Ebreu

10 Ukun-Fuan mak lalatak+ ba buat diʼak neʼebé atu mai,+ maibé lalatak neʼe laʼós realidade ba buat diʼak neʼe. Tan neʼe Ukun-Fuan* nunka bele halo ema sai perfeitu+ liuhusi hasaʼe sakrifísiu neʼebé hanesan tinan-tinan. 2 Se lae karik, ema la presiza hasaʼe tan sakrifísiu, tanba sira neʼebé halo serbisu sagradu sai moos ona dala ida ba nafatin no sira-nia konxiénsia la sente sala tan. 3 Maibé, sakrifísiu sira neʼebé hasaʼe tinan-tinan fó-hanoin sira kona-ba sala,+ 4 tanba karau-aman no bibi-timur nia raan nunka bele hasai sala.

5 Nuneʼe, bainhira nia mai iha mundu, nia dehan: “‘Ita lakohi simu sakrifísiu no prezente sira, maibé Ita prepara isin-lolon ida mai haʼu. 6 Ita la haksolok ho sakrifísiu sunu nian neʼebé hasaʼe tomak no sakrifísiu sala nian.’+ 7 Tuirmai haʼu dehan: ‘Haʼu mai ona. Iha livru laran* hakerek nanis ona kona-ba haʼu. Oh Maromak, haʼu mai atu halo tuir Ita-nia hakarak.’”+ 8 Primeiru nia dehan: “Ita lakohi simu no la haksolok ho sakrifísiu, prezente, sakrifísiu sunu nian neʼebé hasaʼe tomak no sakrifísiu sala nian”, neʼe katak sakrifísiu sira neʼebé ema hasaʼe tuir Ukun-Fuan. 9 Tuirmai, nia dehan: “Haʼu mai ona atu halo tuir Ita-nia hakarak.”+ Nia halakon tiha arranju ida primeiru atu nuneʼe halo fali ida neʼebé segundu. 10 Ho Maromak nia “hakarak”+ neʼe ita sai santu* ona liuhusi Jesus Kristu nia isin neʼebé nia hasaʼe nuʼudar sakrifísiu dala ida deʼit ba nafatin.+

11 No mós, loron ba loron amlulik hotu hamriik iha ida-idak nia fatin hodi halo serbisu santu+ no hasaʼe beibeik sakrifísiu neʼebé hanesan,+ neʼebé nunka bele halakon ema nia sala iha dalan kompletu.+ 12 Maibé mane neʼe hasaʼe sakrifísiu ida deʼit ba nafatin atu hamoos sala no tuur ona iha Maromak nia liman sorin loos,+ 13 hahú husi tempu neʼe ba oin, nia hein toʼo Maromak tau ninia inimigu sira iha ninia ain okos.*+ 14 Tanba liuhusi sakrifísiu ida deʼit mak nia halo ona ema neʼebé santu atu sai perfeitu+ ba nafatin. 15 Liután neʼe, espíritu santu mós fó sasin ba ita, hodi dehan: 16 “‘Neʼe mak aliansa neʼebé haʼu sei halo ho sira liutiha tempu neʼebá’, Jeová* mak dehan. ‘Haʼu sei tau haʼu-nia ukun-fuan iha sira-nia fuan, no haʼu sei hakerek ukun-fuan neʼe iha sira-nia neon.’”+ 17 Tuirmai nia dehan: “Haʼu sei la hanoin-hetan tan sira-nia sala no sira-nia hahalok neʼebé la loos.”+ 18 Se Maromak fó ona perdua ba sala sira-neʼe hotu, entaun la presiza tan hasaʼe sakrifísiu ba sala.

19 Neʼe duni, maun-alin sira, tanba Jesus nia raan halo ita sai brani* atu laʼo iha dalan neʼebé lori ita tama ba fatin santu+ 20 neʼebé nia loke* ona ba ita nuʼudar dalan foun neʼebé lori ita ba moris. Nia halo nuneʼe hodi tama liuhusi kortina,*+ neʼe katak, ninia isin, 21 no mós tanba ita iha amlulik neʼebé boot liu neʼebé tau matan ba Maromak nia umakain,+ 22 mai ita hakbesik ba Maromak ho laran-moos no fiar tomak, tanba ita-nia fuan hamoos ona* husi konxiénsia neʼebé aat,+ no ita-nia isin fase ona ho bee moos.+ 23 Mai ita fó sai nafatin ita-nia esperansa ba ema hotu hodi la nakdedar,+ tanba ida neʼebé fó ita promesa neʼe mak laran-metin. 24 No mai ita hanoin malu hodi fó laran-manas ba malu* atu hatudu domin no hahalok diʼak,+ 25 no maski ema balu sai toman ona atu la halibur hamutuk,*+ maibé imi keta haluha atu halibur hamutuk, no fó aten-brani ba malu,+ liuliu bainhira imi haree loron neʼe besik daudaun ona.+

26 Tanba se ita halo beibeik sala ho neon bainhira ita hetan ona koñesimentu neʼebé loos kona-ba lia-loos,+ sei la iha tan sakrifísiu ba sala,+ 27 maibé sei hein ba kastigu neʼebé hamosu taʼuk no hirus neʼebé lakan hanesan ahi, neʼebé sei han mohu ema sira neʼebé kontra.+ 28 Ema neʼebé la halo tuir Moisés nia Ukun-Fuan tenke hetan kastigu-mate la ho laran-sadiʼa kuandu iha ema naʼin-rua ka tolu neʼebé sai sasin.+ 29 Se nuneʼe, tuir imi-nia hanoin oinsá? Ema neʼebé hakribi Maromak nia Oan-Mane, no la hafolin raan aliansa nian+ neʼebé halo ema neʼe santu ona, no koʼalia aat* Maromak nia espíritu neʼebé nia fó ho laran-diʼak neʼebé boot, ema neʼe merese simu kastigu boot liután, loos ka lae?+ 30 Tanba ita hatene Maromak neʼebé dehan: “Haʼu mak iha direitu atu selu fali; haʼu sei selu fali hahalok aat sira”; no iha eskritura dehan: “Jeová* sei tesi-lia ba ninia povu.”+ 31 Monu ba Maromak neʼebé moris nia liman mak buat neʼebé halo ema taʼuk.

32 Maibé, kontinua hanoin-hetan loron uluk nian, bainhira imi simu ona naroman,+ imi tahan terus makaʼas hamutuk ho susar oioin. 33 Iha tempu neʼebá, dala ruma ema hamoe imi no fó-terus ba imi iha ema barak nia oin,* no dala ruma imi apoia* sira neʼebé hetan terus hanesan neʼe. 34 Tanba imi hanoin sira neʼebé iha komarka laran no imi la lakon imi-nia ksolok kuandu ema hadau imi-nia sasán,+ tanba hatene katak imi hetan liman-rohan neʼebé diʼak liu no ba nafatin.+

35 Tan neʼe, keta lakon imi-nia aten-brani,* neʼebé sei lori kolen boot ba imi.+ 36 Tanba imi presiza tahan,+ atu nuneʼe, bainhira imi halo tiha Maromak nia hakarak, imi bele simu buat neʼebé nia promete ona. 37 Tanba hela “tempu uitoan deʼit ona”,+ no “ida neʼebé atu mai sei toʼo no nia sei la demora”.+ 38 “Maibé haʼu-nia ema laran-loos sei moris tanba fiar”,+ no “haʼu* sei la kontente ho nia se nia dada an”.+ 39 Ita laʼós ema neʼebé taʼuk hodi dada an no lakon moris,+ maibé ita mak ema neʼebé iha fiar no bele kontinua moris.*