Isaias
3 Haree bá! Naʼi neʼebé loos, Jeová neʼebé ukun tropa lalehan nian,
Sei hasai buat oioin neʼebé apoia no ajuda Jeruzalein no Judá,
Nia sei la ajuda tan sira hodi fó paun no bee,+
2 La iha tan asuwaʼin no funu-naʼin,
Juís no profeta,+ siʼikdór no katuas,
3 Xefe,*+ ema-boot no konsellu-naʼin sira,
Ema neʼebé matenek atu halo masonik no ema neʼebé matenek atu uza biru.+
4 Haʼu sei halo labarik-mane sira sai sira-nia ulun-naʼin,
No ema neʼebé neon-namlele mak sei ukun sira.
5 Povu sei haterus malu,
Maluk sira sei hanehan malu.+
Labarik-mane sei ataka katuas,
No ema kiʼik sei kontra ema naran-boot.+
6 Sira ida-idak sei kaer metin sira-nia maun-alin iha sira-nia aman nia uma no dehan:
“Ó iha unuk, entaun ó tenke ukun ami.
Ukun fatin neʼe neʼebé rahun ona.”
7 Maibé iha loron neʼebá nia sei hatán:
“Haʼu sei la sai ema neʼebé kura imi-nia kanek;
La iha ai-han ka roupa iha haʼu-nia uma.
Keta foti haʼu nuʼudar ukun-naʼin ba povu neʼe.”
8 Jeruzalein sidi ona,
No Judá monu ona,
Tanba sira kontra Jeová ho sira-nia liafuan no hahalok;
Sira hatudu hahalok kontra iha Maromak neʼebé kmanek nia oin.+
9 Sira-nia oin rasik fó sasin hasoru sira,
No sira koʼalia nakloke kona-ba sira-nia sala hanesan ema Sodoma;+
Sira la koko atu subar sira-nia sala.
Susar ba sira, tanba sira lori ona terus ba sira-nia an rasik!
10 Fó-hatene ba ema laran-loos sira katak buat hotu sei sai diʼak ba sira;
11 Susar ba ema aat!
Terus sei kona sira,
Tanba buat neʼebé sira halo ona ba ema, ema sei halo fali ba sira!
12 Kona-ba haʼu-nia povu, sira-nia xefe fó-terus ba sira,
No feto mak ukun sira.
Haʼu-nia povu, imi-nia ulun-naʼin sira halo imi laʼo sala dalan,
No sira halo imi bilán kona-ba dalan neʼebé imi tenke laʼo.+
13 Jeová prontu ona atu tesi-lia;
Nia hamriik atu fó sai ninia desizaun ba povu.
14 Jeová sei tesi-lia ba katuas no ulun-naʼin sira husi ninia povu.
“Imi sunu ona toʼos-uvas,
No buat neʼebé imi naʼok husi ema kiak mak iha imi-nia uma.+
15 Tanbasá mak imi brani atu hanehan haʼu-nia povu
No hanehan ema kiak sira-nia oin ba rai-rahun?”+ Naʼi Ukun-Naʼin Boot Liu, Jeová neʼebé ukun tropa lalehan nian, mak dehan.
16 Jeová hatete: “Tanba Siaun nia oan-feto sira sai loko an,
Sira laʼo ho ulun foti saʼe,*
Sira piska matan no laʼo haksoit,
Hodi halo lian pulseira neʼebé iha sira-nia ain.
17 Jeová mós sei halo Siaun nia oan-feto sira-nia ulun hetan kanek oioin,
No Jeová sei halo sira-nia ulun molik.+
18 Iha loron neʼebá, Jeová sei hasai tiha sira-nia sasán murak hotu:
Kelu, bandalete, sasán furak neʼebé modelu hanesan fulan-lotuk,+
19 Brinkus, pulseira liman nian, veu,
20 Hena neʼebé kesi fuuk, pulseira ain nian, sintu furak,
Fatin mina-morin nian, biru,*
21 Kadeli iha liman, brinkus ba inus,
22 Roupa serimónia nian, unuk oioin, pasta kiʼik sira,
23 Espellu kiʼik,+ roupa husi hena-liñu,*
Turbante* no veu.
24 Sira-nia mina-bálsamu+ sei troka fali ho iis dois;
Sira-nia sintu sei troka fali ho tali;
Sira-nia fuuk kapás sei troka fali ho ulun-molik;+
Sira-nia roupa furak sei troka fali ho hena karón;*+
Sira-nia bonita sei troka fali ho fitar iha isin.*
25 Mane sira iha sidade neʼe sei mate ho surik,
No ninia asuwaʼin sira sei mate iha funu.+