Banati-tuir Sira-nia Fiar
1. Livru saida mak ita sei uza iha Estudu Bíblia iha Kongregasaun semana komesa husi 19 Outubru?
1 Semana komesa husi 19 Outubru 2015, ita sei estuda hamutuk livru Banati-tuir Sira-nia Fiar iha Estudu Bíblia iha Kongregasaun. Livru neʼe koʼalia kona-ba feto no mane fiar-naʼin hamutuk naʼin-14. Dalan neʼebé livru neʼe konta sira-nia moris halo ita sente hanesan ita mós hamutuk hela ho sira iha tempu neʼebá, no ita bele haree katak istória sira-neʼe tebes duni tanba ema sira-neʼe mós hasoru susar bainhira sira hakarak serbí Jeová. Livru neʼe mós hanorin ita oinsá mak ita bele uza sira-nia ezemplu atu halo desizaun iha ita-nia moris ohin loron.—Ebreu 6:12.
2. Esplika toʼok tanbasá mak livru Banati-tuir Sira-nia Fiar neʼe diʼak tebes.
2 Tanbasá mak livru neʼe diʼak: Ita bele haree mapa no tempu akontesimentu sira neʼebé sei ajuda ita atu hatene ema ida-idak moris iha neʼebé no iha tempu saida. Iha kapítulu ida-idak iha “Pergunta atu hanoin kleʼan” neʼebé sei ajuda ita atu medita kona-ba istória ida no saida mak ita bele aprende husi istória neʼe. Livru neʼe mós iha dezeñu ho kór oioin neʼebé haree hanesan moris.
3. Saida mak ita bele halo atu ita bele aprende buat ruma husi livru neʼe?
3 Oinsá atu uza didiʼak: Iha Grupu Administradór nia karta, liafuan neʼebé sira koʼalia atu fó anima ita hahú hanesan neʼe: “Envolve an iha istória sira, hanoin toʼok katak imi mós iha tempu neʼebá. Koko toʼok atu sente buat neʼebé ema iha istória sira-neʼe sente, haree buat neʼebé sira haree. Husu ba imi-nia an: ‘Se haʼu hasoru situasaun ruma hanesan ho sira-nian, haʼu sei halo tuir dalan neʼebé sira hasoru situasaun neʼe ka lae?” Envolve an la dehan katak ita bele siʼik tun-saʼe, maibé hanoin didiʼak saida mak eskritura koʼalia kona-ba istória neʼe no komprende sira-nia sentimentu no situasaun neʼebé sira hasoru. Atu bele halo nuneʼe, ita presiza duni tempu no medita didiʼak. (Neemias 8:8) Se lisaun ida mak remata iha kapítulu nia klaran, uza pergunta ida ka rua atu halo rezumu ba lisaun foin estuda neʼe. No se estudu ida mak hahú husi kapítulu ida-nia klaran, ema neʼebé dirije estudu sei uza segundu 30 toʼo 60 atu koʼalia fali uitoan kona-ba buat neʼebé ita estuda semana kotuk.
4. Tanbasá mak ita presiza estuda livru Banati-tuir Sira-nia Fiar?
4 Ohin loron, ita moris iha mundu neʼebé ema sempre koko atu halakon ka halo ita-nia fiar sai fraku. Livru neʼe, no mós série iha Livru Haklaken kona-ba Banati-tuir Sira-nia Fiar mak hanesan prezente ida husi Jeová atu ajuda hametin ita-nia fiar. (Tiago 1:17) Mai ita aproveita didiʼak ajuda neʼebé Jeová fó ba ita, hodi tuir beibeik Estudu Bíblia iha Kongregasaun no partisipa ho laran-manas bainhira ita estuda hamutuk livru neʼe!