Graxe̱ rí nuni bi̱ nuraxnuu
Lá David ninindxu̱u̱ bi̱ táʼnimbo̱o̱ o mbáʼ niʼthíí índo̱ niʼnirámáʼ rí maʼni mba̱a̱ mbiʼyuuʼ Dios “kámuu mbiʼi” xóo ma naʼthí náa Salmo 61:8 ráʼ.
Na̱nguá. David niʼnirámáʼ xó má kaʼyoo.
Atsaʼwáminaʼ dí niʼnirámáʼ náa Salmo 61:8 ga̱jma̱a̱ náa i̱ʼwáʼ versículo naʼthí má ikhaa kayuuʼ. Niʼthí: “Ma̱ni̱ ajmúú náa mbiʼyaaʼ kámuu mbiʼi ga̱jma̱a̱ manimbánuu rí nikuʼdáminaʼ ma̱ni̱ mámbá mbiʼi”. “Nani mba̱a̱n Jeobá Dios ndrígóʼ, ga̱jma̱a̱ xúgíʼ a̱jkiu̱nʼ, gajkhun rí ma̱ni̱ mba̱a̱ mbiʼyaʼ asndu kámuu mbiʼi”. Ga̱jma̱a̱ “gajkhun rí mbayamajkhuu má xúʼko̱ mbiʼyaaʼ” (Sal. 61:8; 86:12; 145:1, 2).
Rí niʼthí David na̱nguá niʼthí mbá maʼthíí. Ikhaa ndiʼyoo rí ga̱jma̱a̱ numuu aʼkhá maʼganú mbóoʼ mbiʼi rí makhañúu. David má ndiʼyoo rí nindxu̱u̱ xa̱bu̱ aʼkhá (Gén. 3:3, 17-19; Sal. 51:4, 5). Ndaʼyoo má rí xa̱bu̱ bi̱ naguajún jmbu náa Jeobá maʼga̱nú makhañún xó má nigíʼnun Abrahán, Isaac ga̱jma̱a̱ Jacob. Ga̱jma̱a̱ ndiʼyoo rí ma̱ngaa maʼga̱nú mbóoʼ mbiʼi rí makhañúu (Sal. 37:25; 39:4). Ajngáa rí naʼthí náa Salmo 61:8 nasngájma rí nindoo maʼni mba̱a̱ Jeobá kámuu mbiʼi, xóo mutha nákha xóó xtáa (2 Sam. 7:12).
Nguáná David niʼnirámáʼ xú káʼnii nixtáa. Xó má nandoo nduʼyáá rí kagu̱ edxu̱u̱ i̱yi̱ʼ ndrígóo Salmos 18, 51 ga̱jma̱a̱ 52. Náa Salmo 23, naʼnimbríguíi Jeobá xóo mbáa baxtúu bi̱ naxnúlú ikha ga̱jma̱a̱ bi̱ nañewu̱u̱n mugiu̱u̱. David niñewu̱u̱n xúʼko̱ mugiu̱u̱ ga̱jma̱a̱ nindoo maʼni ñajuunʼ Jeobá xúgíʼ mbiʼi rí gáxtáa (Sal. 23:6).
Garmáʼáan a̱jkiu̱lú dí niʼnirámáʼ David ni̱ʼkha̱ náa Dios. Tikhun bi̱ ninirámáʼ nithi ga̱jma̱a̱ numuu profecías dí mambanúu nda̱wa̱á. Mbá xkri̱da, náa Salmo 110, David niʼthí rí Jesús maʼga̱nú magi̱ʼi̱ náa ñawún mújúunʼ Dios náa mekhuíí ga̱jma̱a̱ magruigú wéñuuʼ tsiakii, ga̱jma̱a̱ tsiakii rígi̱ gámbáyúu maʼnigámbíin xa̱bu̱ sia̱nʼ ndrígio̱o̱ Dios ga̱jma̱a̱ “maʼthí rí maguáʼníí”. David nindxu̱u̱ wajinʼ xiʼñúuʼ bi̱ maʼni xúgíʼ rígi̱, Mesías bi̱ matañájunʼ asndu mekhuíí ga̱jma̱a̱ “Ikhaa manindxuuʼ ndxajkun asndu kámuu” (Sal. 110:1-6). Jesús niʼthí dí profecía dí na̱ʼkha̱ náa Salmo 110 naʼthí ga̱jma̱a̱ numuu ikhaa ga̱jma̱a̱ rí mambanúu nda̱wa̱á (Mat. 22:41-45).
Xó má ndiʼyáá, Jeobá nixná ikhoo David mu maʼnirámáʼ rí xóo nixtáa rarígá nákhá ikhaa nixtáa mangaa niʼnirámáʼ dí marigá nda̱wa̱á. Índo̱ ikhaa gátujxi̱i̱ ga̱jma̱a̱ ma̱ndoo maʼni mba̱a̱ Jeobá kámuu mbiʼi. Ga̱jma̱a̱ xóo gándoo gámbáyulú mikru̱ʼu̱lú dí naʼthí náa Salmo 37:10, 11, 29 rá. Náa versículo rúʼko̱ naʼthí xú káʼnii nikúwá nákhá wajyúuʼ bi̱ israelita mangaa naʼthí xóo kaʼnii gákúwáánʼ ikháánʼ índo̱ Dios gáʼnimbánuu rí nikudaminaʼ maʼni (atayáá náa revista rígi̱ rí na̱ʼkha̱ náa artículo “Maraxtaa ga̱jma̱á nindxu̱ʼ náa ku̱ba̱ʼ mitsaanʼ”).
Xó má naʼthí náa Salmo 61:8 ga̱jma̱a̱ náa i̱ʼwáʼ versículo, nambáyulú mbuʼyáá dí David nindoo maʼni mba̱a̱ Jeobá nákhá nixtáa náa Israel. Ga̱jma̱a̱ rúʼko̱ esngájmulú rí Jeobá makuxi̱ín bi̱ nikháñún nda̱wa̱á.