Wanem Apen Wen Yumi Pasawei?

Yu gad sambodi yu mina lab uda bin pasawei? Wea dis mina adtaim, yu mait tingk: ‘Wanem apen wen wi ded? Wiswei, i gad eni oup po luk dem klostuwan gen a?’ Lo dis lesen ane da neks lesen, tingbaut wanem ansa da Baibol i gibem po kampot yu.

1. Wanem apen wen yumi pasawei?

Da wei Zizas bin tokbaut sambodi uda pasawei, i wase dempla i dedslip. Aukam ded i seimkain wase slip? Samwan uda i dedslip, no sabe wanem apen raun dempla. Apta samwan i pasawei, em no pile pein o sapa enimo. Nomata aumas em bin labe pamle ane pren blo em, em pil nating nau. Baibol spik: “Demwan uda ded no sabe eniting.”​—Rid Iklaziastis 9:5.

2. Aukam i elpe yumi po sabe wanem i tru baut ded?

Plenti pipol prait wen ol tingbaut ded ane ol mina prait prom wen pipol i ded tu! Bat, yumi ken gede kampot prom wanem da Baibol spikbaut pipol uda pasawei. Zizas spik: “Da trutok . . . i go meke yupla pri.” (Zon 8:32) Sam rilizan tis dat apta man i pasawei, samting insaid da man i kamaut ane gad laip wea spirit ples, bat Baibol no tisem demkain. Nobodi i sapa apta ol i ded. Wa, pipol uda pasawei no sabe eniting i apen raun dempla, so ol kan wail o erte mipla. Dasmin, yumi no nid po meke samting po dempla, o wosip da ded tu.

Sam pipol spik ol ken tok po ded pipol. Bat, i kan. Yumi pinis lan dat ded pipol “no sabe eniting.” Sam pipol tingk ol tok po sambodi klostu po dempla uda bin pasawei. Bat, ol tok po ol debolspirit uda blape dempla, ane ol akt po demwan uda bi pasawei. So, bikoz yumi sabe da trutok baut wanem apen wen mipla pasawei, i protekt yumi prom ol debolspirit. Zeoba wone yumi no po trai tok po ded pipol. Em sabe dat eniting mipla mekem wea ol debolspirit go erte mipla.​—Rid Dutaronami 18:10-​12.

3. Lan wanem i tru baut wanem i apen wen pipol pasawei

Pipol prom raun da wold, gad ol dipren bilib baut wanem go apen wen pipol pasawei. Bat, ebridem bilib kan bi tru.

• Wanem pipol raun wea yu stap, tingk go apen wen pipol pasawei?

BIDYO: Wanem Apen Wen Samwan Pasawei?​—Smol Pat (1:19)

Rid Iklaziastis 3:20, ane tokbaut dem kwestin ya:

• Prom dis skripsa, wanem apen wen samwan pasawei?

• Apta sambodi pasawei, i gad eni pat blo em i kamaut ane stap samwea a?

Da Baibol tokbaut wen wan klostupren blo Zizas, Lazaras, bin pasawei. Wen yu rid Zon 11:11-14, tekenotis wiskain Zizas bin soe wanem apen wen Lazaras bin ded. Den tokbaut dem kwestin ya:

• Zizas spik ded i seimkain wase wanem?

• Wanem i soe yumi baut pipol uda pasawei?

• Wiswei, yu tingk wanem Baibol tokbaut ded i meke sens a?

4. Da trutok baut wen pipol pasawei, i elpe yumi

Bikoz yumi sabe wanem i tru baut wanem apen wen samwan pasawei, yumi no nid po prait prom demwan uda ded. Rid Iklaziastis 9:10, ane tokbaut dis kwestin ya:

• Ken da ded erte mipla?

Trutok blo Baibol protekt yumi prom da lai, wea wi tingk yumi mas wosip o meke ol samting po stape wail blo demwan uda ded. Rid Aizaia 8:19 ane Rebaleisan 4:11, ane tokbaut dis kwestin ya:

• Wiskain yu tingk Zeoba pil baut sambodi uda wosip o lukraun po elp prom demwan uda ded?

5. Da trutok baut wen pipol pasawei, go kampot yumi

Plenti pipol bin lan dat wen ol ded, ol go gede panisment prom ol nugudting ol bin mekem wea laip blo dempla. Bat, i meke yumi mina api po sabe nobodi sapa apta ol ded​—iben demwan uda bin meke nadakain nugud samting no sapa. Rid Rom 6:7, ane tokbaut dis kwestin ya:

• Da Baibol spik dat wen sambodi i pasawei, ol wantaim pri prom sin ol i gad, so, yu tingk enibodi uda ded i sapa, bikoz ol bin meke badting wea laip?

Da mo yumi kam po sabe uda Zeoba, da mo yumi go prapa luk, em no panis demwan uda ded o laue dempla po sapa. Rid Dutaronami 32:4 ane 1 Zon 4:8, ane tokbaut dem kwestin ya:

• Ip God gad demkain pasin, wase dem skripsa i spik, yu tingk em panis demwan uda bin pasawei a?

• Wiswei, da trutok baut wanem apen po demwan uda pasawei, i gibe yu kampot a? Aukam?

WANEM YU BI LAN

Wen samwan i pasawei, laip blo dempla wantaim pinis. Dempla no sapa, ane ol kan erte demwan uda i laip.

Wiskain Yu Go Spik

• Wanem apen wen samwan pasawei?

• Wiskain da trutok baut ded go elpe yumi?

• Wiskain da trutok baut ded kampot yumi?

PAINDAUT MO

Luk wanem da wod “soul” min wea Baibol.

“What Is the Soul?” (Web article)

Paindaut ip God panis ol nugudpipol wea el.

Yu Tingk El i Wan Prapa Ples Po Ban ane Sapa? (3:07)

Wiswei, yumi nid po akan prom ded pipol a?

Spirits of the Dead​—Can They Help You or Harm You? Do They Really Exist? (brochure)

Paindaut wiskain wan man bin gede kampot wen em bin lan trutok baut wanem i apen wen pipol pasawei.

“I Was Impressed by the Bibleʼs Clear, Logical Answers” (The Watchtower, February 1, 2015)