Ol Pamle ane Pren Blo Yu Uda Pasawei Go Kamlaipgen!

Wen sambodi pasawei i meke mipla pil nadakain atso ane sore. Daswai da Baibol spik ded, i wan enami. (1 Korint 15:26) Lo Lesen 27, yu bin pinis lan dat Zeoba go smase dis enami. Bat, wiswei demwan uda olredi ded? Lo dis lesen, yu go lan mo baut wan nada mina nais promis blo Zeoba​—em go meke plenti bilion pipol kamlaipgen po kese apilaip poeba. Wa, em go meke demwan kamlaipgen prom ded! Yu tingk i ken apen a? Wiswei, dempla go kamlaipgen po stap lo eben o wea ert?

1. Wanem Zeoba wande mekem po ol pamle ane pren uda bin pasawei?

Zeoba prapa kan weit po meke dem pipol uda bin pasawei kamlaipgen. Zob, wan sebant blo God, bin gad strong bilib dat God nogo piged em wen em go ded. Em spik po God: “Yu go singaut, ane ai go ansa yu [prom Greib].”​—Rid Zob 14:13-15.

2. Wiskain yumi sabe ded pipol go kamlaipgen?

Wen Zizas bin ya lo ert, God bi gibe em da paua po meke pipol kamlaipgen prom ded. Zizas bin meke diskain po wan 12 iya oul gel ane boi blo wan widooman. (Mak 5:41, 42; Luk 7:12-15) Wan nada taim, pren blo Zizas, Lazaras, bin pasawei. Nomata Lazaras bin ded wea em greib po 4 dei, Zizas bin meke em kamlaipgen. Zizas prea po God ane spik: “Lazaras! Kamaut!” Ane “Lazaras i bin kamaut, kam ausaid wea beriolklos”​—em kamlaipgen! (Zon 11:43, 44) Ol pamle ane pren blo Lazaras masbi obamak api a!

3. Wanem Baibol promis go apen bambai po ol pamle ane pren uda pasawei?

Baibol meke promis: “Wandei God i go meke ol dem ded pipol kamlaipgen.” (Pas Misnare Wok 24:15) Wen Zizas bin weikemap demwan uda bin ded bipo, ol no bin go antap eben. (Zon 3:13) Ol bin api po kamlaipgen mata ya wea ert. Seimkainwei, i no long nau, Zizas go weikemap plenti bilion pipol prom ded, wea paradais lo ert, ane ol gobi api poeba. Zizas spik, “ebriwan uda i bin pasawei wea sematri,” go gedap gen bikoz God rimemba demwan​—no wase man uda ken piged pipol, bat God sabe dempla.​—Zon 5:28, 29.

TINGBAUT MO NAU

4. Zizas bin prubem em ken meke ded pipol kamlaipgen

Lan mo baut wanem Zizas bin mekem po pren blo em, Lazaras. Rid Zon 11:14, 38-44, ane tokbaut dem kwestin ya:

• Wiskain yumi sabe Lazaras bin prapa ded, no kasa wan?—Rid Zon 11:39.

• Wiswei, yu tingk Zizas go wande meke Lazaras kamlaipgen ya wea ert, ip Lazaras bin prapawan go antap po eben?

Plei da BIDYO.

BIDYO: Zizas Meke Lazaras Kamlaipgen (1:16)

5. Prapa plenti pipol go kamlaipgen!

Rid Song blo Sam 37:29, ane tokbaut dis kwestin ya:

• Wea ol dem plenti bilion pipol uda go kamlaipgen go stap?

Zizas go meke demwan uda bin wosip Zeoba kambaik laipgen, ane em go meke plenti ol nadawan uda no bin wosip Zeoba kamlaipgen tu. Rid Pas Misnare Wok 24:15, ane tokbaut dis kwestin ya:

• Uda yu prapa wande luk kambaik laipgen?

Tingbaut nau: Zizas ken meke sambodi kamlaipgen wase wan papa ken weikemap pikinini blo em prom slip

6. Yumi gede kampot ane oup prom sabe ded pipol go kamlaipgen

Da Baibol stori baut smolgel blo Zairas gibe kampot ane elpe plenti pipol uda pil sore ane atso. Ride dis tru stori lo Luk 8:40-42, 49-56.

Zizas bin spik po Zairas bipo em meke em smolgel kamlaipgen: “Yu no prait, yu mata bilibe mi, trase mi.” (Rid Luk 8:50.) Bikoz yu sabe ol ded pipol ken kamlaipgen bambai, wiskain i go elpe yu . . .

• wen pamle ane pren i pasawei?

• wen laip blo yu i wea deinza?

Plei da BIDYO, ane tokbaut dis kwestin ya.

BIDYO: Pipol Go Kamlaipgen Bambai​—Wiskain i Gibe Yumi Strong Nau? (3:21)

• Wiskain papa ane ama blo Phelicity gede kampot ane oup bikoz ol sabe demwan uda pasawei go kamlaipgen bambai?

WANEM YU BI LAN

Da Baibol gibe promis dat plenti bilion pipol uda bin pasawei go kamlaipgen. Zeoba prapa wande luk demwan kambaik laip, ane em gibe Zizas da paua po meke dempla kamlaipgen.

Wiskain Yu Go Spik

• Wiskain yumi sabe Zeoba ane Zizas lukpowad po meke demwan uda ded kamlaipgen?

• Wea da mein ples ol dem plenti bilion pipol uda go kamlaipgen go stap​—wea eben o lo ert? Aukam yu spik demkain?

• Wanem elpe yu po prapa sabe, yu go luk ol pamle ane pren blo yu kamlaipgen?

PAINDAUT MO

Lan wanem yu ken mekem po elpe yu wen yu pil nadakain atso.

“Help for Those Who Grieve” (Awake! No. 3 2018)

Wiswei, ken Baibol prapa elpe sambodi uda i atso a?

Wen Pamle ane Pren i Pasawei (5:06)

Wanem ken elpe ol pikinini wen ol luze pamle o pren klostu po dempla?

Zizas Gibe Em Laip po Seibe Mipla (2:07)

Wiswei, i go gad enibodi uda go kamlaipgen ane gopo eben? Uda no go kamlaipgen?

“What Is the Resurrection?” (Web article)