A̱jmi̱i̱n a̱ngiu̱lú nuxu̱u̱nʼ náa Cuerpo Gobernante

NÁKHÁ 5 ñajunʼ gu̱nʼ octubre tsiguʼ 2024, nijuixná mbá anuncio kiejuunʼ náa reunión dí narígá mámbá tsiguʼ. Ndxájulú Jody Jedele ga̱jma̱a̱ Jacob Rumph nijuaxtaʼwíin mu mani̱ndxu̱ún Cuerpo Gobernante ndrígu̱ún testigos de Jeobá. Mbá nájmi̱i̱n mba̱yu̱u̱ʼ má kúwá runi̱ kájxi̱ ñajuunʼ Jeobá.

Ndxájulú Jedele nigumaa náa Misuri (Estados Unidos). Anu̱u̱ ga̱jma̱a̱ ru̱dúu̱ nisngáa dí gajkhun, ikhiin nikúwá náa ndawi̱i̱n mbaʼin Testigos. Ikha jngóo nindoo nininúúnʼ a̱ngiu̱lú bi̱ naguwáʼ i̱mba̱ níʼkhá xuajin, bi̱ nagún ikhí mu muyambáá náa najuiʼtáraʼa. Ikhaa ninigu̱u̱ʼ índo̱ ndiʼyoo dí xa̱bi̱i̱ Jeobá nandún kuyamijná ga̱jma̱a̱ kúwá mbá kambájxu̱u̱n. Nijngúun iyááʼ nákha 15 ñajunʼ gu̱nʼ octubre tsiguʼ 1983, ga̱jma̱a̱ nanigu̱u̱ʼ maʼtáraʼa. Ikha jngóo índo̱ nirámuuʼ escuélóo ninindxu̱u̱ precursor regular nákha septiembre tsiguʼ 1989.

Anu̱u̱ ga̱jma̱a̱ ru̱dúu̱ nigún kudiin náa Betel, nákhá ikhaa ga̱jma̱a̱ giʼtio̱o̱ dxáʼgú kaʼníí majkhiinʼ. Rígi̱ nixkajxi̱i̱n mu mangiin maʼndún muyambáá ikhí. Ga̱jma̱a̱ xúʼko̱ má nirígá, mbá nájmi̱i̱n nigún gúyambáá náa Betel. Nákha septiembre tsiguʼ 1990, ikhaa niyambáá náa Betel dí rígá náa Wallkill. Ginii niyambáá náa Departamento rí Naʼni kaʼwi̱i̱ ga̱jma̱a̱ nda̱wa̱á náa Servicios Médicos.

Nákha ikhú, mijngii ikhí rígá tikhu congregación xtílóo, numuu dí ni̱jkha̱ raʼni itháan mbaʼin ga̱jma̱a̱ ndiñúu̱nʼ a̱ngiu̱lú xa̱bekha mu muyambáá, ikha jngóo ndxájulú Jedele nigíʼdu̱u̱ ni̱jkha̱ náa mbá congregación rúʼko̱ ga̱jma̱a̱ niʼnigajmaa xtílóo. Nda̱wa̱á nininiiʼ mbáa precursora bi̱ xtáa náa ikháá má circuito bi̱ mbiʼyuuʼ Dámaris. Nda̱wa̱á nidamijná ga̱jma̱a̱ mbá nájmi̱i̱n niyambáá mbóó náa Betel.

Nákhá 2005, nigájníin náa Betel mu muñewa̱a̱n ru̱dúu̱ ndxájulú Jedele ma̱ngaa anu̱u̱ ga̱jma̱a̱ ru̱dúu̱ Dámaris. Náa xúgíʼ tsiguʼ rúʼko̱ niyambáá xóo precursores regulares ga̱jma̱a̱ ndxájulú Jedele niʼsngáa náa Escuela Ndrígóo Precursor, ma̱ngaa nixtáa náa Comité bi̱ Nayambáá náa Hospital ga̱jma̱a̱ náa Comité bi̱ Naríyaʼ Awan xú káʼnii Gáguma Guʼwá náa mijngii ikhí.

Nákhá 2013, nithúún muyambáá mbu̱júu̱ náa Betel, mú xúgi̱ mu muñajunʼ náa xtáa raguma Warwick. Asndu má nákha ikhú nikúwá rayambáá náa Patterson ga̱jma̱a̱ náa Wallkill. Ndxájulú niñajunʼ náa Departamento Local ndrígóo Diseño ga̱jma̱a̱ Construcción ga̱jma̱a̱ náa Servicios de Información sobre Hospitales. Nákha marzo tsiguʼ 2023, nitháán mambáyúu Comité Bi̱ ndaʼyoo xóo miʼtáraʼa. Ndxájulú naʼthí rígi̱ ga̱jma̱a̱ numuu ñajunʼ dí nigiʼdoo: “Nguáná namíñulú índo̱ nakánulú i̱mba̱ nuxi̱ʼ ñajunʼ muʼni, mú gíʼmaa marmáʼáan a̱jkiu̱lú dí gíʼdoo numuu makumulú kuʼyáá Jeobá, numuu dí ikhaa má nambáyulú muʼnimbáníí ñajunʼ dí naxnúlú”.

Ndxájulú Rumph nigumaa náa California (Estados Unidos). Nákha ikhaa kaʼníí chíʼgíiʼ ru̱dúu̱ niniñuuʼ raʼni ñajuunʼ Jeobá, mú niʼni xó má eʼngo̱o̱ mu maʼsngóo dí naʼthí náa Biblia. Mámbá tsiguʼ na̱jkha̱ gáʼyoo xíñúnʼ bi̱ naʼni ñajuunʼ Jeobá ga̱jma̱a̱ ikhaa nimbáyúu mu manigu̱u̱ʼ majmañuu dí gajkhun. Ikha jngóo nákha gíʼdoo 13 tsiguuʼ ninda̱ʼa̱ dí miʼsngáa ga̱jma̱a̱ numuu Biblia. Nákha 27 ñajunʼ gu̱nʼ septiembre tsiguʼ 1992, nijngún iyááʼ. Ma̱ngaa ru̱dúu̱ nitanga̱a̱ niʼni ñajuunʼ Jeobá ga̱jma̱a̱ mbá xúgíinʼ bi̱ kúwá náa goʼwóo, nijngún iyááʼ.

Nákhá kaʼníí dxámá nindxu̱u̱ ndxájulú Rumph, ndiʼyoo dí precursores kúwá gagi, ikha jngóo índo̱ nirámuuʼ escuélóo ninindxu̱u̱ precursor nákha septiembre tsiguʼ 1995. Nákha tsiguʼ 2000 ni̱jkha̱ gáxtáa náa mbá xuajin dí rígá náa Ecuador, náa ndiyóo bi̱ muyambáá mutaraʼa. Ikhí nininiiʼ mbáa precursora bi̱ na̱ʼkha̱ náa Canadá bi̱ mbiʼyuuʼ Inga, ga̱jma̱a̱ nda̱wa̱á nidamijná. Nákha ndiʼkhú nidamijná nikúwá ruyambáá náa mbá xuajin dí rígá náa Ecuador náa ndawi̱i̱n mbaʼin publicadores. Ga̱jma̱a̱ dí mbiʼi xúgi̱ nindxu̱u̱ mbá congregación náa kúwá mbaʼin a̱ngiu̱lú.

Nda̱wa̱á ninindxu̱ún precursores especiales ga̱jma̱a̱ ninindxu̱ún viajantes. Nákha tsiguʼ 2011 nithúún magún náa escuela ndrígóo Galaad, clase 132. Índo̱ nirámún mbaʼa náa nixuʼmiin nigún, ninindxu̱ún betelitas, misioneros ga̱jma̱a̱ viajantes. Ma̱ngaa ndxájulú niʼsngáa náa escuela dí Najuiʼsngúún bi̱ Nutaraʼa numuu Reino.

Ga̱jma̱a̱ numuu nandii COVID-19, nitangiín náa Estados Unidos. Nithúún dí muyambáá náa Betel dí rígá náa Wallkill, ikhí ndxájulú Rumph ninirataa náa Departamento bi̱ Nduyáá xóo Miʼtáraʼa. Nda̱wa̱á nixuʼmiin náa sucursal dí rígá náa Ecuador ga̱jma̱a̱ ikhí niyambáá xóo Comité ndrígóo Sucursal. Nákha tsiguʼ 2023 niguáanʼ náa Warwick, ga̱jma̱a̱ nákha enero tsiguʼ 2024, ikhaa nitháán dí mambáyúu Comité bi̱ Ndaʼyoo xóo Miʼtáraʼa. Ndxájulú naʼthí rígi̱ ga̱jma̱a̱ numuu náa xúgíʼ xuajin dí ni̱jkha̱ gáyambáá: “Tséʼniuu má náá kúwáanʼ ru̱ʼni̱ ñajuunʼ Jeobá, rí itháan gíʼdoo numuu nindxu̱u̱ rí makuwáanʼ mbóó gajmiúlú a̱ngiu̱lú”.

Nangajulú ñajunʼ dí nuni̱ a̱ngiu̱lú bugi̱ ga̱jma̱a̱ ‹nduʼyamajkhún má xúʼko̱› (Filip. 2:29).