Ezequiel
19 “Ó tenke kanta knananuk triste nian* kona-ba Izraél nia xefe sira, 2 hodi dehan:
‘Ó-nia inan mak hanesan saida? Leaun-inan iha leaun sira-nia leet.
Nia toba iha leaun-aman forte sira-nia leet no haboot ninia oan sira.
3 Ninia oan ida sai boot, no sai leaun-aman neʼebé forte.+
Nia aprende oinsá atu lees animál ba pedasuk,
Nia mós han ema.
4 Nasaun sira rona kona-ba nia no kaer nia iha rai-kuak neʼebé sira keʼe,
No sira tau besi-kaʼit ba ninia inus hodi lori nia ba rai-Ejitu.+
5 Leaun-inan neʼe hein no ikusmai hatene katak ninia oan la fila ona.
Entaun nia foti ninia oan seluk no halo ninia oan neʼe sai nuʼudar leaun-aman neʼebé forte.
6 Leaun-aman neʼe mós laʼo bá-mai iha leaun sira-nia leet. Sin, nia sai leaun-aman neʼebé forte.
Nia aprende oinsá atu lees animál ba pedasuk, no nia mós han ema.+
7 Nia laʼo bá-mai besik ema nia uma aas* sira neʼebé seguru no harahun sidade sira,
Nuneʼe, rai neʼebé mamuk sai nakonu ho ninia lian.+
8 Ema husi nasaun sira neʼebé haleʼu nia mai hodi soe sira-nia rede ba nia,
No sira kaer nia iha rai-kuak neʼebé sira keʼe.
9 Sira tau besi-kaʼit ba ninia inus no hatama nia iha rede laran no sira lori nia ba liurai Babilónia.
Sira sulan nia iha neʼebá, atu ema labele rona tan ninia lian iha foho sira iha Izraél.
10 Ó-nia inan mak hanesan uvas-hun ida*+ neʼebé kuda besik bee.
Uvas neʼe fó fuan no iha sanak barak tanba iha bee barak.
11 Uvas-hun neʼe nia sanak* sira mak toos, no bele uza atu halo liurai nia ai-tonka.
Uvas neʼe sai boot no aas liu ai-hun sira seluk,
No ema bele haree uvas-hun neʼe husi dook tanba aas loos no iha tahan barak.
12 Maibé Maromak fokit sai uvas-hun neʼe ho hirus+ no soe tiha ba rai,
No anin husi parte leste* halo maran ninia fuan sira.
Ninia sanak sira neʼebé toos silu sai tiha no sai maran,+ no ahi han sanak sira-neʼe.+
13 Agora uvas-hun neʼe kuda fali iha rai-fuik
Neʼebé la iha bee no maran-dekor.+
14 Ahi lakan iha ninia sanak* sira no han tiha ninia dikin no fuan sira,
No la iha tan ai-sanak toos neʼebé bele uza atu halo liurai nia ai-tonka.+
“‘Neʼe mak knananuk triste nian, no ema sei kanta knananuk triste neʼe.’”