Jesús nindxu̱u̱ Ndxajkun bi̱ phú Kayá edxu̱u̱ bi̱ nagáwíinʼ a̱jkiu̱u̱n

1, 2. a) Náá numuu dí Jeobá nikuʼmaa ma̱ʼkha̱ A̱ʼdióo náa tsu̱du̱u̱ Ku̱ba̱ʼ rá. b) Ndiéjunʼ gúʼyáá náa artículo rígi̱ rá. (Hebreos 5:​7-9.)

NAʼNI má 2,000 tsiguʼ dí Jeobá nikuʼmaa A̱ʼdióo bi̱ itháán nandoo kaʼyoo náa tsu̱du̱u̱ Ku̱ba̱ʼ. Náá numuu rá. Mu maʼni káwíin xa̱bu̱ numbaaʼ náa aʼkhá ga̱jma̱a̱ náa nakháñún ma̱ngaa mu maʼni gámbóo xkujndu dí Gixa̱a̱ niʼni marigá (Juan 3:16; 1 Juan 3:8). Jeobá ma̱ngaa ndiʼyoo dí Jesús maxtáa xóo xa̱bu̱ numbaaʼ ga̱jma̱a̱ rígi̱ maʼnirataa mu mani̱ndxu̱u̱ Ndxajkun bi̱ phú Kayá edxu̱u̱ bi̱ magáwíinʼ a̱jkiu̱u̱n kaʼyulú ga̱jma̱a̱ makro̱ʼo̱o̱ kaʼyulú. Jesús nigíʼdu̱u̱ ninindxu̱u̱ Ndxajkun bi̱ phú Kayá edxu̱u̱ nda̱wa̱á dí nijngúun iyááʼ, nákhá tsiguʼ 29.a

² Náa artículo rígi̱ mbuʼyáá xú káʼnii nigumarataa Jesús dí maxtáa náa tsu̱du̱u̱ Ku̱ba̱ʼ mu mani̱ndxu̱u̱ Ndxajkun bi̱ phú Kayá edxu̱u̱ bi̱ magáwíinʼ a̱jkiu̱u̱n kaʼyulú. Gíʼdoo numuu rí makru̱ʼu̱lú májánʼ rígi̱, mu xúʼko̱ xáʼniulú gakhi̱i̱ muxuʼmamijná náa Jeobá ga̱jma̱a̱ muʼtákáñíí, itháan índo̱ nakuwáánʼlú ngíná ga̱jma̱a̱ numuu aʼkhá dí nixuʼdámíjná o ga̱jma̱a̱ numuu dí tséʼngulú gúʼni (atraxnuu Hebreos 5:​7-9).

A̱ʼDIÓO DIOS BI̱ ITHÁÁN NANDOO KAʼYOO NA̱ʼKHA̱ NÁA TSU̱DU̱U̱ KU̱BA̱ʼ

3, 4. Xú káʼnii nixtiʼkhu̱u̱ xóo nixtáa Jesús índo̱ ni̱ʼkha̱ náa tsu̱du̱u̱ Ku̱ba̱ʼ rá.

³ Mbaʼánʼ dí ikháán naxtiʼkhu̱u̱ xóo kuwáánʼlú, mbá xkri̱da, mbáa ndaʼyóoʼ muniʼñááʼ náa nanigulúʼ makuwa mu mu̱ʼgua̱ i̱mba̱ níʼkhá ga̱jma̱a̱ ndayóoʼ muniʼñúúnʼ bi̱ kuʼñúún ga̱jma̱a̱ bi̱ nambájxulú gajmiúlú. Rígi̱ nindxu̱u̱ gakhi̱i̱ mú tsémbríguii ga̱jma̱a̱ dí ndiyóoʼ maʼni Jesús. Náa mbá xúgíinʼ e̱ji̱i̱n Dios Jesús ninindxu̱u̱ timbáa ángel bi̱ nigiʼdoo numuu náa mekhuíí. Nixtáa náa mekhuíí ga̱jma̱a̱ Jeobá, ikhaa nindoo kaʼyoo ma̱ngaa nixtáa gagi “náa níjniúu” Anu̱u̱ (Sal. 16:11; Prov. 8:30). Mú náa Filipenses 2:7 naʼthí dí ga̱jma̱a̱ gagi niniñuuʼ “xúgíʼ rí gíʼdoo”, mu maxtáa náa tsu̱du̱u̱ Ku̱ba̱ʼ náa kúwá xa̱bu̱ aʼkhá.

⁴ Ma̱ngaa gundxaʼwamíjna̱ xú káʼnii nixtáa Jesús náa tsu̱du̱u̱ Ku̱ba̱ʼ. Anu̱u̱ ga̱jma̱a̱ ru̱dúu̱ ninindxu̱ún migíníin, nduʼyáá rígi̱ numuu dí índo̱ nigumaa Jesús nixniin a̱jmi̱i̱n ñu̱ʼu̱ xóo tsigijñaʼ (Lev. 12:8; Luc. 2:24). Ga̱jma̱a̱ índo̱ rey Herodes niʼdxawuun dí nigumaa Mesías, ikhaa nindoo maxíyáa. Ikhaa jngóo ndiyóoʼ magañún náa Egipto ga̱jma̱a̱ nikúwá ikhí mbá nguáthá mbayuʼ (Mat. 2:​13, 15). ¡Mbá nuthu kayuuʼ nixtáa Jesús náa tsu̱du̱u̱ Ku̱ba̱ʼ ga̱jma̱a̱ mbá nuthu nixtáa náa mekhuíí!

5. Ndiéjunʼ ndiʼyoo Jesús índo̱ nixtáa náa tsu̱du̱u̱ Ku̱ba̱ʼ ga̱jma̱a̱ xú káʼnii niʼnirataa mu mani̱ndxu̱u̱ Ndxajkun bi̱ phú Kayá edxu̱u̱ rá. (Atayáá ma̱ngaa xtiʼkhuu.)

⁵ Índo̱ nijkha rakhi̱i̱, Jesús ndiʼyoo dí mbaʼin xa̱bu̱ numíníiʼ. Ndiʼyoo xú káʼnii ekumu̱ún xa̱bu̱ índo̱ nakháñuu mbáa bi̱ kuyáá, mbáa ikhaa ndiʼyoo xóo nikháñúu José, anu̱u̱ bi̱ nigiʼdaa náa tsu̱du̱u̱ Ku̱ba̱ʼ. Náa xúgíʼ tsiguʼ rí nixtáa náa tsu̱du̱u̱ Ku̱ba̱ʼ ndiʼyoo xóo emíníiʼ xa̱bu̱ ga̱jma̱a̱ numuu nandii lepra, dí tsékruigu̱u̱n, tikhuun nindxu̱ún gúʼxúʼ o ga̱jma̱a̱ numuu dí nikháñuu aʼdiún ga̱jma̱a̱ nigáwíinʼ a̱jkiu̱u̱n kaʼñún xúgíinʼ buʼko̱ (Mat. 9:​2, 6; 15:30; 20:34; Mar. 1:​40, 41; Luc. 7:13). Gajkhun má dí nákhá nixtáa náa mekhuíí ndiʼyoo xóo emíníiʼ xa̱bu̱ mú índo̱ nixtáa náa tsu̱du̱u̱ Ku̱ba̱ʼ nindoo nikro̱ʼo̱o̱ itháan májánʼ (Is. 53:4). Xúgíʼ rígi̱ nimbáyúu mu makro̱ʼo̱o̱ xóo ekumu̱ún xa̱bu̱, rí naʼni maxmiéjúúnʼ ga̱jma̱a̱ rí naʼni makuwá ngíná. Ma̱ngaa, mínaaʼ má Jesús niʼni néʼngo̱o̱, nixtáa ngíná ga̱jma̱a̱ nixmiéjúúnʼ xó má ikháánʼlú.

JESÚS NAKRO̱ʼO̱O̱ KAʼÑÚN XA̱BU̱

6. Ndiéjunʼ eʼsngúlú náa xkri̱da dí nijmuu profeta Isaías rá. (Isaías 42:3.)

⁶ Índo̱ Jesús nixtáa náa tsu̱du̱u̱ Ku̱ba̱ʼ, nikro̱ʼo̱o̱ kaʼñún bi̱ kúwá ngíná ga̱jma̱a̱ bi̱ naguma ngíníi. Xúʼko̱ nimbánuu kiʼtáriyaʼ dí Dios niʼni dí maʼnirámáʼ Isaías. Náa Escrituras Hebreas naʼthí dí xa̱bu̱ bi̱ nakumu̱ún kuyáá Jeobá nindxu̱ún xóo mbá jardín dí naxtagíjyáʼ májánʼ ga̱jma̱a̱ xóo ixi̱ mba̱ʼo̱ (Sal. 92:12; Is. 61:3; Jer. 31:12). Mú bi̱ naguma ngíníi, najuiʼthá dí nindxu̱ún xóo e̱ʼi̱n dí na̱jkha̱ rajmigaʼ ga̱jma̱a̱ ndélá dí na̱jkha̱ rajuíyuuʼ, rígi̱ nindxu̱u̱ dí tséjmaa eyá xa̱bu̱ (atraxnuu Isaías 42:3). Jeobá nijmuu xkri̱da rígi̱ mu maʼtáriyaʼ dí Jesús maʼniún dí májánʼ xa̱bu̱ ga̱jma̱a̱ magáwíinʼ a̱jkiu̱u̱n kaʼñún, bi̱ xa̱bu̱ nduyáá dí raguáʼdáá numún.

7, 8. Xú káʼnii niʼnimbánuu Jesús kiʼtáriyaʼ dí niʼthí Isaías rá.

⁷ Mateo niʼthí dí Jesús niʼnimbánuu ajngáa dí niʼtáriyaʼ Isaías, índo̱ niʼnirámáʼ: “Xáxpigawóo e̱ʼi̱n rí na̱jkha̱ rajmigaʼ ni má xándijyúuʼ ndélá rí na̱jkha̱ rajuíyuuʼ” (Mat. 12:20). Mbaʼa milagro dí niʼni Jesús nimbáñún xa̱bu̱ bi̱ naguma ngíníi ga̱jma̱a̱ bi̱ nikumu̱ún dí ní xátangi̱ín makuwá májánʼ. Gundxaʼwamíjna̱ ga̱jma̱a̱ numuu xa̱bu̱ bi̱ niʼniuu nandii lepra, mbáa ikhaa nikumu̱u̱ dí xándoo maguma thanáá ga̱jma̱a̱ ni xándoo maxtáa mbóó gajmíi̱nʼ bi̱ kaʼñún ma̱ngaa bi̱ nambájxu̱u̱ gajmíi̱nʼ (Luc. 5:​12, 13). O ga̱jma̱a̱ numuu xa̱bu̱ bi̱ tsédxawuun ma̱ngaa tséjmaa gáʼthí májánʼ. Atatsaʼwáminaʼ xú káʼnii eku̱mu̱u̱ xa̱bu̱ bugi̱ índo̱ ndaʼyoo dí eʼwíinʼ nutamijná ga̱jma̱a̱ ikhaa na̱nguá ekro̱ʼo̱o̱ dí nuthi (Mar. 7:​32, 33). Mú raʼkháa i̱ndó rúʼko̱ nirígá.

⁸ Nákhá mbiʼi dí nixtáa Jesús, mbaʼin judío nundxaʼwamíjna̱ dí Dios eʼni rí xa̱bu̱ maʼniún nandii ga̱jma̱a̱ numuu aʼkhá rí nixudamíjna̱ o dí nixudami̱jna̱ xabuanii (Juan 9:2). Ikha jngóo mbaʼin xa̱bu̱ nuni̱ ngíníi bi̱ naʼniún nandii ga̱jma̱a̱ tsíñún gúñún, mú Jesús niʼni thanún ga̱jma̱a̱ nimbáñún mbuyáá dí Dios nañewu̱u̱n. Xígi̱ niʼnimbánuu kiʼtáriyaʼ dí niʼthí Isaías. Ndiéjunʼ eʼsngúlú ikháánʼ rígi̱ rá.

9. Xú káʼnii esngájma dí naʼthí náa Hebreos 4:​15, 16 dí Jesús nindxu̱u̱ Ndxajkun bi̱ phú Kayá edxu̱u̱ bi̱ nagáwíinʼ a̱jkiu̱u̱n rá.

⁹ (Atraxnuu Hebreos 4:​15, 16). Nduʼyáá gajkhun dí Jesús nagáwíinʼ a̱jkiu̱u̱n kaʼyulú. Ajngáa griego dí nijuiʼtájuíi “nagáwíinʼ a̱jkiu̱u̱n” nandoo gáthúu̱n dí nakrua̱ʼa̱a̱ʼ rí naʼni mumíníiʼ ga̱jma̱a̱ dí naʼni makuwá ngíná eʼwíinʼ. Pablo ma̱ngaa nijmuu ajngáa rígi̱ náa Hebreos 10:​34, índo̱ niʼthí dí magáwíinʼ a̱jkiu̱lú kuʼñúún bi̱ kajchún náa guʼwá e̱jua̱nʼ. Índo̱ náa Biblia naʼthí dí Jesús niʼni milagro mu mambáñún xa̱bu̱, nasngájmulú dí ikhaa ma̱ngaa nigawúunʼ índo̱ ndiʼyoo rí eʼwíinʼ numíníiʼ. Na̱nguá niʼni thanún índo̱ numuu dí rúʼko̱ kaʼyoo maʼni, niʼni thanún numuu rí nixmiéjúúnʼ kaʼñún ga̱jma̱a̱ nindoo mambáñún. Mbá xkri̱da, ma̱ndoo maʼni thanuu xa̱bu̱ bi̱ niʼniuu lepra asndu mitsínguánʼ. Mú dí niʼni, nijkha gáxkajmaa, mbáa mbayuʼ má tsiguʼ dí ndawa̱a̱ tsáa exkajmaa ga̱jma̱a̱ rígi̱ nindxu̱u̱ timbá aʼphu̱. Ga̱jma̱a̱ índo̱ nimbáʼta̱a̱ cháʼwuun xa̱bu̱ bi̱ tséʼdxawuun, niríyaaʼ kaníí náa nda̱wi̱i̱n xa̱bu̱ mu maʼni thanuu. Ma̱ngaa nixprígúu mbáa fariseo bi̱ niwiyu̱u̱ʼ kaʼyoo mbáa a̱ʼgu̱ bi̱ nitanga̱a̱ a̱jkiu̱u̱n ga̱jma̱a̱ niʼjñáa rajkúu Jesús ma̱ngaa nikúdíi ga̱jma̱a̱ xtátsiu̱u̱n (Mat. 8:3; Mar. 7:33; Luc. 7:44). Gi̱i̱ nandoo nduʼyáá dí Jesús nindoo kaʼñún xa̱bu̱ bi̱ naʼniún nandii o bi̱ nixudami̱jná mbá aʼkhá mbiiʼ. Ikhaa nigruiguíin ga̱jma̱a̱ májánʼ ma̱ngaa nigáwíinʼ a̱jkiu̱u̱n kaʼñún, ikha jngóo nduʼyáá gajkhun dí xúʼko̱ má eʼni ga̱jma̱a̱ numulú mangáanʼ.

NDUʼYARIDÁÁ NDXAJKUN BI̱ PHÚ KAYÁ EDXU̱U̱

10. Ndiéjunʼ dí ma̱ndoo mambáñún xa̱bu̱ bi̱ tsédxuun ga̱jma̱a̱ bi̱ tsékruigu̱u̱n mu muniʼniiʼ Dios rá. (Atayáá ma̱ngaa xtiʼkhuu.)

¹⁰ Numuu dí nandulúʼ mbuʼyaridáá Jesús, ikha jngóo nu̱ʼni̱ tsiakimíjna̱ musngajmá dí nandulúʼ kuʼñúún xa̱bu̱, dí nakru̱ʼu̱lú kuʼñúún ga̱jma̱a̱ dí nagáwíinʼ a̱jkiu̱lú kuʼñúún (1 Ped. 2:21; 3:8). Gajkhun má dí xándoo mu̱ʼni̱ thanún bi̱ tsédxawíín o bi̱ tsékruigu̱u̱n mú ma̱ndoo mumbáñún mu muniʼniiʼ Dios, mbá xkri̱da, i̱yi̱i̱ʼ dí naguwíi xuajñuu Dios rígá náa itháan dí 100 ajngáa señas. Ma̱ngaa rígá i̱yi̱i̱ʼ dí nigumaraʼmáʼ náa braille náa itháan dí 60 ajngáa ga̱jma̱a̱ rígá videos dí gíʼdoo audiodescripciones náa itháan dí 100 ajngáa. Mu xúʼko̱ xa̱bu̱ bi̱ tsédxawíín ga̱jma̱a̱ bi̱ tsékruigu̱u̱n magún kanuu náa Jeobá ga̱jma̱a̱ náa A̱ʼdióo.

11. Ndiéjunʼ eʼni xuajñuu Jeobá mu mbaʼyaridoo Jesús rá. (Hechos 2:​5-7, 33; atayáá ma̱ngaa xtiʼkhuu.)

¹¹ Nda̱wa̱á dí nigabi̱i̱, Jesús nixídírámuuʼ espíritu santo náa xa̱bi̱i̱ mu mutaraʼa ajngáa rí májánʼ náa “ajngún” xa̱bu̱ bi̱ nigún mu muniriya̱a̱ʼ Ndxa̱a̱ Pentecostés (atraxnuu Hechos 2:​5-7, 33). Xúʼko̱ má eʼni xuajñuu Jeobá ma̱ngaa, naʼni xó má eʼngo̱o̱ mu mambáñún xúgíinʼ xa̱bu̱ bi̱ naguwáʼ náa mixtiʼkhu enii xuajin mu majmañún ga̱jma̱a̱ numuu Dios, ikha jngóo naguwíi i̱yi̱i̱ʼ náa itháan dí 1,000 ajngáa, maski ajndu kááʼ nguéjmi̱i̱n xa̱bu̱ bi̱ nuthi mbóó ajngá. Xóo ajngáa dí nuthi tikhuun xa̱bu̱ bi̱ kúwá náa xígií norte ndrígóo América ga̱jma̱a̱ xígií náa sur. Xuajñuu Jeobá naguwíi i̱yi̱i̱ʼ náa itháan dí 160 ajngáa mu xúʼko̱ xa̱bu̱ bi̱ nuthi ajngáa rúʼko̱ ma̱ndoo majmañún ga̱jma̱a̱ numuu Dios. Ma̱ngaa i̱yu̱lúʼ najuiʼtájuíi náa itháan dí 20 variante ndrígóo ajngáa romaní (o gitano). Rígi̱ niyambáá mu xúʼko̱ mbaʼin xa̱bu̱ majmañún dí gajkhun.

12. Ndiéjunʼ ma̱ngaa eʼni xuajñuu Jeobá rá.

¹² Mú raʼkháa i̱ndó numbañún xa̱bu̱ mu muniʼnuuʼ ajngáa dí májánʼ, ma̱ngaa xuajñuu Jeobá ndayáʼ xóo ma̱ndoo maʼni mu mambáñún xa̱bu̱ bi̱ numíniiʼ ga̱jma̱a̱ numuu mbá ruʼwambiʼ o gaʼxma. Mbaʼin a̱ngiu̱lú nuxnaximi̱jna̱ mu mumbañún bi̱ nda̱ñúunʼ. Ma̱ngaa, naguma náa ma̱ndoo magimbíin xa̱bu̱ mu majmañún itháan ga̱jma̱a̱ numuu Dios bi̱ nandoo kaʼñún.

NDXAJKUN BI̱ PHÚ KAYÁ EDXU̱U̱ NAMBÁYÚU MÁMBÁA DÍ IKHÁANʼLÚ

13. Ndiéjunʼ nindxu̱u̱ tikhuu dí naʼni Jesús mu mambáyulú rá.

¹³ Jesús nindxu̱u̱ Baxtúu májáanʼ ndrígulú, ikha jngóo nambáyulú mámbáa dí ikháanʼ mu maguaʼdáá dí ndayúlúʼ mu makuwaanʼ mijngii náa Jeobá (Juan 10:14; Efes. 4:7). Xkujndu dí nuraʼníí ma̱ndoo maʼni makumulú dí nindxu̱lú xóo e̱ʼi̱n rí na̱jkha̱ rajmigaʼ o xóo ndélá rí na̱jkha̱ rajuíyuuʼ. Mbáa nakumulú rí xáʼngulú itháan numuu dí naʼniulú mbá nandii mbiiʼ, numuu dí nixuʼdamijná mbá aʼkhá mbiiʼ o ga̱jma̱a̱ numuu dí niguaʼdáá xkujndu gajmiúlú mbáa ndxájulú. Rígi̱ ma̱ndoo maʼni dí maʼniulú gakhi̱i̱ mbuʼyáá dí wíji̱ marigá nda̱wa̱á. Mú garmáʼáan a̱jkiu̱lú dí Jesús ndaʼyoo xóo kuwáanʼlu ga̱jma̱a̱ nakro̱ʼo̱o̱ xóo kumulúʼ. Ga̱jma̱a̱ nambáyulú numuu dí nagáwíinʼ a̱jkiu̱u̱n kaʼyulú. Mbá xkri̱da ma̱ndoo majmuu espíritu santo mu maxnúlú tsiaki̱i̱ (Juan 16:7; Tito 3:6). Ma̱ngaa ma̱ndoo majmiuu a̱ngiu̱lú anciano bi̱ nixníin “xóo regalo” náa congregación ga̱jma̱a̱ eʼwíinʼ a̱ngiu̱lú mu muxna̱ʼ tsiaki̱i̱ ma̱ngaa mu mumbayulúʼ (Efes. 4:8).

14. Ndiéjunʼ ma̱ndoo muʼni mu xákuwáanʼ ngíná rá.

¹⁴ Á mu xtaa ngíná ga̱jma̱a̱ naku̱ma̱a̱ʼ dí nánguá xtaʼdáá tsiaki̱i̱, atatsaʼwáminaʼ ndiéjunʼ eyoo gáʼthúu̱n náa ikháán dí Jesús nindxu̱u̱ Ndxajkun bi̱ phú Kayá edxu̱u̱. Garmáʼáan a̱jkia̱a̱nʼ dí Jeobá na̱nguá nikuʼmaa náa tsu̱du̱u̱ Ku̱ba̱ʼ i̱ndó mu maxnájximinaʼ makhañúu ga̱jma̱a̱ numulú. Ma̱ngaa ni̱ʼkha̱ mu xúʼko̱ makro̱ʼo̱o̱ xkujndu dí nuraʼníí ikháánʼlú dí nindxu̱lú xa̱bu̱ aʼkhá. Índo̱ nakuwáanʼ ngíná ga̱jma̱a̱ numuu aʼkhá dí nuxuʼdamíjná o ga̱jma̱a̱ numuu dí tséʼngulú gúʼni, Jesús xtáa xawii mambáyulú “índo̱ phú ndayóoʼ mixtámbáyulú” (Heb. 4:​15, 16).

15. Ndiéjunʼ nimbáyúu mbáa ndxájulú mu matanga̱a̱ náa congregación rá.

¹⁵ Jesús ma̱ngaa naxnún ikha xa̱bi̱i̱ mu mbuñíinʼ ga̱jma̱a̱ mumbañún bi̱ nini̱ tsíngumi̱jna̱ náa xuajñuu Dios (Mat. 18:​12, 13). Guʼyáá dí nigíʼnuu ndxájulú Stefano.b Niriya̱a̱ʼ náa congregación ga̱jma̱a̱ nda̱wa̱á dí nijngoo 12 tsiguʼ nitanga̱a̱ ni̱jkha̱ reunión. Ikhaa naʼthí: “Niti̱yu̱ʼ índo̱ nijkhánú náa Guʼwá nagimbáanʼ, mú nindoo maxtáá mbu̱júu̱ náa xuajñuu Jeobá. A̱ngiu̱lú ancianos bi̱ ndi̱wi̱i̱nʼ mu mutamijná ga̱jmá nindxu̱ʼ, nindrigún májánʼ. Nguáná naxtáá ngíná numuu dí niniʼñúuʼ Jeobá. Mú a̱ngiu̱lú nini̱ marmáʼáan a̱jkiu̱nʼ dí Jeobá ga̱jma̱a̱ Jesús nandún dí xákaguabúnʼ. Índo̱ nitangu̱ún náa congregación a̱ngiu̱lú nidrigún májánʼ ikhúún gajmíʼ bi̱ kúwá náa goʼwóʼ. Nda̱wa̱á, a̱ʼgiu̱ʼ nigíʼdu̱u̱ niʼnigajmaa Biblia ga̱jma̱a̱ dí xúgi̱ mbóó jnduʼ eni̱xu̱ ñajuunʼ Jeobá”. Jesús, Ndxajkun bi̱ phú Kayá edxu̱u̱ nadxuu índo̱ ndaʼyoo dí bi̱ natanga̱a̱ a̱jkiu̱ún naxtambáñún mu matangi̱i̱n náa congregación.

16. Ndíjkha dí nadxulú rí guáʼdáá mbáa Ndxajkun bi̱ phú Kayá edxu̱u̱ bi̱ nagáwíinʼ a̱jkiu̱u̱n rá.

¹⁶ Índo̱ Jesús nixtáa náa tsu̱du̱u̱ Ku̱ba̱ʼ, nimbáñún mbaʼin xa̱bu̱ náa mbiʼi dí phú kaʼyoo. Dí mbiʼi xúgi̱ ma̱ngaa ma̱ndoo mbuʼyáá gajkhun dí ikhaa maxtáa ga̱jma̱a̱ nindxu̱lú índo̱ gáʼyulúʼ. Ma̱ngaa nánguá má mbayuʼ dí náa numbaaʼ nuxi̱ʼ mambáyulú mu ni xánindxu̱lú xa̱bu̱ aʼkhá. ¡Nuxnáa núma̱aʼ Jeobá Dios numuu dí nandoo kaʼyulú ga̱jma̱a̱ nagáwíinʼ a̱jkiu̱u̱n kaʼyulú, ikha jngóo nigíiʼ A̱ʼdióo bi̱ nagáwíinʼ a̱jkiu̱u̱n mu mani̱ndxu̱u̱ Ndxajkun bi̱ phú Kayá edxu̱u̱!