Primeiru Tesalónika

5 Maun-alin sira, ema ida la presiza hakerek buat ida ba imi kona-ba tempu no loron sira neʼebé deside ona. 2 Tanba imi rasik hatene ho didiʼak katak Jeová* nia loron+ sei toʼo mai hanesan naʼok-teen iha kalan.+ 3 Bainhira sira dehan: “Dame no hakmatek!”, tuirmai sira sei lakon derrepente deʼit,+ hanesan feto isin-rua neʼebé sente moras tuur-ahi nian derrepente deʼit, no sira labele halai sees. 4 Maibé imi, maun-alin sira, imi laʼós iha nakukun laran, atu loron neʼe la kaer toman imi derrepente deʼit hanesan naroman toman naʼok-teen sira, 5 tanba imi hotu mak naroman nia oan no loron nia oan sira.+ Ita laʼós parte ba kalan ka nakukun.+

6 Tan neʼe, ita labele toba-dukur hanesan ema seluk,+ maibé mai ita hadeer nafatin+ no kontinua matan-moris.*+ 7 Tanba ema sira neʼebé toba, baibain toba iha kalan no ema sira neʼebé lanu, baibain lanu iha kalan.+ 8 Maibé kona-ba ita, ita mak loron nia oan sira, entaun mai ita matan-moris nafatin, tau fiar no domin nuʼudar besi atu proteje ita-nia hirus-matan, no tau esperansa salvasaun nian nuʼudar kapasete,+ 9 tanba Maromak hili ita laʼós atu simu ninia hirus, maibé atu hetan salvasaun+ liuhusi ita-nia Naʼi Jesus Kristu. 10 Nia mate ba ita,+ atu nuneʼe, maski ita hadeer nafatin ka toba,* ita sei moris hamutuk ho nia.+ 11 Tan neʼe, kontinua fó aten-brani* ba malu no hametin malu,+ hanesan imi halo daudaun.

12 Maun-alin sira, agora ami husu imi atu hatudu respeitu ba sira neʼebé serbisu makaʼas iha imi-nia leet no sira neʼebé dirije imi iha Naʼi no fó konsellu ba imi. 13 Hatudu bá katak imi hafolin tebes sira no hadomi sira tanba sira-nia serbisu.+ Imi hotu moris ho dame bá.+ 14 Iha parte seluk, ami husu imi, maun-alin sira, fó avizu* ba sira neʼebé la tuir ukun-fuan,+ koʼalia hodi fó kmaan ba sira neʼebé laran-triste,* apoia sira neʼebé fraku, no hatudu pasiénsia ba ema hotu.+ 15 Kuidadu bá katak ema ida la selu aat ho aat ba ema seluk,+ maibé sempre buka atu halo buat neʼebé diʼak ba malu no mós ba ema hotu.+

16 Haksolok nafatin bá.+ 17 Halo orasaun beibeik.+ 18 Fó agradese kona-ba buat hotu.+ Ida-neʼe mak Maromak nia hakarak ba imi iha Kristu Jesus. 19 Keta hanetik Maromak nia espíritu nia serbisu iha imi.*+ 20 Keta hatudu katak imi hakribi profesia sira.+ 21 Buka-hatene uluk buat hotu se neʼe mak loos ka lae,+ no kaer metin ba buat neʼebé diʼak. 22 Hasees an husi buat aat hotu.+

23 Haʼu harohan katak Maromak neʼebé fó dame sei halo imi santu* ba ninia serbisu. No maun-alin sira, haʼu harohan katak imi-nia neon,* imi-nia moris* no imi-nia isin-lolon tomak bele sai sala-laek no diʼak nafatin iha tempu neʼebé ita-nia Naʼi Jesus Kristu toʼo ona mai.*+ 24 Nia neʼebé bolu imi mak laran-metin, no nia sei halo nuneʼe duni.

25 Maun-alin sira, kontinua harohan kona-ba ami.+

26 Fó kumprimentus ba maun-alin sira hotu ho reʼi.*

27 Haʼu haruka imi hodi Naʼi nia naran atu lee karta neʼe ba maun-alin sira hotu.+

28 Haʼu hein katak ita-nia Naʼi Jesus Kristu nia laran-diʼak neʼebé boot hamutuk ho imi.