“Laʼo bá no hanorin ema . . . atu sai haʼu-nia dixípulu”

1-6. Konta toʼok esperiénsia kona-ba oinsá Testemuña sira haklaken iha situasaun oioin.

IRMÁN joven ida neʼebé hela iha rai-Gana naran Rebecca hatete katak nia haree ninia eskola nuʼudar ninia haklaken-fatin. Nia sempre lori publikasaun sira kona-ba Bíblia iha ninia pasta. Durante tempu deskansa, nia buka oportunidade atu haklaken ba ninia kolega eskola sira. Ninia kolega eskola balu mós komesa estuda Bíblia ho nia.

² Iha illa Madagaskar, besik Áfrika leste, feen-laʼen neʼebé serbí nuʼudar pioneiru regulár laʼo dook kilómetru 25 iha loron manas atu bá knua kiʼik neʼebé izoladu. Sira estuda ho ema balu iha knua neʼe.

³ Atu bele haklaken ba ema neʼebé hela besik mota Paraguai no mota Paraná, Testemuña sira iha rai-Paraguai hamutuk ho Testemuña seluk husi nasaun 15 serbisu hamutuk atu halo ró ida. Ró neʼe boot no ema naʼin-12 bele hela iha laran. Irmaun-irmán sira uza ró neʼe atu haklaken ho laran-manas iha área sira neʼebé susar atu vizita.

⁴ Testemuña sira iha Alaska aproveita oportunidade úniku atu haklaken durante tempu neʼebé iha turista barak. Baibain durante tempu neʼe, ró boot barak lori turista husi rai oioin mai atu vizita. Entaun irmaun-irmán sira haklaken ho karrosa iha ponte-kais no hatudu ita-nia publikasaun iha língua oioin. Iha Alaska, irmaun-irmán sira mós uza aviaun atu haklaken iha fatin izoladu sira, no fó oportunidade ba ema Aleútes, Atapascas, Tsimshians, no Tlingits atu rona liafuan diʼak.

⁵ Irmaun Larry husi Texas, Estadus Unidus, iha fatin espesiál atu haklaken, neʼe mak hela-fatin ba ferik-katuas sira, no nia hela iha neʼebá. Maski nia tuur deʼit iha kadeira-roda tanba asidente, maibé nia kontinua buka oportunidade atu haklaken. Nia haklaken ba ema seluk kona-ba Maromak nia Ukun no ninia esperansa katak iha mundu foun nia bele laʼo fali.—Isa 35:5, 6.

⁶ Atu bele asiste asembleia iha rai-Myanmar nia parte norte, irmaun-irmán balu halo viajen loron tolu ho ró husi sidade Mandalay. Sira hakarak tebes atu haklaken liafuan diʼak, tan neʼe sira lori ita-nia publikasaun sira atu fahe ba pasajeiru seluk. Tempu ida-idak kuandu ró para iha sidade ka knua ida, sira tun husi ró atu haklaken lalais iha fatin sira-neʼe hodi fahe publikasaun sira. Irmaun-irmán sira-neʼe mós haklaken ba pasajeiru foun neʼebé foin saʼe ba ró neʼe.

7. Iha dalan saida deʼit mak Testemuña sira haklaken kona-ba Maromak nia Ukun? Saida mak sira-nia objetivu?

⁷ Hanesan temi ona iha ezemplu sira-neʼe, Jeová nia atan iha mundu tomak laran-manas atu “fó sasin ho didiʼak kona-ba Maromak nia Ukun”. (Após 28:23) Sira haklaken husi uma ba uma, iha dalan, liuhusi karta, no mós liuhusi telefone. Irmaun-irmán sira mós buka oportunidade atu haklaken kona-ba Maromak nia Ukun bainhira saʼe bís, laʼo halimar iha jardín, ka deskansa iha serbisu-fatin. Maski haklaken iha dalan neʼebé la hanesan, maibé sira-nia objetivu mak atu haklaken ba ema iha fatin oioin.—Mt 10:11.

8, 9. (a) Tanbasá ita bele dehan katak serbisu haklaken mak hanesan milagre ida? (b) Neʼe hamosu pergunta saida, no oinsá ita bele hetan ninia resposta?

⁸ Ita mós hola parte ka lae iha serbisu haklaken kona-ba Maromak nia Ukun iha rai 235 liu? Se nuneʼe, Ita bele sente kontente tanba Ita ajuda ema barak hatene kona-ba liafuan diʼak! Serbisu haklaken neʼebé Jeová nia povu kumpre iha mundu tomak mak hanesan milagre ida. Maski iha susar oioin, inklui governu bandu, no ema fó-terus, maibé Testemuña ba Jeová fó sasin ho didiʼak kona-ba Maromak nia Ukun ba ema husi nasaun oioin.

⁹ Hanoin toʼok, maski ita hasoru susar oioin no Satanás koko atu hapara ita-nia serbisu haklaken, maibé serbisu neʼe laʼo ba oin nafatin. Oinsá neʼe bele akontese? Atu hatán ba pergunta neʼe, ita presiza hanoin fali ba apóstolu sira-nia tempu. Tuir loloos, Testemuña ba Jeová kontinua halo serbisu neʼebé ema Kristaun sira iha tempu uluk halo.

Serbisu neʼebé importante tebes

10. Saida mak serbisu neʼebé importante liu ba Jesus? Saida mak Jesus hatene kona-ba serbisu neʼe?

¹⁰ Kuandu Jesus iha rai, serbisu neʼebé importante liu ba nia mak haklaken liafuan diʼak kona-ba Maromak nia Ukun. Nia mak harii kongregasaun Kristaun no kongregasaun Kristaun kontinua halo serbisu neʼe toʼo ohin loron. Jesus hatete: “Haʼu tenke haklaken mós liafuan diʼak kona-ba Maromak nia Ukun iha sidade sira seluk, tanba neʼe mak Maromak haruka haʼu mai.” (Lc 4:43) Jesus hahú serbisu neʼe, maibé nia hatene katak nia labele halo neʼe mesak toʼo hotu. Lakleur antes nia mate, nia fó-hatene nanis katak ema sei haklaken kona-ba Maromak nia Ukun “iha nasaun hotu”. (Mc 13:10) Maibé, sé mak sei halo serbisu neʼe no oinsá sira bele kumpre ida-neʼe?

11. Jesus haruka ninia dixípulu sira atu halo saida? Sira sei simu ajuda iha dalan oinsá?

¹¹ Depois Jesus mate no moris hiʼas, nia mosu ba ninia dixípulu sira no haruka sira atu halo serbisu importante, hodi dehan: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira hodi Aman, Oan no espíritu santu nia naran. Hanorin sira atu halo tuir mandamentu hotu neʼebé haʼu fó ona ba imi. Hanoin-hetan bá katak haʼu sei hamutuk nafatin ho imi toʼo mundu neʼe nia rohan.” (Mt 28:19, 20) Jesus nia liafuan “haʼu sei hamutuk nafatin ho imi” hatudu katak Jesus sei ajuda dixípulu sira atu haklaken no hanorin. Sira presiza Jesus nia ajuda tanba Jesus fó-hatene nanis katak ‘nasaun hotu sei odi sira’. (Mt 24:9) Dixípulu sira hatene katak Jesus promete atu ajuda sira iha dalan seluk tan. Antes Jesus saʼe ba lalehan, nia fó-hatene sira katak sira sei simu kbiit husi espíritu santu atu bele haklaken “toʼo rai sira neʼebé dook liu iha mundu”.—Após 1:8.

12. Ita presiza buka-hatene resposta ba pergunta importante saida deʼit? Tanbasá ita tenke buka-hatene resposta ba pergunta sira-neʼe?

¹² Hanoin toʼok kona-ba pergunta importante sira tuirmai: Jesus nia apóstolu no dixípulu sira iha tempu neʼebá haree serbisu neʼe mak importante duni ka lae? Ema Kristaun sira-neʼe haklaken ho didiʼak kona-ba Maromak nia Ukun maski ema fó-terus ka lae? Sira hetan duni apoiu husi Jeová, Jesus, anju, no espíritu santu atu halo serbisu neʼe ka lae? Ita bele hetan resposta sira iha livru Apóstolu iha Bíblia. Ita tenke buka-hatene ninia resposta. Tanbasá? Tanba Jesus promete katak serbisu neʼe sei kontinua “toʼo mundu neʼe nia rohan”. No ema Kristaun hotu neʼebé loos presiza halo tuir Jesus nia mandamentu atu haklaken, inklui ita neʼebé moris iha loron ikus sira. Tan neʼe, ita hakarak estuda kona-ba akontesimentu sira husi livru Apóstolu.

Introdusaun ba livru Apóstolu

13, 14. (a) Sé mak hakerek livru Apóstolu, no hakerek-naʼin neʼe hetan informasaun husi neʼebé? (b) Livru Apóstolu fó sai kona-ba saida deʼit?

¹³ Sé mak hakerek livru Apóstolu? Livru neʼe la fó sai sé mak hakerek, maibé husi liafuan primeiru ita bele hatene katak ema neʼebé hakerek livru Apóstolu mak hakerek livru Lucas. (Lc 1:1-4; Após 1:1, 2) Tan neʼe, ba tempu kleur ona ema rekoñese katak Lucas mak hakerek livru Apóstolu. Bíblia bolu Lucas nuʼudar “doutór” no nia matenek kona-ba istória. (Kol 4:14) Livru neʼe fó sai buat neʼebé akontese durante tinan 28 nia laran, hahú husi Jesus saʼe ba lalehan iha tinan 33 EC toʼo 61 EC kuandu Paulo tama komarka iha Roma. Lucas mós iha durante akontesimentu sira-neʼe balu. Ita bele hatene ida-neʼe tanba dala ruma nia uza liafuan “ami” bainhira hakerek akontesimentu balu. (Após 16:8-10; 20:5; 27:1) Lucas hakarak hakerek ho loloos buat neʼebé akontese. Tan neʼe nia husu uluk ba Paulo, Barnabé, Filipe, no ema seluk antes hakerek livru Apóstolu.

¹⁴ Livru Apóstolu fó sai kona-ba saida deʼit? Iha evanjellu, Lucas fó sai kona-ba buat neʼebé Jesus koʼalia no halo. Maibé iha livru Apóstolu, Lucas fó sai kona-ba buat neʼebé Jesus nia dixípulu sira koʼalia no halo. Entaun livru Apóstolu konta kona-ba oinsá sira halo serbisu neʼebé kmanek no importante maski ema barak hanoin katak sira mak “ema la eskola no ema baibain deʼit”. (Após 4:13) Maromak nia espíritu santu dirije Lucas atu hakerek kona-ba oinsá kongregasaun Kristaun hahú no sai boot liután. Livru Apóstolu esplika kona-ba oinsá ema Kristaun iha tempu neʼebá haklaken no mós sira-nia atitude. (Após 4:31; 5:42) Livru neʼe mós esplika ho klaru oinsá espíritu santu ajuda atu habelar liafuan diʼak. (Após 8:29, 39, 40; 13:1-3; 16:6; 18:24, 25) Hanesan livru sira seluk iha Bíblia, livru Apóstolu mós fokus kona-ba oinsá Maromak nia Ukun sei halo santu Maromak nia naran, no mós fó sai kona-ba oinsá apóstolu sira haklaken maski ema kontra.—Após 8:12; 19:8; 28:30, 31.

15. Ita bele hetan benefísiu saida hodi estuda livru Apóstolu?

¹⁵ Bainhira ita estuda kona-ba livru Apóstolu, neʼe bele hametin ita-nia fiar. Se ita hanoin didiʼak kona-ba oinsá dixípulu sira haklaken ho laran-manas no aten-brani, ita sei hafolin liután serbisu neʼebé sira halo. Neʼe sei motiva ita atu banati-tuir sira-nia fiar no ajuda ita atu halo tuir Jesus nia mandamentu atu “laʼo bá no hanorin ema . . . atu sai haʼu-nia dixípulu”. Livru neʼe nia objetivu mak atu ajuda Ita estuda didiʼak kona-ba livru Apóstolu.

Livru neʼebé ajuda ita

16. Saida mak objetivu tolu husi livru neʼe?

¹⁶ Saida mak objetivu husi livru neʼe? Iha objetivu tolu: (1) Atu hametin ita-nia fiar katak Jeová uza ninia espíritu santu atu apoia serbisu haklaken no hanorin, (2) atu motiva ita haklaken ho laran-manas hodi aprende husi Kristu nia dixípulu sira, no (3) atu ajuda ita respeitu liután Jeová nia organizasaun no ema neʼebé nia uza atu dirije serbisu haklaken no kongregasaun.

17, 18. Livru neʼe organiza iha dalan oinsá? No informasaun saida mak bele ajuda Ita bainhira estuda mesak?

¹⁷ Livru neʼe organiza iha dalan oinsá? Livru neʼe fahe ba parte ualu, parte ida-idak esplika informasaun balu husi livru Apóstolu. Kapítulu sira la esplika versíkulu ida-idak husi livru Apóstolu, maibé ajuda ita atu aprende husi akontesimentu sira neʼebé temi iha livru Apóstolu no ajuda ita aplika buat neʼebé ita aprende. Iha kapítulu ida-idak, iha liafuan introdusaun neʼebé esplika pontu importante husi kapítulu neʼe no mós eskritura ida neʼebé ita sei koʼalia iha kapítulu neʼe.

¹⁸ Iha mós buat seluk tan husi livru neʼe neʼebé ajuda Ita bainhira estuda mesak. Dezeñu sira ajuda Ita imajina akontesimentu sira iha livru Apóstolu. Iha kapítulu balu, iha mós kaixa sira neʼebé fó sai informasaun estra. Kaixa balu fó sai informasaun kona-ba fiar-naʼin sira neʼebé ita bele banati-tuir. Kaixa seluk tan fó sai informasaun kona-ba fatin, akontesimentu, kostume, no ema seluk neʼebé temi iha livru Apóstolu.

19. Dala ruma ita presiza halo saida?

¹⁹ Livru neʼe bele ajuda Ita analiza Ita-nia an. Maski Ita serbí Jeová kleur ona ka lae, diʼak atu uza tempu atu analiza buat neʼebé importante liu iha Ita-nia moris no mós Ita-nia hanoin kona-ba serbisu haklaken. (2 Kor 13:5) Husu Ita-nia an: ‘Haʼu nafatin haree serbisu haklaken mak buat neʼebé importante liu ka lae? (1 Kor 7:29-31) Haʼu haklaken liafuan diʼak ho laran-manas no fiar metin ka lae? (1 Tes 1:5, 6) Haʼu hakaʼas an tuir haʼu-nia situasaun atu hola parte beibeik iha serbisu haklaken no hanorin ka lae?’—Kol 3:23.

20, 21. Tanbasá serbisu haklaken mak importante tebes, no ita hakarak deside metin atu halo saida?

²⁰ Keta haluha katak serbisu neʼebé importante liu mak haklaken no hanorin ema atu sai Jesus nia dixípulu. Nuʼudar tempu liu daudaun, serbisu haklaken mós sai importante liután. Mundu nia rohan besik ona. Agora ema presiza rona liafuan diʼak atu bele moris liu Armagedon. Karik ema barak tan sei hakarak rona ita-nia mensajen. (Após 13:48) Ita iha responsabilidade atu ajuda sira antes tarde.—1 Tim 4:16.

²¹ Tan neʼe, importante tebes ba ita atu banati-tuir ema Kristaun iha apóstolu sira-nia tempu kona-ba laran-manas. Bainhira Ita estuda didiʼak livru neʼe, hanoin kona-ba oinsá Ita bele haklaken ho laran-manas no aten-brani, no deside metin atu kontinua “fó sasin ho didiʼak kona-ba Maromak nia Ukun”.—Após 28:23.