10 Liafuan “Testamentu Tuan” no “Testamentu Foun”

2 Korinto 3:14—Gregu, ἐπὶ τῇ ἀναγνώσει τῆς παλαιᾶς διαθήκης (epí tei anagnósei tes palaiás diathekes); latín, in lectione veteris testamenti

1611	“bainhira sira lee testamentu tuan nian”	King James Version.
1808	“bainhira sira lee aliansa tuan nian”	The New Covenant, Commonly Called the New Testament: Translated From the Greek, husi Charles Thomson, Philadelphia.
1869	“bainhira lee aliansa tuan nian”	The New Testament: Translated From the Greek Text of Tischendorf, husi George R. Noyes, Boston.
1950	“kuandu lee aliansa tuan nian”	New World Translation of the Christian Greek Scriptures, Brooklyn.
1972	“kuandu informasaun neʼe lee husi aliansa tuan nian”	The New English Bible, Oxford no Cambridge.

Ohin loron ema barak bolu eskritura neʼebé hakerek iha lia-gregu nuʼudar “Testamentu Foun”, no eskritura neʼebé hakerek iha lia-ebraiku no aramaiku nuʼudar “Testamentu Tuan”. Ida-neʼe tanba liafuan sira iha 2 Korinto 3:14 iha Bíblia Vulgata (iha lia-latín) no King James Version (iha lia-inglés). Maibé, ita presiza hatene katak iha 2 Korinto 3:14, liafuan diathekes iha arti katak “aliansa”, hanesan iha fatin 32 seluk iha Eskritura Lia-Gregu.

Iha 2 Korinto 3:14, kuandu apóstolu Paulo temi kona-ba “aliansa tuan nian”, nia la koʼalia kona-ba Eskritura Lia-Ebraiku tomak. Tan neʼe, se ita bolu Eskritura Lia-Gregu tomak nuʼudar “Testamentu Foun”, ida-neʼe mós sala. Iha eskritura neʼe apóstolu Paulo koʼalia kona-ba aliansa Ukun-Fuan nian neʼebé tuan. No Moisés mak hakerek aliansa neʼe iha livru lima primeiru iha Eskritura Lia-Ebraiku no livru sira-neʼe mak parte kiʼik ba Eskritura neʼe. Tan razaun neʼe mak Paulo dehan iha versíkulu 15, “kuandu sira lee Moisés nia livru”.

Tan neʼe, la iha razaun atu bolu Eskritura Lia-Ebraiku nuʼudar “Testamentu Tuan” no Eskritura Lia-Gregu nuʼudar “Testamentu Foun”. Jesus Kristu bolu Eskritura Lia-Ebraiku nuʼudar “Eskritura”. (Mateus 21:42; Marcos 14:49; João 5:39) Apóstolu Paulo mós bolu Eskritura Lia-Ebraiku nuʼudar “Eskritura santu”, “Eskritura”, no “livru santu”. (Roma 1:2; 15:4; 2 Timóteo 3:15) Entaun, ita iha razaun loos atu bolu Bíblia nia parte rua neʼe nuʼudar “Eskritura Lia-Ebraiku” no “Eskritura Lia-Gregu”.