Isaias
44 “Agora rona bá, oh haʼu-nia atan Jacob,
Rona bá, oh Izraél, neʼebé haʼu hili ona.+
2 Neʼe mak liafuan husi Jeová,
Ó-nia Kriadór, Ida neʼebé halo ó,+
Ida neʼebé ajuda ona ó husi knotak laran.* Nia dehan:
Haʼu sei fakar sai haʼu-nia espíritu ba ó-nia bei-oan+
No fakar haʼu-nia bensaun ba ó-nia bei-oan sira.
4 No sira sei mosu no buras hanesan duʼut matak,+
Hanesan ai-koupos besik mota ninin.
5 Sira ida sei dehan: “Haʼu mak Jeová nian.”+
Ida seluk sei bolu nia an hodi Jacob nia naran,
No ida seluk tan sei hakerek iha ninia liman dehan: “Haʼu mak Jeová nian.”
No nia sei simu Izraél nia naran.’
6 Neʼe mak liafuan husi Jeová,
Liurai Izraél nian+ no Ida neʼebé Sosa Fali nia,+ Jeová neʼebé ukun tropa lalehan nian, dehan:
‘Haʼu mak primeiru no haʼu mak ikus.+
La iha Maromak seluk, só haʼu deʼit.+
7 Sé mak hanesan ho haʼu?+
Husik nia koʼalia no fó sai ida-neʼe no fó prova ba haʼu!+
Husik nia konta kona-ba buat neʼebé atu mai
No fó sai buat neʼebé sei akontese,
Hanesan haʼu halo ona husi tempu neʼebé haʼu hili povu ida iha tempu uluk.
Haʼu koʼalia ona ba imi ida-idak no fó sai ona ida-neʼe, loos ka lae?
Imi mak haʼu-nia testemuña.+
Haʼu deʼit mak Maromak. Iha Maromak seluk ka lae?
Lae, la iha Fatuk Boot seluk;+ haʼu la hatene Maromak seluk.’”
9 Sira hotu neʼebé bahat estátua mak folin-laek,
No estátua neʼebé sira hafolin sei la lori buat diʼak ida.+
Sira* labele fó sasin, tanba sira labele haree buat ida no la hatene buat ida,+
Nuneʼe mós ema neʼebé halo estátua sira-neʼe, sira sei hetan moe.+
10 Sé mak halo maromak ida ka estátua husi besi
Neʼebé la lori benefísiu ida?+
11 Ninia maluk hotu sei hetan moe!+
Badaen sira mak ema deʼit.
Husik sira halibur hamutuk no hamriik iha sira ida-idak nia fatin.
Sira sei sai taʼuk no sai moe hamutuk.
12 Badaen-besi hamanas besi iha ahi-klaak leten.
Ho ninia liman neʼebé forte+
Nia tuku besi neʼe ho martelu sira.
Tuirmai nia sai hamlaha no lakon forsa;
Nia la hemu bee no sai kole.
13 Ema neʼebé matenek atu bahat, nia sukat ho tali no tau marka ho jís mean.
Nia halo serbisu hodi bahat no halo marka ho sasán marka nian.
14 Iha ema neʼebé halo serbisu hodi tesi ai-sedru.
Nia hili ai-hun oin ida, ai-karvallu,
No nia husik ai neʼe sai boot entre ai-hun sira seluk iha ai-laran.+
Nia kuda ai-loureiru, no udan halo ai neʼe sai boot.
15 Tuirmai ema ida uza ai neʼe nuʼudar ai-sunu atu halo lakan ahi.
Nia foti ai neʼe balu atu sunu hodi haneruk;
Nia halo ahi no tunu paun.
Maibé nia mós halo ai neʼe sai maromak ida no adora ida-neʼe.
Nia bahat estátua husi ai neʼe no hakruʼuk iha estátua neʼe nia oin.+
16 Ai balu nia sunu iha ahi;
No ho ai neʼe mak nia tunu naʼan no han toʼo bosu.
Nia mós haneruk no dehan:
“Agora haʼu hateke ba ahi neʼe no sente manas.”
17 Maibé nia bahat ai restu neʼe hodi halo maromak, katak ninia estátua ida.
Nia hakruʼuk no adora estátua neʼe.
Nia halo orasaun ba ida-neʼe, hodi dehan:
“Salva haʼu, tanba Ita-Boot mak haʼu-nia maromak.”+
18 Sira la hatene buat ida, sira la komprende buat ida,+
Tanba sira-nia matan taka metin no sira labele haree,
No sira-nia laran la iha matenek.
19 Sira la iha koñesimentu ka kbiit atu komprende,
La iha ema ida mak hanoin iha ninia laran, hodi dehan:
“Ai balu haʼu sunu ona iha ahi,
No haʼu tunu paun ho naʼan iha ahi-klaak leten atu han.
Se nuneʼe, haʼu mós tenke halo ai neʼe balu hodi sai buat neʼebé foʼer tebes ka?+
Haʼu tenke adora ai neʼe nia pedasuk balun ka?”
20 Nia han ahi-kadesan.
Ninia laran neʼebé lohi nia, halo nia laʼo sala dalan.
Nia labele salva nia an, no labele dehan:
“Haʼu iha buat neʼebé falsu iha haʼu-nia liman-loos.”
21 “Oh Jacob, oh Izraél, hanoin-hetan buat sira-neʼe,
Tanba ó mak haʼu-nia atan.
Haʼu mak halo ó, no ó mak haʼu-nia atan.+
Oh Izraél, haʼu sei la haluha ó.+
22 Haʼu sei hamoos ó-nia sala
No taka ó-nia sala hanesan taka ho kalohan mahar.+
Fila fali ba haʼu, tanba haʼu sei sosa fali ó.+
23 Oh lalehan, haklalak ho haksolok bá,
Tanba Jeová halo ona ida-neʼe!
Oh fatin neʼebé kleʼan iha rai, haklalak ho lian manán nian!
Oh foho sira, ai-laran no ai-hun hotu,
Haklalak ho haksolok bá!+
Tanba Jeová sosa fali ona Jacob,
No nia hatudu sai ona ninia kmanek ba Izraél.”+
24 Jeová, Ida neʼebé Sosa Fali imi,+
Ida neʼebé kria imi husi tempu bainhira imi iha knotak laran, dehan nuneʼe:
“Haʼu mak Jeová, haʼu mak halo buat hotu.
Sé mak uluk hamutuk ho haʼu?
25 Haʼu halo runguranga profeta falsu nia sinál sira,
No haʼu mak halo siʼikdór sira hatudu hahalok beik;+
Haʼu mak halo ema matenek sai bilán
No troka sira-nia koñesimentu hodi sai nuʼudar buat beik;+
26 Haʼu mak kumpre haʼu-nia atan sira-nia liafuan
No halo haʼu-nia atan sira-nia liafuan hotu sai loos;+
Haʼu mak fó sai kona-ba Jeruzalein: ‘Ema sei hela iha sidade neʼe’,+
No kona-ba Judá nia sidade sira: ‘Ema sei harii fali sidade sira-neʼe,+
No haʼu sei hadiʼa fali fatin sira neʼebé rahun ona’;+
27 Haʼu mak dehan ba bee neʼebé kleʼan: ‘Sai maran bá,
No haʼu sei halo maran ó-nia mota sira hotu’;+
28 Haʼu mak dehan kona-ba Ciro:+ ‘Nia mak haʼu-nia bibi-atan,
No nia sei kumpre duni haʼu-nia hakarak hotu’;+
Haʼu mak dehan kona-ba Jeruzalein: ‘Ema sei harii fali sidade neʼe’,
No kona-ba templu: ‘Ema sei tau fali ó-nia fundasaun.’”+