Segundu Timóteo

4 Iha Maromak no Kristu Jesus nia oin, Jesus neʼebé sei tesi-lia+ ba ema moris no ema mate,+ no sei hatudu sai ninia an+ no ninia Ukun,*+ haʼu haruka ó atu halo tuir mandamentu tuirmai neʼe: 2 Haklaken Maromak nia liafuan bá;+ halo ida-neʼe ho urjente iha tempu neʼebé diʼak no iha tempu neʼebé susar. Korrije,+ fó avizu makaʼas no fó konsellu* ho pasiénsia no ho matenek atu hanorin.+ 3 Tanba tempu sei toʼo mai bainhira sira sei la simu tan hanorin neʼebé loos,*+ maibé sira sei halibur mestre sira neʼebé koʼalia deʼit buat neʼebé sira hakarak atu rona hodi tuir sira-nia hakarak rasik.+ 4 Sira sei fila kotuk hodi la rona tan lia-loos, no tau atensaun fali ba istória falsu sira. 5 Maibé kona-ba ó, kontinua matan-moris iha situasaun hotu, tahan susar sira,+ halo serbisu nuʼudar haklaken-naʼin kona-ba liafuan diʼak,* no kumpre didiʼak ó-nia serbisu ba Maromak.+

6 Tanba haʼu sai ona hanesan sakrifísiu hemu nian+ neʼebé fui daudaun iha altár leten, no tempu atu haʼu sai livre+ besik loos ona. 7 Haʼu halo tiha ona funu neʼebé diʼak,+ haʼu halai ona toʼo rohan,+ haʼu moris tuir ona fiar. 8 Husi ohin ba oin, juís neʼebé iha hahalok loos,+ katak Naʼi, rai hela ona koroa hahalok loos nian+ ba haʼu. Iha loron neʼebá, nia sei fó koroa neʼe ba haʼu nuʼudar kolen,+ laʼós ba haʼu deʼit, maibé mós ba sira hotu neʼebé hein namanas atu nia hatudu sai ninia an.

9 Hakaʼas an atu mai haree haʼu lalais. 10 Demas+ husik ona haʼu tanba nia hadomi mundu* neʼe, no nia bá tiha ona Tesalónika; Cresente bá ona Galásia, no Tito bá ona Dalmásia. 11 Lucas deʼit mak hamutuk ho haʼu. Lori mós Marcos ho ó, tanba nia sei ajuda tebes haʼu iha haʼu-nia serbisu ba Maromak. 12 Maibé haʼu haruka ona Tíkiko+ ba Éfeso. 13 Kuandu ó mai, lori mós roupa neʼebé haʼu husik hela ba Carpo iha Tróade, no lori mós livru sira,* liuliu livru sira neʼebé halo husi animál kulit.

14 Badaen-riti naran Alexandre halo buat aat barak mai haʼu. Jeová* sei selu fali nia tuir ninia hahalok sira.+ 15 Ó mós tenke matan-moris kona-ba nia, tanba nia kontra makaʼas liafuan neʼebé ami hatoʼo ona.

16 La iha ema ida mak apoia haʼu bainhira haʼu defende haʼu-nia an ba dala primeiru iha naʼi-ulun sira-nia oin, maibé sira hotu husik hela haʼu. Haʼu hein katak Maromak sei la fó-sala ba sira kona-ba neʼe. 17 Maibé Naʼi hamriik besik haʼu no fó kbiit mai haʼu, atu nuneʼe haʼu bele halo serbisu haklaken toʼo hotu no nasaun hotu bele rona kona-ba neʼe;+ no Naʼi salva ona haʼu husi leaun nia ibun.+ 18 Naʼi sei hasai haʼu husi hahalok aat hotu no sei salva haʼu hodi lori haʼu ba ninia Ukun* iha lalehan.+ Fó glória ba nia tinan ba tinan nafatin. Amen.

19 Fó haʼu-nia kumprimentus ba Prisca* no Áquila+ no ba Onesíforo+ nia umakain.

20 Erasto+ hela nafatin iha Korinto, maibé haʼu husik Trófimo+ hela iha Mileto tanba nia moras. 21 Hakaʼas an bá atu mai vizita haʼu antes tempu malirin.

Eubulo haruka kumprimentus ba ó, nuneʼe mós ho Pudente, Lino, Cláudia no maun-alin sira hotu.

22 Haʼu hein katak Naʼi sei haraik bensaun ba espíritu* neʼebé ó hatudu, no haraik ninia laran-diʼak neʼebé boot ba imi hotu.