Ezequiel

18 Jeová koʼalia tan mai haʼu, hodi dehan: 2 “Imi-nia lia-dadolin neʼebé imi koʼalia iha rai-Izraél katak sá? Imi dehan: ‘Aman mak han uvas-fuan neʼebé siin, maibé oan-mane sira mak sente nehan siin.’+

3 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak imi sei la kontinua tan atu temi lia-dadolin neʼe iha rai-Izraél. 4 Ema hotu nia moris* mak haʼu-nian. Aman nia moris no mós oan nia moris mak haʼu-nian. Ema* neʼebé halo sala, ema neʼe rasik mak sei mate.

5 “‘Se iha mane laran-loos ida neʼebé halo buat neʼebé loos no tuir justisa; 6 nia la han ai-han neʼebé hasaʼe nuʼudar sakrifísiu ba estátua sira iha foho leten;+ nia la hateke ba umakain Izraél nia estátua neʼebé haʼu hakribi;* nia la halo sala seksuál ho ninia maluk nia feen+ ka la halo relasaun seksuál ho feto neʼebé menstruasaun hela;+ 7 nia la halo aat ba ema ida,+ maibé nia fó fali sasán neʼebé ema fó ba nia nuʼudar garantia* atu debe osan;+ nia la naʼok husi ema ida,+ maibé nia fó ai-han ba ema neʼebé hamlaha+ no fó roupa ba ema neʼebé isin-tanan;+ 8 nia la husu osan-funan bainhira fó debe no nia mós la buka atu manán osan-funan barak,+ maibé nia hanetik ninia an atu la halo buat neʼebé la tuir justisa;+ nia tesi-lia ho justisa entre ema ida ho ema seluk;+ 9 no nia kontinua halo tuir haʼu-nia ukun-fuan no kumpre haʼu-nia desizaun sira hodi hatudu laran-metin. Ema hanesan neʼe mak ema laran-loos no nia sei kontinua moris’,+ Jeová, Naʼi Ukun-Naʼin Boot Liu, mak dehan.

10 “‘Maibé se karik ema neʼe iha oan-mane neʼebé naʼok+ ka oho ema*+ ka halo sala sira seluk hanesan neʼe; 11 nia han ai-han neʼebé hasaʼe nuʼudar sakrifísiu ba estátua sira iha foho leten, halo sala seksuál ho ninia maluk nia feen, maski ninia aman la halo buat sira-neʼe; 12 nia halo aat ba ema kiʼik no ema kiak,+ naʼok ema nia sasán, nia la fó fali sasán neʼebé ema fó ba nia nuʼudar garantia atu debe osan, nia hateke ba estátua sira neʼebé haʼu hakribi,*+ nia halo hahalok aat,+ 13 nia husu osan-funan bainhira fó debe no buka atu manán osan-funan barak,+ entaun oan-mane neʼe sei mate. Tanba nia halo hahalok aat sira-neʼe hotu neʼebé haʼu hakribi, entaun nia sei mate duni. Nia tenke lori todan ba ninia sala rasik.*

14 “‘Se karik aman ida iha oan-mane neʼebé haree sala hotu neʼebé ninia aman halo, maibé nia la halo tuir ninia aman nia hahalok; 15 nia la han ai-han neʼebé hasaʼe nuʼudar sakrifísiu ba estátua sira iha foho leten; nia la hateke ba umakain Izraél nia estátua neʼebé haʼu hakribi;* nia la halo sala seksuál ho ninia maluk nia feen; 16 nia la halo aat ba ema ida; nia la hadau sasán neʼebé ema fó ba nia nuʼudar garantia atu debe osan; nia la naʼok ema nia sasán, maibé nia fó ai-han ba ema neʼebé hamlaha no fó roupa ba ema neʼebé isin-tanan; 17 nia la halo aat ba ema kiak; nia la husu osan-funan bainhira fó debe no la buka atu manán osan-funan barak; no nia halo tuir haʼu-nia ukun-fuan no kumpre haʼu-nia desizaun sira. Ema hanesan neʼe sei la mate tanba ninia aman nia sala. Ema neʼe sei kontinua moris. 18 Maibé nia aman tenke mate tanba nia halo sala hodi hamatak ema, naʼok husi ninia maluk, no halo hahalok aat iha ninia povu nia leet.

19 “‘Maibé imi sei husu: “Tanbasá mak oan neʼe la lori todan tanba ninia aman nia sala?” Oan neʼe sei kontinua moris tanba nia halo buat neʼebé loos no tuir justisa, no halo tuir haʼu-nia ukun-fuan hotu.+ 20 Ema* neʼebé halo sala, ema neʼe rasik mak sei mate.+ Oan ida sei la lori todan tanba ninia aman nia sala, no aman ida sei la lori todan tanba ninia oan nia sala. Ema laran-loos sei hetan kolen tanba ninia hahalok loos, no ema laran-aat sei hetan kastigu tanba ninia hahalok aat.+

21 “‘Se ema aat ida husik tiha ninia hahalok aat hotu no halo tuir fali haʼu-nia ukun-fuan no halo buat neʼebé loos no tuir justisa, nia sei kontinua moris. Nia sei la mate.+ 22 Haʼu sei la hanoin tan sala hotu neʼebé nia halo ona.+ Nia sei kontinua moris tanba nia halo buat neʼebé loos.’+

23 “Jeová, Naʼi Ukun-Naʼin Boot Liu, dehan: ‘Haʼu la kontente bainhira ema aat ida mate.+ Haʼu-nia hakarak mak nia husik tiha ninia hahalok aat* no kontinua moris.’+

24 “‘Maibé kuandu ema laran-loos ida husik tiha ninia hahalok loos no halo fali buat neʼebé sala,* no halo buat aat hotu neʼebé haʼu hakribi hodi tuir ema aat nia hahalok, entaun nia sei mate. Haʼu sei la hanoin-hetan ninia hahalok loos hotu neʼebé nia halo ona.+ Nia sei mate tanba nia la hatudu laran-metin no tanba nia halo sala.+

25 “‘Maibé imi sei dehan: “Jeová nia hahalok mak la tuir justisa.”+ Oh umakain Izraél, favór ida rona lai! Haʼu-nia hahalok sira la tuir justisa ka?+ Imi-nia hahalok sira mak la tuir justisa, loos ka lae?+

26 “‘Kuandu ema laran-loos ida husik tiha ninia hahalok loos no halo fali buat neʼebé sala, no mate tanba ninia hahalok neʼe, entaun nia mate tanba ninia sala rasik.

27 “‘Se ema aat ida husik tiha ninia hahalok aat no komesa halo fali buat neʼebé loos no tuir justisa, nia sei salva nia moris rasik.+ 28 Bainhira nia hatene ona ninia sala no husik tiha sala hotu, nia sei kontinua moris. Nia sei la mate.

29 “‘Maibé umakain Izraél sei dehan: “Jeová nia hahalok mak la tuir justisa.” Oh umakain Izraél, haʼu-nia hahalok sira mak la tuir justisa ka?+ Imi-nia hahalok sira mak la tuir justisa, loos ka lae?’

30 “Jeová, Naʼi Ukun-Naʼin Boot Liu, dehan: ‘Oh umakain Izraél, haʼu sei tesi-lia ba imi tuir imi ida-idak nia hahalok.+ Tan neʼe, arrepende an bá, no husik tiha* imi-nia hahalok aat hotu, atu nuneʼe hahalok aat sira-neʼe la sai nuʼudar fatuk sidi nian neʼebé lori imi ba sala. 31 Oh umakain Izraél, husik tiha sala hotu neʼebé imi halo ona,+ no hetan laran neʼebé foun no espíritu* neʼebé foun.+ Tanbasá mak imi tenke mate?’+

32 “Jeová, Naʼi Ukun-Naʼin Boot Liu, dehan: ‘Haʼu la kontente bainhira ema ida mate.+ Tan neʼe, arrepende an bá* no kontinua moris.’”+