EZRAS

1 Iha tinan primeiru husi liurai Pérsia naran Ciro+ nia ukun, Jeová book Liurai Ciro nia laran atu fó sai avizu ida iha área tomak neʼebé nia ukun, hodi bele kumpre Jeová nia liafuan neʼebé fó sai ona liuhusi Jeremias,+ no liurai mós hakerek avizu neʼe:+

2 “Liurai Ciro husi rai-Pérsia dehan nuneʼe: ‘Jeová, Maromak lalehan nian fó ona nasaun hotu iha mundu neʼe mai haʼu,+ no nia rasik haruka ona haʼu atu harii uma ida ba nia iha sidade Jeruzalein+ iha rai-Judá. 3 Ema hotu iha imi-nia leet, neʼebé mak Maromak neʼe nia povu, haʼu hein katak sira-nia Maromak sei hamutuk ho sira, no sira bele fila fali ba Jeruzalein iha rai-Judá atu harii fali uma ba Jeová, Izraél nia Maromak. Nia mak Maromak loos neʼebé uluk ninia uma iha Jeruzalein.* 4 Ema hotu neʼebé hela iha rai neʼe nuʼudar ema estranjeiru,+ sira sei simu ajuda husi sira-nia viziñu.* Sira-nia viziñu tenke fó osan-mutin no osan-mean, sasán sira no animál-hakiak, no mós sasán oioin neʼebé sira fó ho laran atu uza iha Maromak loos nia uma,+ neʼebé iha sidade Jeruzalein.’”

5 Tuirmai, ulun-naʼin sira husi umakain Judá, umakain Benjamim, amlulik sira ho ema Levi, sin, ema hotu neʼebé Maromak loos book sira-nia laran, sira haloot sasán atu bá harii fali Jeová nia uma iha sidade Jeruzalein. 6 Viziñu hotu neʼebé hela haleʼu sira mós apoia sira* hodi fó sasán neʼebé halo husi osan-mutin no osan-mean, sasán sira seluk, animál-hakiak sira no sasán sira neʼebé folin-boot no mós sasán seluk tan neʼebé sira fó ho laran.

7 Liurai Ciro mós foti sai sasán sira neʼebé uluk Nabukodonozór foti husi Jeová nia uma iha Jeruzalein no tau iha Nabukodonozór nia maromak nia uma.+ 8 Liurai Ciro husi rai-Pérsia haruka Mitredat neʼebé toma konta ba liurai nia rikusoin, atu lori sai sasán sira-neʼe no halo lista kona-ba sasán sira-neʼe no fó buat hotu neʼe ba Sesbazar,*+ xefe ba rai-Judá.

9 Sasán sira-neʼe mak tuirmai neʼe: raga osan-mean hamutuk 30, raga osan-mutin hamutuk 1.000, raga sira seluk tan hamutuk 29, 10 manko kiʼik osan-mean hamutuk 30, manko kiʼik osan-mutin hamutuk 410 no sasán seluk tan hamutuk 1.000. 11 Sasán hotu neʼebé halo husi osan-mean no osan-mutin hamutuk 5.400. Iha tempu neʼebé Sesbazar lori sai ema dadur* sira+ husi Babilónia atu fila ba Jeruzalein, nia mós lori sasán sira-neʼe hotu.

2 Tuirmai neʼe mak ema Judeu sira neʼebé hela iha provínsia,* neʼebé fila fali ba Jeruzalein no rai-Judá.+ Sira mak jerasaun husi ema neʼebé Liurai Nabukodonozór lori ba rai-Babilónia+ nuʼudar dadur.* Maibé ikusmai sira fila fali ba sira ida-idak nia sidade.+ 2 Sira fila hamutuk ho Zorobabel,+ Jesua,*+ Neemias, Seraias, Reelaias, Mordecai, Bilsan, Mispar, Bigvai, Rehum no Baaná.

Númeru ba mane Izraél sira neʼebé fila mak tuirmai neʼe:+ 3 Paros nia oan-mane* sira hamutuk naʼin-2.172; 4 Sefatias nia oan-mane sira hamutuk naʼin-372; 5 Ará nia oan-mane sira+ hamutuk naʼin-775; 6 Pahat-Moab nia oan-mane sira,+ husi Jesua no Joab nia umakain, hamutuk naʼin-2.812; 7 Elam nia oan-mane sira+ hamutuk naʼin-1.254; 8 Zatu nia oan-mane sira+ hamutuk naʼin-945; 9 Zakai nia oan-mane sira hamutuk naʼin-760; 10 Bane nia oan-mane sira hamutuk naʼin-642; 11 Bebai nia oan-mane sira hamutuk naʼin-623; 12 Asgad nia oan-mane sira hamutuk naʼin-1.222; 13 Adonikam nia oan-mane sira hamutuk naʼin-666; 14 Bigvai nia oan-mane sira hamutuk naʼin-2.056; 15 Adin nia oan-mane sira hamutuk naʼin-454; 16 Ater nia oan-mane sira, neʼebé husi Ezequias nia umakain,* hamutuk naʼin-98; 17 Bezai nia oan-mane sira hamutuk naʼin-323; 18 Jora nia oan-mane sira hamutuk naʼin-112; 19 Hasum nia oan-mane sira+ hamutuk naʼin-223; 20 Gibar nia oan-mane sira hamutuk naʼin-95; 21 Belein nia oan-mane sira hamutuk naʼin-123; 22 Ema Netofa sira hamutuk naʼin-56; 23 Mane sira husi Anatot+ hamutuk naʼin-128; 24 Azmavet nia oan-mane sira hamutuk naʼin-42; 25 Kiriat-Jearim, Kefira no Beerot nia oan-mane sira hamutuk naʼin-743;26 Ramá+ no Geba+ nia oan-mane sira hamutuk naʼin-621; 27 Ema Mikmas sira hamutuk naʼin-122; 28 Ema Betel no ema Ai+ sira hamutuk naʼin-223; 29 Nebo nia oan-mane sira+ hamutuk naʼin-52; 30 Magbis nia oan-mane sira hamutuk naʼin-156; 31 Elam ida seluk nia oan-mane sira hamutuk naʼin-1.254; 32 Harim nia oan-mane sira hamutuk naʼin-320; 33 Lod, Hadid ho Ono nia oan-mane sira hamutuk naʼin-725; 34 Jerikó nia oan-mane sira hamutuk naʼin-345; 35 no Senaa nia oan-mane sira hamutuk naʼin-3.630.

36 Amlulik sira mak tuirmai neʼe:+ Jedaias nia oan-mane sira+ husi Jesua nia umakain,+ hamutuk naʼin-973; 37 Imer nia oan-mane sira+ hamutuk naʼin-1.052; 38 Pasur nia oan-mane sira+ hamutuk naʼin-1.247; 39 no Harim nia oan-mane sira+ hamutuk naʼin-1.017.

40 Ema Levi sira mak tuirmai neʼe:+ Jesua ho Kadmiel nia oan-mane sira,+ neʼebé husi Hodavias nia umakain, hamutuk naʼin-74. 41 Kantadór sira mak tuirmai neʼe:+ Asaf nia oan-mane sira+ hamutuk naʼin-128. 42 Guarda sira neʼebé hein portaun nia oan-mane sira mak tuirmai neʼe:+ Salum nia oan-mane sira, Ater nia oan-mane sira, Talmon nia oan-mane sira,+ Akub nia oan-mane sira,+ Hatita nia oan-mane sira no Sobai nia oan-mane sira, hamutuk naʼin-139.

43 Atan sira neʼebé halo serbisu iha templu* mak tuirmai neʼe:+ Ziha nia oan-mane sira, Hasufa nia oan-mane sira, Tabaot nia oan-mane sira, 44 Keros nia oan-mane sira, Siá nia oan-mane sira, Padon nia oan-mane sira, 45 Lebana nia oan-mane sira, Hagaba nia oan-mane sira, Akub nia oan-mane sira, 46 Hagab nia oan-mane sira, Salmai nia oan-mane sira, Hanan nia oan-mane sira, 47 Gidel nia oan-mane sira, Gahar nia oan-mane sira, Reaias nia oan-mane sira, 48 Rezin nia oan-mane sira, Nekoda nia oan-mane sira, Gazam nia oan-mane sira, 49 Uza nia oan-mane sira, Pasea nia oan-mane sira, Besai nia oan-mane sira, 50 Asna nia oan-mane sira, Meunim nia oan-mane sira, Nefusim nia oan-mane sira, 51 Bakbuk nia oan-mane sira, Hakufa nia oan-mane sira, Harur nia oan-mane sira, 52 Bazlut nia oan-mane sira, Mehida nia oan-mane sira, Harsa nia oan-mane sira, 53 Barkos nia oan-mane sira, Sísera nia oan-mane sira, Tema nia oan-mane sira, 54 Nezia nia oan-mane sira no Hatifa nia oan-mane sira.

55 Salomão nia atan sira-nia oan-mane mak tuirmai neʼe: Sotai nia oan-mane sira, Soferet nia oan-mane sira, Peruda nia oan-mane sira,+ 56 Jaala nia oan-mane sira, Darkon nia oan-mane sira, Gidel nia oan-mane sira, 57 Sefatias nia oan-mane sira, Hatil nia oan-mane sira, Pokeret-Hazerbaim nia oan-mane sira no Amei nia oan-mane sira.

58 Atan hotu neʼebé halo serbisu iha templu* no Salomão nia atan sira-nia oan-mane hamutuk naʼin-392.

59 Tuirmai neʼe mak ema sira neʼebé sai husi rai Tel-Mela, Tel-Harsa, Kerub, Adon no Imer, maibé sira labele prova katak sira-nia aman nia umakain no beiʼala sira mak ema Izraél:+ 60 Delaias nia oan-mane sira, Tobias nia oan-mane sira no Nekoda nia oan-mane sira hamutuk naʼin-652. 61 Amlulik nia oan-mane sira mak tuirmai neʼe: Habaias nia oan-mane sira, Hakoz nia oan-mane sira+ no Barzilai nia oan-mane sira. Ema bolu sira Barzilai nia oan-mane sira tanba sira-nia beiʼala kaben ho Barzilai+ ema Gilead nia oan-feto. 62 Sira buka sira-nia umakain nia naran iha lista naran nian, maibé la hetan, tan neʼe sira labele sai amlulik.*+ 63 Governadór* hatete ba sira katak sira labele han ai-han neʼebé santu liu hotu+ toʼo hetan amlulik ida neʼebé kaer Urim no Tumim.*+

64 Kongregasaun* tomak neʼe sura hamutuk naʼin-42.360.+ 65 Neʼe la sura ho sira-nia atan-mane no atan-feto sira neʼebé hamutuk naʼin-7.337. Sira mós iha kantadór* mane no feto hamutuk naʼin-200. 66 Sira-nia kuda hamutuk 736, kuda-mula* hamutuk 245, 67 kuda-kamelu hamutuk 435, no kuda-burru hamutuk 6.720.

68 Bainhira sira toʼo iha Jeová nia uma iha sidade Jeruzalein, ulun-naʼin balu husi Izraél nia umakain sira fó kontribuisaun+ ho laran atu uza iha Maromak loos nia uma hodi harii fali uma neʼe iha ninia fatin.+ 69 Sira apoia projetu neʼe tuir sira ida-idak nia kbiit hodi fó osan-mean kilograma 513,* osan-mutin kilograma 2.850*+ no unuk hamutuk 100 ba amlulik sira. 70 No amlulik sira, ema Levi, povu balu, kantadór sira, guarda sira neʼebé hein portaun, atan sira neʼebé halo serbisu iha templu* no ema Izraél restu,* sira hotu hela iha sira ida-idak nia sidade.+

3 Bainhira fulan-hitu+ komesa ona no ema Izraél hela ona iha sira ida-idak nia sidade, sira hotu halibur hamutuk ho hanoin ida deʼit iha sidade Jeruzalein. 2 Tuirmai, Jeozadak nia oan-mane Jesua+ ho ninia maluk amlulik sira, no Sealtiel+ nia oan-mane Zorobabel+ ho ninia maun-alin sira harii altár ba Izraél nia Maromak, atu sira bele hasaʼe sakrifísiu sunu nian iha altár leten hodi halo tuir Maromak loos nia atan Moisés nia Ukun-Fuan.+

3 Maski sira taʼuk ba ema neʼebé hela haleʼu sira,+ maibé sira harii fali altár iha ninia fatin no komesa hasaʼe sakrifísiu sunu nian ba Jeová iha altár leten, sakrifísiu sunu nian neʼebé hasaʼe iha dadeer no mós iha kalan.+ 4 Tuirmai sira halo Festa Barraka nian* hodi halo tuir ukun-fuan neʼebé hakerek ona.+ Loroloron, sira hasaʼe sakrifísiu sunu nian hodi tuir ukun-fuan kona-ba animál hira mak sira tenke hasaʼe nuʼudar sakrifísiu iha loron ida-idak durante festa neʼe.+ 5 Liutiha neʼe, sira mós hasaʼe sakrifísiu sunu nian neʼebé tenke hasaʼe loroloron,+ sakrifísiu neʼebé tenke hasaʼe iha fulan-foun,+ sakrifísiu neʼebé tenke hasaʼe iha Jeová nia festa santu hotu,+ no mós sakrifísiu neʼebé ema hotu fó ba Jeová ho hakarak rasik.+ 6 Hahú husi loron primeiru iha fulan-hitu,+ sira komesa hasaʼe sakrifísiu sunu nian ba Jeová maski sira seidauk halo fundasaun ba Jeová nia templu.

7 Liurai Ciro husi rai-Pérsia+ fó lisensa ba sira, ho ida-neʼe, sira fó osan ba badaen neʼebé fera fatuk+ no badaen sira seluk.+ Sira mós fó ai-han, hemu no mina ba ema Sidon no ema Tiro neʼebé lori ai-sedru liuhusi tasi husi rai-Líbanu toʼo Jope.+

8 Iha fulan-segundu tinan segundu husi tempu neʼebé ema Izraél mai toʼo Maromak loos nia uma iha Jeruzalein, sira komesa halo serbisu. Ema Izraél sira-neʼe mak Sealtiel nia oan-mane Zorobabel, Jeozadak nia oan-mane Jesua, no sira-nia maun-alin sira, amlulik sira no ema Levi, ho ema hotu neʼebé sai husi dadur no mai toʼo Jeruzalein;+ sira fó knaar ba ema Levi sira neʼebé husi tinan 20 ba leten hodi tau matan ba serbisu atu harii fali Jeová nia uma. 9 Tan neʼe, Jesua ho Kadmiel hamutuk ho sira-nia oan-mane no maun-alin sira, neʼebé husi Judá* nia umakain, no mós Henadad nia oan-mane sira+ no sira-nia bei-oan no maun-alin sira, neʼebé mós ema Levi, sira hotu hamutuk tau matan ba serbisu atu harii fali Maromak loos nia uma.

10 Bainhira badaen sira halo ona fundasaun ba Jeová nia templu,+ amlulik sira neʼebé hatais roupa amlulik nian kaer trombeta,+ no ema Levi, Asaf nia oan-mane sira, kaer simbala, sira hotu hamriik atu fó hahiʼi ba Jeová hodi halo tuir matadalan neʼebé uluk Liurai David husi Izraél fó ba sira.+ 11 Grupu ida hahú kanta, no grupu seluk kanta hodi hatán fali.+ Sira hahiʼi no fó agradese ba Jeová, “tanba nia mak diʼak, ninia domin neʼebé laran-metin ba Izraél iha ba nafatin”.+ Tuirmai, povu hotu haklalak ho lian makaʼas hodi fó hahiʼi ba Jeová tanba sira harii ona fundasaun ba Jeová nia uma. 12 Ema barak husi amlulik sira, ema Levi no umakain Izraél nia ulun-naʼin sira, neʼebé katuas ona no haree ona templu uluk nian,+ sira tanis ho lian makaʼas bainhira haree fundasaun neʼe harii fali ona, maibé sira barak seluk haklalak ho haksolok ho lian makaʼas.+ 13 Tan neʼe, ema la hatene lian neʼe mak lian haksolok nian ka lian tanis nian, tanba povu haklalak ho lian makaʼas toʼo ema iha fatin dook tebes mós bele rona.

4 Bainhira povu Judá no povu Benjamim nia inimigu sira+ rona katak ema dadur* sira neʼebé fila fali mai ona+ harii daudaun templu ba Jeová, Izraél nia Maromak, 2 ema sira-neʼe bá kedas hasoru Zorobabel no ulun-naʼin sira husi ema Izraél nia umakain, hodi dehan: “Ami mós hakarak harii templu neʼe hamutuk ho imi, tanba ami mós adora* imi-nia Maromak+ no hasaʼe sakrifísiu ba nia husi tempu neʼebé Liurai Esar-Hadon+ husi rai-Asíria lori ami mai iha neʼe.”+ 3 Maibé Zorobabel, Jesua no ulun-naʼin sira seluk husi ema Izraél nia umakain hatete ba sira: “Imi la iha direitu atu harii ami-nia Maromak nia uma hamutuk ho ami,+ tanba ami rasik mak sei harii uma neʼe ba Jeová, Izraél nia Maromak, hodi tuir Liurai Ciro husi rai-Pérsia nia mandamentu ba ami.”+

4 Tuirmai ema sira neʼebé hela haleʼu povu Judá kontinua halo povu Judá laran-triste no taʼuk atu nuneʼe sira para harii fali templu neʼe.+ 5 Sira mós selu konsellu-naʼin sira atu estraga povu Judá nia planu.+ Sira kontinua halo nuneʼe durante tempu neʼebé Liurai Ciro ukun rai-Pérsia toʼo tempu neʼebé Liurai Dário+ ukun rai-Pérsia. 6 Tuirmai, iha tempu neʼebé Assuero hahú ukun, ema sira-neʼe hakerek karta hodi duun povu neʼebé hela iha rai-Judá no Jeruzalein. 7 No durante Liurai Artaxerxes husi rai-Pérsia nia tempu, Bislam, Mitredat no mós Tabeel ho ninia maluk seluk hakerek karta ba Liurai Artaxerxes. Tuirmai sira mós tradús karta neʼe ba lian Aramaiku,+ no hakerek ho letra Aramaiku.*

8 * Governadór Rehum no eskriba Simsai hakerek karta ba Liurai Artaxerxes atu duun Jeruzalein. 9 Tuir loloos karta neʼe husi Governadór Rehum, husi eskriba Simsai, no husi sira-nia maluk seluk hotu. Sira-nia maluk sira-neʼe mak juís, governadór sira neʼebé iha pozisaun kiʼik, sekretáriu sira, ema iha sidade Erek,+ ema Babilónia, no ema neʼebé hela iha sidade Susa,+ katak ema Elam,+ 10 no ema sira husi nasaun sira seluk neʼebé liurai boot Asenapar lori ona nuʼudar dadur no haruka sira hela iha rai-Samaria nia sidade sira,+ no mós ema sira iha área Mota Eufrates nia sorin parte oeste.* 11 Karta neʼebé sira haruka ba Artaxerxes mak tuirmai neʼe:

“Ba Liurai Artaxerxes, karta neʼe husi Ita-Boot nia atan sira, neʼebé hela iha área Mota Eufrates nia sorin parte oeste:* 12 Ami hakarak liurai hatene katak ema Judeu sira neʼebé sai husi Ita-Boot nia área no mai hela iha ami-nia área, sira toʼo ona iha Jeruzalein. Sira harii fali daudaun sidade neʼe. Ema neʼebé hela iha sidade neʼe halo hahalok aat no kontradór, no sira besik harii hotu ona sidade neʼe nia moru+ no hadiʼa fundasaun sira. 13 Ami mós hakarak liurai hatene katak bainhira sira harii hotu ona sidade neʼe no ninia moru sira, sira sei la selu taxa,*+ ho ida-neʼe osan uitoan deʼit mak sei tama ba liurai sira-nia osan-fatin. 14 Ami sente la diʼak se ami husik liurai lakon osan tanba ami mós simu saláriu husi palásiu,* tan neʼe ami haruka karta neʼe atu fó-hatene ba liurai kona-ba situasaun neʼe, 15 atu nuneʼe, Ita-Boot bele buka-hatene kona-ba povu sira-neʼe iha Ita-Boot nia beiʼala sira-nia livru istória.+ Husi livru sira-neʼe, Ita-Boot sei hatene katak sidade neʼe nakonu ho ema kontradór sira, neʼebé halo aat ba liurai no mós ba provínsia sira. Husi tempu uluk kedas iha sidade neʼe iha ema neʼebé kontra makaʼas ukun-naʼin sira. Tan neʼe mak ema harahun tiha sidade neʼe.+ 16 Ami hakarak fó-hatene ba liurai katak bainhira sira harii hotu ona sidade neʼe no ninia moru sira, Ita-Boot sei labele kontrola tan área Mota Eufrates nia sorin parte oeste.”*+

17 Depois neʼe, liurai haruka lia-menon ba Governadór Rehum no ba eskriba Simsai no ba sira-nia maluk seluk neʼebé hela iha rai-Samaria no ba ema seluk iha área Mota Eufrates nia sorin parte oeste,* hodi dehan:

“Kumprimentus ba imi! 18 Ami simu ona dokumentu ofisiál neʼebé imi haruka mai ami, no haʼu-nia atan sira lee* ona ho momoos liafuan hotu mai haʼu. 19 Tan neʼe, haʼu haruka haʼu-nia atan sira atu buka-hatene kona-ba situasaun neʼe, no ami hatene ona katak husi tempu uluk kedas ema neʼebé hela iha sidade neʼe la hakruʼuk ba liurai sira, no sira mak kontradór.+ 20 Iha tempu uluk, iha mós liurai kbiit boot sira iha Jeruzalein no sira ukun área tomak iha Mota Eufrates nia sorin parte oeste,* no ema tenke selu taxa* ba liurai sira-neʼe. 21 Tan neʼe, haruka ema sira-neʼe para sira-nia serbisu. Sira labele harii fali sidade neʼe toʼo haʼu fó sai orden ida tan. 22 Imi tenke halo tuir buat sira-neʼe ho didiʼak, atu nuneʼe sira labele halo aat tan ba liurai.”+

23 Bainhira lee tiha Liurai Artaxerxes nia dokumentu ofisiál neʼe iha Rehum no eskriba Simsai nia oin no mós iha sira-nia maluk nia oin, sira hamutuk ho tropa sira bá lalais Jeruzalein no hapara ema Judeu atu labele harii tan sidade neʼe. 24 Ho ida-neʼe mak ema Judeu para no la harii tan Maromak nia uma iha Jeruzalein. Sira para husi tempu neʼebá toʼo tinan segundu husi Liurai Dário nia ukun ba rai-Pérsia.+

5 Tuirmai, profeta Ageu+ ho Zacarias,+ Ido+ nia bei-oan, hatoʼo Maromak nia liafuan ba ema Judeu neʼebé hela iha rai-Judá no iha Jeruzalein, sira naʼin-rua halo nuneʼe hodi Izraél nia Maromak nia naran, Maromak neʼebé hamutuk ho sira. 2 Iha tempu neʼebá mak Sealtiel nia oan-mane Zorobabel+ hamutuk ho Jeozadak nia oan-mane Jesua+ hahú harii fali Maromak nia uma+ iha Jeruzalein, no Maromak nia profeta sira mós hamutuk ho sira no apoia sira.+ 3 Iha tempu neʼebá Tatenai, governadór ba área Mota Eufrates nia sorin parte oeste,* no Setar-Bozenai hamutuk ho sira-nia maluk mai hasoru Zorobabel ho Jesua no husu ba sira: “Sé mak haruka imi atu harii fali uma neʼe no tau ninia ai-lolon sira hotu?” 4 Sira mós husu: “Mane sira neʼebé harii daudaun uma neʼe, sira-nia naran saida?” 5 Maibé Maromak tau matan ba ema Judeu nia katuas sira,+ tan neʼe Tatenai ho ninia maluk labele hapara sira toʼo tempu neʼebé Tatenai haruka karta ba Liurai Dário no simu fali dokumentu ofisiál husi liurai kona-ba neʼe.

6 Tuirmai mak karta neʼebé sira haruka ba Liurai Dário. Karta neʼe husi Tatenai, governadór ba área iha Mota Eufrates nia sorin parte oeste,* no Setar-Bozenai ho ninia maluk sira, governadór sira neʼebé iha pozisaun kiʼik iha área Mota Eufrates nia sorin parte oeste. 7 Sira haruka informasaun tuirmai neʼe ba liurai:

“Ba Liurai Dário:

“Dame hela ho Ita-Boot! 8 Ami hakarak liurai hatene katak ami bá ona provínsia Judá, no haree ona Maromak boot nia uma. Sira harii daudaun uma neʼe ho fatuk boot sira, no sira mós tau ai-lolon sira ba moru. Povu sira halo serbisu neʼe ho badinas, no tanba sira hakaʼas an, sira-nia serbisu neʼe laʼo ba oin lalais. 9 Tan neʼe, ami husu ba sira-nia katuas sira, dehan: ‘Sé mak haruka imi atu harii fali uma neʼe no tau ninia ai-lolon sira hotu?’+ 10 Ami mós husu katuas sira-neʼe nia naran atu ami bele fó-hatene ba Ita-Boot, hodi Ita bele hatene sira-nia xefe nia naran.

11 “Sira hatán mai ami: ‘Ami mak atan ba Maromak lalehan no rai nian, no ami harii fali uma neʼebé harii ona iha tinan barak liubá, uma neʼebé uluk Izraél nia liurai boot ida mak harii.+ 12 Maibé tanba ami-nia beiʼala sira halo Maromak lalehan nian sai hirus,+ nia entrega sira ba Liurai Nabukodonozór+ husi Babilónia. Nabukodonozór, ema Kaldeia, sobu uma neʼe+ no lori povu ba rai-Babilónia nuʼudar dadur.*+ 13 Maski nuneʼe, iha tinan primeiru husi Liurai Ciro nia ukun ba rai-Babilónia, Liurai Ciro fó orden atu harii fali Maromak nia uma neʼe.+ 14 Liután neʼe, Liurai Ciro mós foti sai sasán sira neʼebé uluk Nabukodonozór foti husi Maromak nia uma iha Jeruzalein hodi tau iha ninia maromak nia templu iha Babilónia.+ Liurai Ciro fó sasán sira-neʼe neʼebé halo husi osan-mean no osan-mutin ba mane ida naran Sesbazar,*+ neʼebé Liurai Ciro foti nuʼudar governadór.+ 15 Ciro dehan ba nia: “Foti sasán sira-neʼe. Bá tau fali sasán sira-neʼe iha templu iha Jeruzalein, no harii fali Maromak nia uma iha ninia fatin.”+ 16 Depois neʼe, Sesbazar mai toʼo Jeruzalein, no nia harii fundasaun ba Maromak nia uma.+ Ami komesa atu harii fali uma neʼe husi tempu neʼebá, maibé agora ami seidauk harii hotu.’+

17 “Tan neʼe, se karik diʼak ba liurai, favór ida, haruka ema atu buka-hatene kona-ba situasaun neʼe iha liurai nia fatin atu rai rikusoin* iha Babilónia, atu bele hatene ho loloos se Liurai Ciro fó duni orden ba sira atu harii fali Maromak nia uma iha Jeruzalein ka lae.+ Tuirmai fó-hatene fali liurai nia desizaun mai ami.”

6 Iha tempu neʼebá mak Liurai Dário haruka ninia atan sira bá Babilónia atu buka-hatene kona-ba situasaun neʼe iha fatin neʼebé rai dokumentu* no liurai nia rikusoin. 2 Sira hetan surat-tahan lulun ida iha fatin neʼebé seguru* iha sidade Ekbatana, iha provínsia Média, no iha surat-tahan neʼe iha mandamentu tuirmai neʼe:

3 “Iha tinan primeiru husi Liurai Ciro nia ukun, nia fó sai orden ida kona-ba Maromak nia uma iha Jeruzalein, hodi dehan:+ ‘Ema Judeu sira tenke harii fali uma neʼe nuʼudar fatin ba sira atu hasaʼe sakrifísiu, no sira tenke harii metin uma neʼe nia fundasaun; uma neʼe tenke aas metru 27,* no luan metru 27,+ 4 sira tenke harii uma neʼe ho fatuk boot tula malu liña tolu, no ho ai-lolon liña ida;+ no foti osan husi liurai nia osan-fatin atu selu buat sira-neʼe.+ 5 No mós sasán sira neʼebé uluk foti husi Maromak nia uma, sasán sira neʼebé halo husi osan-mean no osan-mutin, neʼebé uluk Nabukodonozór foti ona husi templu iha Jeruzalein no lori ba Babilónia,+ tenke entrega fali ba sira atu nuneʼe sira bele tau fali sasán sira-neʼe iha sira-nia fatin iha templu laran iha Jeruzalein, no rai didiʼak iha Maromak nia uma.’+

6 “Tan neʼe, Tatenai, governadór ba área Mota Eufrates nia sorin parte oeste,* no Setar-Bozenai, ho imi-nia maluk sira, governadór sira neʼebé iha pozisaun kiʼik iha área Mota Eufrates nia sorin parte oeste,+ imi labele bá fatin neʼebá. 7 Imi labele hanetik sira-nia serbisu atu harii Maromak nia uma. Ema Judeu nia governadór no katuas sira sei harii fali Maromak nia uma iha ninia fatin. 8 Liután neʼe, haʼu fó sai orden kona-ba buat neʼebé imi tenke halo ba ema Judeu nia katuas sira-neʼe, atu sira bele harii fali Maromak nia uma: Kona-ba osan atu harii fali uma neʼe, imi tenke foti husi liurai nia osan-fatin,+ husi osan impostu neʼebé imi simu husi ema iha área Mota Eufrates nia sorin parte oeste,* no imi tenke fó kedas osan neʼe ba mane sira-neʼe atu sira bele kontinua harii fali Maromak nia uma no ema seluk labele hanetik.+ 9 Loroloron, imi mós tenke fó buat neʼebé amlulik sira iha Jeruzalein presiza, hanesan karau-aman,+ bibi-malae aman+ no mós bibi-malae oan+ atu sira bele hasaʼe nuʼudar sakrifísiu sunu nian ba Maromak neʼebé iha lalehan, no imi mós tenke fó trigu,+ masin,+ tua-uvas+ no mina+ tuir buat neʼebé sira husu. 10 Ho ida-neʼe, sira bele kontinua hasaʼe sakrifísiu atu halo kontente Maromak lalehan nian no sira bele harohan ba liurai nia diʼak no ba ninia oan sira-nia diʼak.+ 11 Haʼu mós fó sai ona orden ida katak se iha ema ruma neʼebé la halo tuir mandamentu neʼe, imi tenke losu sai tiha ai husi ema neʼe nia uma, no tara nia ba ai neʼe, no tanba ninia sala neʼe, ninia uma sei sai fali sentina públiku.* 12 No Maromak neʼebé hili fatin neʼe atu lori ninia naran+ mak sei halakon liurai sira no ema naran deʼit neʼebé halo buat ruma hodi kontra orden neʼe no mós ema naran deʼit neʼebé harahun Maromak nia uma iha Jeruzalein. Haʼu, Dário, mak fó sai orden neʼe. Imi tenke halo tuir kedas.”

13 Tuirmai, Tatenai, governadór ba área Mota Eufrates nia sorin parte oeste,* no Setar-Bozenai,+ ho sira-nia maluk halo tuir kedas orden hotu husi Liurai Dário. 14 No ema Judeu nia katuas sira kontinua harii Maromak nia uma no halo serbisu neʼe laʼo ba oin.+ Profeta Ageu+ no Zacarias,+ Ido nia bei-oan, mós hatoʼo Maromak nia liafuan hodi book sira atu halo serbisu ho badinas. Nuneʼe sira halo uma neʼe toʼo hotu tuir Izraél nia Maromak nia orden,+ no tuir orden husi Ciro,+ husi Dário+ no mós husi Artaxerxes,+ liurai ba rai-Pérsia. 15 Sira harii hotu uma neʼe iha loron terseiru fulan-Adar* tinan neen husi Liurai Dário nia ukun.

16 Tuirmai ema Izraél sira hamutuk ho amlulik sira, ema Levi,+ no ema seluk hotu* ho laran-haksolok halo inaugurasaun* ba Maromak nia uma neʼe. 17 Sira hasaʼe karau-aman 100, bibi-malae aman 200, bibi-malae oan 400 nuʼudar sakrifísiu atu inaugura Maromak nia uma neʼe no sira mós hasaʼe bibi-timur aman 12 nuʼudar sakrifísiu sala nian ba ema Izraél hotu, tuir Izraél nia suku ida-idak.+ 18 Sira fó knaar ba amlulik sira tuir sira ida-idak nia grupu, no mós ba ema Levi sira tuir sira ida-idak nia grupu atu sira bele serbí Maromak iha Jeruzalein,+ hodi tuir buat neʼebé hakerek ona iha Moisés nia livru.+

19 Ema Izraél sira* selebra Páskua* iha loron 14 fulan-primeiru.+ 20 Iha tempu neʼebá amlulik no ema Levi hotu hamoos ona sira-nia an,+ nuneʼe sira hotu moos ona. Tan neʼe, sira bele oho animál atu hasaʼe sakrifísiu Páskua nian ba ema Izraél hotu,* no ba sira-nia maluk amlulik sira, no mós ba sira-nia an rasik. 21 Tuirmai ema Izraél sira* no mós ema hotu neʼebé mai halibur hamutuk ho sira no haketak an ona husi nasaun sira neʼebé la moos iha rai neʼe hodi bele adora* Jeová, Izraél nia Maromak, sira hotu han ai-han husi sakrifísiu neʼe.+ 22 Sira mós selebra Festa Paun Fermentu-Laek nian+ ba loron hitu ho laran-haksolok, tanba Jeová halo sira haksolok no halo ona liurai Asíria hatudu laran-diʼak+ hodi apoia sira* atu harii fali uma ba Maromak loos, Izraél nia Maromak.

7 Liutiha buat sira-neʼe, durante tempu neʼebé Liurai Artaxerxes+ mak ukun rai-Pérsia, Ezras*+ fila fali. Ezras mak Seraias+ nia oan-mane, Seraias mak Azarias nia oan-mane, Azarias mak Hilquias+ nia oan-mane, 2 Hilquias mak Salum nia oan-mane, Salum mak Zadoc nia oan-mane, Zadoc mak Ahitub nia oan-mane, 3 Ahitub mak Amarias nia oan-mane, Amarias mak Azarias+ nia oan-mane, Azarias mak Meraiot nia oan-mane, 4 Meraiot mak Zeraias nia oan-mane, Zeraias mak Uzi nia oan-mane, Uzi mak Buki nia oan-mane, 5 Buki mak Abisua nia oan-mane, Abisua mak Fineias nia oan-mane,+ Fineias mak Eleazar nia oan-mane,+ Eleazar mak amlulik boot Arão nia oan-mane.+ 6 Ezras mai husi rai-Babilónia. Nia mak eskriba ida neʼebé hatene didiʼak* Moisés nia Ukun-Fuan+ neʼebé Jeová, Izraél nia Maromak, fó sai ona. Liurai fó buat hotu neʼebé Ezras husu, tanba ninia Maromak Jeová hamutuk ho nia.*

7 Iha tinan hitu husi Liurai Artaxerxes nia ukun, ema Izraél balu, amlulik sira, ema Levi,+ kantadór sira,+ guarda sira neʼebé hein portaun,+ no atan sira neʼebé halo serbisu iha templu,*+ sira hotu bá toʼo Jeruzalein. 8 Iha fulan-lima tinan hitu husi liurai neʼe nia ukun, Ezras toʼo iha Jeruzalein. 9 Iha loron primeiru fulan-primeiru, nia hahú halo viajen husi rai-Babilónia, no nia toʼo iha Jeruzalein iha loron primeiru fulan-lima, tanba ninia Maromak hamutuk ho nia.+ 10 Ezras prepara ona ninia laran atu estuda Jeová nia Ukun-Fuan no halo tuir,+ no mós atu hanorin ninia mandamentu no desizaun iha Izraél.+

11 Liurai Artaxerxes fó karta ba amlulik Ezras. Ezras mós nuʼudar eskriba neʼebé hatene didiʼak* mandamentu no ukun-fuan sira neʼebé Jeová fó ba Izraél. Liurai nia karta mak tuirmai neʼe:

12 * “Husi Artaxerxes,+ liurai ba liurai sira, hatoʼo ba amlulik Ezras, eskriba neʼebé hakerek fali Ukun-Fuan husi Maromak lalehan nian. Dame hela ho ó. Agora 13 haʼu fó sai ona orden katak, ema Izraél, sira-nia amlulik sira, no ema Levi neʼebé hela iha rai neʼebé haʼu ukun, neʼebé hakarak bá Jeruzalein hamutuk ho ó, sira hotu bele bá.+ 14 Tanba liurai no ninia konsellu-naʼin naʼin-hitu, haruka ó atu buka-hatene didiʼak se ema iha rai-Judá no Jeruzalein halo tuir ona ó-nia Maromak nia Ukun-Fuan ka lae, Ukun-Fuan neʼebé ó hatene didiʼak.* 15 Ó mós tenke lori osan-mutin no osan-mean neʼebé liurai no ninia konsellu-naʼin sira fó ona ba ó ho hakarak rasik hodi lori ba Izraél nia Maromak neʼebé hela iha Jeruzalein, 16 no lori mós osan-mutin no osan-mean hotu neʼebé ó simu* husi ema iha provínsia Babilónia tomak, no mós prezente neʼebé povu no amlulik sira fó ona ba ó ho hakarak rasik hodi lori ba sira-nia Maromak nia uma iha Jeruzalein.+ 17 Ó tenke uza kedas osan sira-neʼe atu sosa karau-aman,+ bibi-malae aman,+ bibi-malae oan,+ no mós buat neʼebé presiza atu hasaʼe nuʼudar sakrifísiu trigu*+ nian no sakrifísiu hemu nian.+ Ó tenke hasaʼe buat sira-neʼe iha altár iha ó-nia Maromak nia uma iha Jeruzalein.

18 “Ó bele uza osan-mutin no osan-mean restu atu halo buat naran deʼit neʼebé diʼak ba ó no mós ba ó-nia maluk sira, buat neʼebé tuir imi-nia Maromak nia hakarak. 19 Kona-ba sasán hotu neʼebé fó ona ba ó atu uza ba adorasaun iha ó-nia Maromak nia uma, ó tenke lori ba Jeruzalein no tau iha Maromak nia oin.+ 20 Se ó presiza tan buat seluk ba ó-nia Maromak nia uma, ó bele foti osan husi liurai nia osan-fatin atu selu buat sira-neʼe.+

21 “Haʼu, Liurai Artaxerxes, fó sai ona mandamentu ba imi hotu neʼebé toma konta liurai nia osan iha área Mota Eufrates nia sorin parte oeste:* Imi tenke fó kedas buat hotu neʼebé Ezras+ husu ba imi, Ezras neʼebé nuʼudar amlulik no eskriba neʼebé hakerek fali Ukun-Fuan husi Maromak lalehan nian. 22 Se nia husu osan-mutin la liu kilograma 3.420,* trigu la liu koro isin 100,* tua-uvas+ la liu litru 2.200,* mina+ la liu litru 2.200, no masin+ neʼebé barak tebes, imi bele fó ba nia. 23 Buat hotu neʼebé Maromak lalehan nian haruka imi atu halo ba ninia uma, imi tenke halo tuir ho laran tomak,+ atu nuneʼe Maromak lalehan nian labele hirus ba povu neʼebé hela iha rai hotu neʼebé liurai ukun no mós ba ninia oan sira.+ 24 Liután neʼe, imi mós labele husu taxa*+ husi amlulik sira, husi ema Levi, husi kantadór sira ho sira neʼebé toka instrumentu múzika,+ husi guarda sira neʼebé hein portaun, husi atan sira neʼebé halo serbisu iha templu,*+ no husi serbisu-naʼin sira iha Maromak nia uma neʼe.

25 “Kona-ba ó Ezras, ó tenke uza matenek neʼebé ó-nia Maromak haraik ona ba ó, ó tenke hili majistradu tribunál* no mós juís sira atu tesi-lia ba povu hotu iha área Mota Eufrates nia sorin parte oeste,* ba ema hotu neʼebé hatene ona ó-nia Maromak nia ukun-fuan sira. No imi tenke hanorin ukun-fuan sira-neʼe ba ema neʼebé seidauk hatene.+ 26 Ema naran deʼit neʼebé la halo tuir ó-nia Maromak nia Ukun-Fuan no liurai nia ukun-fuan, imi tenke fó kastigu kedas ba ema neʼe maski kastigu-mate, ka duni sai husi ninia rai, ka selu multa, ka hatama nia ba komarka.”

27 Fó hahiʼi ba Jeová, ita-nia beiʼala sira-nia Maromak, neʼebé tau ona hanoin sira-neʼe iha liurai nia laran atu hafurak Jeová nia uma iha Jeruzalein!+ 28 Maromak mós hatudu domin neʼebé laran-metin mai haʼu hodi halo liurai+ ho ninia konsellu-naʼin sira+ no ninia ulun-naʼin hotu neʼebé kbiit boot hatudu laran-diʼak mai haʼu. Nuneʼe, haʼu hametin haʼu-nia laran,* tanba Jeová, haʼu-nia Maromak hamutuk ho haʼu, no haʼu halibur ulun-naʼin sira husi povu Izraél atu bá Jeruzalein hamutuk ho haʼu.

8 Tuirmai neʼe mak lista naran nian tuir liña jerasaun ba povu Izraél nia ulun-naʼin sira* no sira-nia umakain neʼebé sai husi rai-Babilónia hamutuk ho haʼu durante tempu neʼebé Liurai Artaxerxes ukun:+ 2 husi Fineias+ nia oan-mane* sira mak Gerson; husi Itamar+ nia oan-mane sira mak Daniel; husi David nia oan-mane sira mak Hatus; 3 husi Sekanias nia oan-mane sira, neʼebé mai husi Paros nia umakain mak Zacarias, hamutuk ho mane naʼin-150 neʼebé rejistu ona; 4 husi Pahat-Moab nia oan-mane sira+ mak Elioenai, Zeraias nia oan-mane, hamutuk ho mane naʼin-200; 5 husi Zatu nia oan-mane sira+ mak Sekanias, Jaaziel nia oan-mane, hamutuk ho mane naʼin-300; 6 husi Adin nia oan-mane sira+ mak Ebed, Jonatan nia oan-mane, hamutuk ho mane naʼin-50; 7 husi Elam nia oan-mane sira+ mak Jesaias, Atalias nia oan-mane, hamutuk ho mane naʼin-70; 8 husi Sefatias nia oan-mane sira+ mak Zebadias, Micael nia oan-mane, hamutuk ho mane naʼin-80; 9 husi Joab nia oan-mane sira mak Obadias, Jeiel nia oan-mane, hamutuk ho mane naʼin-218; 10 husi Bane nia oan-mane sira mak Selomit, Josifias nia oan-mane, hamutuk ho mane naʼin-160; 11 husi Bebai nia oan-mane sira+ mak Zacarias, Bebai nia oan-mane, hamutuk ho mane naʼin-28; 12 husi Asgad nia oan-mane sira+ mak Joanan, Hakatan nia oan-mane, hamutuk ho mane naʼin-110; 13 husi Adonikam nia oan-mane sira+ neʼebé ikusliu, sira-nia naran mak: Elifelet, Jeiel no Semaias, hamutuk ho mane naʼin-60; 14 no husi Bigvai nia oan-mane sira+ mak Utai no Zabud, hamutuk ho mane naʼin-70.

15 Haʼu halibur sira hotu besik mota neʼebé tun ba Ahava,+ no ami harii tenda hodi hela iha neʼebá durante loron tolu. Maibé bainhira haʼu buka-hatene didiʼak kona-ba povu no amlulik sira, haʼu la hetan ema Levi ida iha neʼebá. 16 Tan neʼe, haʼu haruka ema bolu Eliezer, Ariel, Semaias, Elnatan, Jarib, Elnatan, Natan, Zacarias no Mesulam, neʼebé serbí nuʼudar ulun-naʼin, no bolu mós mestre sira, Joarib no Elnatan. 17 Tuirmai, haʼu fó mandamentu ida ba sira kona-ba Ido, neʼebé nuʼudar ulun-naʼin iha fatin ida naran Kasifia. Haʼu haruka sira bá Kasifia atu fó-hatene Ido no ninia maun-alin sira atu lori ema balu mai hodi halo serbisu iha Maromak nia uma. Ido no ninia maun-alin sira mak jerasaun husi atan sira neʼebé uluk halo serbisu iha templu.* 18 Tanba ami-nia Maromak* hamutuk ho ami, entaun sira lori mane matenek ida husi Mali+ nia oan-mane sira, naran Serebias. Mali mak Levi nia bei-oan, Levi mak Izraél nia oan-mane. Serebias+ mai hamutuk ho ninia oan-mane no maun-alin sira, hamutuk mane naʼin-18; 19 no sira mós lori Hasabias, hamutuk ho Jesaias, ema Merari,+ ho ninia maun-alin sira no sira-nia oan-mane sira, hamutuk mane naʼin-20. 20 No atan sira neʼebé serbí iha templu,* sira neʼebé uluk David ho ulun-naʼin sira fó ona ba ema Levi atu ajuda sira, sira-nia bei-oan hamutuk mane naʼin-220, sira hotu nia naran rejistu ona iha lista naran nian.

21 Tuirmai, haʼu fó sai katak povu hotu tenke halo jejún besik Mota Ahava, atu hatudu haraik an iha ami-nia Maromak nia oin, no husu nia atu fó matadalan kona-ba ami-nia viajen, kona-ba ami, ami-nia oan sira no mós ami-nia sasán hotu. 22 Haʼu moe atu husu liurai nia ajuda hodi haruka ninia tropa sira no mós tropa neʼebé saʼe kuda atu proteje ami husi inimigu sira durante ami-nia viajen neʼe, tanba ami hatete ona ba liurai katak: “Ami-nia Maromak* sei hamutuk ho ema hotu neʼebé buka nia,+ maibé nia sei hatudu sai ninia forsa no hirus hasoru ema hotu neʼebé husik nia.”+ 23 Tan neʼe, ami halo jejún no harohan ba ami-nia Maromak kona-ba situasaun neʼe, no nia rona ba ami-nia harohan.+

24 Tuirmai, haʼu haketak amlulik nia xefe naʼin-12. Sira mak Serebias no Hasabias,+ hamutuk ho sira-nia maun-alin naʼin-sanulu. 25 Tuirmai haʼu tetu osan-mutin, osan-mean no sasán sira seluk, no fó buat sira-neʼe ba sira. Liurai ho ninia konsellu-naʼin sira, ninia ulun-naʼin sira no ema Izraél hotu fó buat sira-neʼe ho laran atu uza iha ami-nia Maromak nia uma.+ 26 Haʼu tetu buat sira-neʼe no fó ba sira. Haʼu fó osan-mutin kilograma 22.230,* sasán neʼebé halo husi osan-mutin hamutuk 100 neʼebé todan kilograma 68 ho grama 400,* osan-mean kilograma 3.420,* 27 manko kiʼik osan-mean hamutuk 20, neʼebé ninia folin osan-mean Pérsia nian* 1.000, no mós sasán rua husi riti diʼak neʼebé kór-mean lakan no folin-boot hanesan ho osan-mean.

28 Entaun, haʼu hatete ba sira: “Imi mak santu ba Jeová,+ no sasán sira-neʼe mós santu. Osan-mutin no osan-mean sira-neʼe mak prezente neʼebé ema fó ho hakarak rasik ba Jeová, imi-nia beiʼala sira-nia Maromak. 29 Nuneʼe, tau matan didiʼak ba sasán sira-neʼe toʼo imi toʼo iha Jeruzalein. Imi tenke tetu sasán sira-neʼe iha amlulik nia xefe sira-nia oin, ema Levi no ulun-naʼin husi umakain Izraél sira-nia oin+ iha kuartu* sira iha Jeová nia uma.” 30 Tuirmai, amlulik sira no ema Levi simu osan-mutin, osan-mean no sasán sira neʼebé tetu ona atu lori ba ami-nia Maromak nia uma iha Jeruzalein.

31 Ikusmai, iha loron 12 fulan-primeiru,+ ami husik Mota Ahava+ no laʼo ba Jeruzalein. Ami-nia Maromak hamutuk ho ami, nia proteje ami husi inimigu sira no ema aat sira durante ami-nia viajen tomak. 32 Tuirmai, ami toʼo iha Jeruzalein+ no hela iha neʼebá ba loron tolu. 33 Iha loron haat, ami tetu osan-mutin, osan-mean no sasán sira iha ami-nia Maromak nia uma+ no fó buat sira-neʼe ba Urijas nia oan-mane Meremot+ neʼebé nuʼudar amlulik, no Fineias nia oan-mane Eleazar, hamutuk ho ema Levi naʼin-rua, sira mak Jesua nia oan-mane Jozabad+ no Binui+ nia oan-mane Noadias. 34 Ami sura no tetu ona buat hotu, no hakerek hotu buat sira-neʼe nia todan. 35 Ema Izraél sira* neʼebé sai livre ona husi dadur,* sira hasaʼe sakrifísiu sunu nian ba Izraél nia Maromak. Sira hasaʼe karau-aman+ 12 ba ema Izraél hotu, bibi-malae aman+ 96, bibi-malae oan* 77, no bibi-timur aman+ 12 nuʼudar sakrifísiu sala nian. Sira hasaʼe animál hotu neʼe nuʼudar sakrifísiu sunu nian ba Jeová.+

36 Tuirmai, ami hatoʼo liurai nia mandamentu+ ba ukun-naʼin distritu* sira no ba governadór sira iha área Mota Eufrates nia sorin parte oeste,*+ no sira apoia povu neʼe hodi fó buat hotu neʼebé presiza atu uza iha Maromak loos nia uma.+

9 Bainhira ami halo hotu tiha buat sira-neʼe, ulun-naʼin sira hakbesik mai haʼu, hodi dehan: “Povu Izraél, amlulik sira no ema Levi seidauk haketak an husi ema sira neʼebé hela haleʼu ami, no seidauk husik sira-nia hahalok aat,+ neʼebé hanesan ho ema Kanaan, ema Hetes, ema Perizeu, ema Jebus, ema Ammon, ema Moab, ema Ejitu+ no ema Amoreu.+ 2 Tanba sira hola ona ema sira-neʼe nia oan-feto sira nuʼudar sira-nia feen no sira-nia oan-mane nia feen.+ Agora povu sira neʼebé santu+ kahur an ona ho ema neʼebé hela haleʼu ami.+ Ulun-naʼin no administradór sira mak halo uluk sala hodi la hatudu laran-metin.”

3 Bainhira haʼu rona tiha liafuan neʼe, haʼu lees kedas haʼu-nia roupa parte laran no roupa neʼebé la iha liman, haʼu mós fokit sai haʼu-nia fuuk no haʼu-nia hasarahun balu, no haʼu tuur ho triste. 4 Tuirmai, ema hotu neʼebé respeitu* Izraél nia Maromak nia liafuan mai halibur haleʼu haʼu iha tempu neʼebé haʼu tuur ho triste hela toʼo oras atu hasaʼe sakrifísiu trigu nian iha kalan.+ Sira halo nuneʼe tanba povu Izraél* la hatudu hahalok laran-metin.

5 Iha oras atu hasaʼe sakrifísiu trigu nian iha kalan,+ haʼu hamriik husi fatin neʼebé haʼu tuur tanba sente laran-kraik, haʼu-nia roupa parte laran no roupa neʼebé la iha liman naklees hela, tuirmai haʼu hakneʼak no loke haʼu-nia liman ba Jeová, haʼu-nia Maromak. 6 Haʼu dehan: “Oh haʼu-nia Maromak, haʼu sente laran-kraik no moe tebes atu foti oin ba Ita-Boot, oh haʼu-nia Maromak, tanba ami-nia sala mak barak tebes toʼo liu ami-nia ulun no ami-nia sala sira mak aas tebes toʼo lalehan.+ 7 Husi ami-nia beiʼala sira-nia tempu toʼo ohin loron ami-nia sala mak boot.+ No tanba ami-nia sala sira-neʼe mak Ita-Boot entrega ami, ami-nia liurai no amlulik sira ba liurai sira husi rai seluk nia liman, ami barak sai dadur+ no balu mate ho surik,+ ema hadau ami-nia rikusoin+ no hamoe ami, hanesan akontese daudaun ohin loron.+ 8 Maibé agora ba tempu uitoan, Ita-Boot, ami-nia Maromak Jeová, Ita hatudu ona laran-diʼak mai ami hodi husik ami balu moris no fó fatin seguru* mai ami iha Ita-nia fatin santu,+ atu ami-nia matan bele nabilan fali, oh ami-nia Maromak, no ami bele sente kmaan uitoan iha ami-nia situasaun nuʼudar atan. 9 Tanba maski ami mak atan,+ Ita-Boot, ami-nia Maromak, la husik ami sai atan ba nafatin, maibé Ita hatudu Ita-nia domin neʼebé laran-metin mai ami iha liurai Pérsia+ sira-nia oin, no fó kbiit foun mai ami atu ami bele harii fali ami-nia Maromak nia uma+ no hadiʼa fali fatin neʼebé sai fuik ona, atu nuneʼe ami hela iha rai-Judá no iha Jeruzalein hanesan moru fatuk* mak haleʼu ami.

10 “Maibé buat hotu neʼe akontese ona, oh ami-nia Maromak, agora ami bele hatete tan saida ba Ita-Boot? Ami husik ona Ita-nia ukun-fuan sira 11 neʼebé Ita fó mai ami liuhusi Ita-nia atan profeta sira, hodi dehan: ‘Rai neʼebé imi atu bá hodi foti nuʼudar imi-nian mak rai neʼebé la moos tanba ema neʼebé hela iha neʼebá la moos. Sira halo nakonu rai neʼe ho sira-nia hahalok aat, husi rai nia rohan ida toʼo rohan seluk.+ 12 Tan neʼe, imi keta fó imi-nia oan-feto sira ba sira-nia oan-mane, no imi keta simu sira-nia oan-feto ba imi-nia oan-mane sira.+ Imi mós labele halo buat naran deʼit neʼebé lori dame ba sira no halo sira moris diʼak,+ hodi nuneʼe imi bele sai forte liután no han buat diʼak husi rai neʼe, no rai neʼe sei sai imi-nian no imi-nia oan sira-nian ba nafatin.’ 13 Agora buat hotu neʼe akontese ona ba ami tanba ami-nia hahalok aat sira no ami-nia sala neʼebé boot. Maibé, oh ami-nia Maromak, Ita la fó kastigu ba ami tuir ami-nia sala,+ no Ita husik ami moris.+ 14 Tan neʼe, oinsá mak ami bele kontra fali Ita-nia ukun-fuan sira hodi kaben ho ema neʼebé halo hahalok aat sira-neʼe?+ Se nuneʼe, Ita-Boot sei sai hirus tebes ba ami no halakon mohu ami toʼo la iha ema ida mak bele halai sees ka moris, loos ka lae? 15 Oh, Jeová, Izraél nia Maromak, Ita-nia hahalok mak loos,+ tanba Ita husik ami balu moris toʼo ohin loron. Agora, ami halo ona sala iha Ita-nia oin, ami la merese atu hamriik iha Ita-nia oin tanba sala neʼebé ami halo ona.”+

10 Bainhira Ezras halo orasaun+ hela no fó sai povu nia sala ho tanis no latan an ho oin ba rai iha Maromak loos nia uma oin, povu Izraél lubun boot, mane, feto no labarik sira mai hamriik haleʼu nia, tanba ema sira-neʼe tanis makaʼas. 2 Tuirmai, Jeiel+ nia oan-mane Sekanias neʼebé husi Elam nia umakain,+ dehan ba Ezras: “Ami la hatudu laran-metin ba ita-nia Maromak tanba ami hola* feto sira husi rai seluk.+ Maski nuneʼe, sei iha esperansa ba povu Izraél. 3 Agora, mai ita halo aliansa ida ho ita-nia Maromak,+ atu haruka ita-nia feen sira-neʼe ho sira-nia oan hotu sai husi ita-nia leet, hodi tuir matadalan husi Jeová no husi ema sira neʼebé respeitu* ita-nia Maromak nia mandamentu.+ Mai ita halo tuir Ukun-Fuan. 4 Hamriik bá, tanba neʼe mak ó-nia knaar, no ami sei hamutuk ho ó. Sai forte no halo ida-neʼe bá.”

5 Rona tiha neʼe, Ezras hamriik no haruka amlulik nia xefe sira, ema Levi, no povu Izraél hotu atu jura katak sira sei halo tuir liafuan sira-neʼe.+ Nuneʼe, sira halo juramentu. 6 Tuirmai, Ezras sai husi Maromak loos nia uma, no bá iha Eliasib nia oan-mane Jeoanan nia kuartu.* Maski nuneʼe, nia la han hahán no la hemu bee iha neʼebá, tanba nia laran-susar tebes kona-ba povu* neʼebé la hatudu laran-metin.+

7 Tuirmai, sira fó sai avizu ida iha rai-Judá no Jeruzalein tomak katak ema Izraél hotu* tenke halibur hamutuk iha Jeruzalein. 8 Avizu neʼe tuir ulun-naʼin no katuas sira-nia desizaun, neʼebé dehan: Ema naran deʼit neʼebé la mai iha loron tolu nia laran, ninia sasán hotu sei prende* tiha, no tenke hasai tiha ema neʼe husi kongregasaun* nia leet.+ 9 Tan neʼe, mane hotu husi suku Judá no Benjamim halibur hamutuk iha Jeruzalein iha loron tolu nia laran, neʼe katak iha loron 20 fulan-sia. Sira hotu tuur iha pátiu* iha Maromak loos nia uma ho nakdedar tanba problema neʼe no mós tanba udan tau makaʼas.

10 Tuirmai, amlulik Ezras hamriik no hatete ba sira: “Imi la hatudu hahalok laran-metin tanba hola feto sira husi rai seluk.+ Ho ida-neʼe mak imi aumenta tan povu Izraél nia sala. 11 Agora, fó sai imi-nia sala ba Jeová, imi-nia beiʼala nia Maromak, no halo tuir ninia hakarak bá. Imi tenke haketak an husi ema sira neʼebé mai husi rai seluk no haruka imi-nia feen sira husi rai seluk atu sai husi imi-nia leet.”+ 12 Rona tiha neʼe, povu* tomak hatán ho lian makaʼas, hodi dehan: “Ami-nia obrigasaun mak ami tenke halo tuir duni liafuan hotu neʼebé Ita-Boot hatete mai ami. 13 Maibé, ami ema barak tebes, no agora mak tempu udan hela. Tan neʼe, ami labele hamriik deʼit iha liʼur, no problema neʼe mós labele hadiʼa iha loron ida ka rua deʼit nia laran, tanba ami halo ona sala boot hasoru Maromak. 14 Tan neʼe, favór ida, husik ami-nia ulun-naʼin sira atu reprezenta kongregasaun tomak.+ No mane hotu iha ami-nia sidade ida-idak neʼebé hola ona feto sira husi rai seluk, sei mai iha fatin neʼe tuir tempu neʼebé deside ona. Sira sei mai hamutuk ho katuas no juís sira husi sira-nia sidade ida-idak atu nuneʼe ami bele hapara ami-nia Maromak nia hirus neʼebé lakan makaʼas hasoru ami tanba problema neʼe.”

15 Maibé Asael nia oan-mane Jonatan, no Tikva nia oan-mane Jazeias kontra desizaun neʼe, no ema Levi naʼin-rua naran Mesulam no Sabetai+ mós apoia sira. 16 Maibé ema Izraél sira* halo tuir buat neʼebé sira konkorda ona. No iha loron primeiru fulan-sanulu, amlulik Ezras ho família nia ulun-naʼin sira husi sira-nia umakain ida-idak,* katak ulun-naʼin sira hotu neʼebé naran hakerek iha lista naran nian, sira halibur hamutuk atu buka-hatene kona-ba problema neʼe. 17 Ikusmai, iha loron primeiru fulan-primeiru, sira rezolve ona problema kona-ba mane hotu neʼebé hola feto sira husi rai seluk. 18 Iha tempu neʼebá sira mós hetan amlulik nia oan-mane balu hola ona feto sira husi rai seluk.+ Sira mak Jesua+ nia oan-mane balu no ninia maun-alin balu, sira-nia naran mak Maseias, Eliezer, Jarib no Gedalias. Jesua mak Jeozadak nia oan-mane. 19 Maibé mane sira-neʼe promete* atu haruka sira-nia feen sai husi sira-nia leet, no sira ida-idak promete atu fó bibi-malae aman ida husi sira-nia bibi-lubun nuʼudar sakrifísiu tanba sira halo ona sala.+

20 Tuirmai neʼe mak amlulik seluk tan neʼebé halo ona sala: husi Imer nia oan-mane sira+ mak Hanani no Zebadias; 21 husi Harim nia oan-mane sira+ mak Maseias, Elias, Semaias, Jeiel no Uzias; 22 husi Pasur nia oan-mane sira+ mak Elioenai, Maseias, Ismael, Netanel, Jozabad no Eleasa. 23 Husi ema Levi mak Jozabad, Simei, Kelaias, neʼe katak Kelita, Petaias, Judá no Eliezer; 24 husi kantadór sira mak Eliasib; no husi guarda sira neʼebé hein portaun mak Salum, Telem no Uri.

25 Tuirmai neʼe mak mane sira husi povu Izraél nia leet neʼebé halo ona sala: husi Paros nia oan-mane sira+ mak Ramias, Izias, Malquias, Mijamin, Eleazar, Malquias no Benaias; 26 husi Elam nia oan-mane sira+ mak Matanias, Zacarias, Jeiel,+ Abdi, Jeremot no Elias; 27 husi Zatu nia oan-mane sira+ mak Elioenai, Eliasib, Matanias, Jeremot, Zabad no Aziza; 28 husi Bebai nia oan-mane sira+ mak Jeoanan, Hananias, Zabai no Atlai; 29 husi Bane nia oan-mane sira mak Mesulam, Maluke, Adaias, Jasub, Seal no Jeremot; 30 husi Pahat-Moab nia oan-mane sira+ mak Adna, Kelal, Benaias, Maseias, Matanias, Bezalel, Binui no Manasés; 31 husi Harim nia oan-mane sira+ mak Eliezer, Isias, Malquias,+ Semaias, Simeão, 32 Benjamim, Maluke no Semarias; 33 husi Hasum nia oan-mane sira+ mak Matenai, Matata, Zabad, Elifelet, Jeremai, Manasés no Simei; 34 husi Bane nia oan-mane sira mak Maadai, Amram, Uel, 35 Benaias, Bedeias, Keluí, 36 Vanias, Meremot, Eliasib, 37 Matanias, Matenai no Jaasu; 38 husi Binui nia oan-mane sira mak Simei, 39 Selemias, Natan, Adaias, 40 Maknadebai, Sasai, Sarai, 41 Azarel, Selemias, Semarias, 42 Salum, Amarias no José; 43 no husi Nebo nia oan-mane sira mak Jeiel, Matitias, Zabad, Zebinas, Jadai, Joel no Benaias. 44 Mane sira-neʼe hotu hola ona feto sira husi rai seluk,+ no sira haruka ona sira-nia feen ho sira-nia oan sai husi sira-nia leet.+