíjná ga̱jma̱a̱ʼ xa̱bu̱ ra̱májáanʼ bi̱ niʼtamijná ga̱jma̱a̱ Jesús. Mbáa gajkhun nindxu̱u̱ dí mbá nájmáanʼla ra̱ʼkhá tháan exna̱a̱la núma̱aʼ ga̱jma̱a̱ nadxulú dí Jesús niʼtsiwáanʼlú. Mbáa asndu matanda̱ʼa̱a̱ maʼthanʼ xú káʼnii nirígá índo̱ inúu makhañuu Jesús náa tsu̱du̱u̱ ku̱ba̱ʼ ga̱jma̱a̱ xú káʼnii nikumu̱u̱ dí nixtiʼña̱a̱ rí nindo̱ʼo̱o̱. Mbáa ikhaa narajxáaʼ xú káʼnii nirígá náa i̱wáá mbiʼi náa numbaaʼ rí niʼtáñajunʼ Gixa̱a̱. ¡Ra̱ʼkhá tháán mitsaanʼ gáʼni dí muʼsngúún ga̱jma̱a̱ numuu Ajngá rawuunʼ Dios xa̱bu̱ xóo bugi̱! (Efes. 4:22-24).

19. Ndíjkha rí xáʼskhulú dí makuwáánʼ náa ku̱ba̱ʼ mitsaanʼ rá. (Atayáá xtiʼkhuu dí na̱ʼkha̱ timbá ináa.)

¹⁹ Nditháan xáʼskhulú rí makuwáánʼ náa ku̱ba̱ʼ mitsaanʼ. Makuwíin má xúʼko̱ xa̱bu̱ bi̱ manigulúʼ muʼtámijná gajmiúlú ga̱jma̱a̱ muguaʼdáá mbá ñajunʼ rí manigulúʼ wéñuʼ. Ma̱ngaa manidxu̱u̱ májánʼ wéñuʼ numuu rí mámbá mbiʼi muniʼniiʼ itháan Anu̱lú bi̱ xtáa mekhuíí ma̱ngaa manigulúʼ xúgíʼ regalo dí gáxnulú. Mámbá mbiʼi majmañulú dí nuxi̱ʼ ga̱jma̱a̱ numuu ikhaa ma̱ngaa i̱ʼwáʼ rí niʼniwíi. Rí nandulú kuʼyáá Dios maʼni itháan mba̱a̱ mámbá mbiʼi. ¡Ra̱ʼkhá tháán nuxna̱a̱lú núma̱a̱ Jeobá ga̱jma̱a̱ Jesús numuu rí nixudamijna̱ muxnulú rí makuwáánʼ kámuu mbiʼi náa ku̱ba̱ʼ mitsaanʼ!