Haksolok hodi estuda livru Tuir Loloos, Saida mak Bíblia Hanorin?
1 Livru Tuir Loloos, Saida mak Bíblia Hanorin? mak livru kapás neʼebé ita kontinua uza atu hanorin ema kona-ba lia-loos importante husi Maromak nia Liafuan. Husi tempu neʼebé ita simu livru neʼe iha Timor-Leste, ita uza ona atu ajuda ema barak hatene lia-loos kona-ba Maromak Jeová, no ikusmai sira barak dedika sira-nia an ba Maromak no hetan batizmu. Tanba livru neʼe hanorin lia-loos sira neʼebé importante, no ita uza beibeik iha serbisu haklaken, diʼak atu ita estuda dala ida tan. Nuneʼe, iha semana komesa 18 Abríl 2011 ita sei hahú estuda livru neʼe iha ita-nia reuniaun, Estudu Bíblia iha Kongregasaun.
2 Irmaun neʼebé dirije Estudu Bíblia iha Kongregasaun sei dada rona-naʼin nia atensaun ba pergunta sira neʼebé loke kapítulu ida-idak. Tuirmai nia sei halaʼo estudu hodi uza pergunta sira iha pájina nia kraik. Diʼak atu lee no esplika eskritura neʼebé importante. Diʼak mós atu uza kaixa “Saida mak Bíblia hanorin” iha kapítulu ida-idak nia rohan. Informasaun iha kaixa neʼe fó resposta neʼebé mai husi Bíblia ba pergunta sira neʼebé loke kapítulu ida-idak. Ita sei kontente atu fó komentáriu tanba livru neʼe esplika ho klaru lia-loos hodi uza liafuan neʼebé simples no fasil atu komprende.
3 Iha livru neʼe nia apéndise esplika liután kona-ba informasaun oioin. Ita bele uza ida-neʼe se estudante Bíblia hakarak hatene klaru liután kona-ba informasaun ruma. Dala ruma ita sei uza informasaun husi apéndise iha Estudu Bíblia iha Kongregasaun. Kuandu uza informasaun husi apéndise iha reuniaun, irmaun neʼebé iha knaar atu lee sei lee parágrafu hotu husi apéndise neʼe. Se informasaun husi apéndise mak naruk uitoan, lee no koʼalia kona-ba parágrafu balu hamutuk. Maski apéndise la iha pergunta sira, maibé irmaun neʼebé dirije estudu sei halo pergunta hodi rona-naʼin sira bele fó komentáriu.
4 Ita sei estuda kedan informasaun barak kuandu estuda livru Bíblia Hanorin iha kongregasaun. Maibé, kuandu ita estuda ho ema neʼebé interese ita bele uza tempu liután atu hanorin, liuliu se ema neʼe seidauk hatene buat barak kona-ba Bíblia. (Apos 26:28, 29) Kuandu ita estuda ho ema, ita presiza koʼalia no husu pergunta kona-ba eskritura sira, esplika ilustrasaun sira, no buat seluk tan. Nuneʼe, mai ita hotu hakaʼas an atu tuir reuniaun semana-semana no hola parte iha Estudu Bíblia iha Kongregasaun hodi uza livru Tuir Loloos, Saida mak Bíblia Hanorin?