Primeiru Krónikas

28 Tuirmai David halibur Izraél nia ulun-naʼin hotu iha Jeruzalein: ulun-naʼin ba suku sira, xefe ba grupu sira+ neʼebé serbí liurai, xefe ba tropa naʼin-1.000 no xefe ba tropa naʼin-100,+ xefe neʼebé tau matan ba liurai nia sasán hotu no animál-hakiak+ no mós tau matan ba liurai nia oan-mane sira,+ hamutuk ho ema-boot neʼebé serbisu iha palásiu ho mane hotu neʼebé kbiit boot no matenek.+ 2 Tuirmai Liurai David hamriik no dehan:

“Oh haʼu-nia maun-alin sira no haʼu-nia povu, rona mai haʼu. Haʼu hakarak tebes atu harii uma ida ba Jeová nia Arka Aliansa nian no mós ba ita-nia Maromak atu tau ain,+ no haʼu prepara ona buat hotu atu harii uma neʼe.+ 3 Maibé Maromak loos hatete ba haʼu: ‘Ó sei la harii uma ida ba haʼu-nia naran,+ tanba ó mak funu-naʼin, no oho ona ema barak.’*+ 4 Maski nuneʼe, Jeová, Izraél nia Maromak, hili haʼu husi haʼu-nia aman nia umakain tomak hodi sai liurai atu ukun Izraél ba nafatin,+ tanba nia hili ona Judá nuʼudar ulun-naʼin.+ Nia hili haʼu husi Judá nia umakain, husi haʼu-nia aman nia umakain.+ No husi haʼu-nia aman nia oan-mane sira-nia leet, nia simu haʼu no foti haʼu nuʼudar liurai ba Izraél tomak.+ 5 Jeová haraik ona bensaun hodi haʼu iha oan-mane barak,+ no iha haʼu-nia oan-mane hotu nia leet, nia hili haʼu-nia oan-mane Salomão+ atu tuur iha Jeová nia kadunan hodi ukun Izraél.+

6 “Nia hatete ba haʼu: ‘Ó-nia oan-mane Salomão mak sei harii haʼu-nia uma no haʼu-nia pátiu* sira, tanba haʼu hili ona nia nuʼudar haʼu-nia oan-mane no haʼu sei sai ninia aman.+ 7 Haʼu sei hametin ninia pozisaun nuʼudar liurai ba nafatin+ se nia laran-metin atu kumpre haʼu-nia mandamentu sira no haʼu-nia desizaun sira,+ hanesan agora nia halo daudaun.’ 8 Entaun iha ema Izraél hotu nia oin, neʼe katak Jeová nia kongregasaun, no iha ita-nia Maromak nia oin, haʼu dehan ba imi: Halo tuir ho didiʼak no buka-hatene Jeová, imi-nia Maromak, nia mandamentu hotu, atu nuneʼe imi bele simu rai neʼebé diʼak+ no fó tutan neʼe nuʼudar liman-rohan ba imi-nia oan-mane sira ba nafatin.

9 “Kona-ba ó, haʼu-nia oan-mane Salomão, koñese bá ó-nia aman nia Maromak no serbí nia ho laran tomak+ no ho laran neʼebé haksolok,* tanba Jeová buka-hatene ema nia laran hotu,+ no nia hatene ema nia hanoin no hakarak hotu.+ Se ó buka nia, ó sei hetan nia,*+ maibé se ó husik nia, nia mós sei la simu ó ba nafatin.+ 10 Agora Jeová hili ona ó atu harii uma ida nuʼudar fatin sagradu. Entaun sai aten-brani no bá halo serbisu.”

11 Tuirmai David entrega dezeñu+ ba ninia oan-mane Salomão. Dezeñu neʼe hatudu kona-ba templu nia varanda+ no ninia uma sira, templu nia armazén, ninia kuartu sira iha leten, kuartu sira iha laran, no uma halo dame nian.*+ 12 Nia fó dezeñu kona-ba buat hotu neʼebé Maromak nia espíritu fó sai ona ba nia. Dezeñu kona-ba pátiu sira+ iha Jeová nia uma, sala han-fatin hotu haleʼu pátiu sira, osan-fatin iha Maromak loos nia uma, no fatin atu rai sasán sira neʼebé halo santu ona.*+ 13 Nia mós fó matadalan kona-ba grupu amlulik+ no ema Levi sira, atu halaʼo serbisu hotu iha Jeová nia uma, no matadalan kona-ba sasán hotu neʼebé uza iha Jeová nia uma. 14 Nia fó matadalan kona-ba osan-mean no osan-mutin hira mak tenke uza atu halo sasán hotu neʼebé uza ba serbisu oioin; 15 no osan-mean hira mak tenke uza atu halo ahi-oan fatin+ no ahi-oan sira, no mós osan-mutin hira mak tenke uza atu halo ahi-oan fatin no ahi-oan sira seluk hodi uza ba serbisu oioin; 16 osan-mean hira mak tenke uza atu halo meza hodi tau paun santu,+ atu halo meza ida-idak, no mós osan-mutin hira mak tenke uza atu halo meza sira seluk, 17 atu halo garfu, manko, buli husi osan-mean neʼebé moos, no osan-mean hira mak tenke uza atu halo manko kiʼik ida-idak,+ no osan-mutin hira mak tenke uza atu halo manko kiʼik ida-idak. 18 Nia mós fó matadalan kona-ba osan-mean* hira mak tenke uza atu halo altár insensu nian+ no atu halo kerubín sira neʼebé reprezenta Maromak nia karreta.+ Kerubín+ osan-mean sira-neʼe loke sira-nia liras no taka Jeová nia Arka Aliansa nian. 19 David hatete: “Jeová mak dirije haʼu,* no nia fó matenek mai haʼu atu hakerek ho klaru+ kona-ba planu hotu ba dezeñu neʼe.”+

20 David hatete ba ninia oan-mane Salomão: “Sai aten-brani no sai forte, no bá halo serbisu. Labele sai taʼuk ka nakdedar, tanba Maromak Jeová, haʼu-nia Maromak, hamutuk ho ó.+ Nia sei la hadook an no la husik ó,+ maibé nia sei hamutuk ho ó toʼo ó halo hotu serbisu sira iha Jeová nia uma. 21 No iha grupu amlulik sira+ no ema Levi sira+ atu halo serbisu hotu iha Maromak loos nia uma. Ó iha serbisu-naʼin neʼebé matenek atu halo serbisu oioin no sira hakarak atu halo serbisu,+ ó mós iha ulun-naʼin sira+ no povu hotu neʼebé sei halo tuir ó-nia mandamentu hotu.”