Ezequiel

11 No espíritu* ida hiʼit saʼe haʼu no lori haʼu ba portaun husi Jeová nia uma neʼebé hateke ba parte leste.+ Iha portaun neʼe nia oin, haʼu haree mane naʼin-25, no iha sira-nia leet haʼu haree Azur nia oan-mane Jazanias, no Benaias nia oan-mane Pelatias. Sira mak ulun-naʼin ba povu neʼe.+ 2 Tuirmai Nia dehan ba haʼu: “Oan-mane husi ema, mane sira-neʼe mak halo planu aat no fó konsellu aat iha* sidade neʼe. 3 Sira dehan: ‘Agora mak tempu atu harii uma, loos ka lae?+ Sidade neʼe* mak hanesan sanan boot,+ no ami mak naʼan.’

4 “Oh oan-mane husi ema, fó sai profesia bá hodi kontra sira.”+

5 Tuirmai Maromak Jeová nia espíritu tun ba haʼu,+ no Maromak dehan: “Koʼalia bá: ‘Jeová dehan nuneʼe: “Oh umakain Izraél, imi-nia liafuan mak loos, no haʼu hatene buat neʼebé imi hanoin daudaun. 6 Imi halo ona ema barak mate iha sidade neʼe, no imi halo nakonu sidade nia dalan sira ho ema nia mate-isin.”’”+ 7 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Mate-isin sira neʼebé imi soe naklekar iha sidade neʼe mak nuʼudar naʼan, no sidade mak sanan boot.+ Maibé haʼu sei hasai tiha imi husi sidade neʼe.’”

8 “Jeová, Naʼi Ukun-Naʼin Boot Liu, dehan nuneʼe: ‘Imi taʼuk surik,+ tan neʼe haʼu sei lori surik atu kontra hasoru imi. 9 Haʼu sei lori imi sai husi sidade no entrega imi ba ema estranjeiru nia liman no sira sei kumpre haʼu-nia tesi-lia ba imi.+ 10 Imi sei mate ho surik.+ Haʼu sei tesi-lia ba imi besik Izraél nia fronteira,+ no imi sei hatene duni katak haʼu mak Jeová.+ 11 Sidade neʼe sei la sai tan hanesan sanan boot ba imi, no imi sei la sai tan hanesan naʼan iha sanan neʼe nia laran. Haʼu sei tesi-lia ba imi besik Izraél nia fronteira, 12 no imi sei hatene duni katak haʼu mak Jeová. Haʼu halo nuneʼe tanba imi la halo tuir haʼu-nia ukun-fuan no la kumpre haʼu-nia desizaun,+ maibé imi halo tuir fali ukun-fuan husi nasaun sira neʼebé haleʼu imi.’”+

13 Bainhira haʼu fó sai profesia neʼe, Benaias nia oan-mane Pelatias mate kedas. Haree tiha ida-neʼe, haʼu hakneʼak ho oin ba rai no halerik ho lian makaʼas, hodi dehan: “Aii Jeová, Naʼi Ukun-Naʼin Boot Liu! Ita-Boot mós sei halakon hotu Izraél nia ema restu sira ka?”+

14 Jeová koʼalia tan mai haʼu, hodi dehan: 15 “Oan-mane husi ema, ema iha Jeruzalein fó sai ona ba ó-nia maun-alin sira neʼebé iha direitu atu sosa fali rai, no mós fó sai ba umakain Izraél tomak, hodi dehan: ‘Hadook an husi Jeová. Rai neʼe mak ami-nian. Neʼe entrega ona ba ami nuʼudar liman-rohan.’ 16 Tan neʼe koʼalia bá: ‘Jeová, Naʼi Ukun-Naʼin Boot Liu, dehan nuneʼe: “Maski haʼu haruka sira bá dook hodi hela iha nasaun sira-nia leet no halo sira namkari ba rai oioin,+ maibé ba tempu badak haʼu sei sai nuʼudar fatin sagradu ba sira iha rai neʼebé sira hela bá.”’+

17 “Tan neʼe, koʼalia bá: ‘Jeová, Naʼi Ukun-Naʼin Boot Liu, dehan nuneʼe: “Haʼu mós sei halibur fali sira husi povu seluk nia leet no halibur sira husi rai oioin neʼebé sira namkari bá, no haʼu sei fó Izraél nia rai ba sira.+ 18 No sira sei fila fali ba neʼebá no soe tiha buat hotu neʼebé haʼu hakribi no halakon hahalok aat sira husi neʼebá.+ 19 No haʼu sei halo sira iha laran ida deʼit,*+ no haʼu sei tau espíritu* foun iha sira.+ No haʼu sei hasai tiha laran neʼebé toos hanesan fatuk+ no fó fali laran neʼebé mamar ba sira,*+ 20 atu nuneʼe sira bele halo tuir haʼu-nia ukun-fuan no kumpre haʼu-nia desizaun sira. Ho ida-neʼe, sira sei sai haʼu-nia povu, no haʼu sei sai sira-nia Maromak.”’

21 “‘“Maibé kona-ba ema neʼebé kaer metin ba buat neʼebé haʼu hakribi no kontinua hatudu hahalok neʼebé aat, haʼu sei halo sira lori todan tanba sira-nia hahalok rasik”, Jeová, Naʼi Ukun-Naʼin Boot Liu, mak dehan.’”

22 Tuirmai kerubín sira hiʼit saʼe sira-nia liras, no roda sira mós besik sira,+ no glória husi Izraél nia Maromak iha sira-nia leten.+ 23 Depois neʼe, Jeová nia glória+ saʼe husi sidade neʼe no para iha foho leten iha sidade nia parte leste.+ 24 No haʼu haree vizaun liuhusi Maromak nia espíritu, no iha vizaun neʼe espíritu* ida hiʼit saʼe haʼu no lori haʼu ba povu neʼebé sai dadur* iha Kaldeia. Tuirmai vizaun neʼebé uluk haʼu haree lakon husi haʼu. 25 Haʼu komesa konta ba povu neʼebé sai dadur kona-ba buat hotu neʼebé Jeová hatudu ona ba haʼu.