NEEMIAS

1 Liafuan husi Hakalias nia oan-mane Neemias*+ mak tuirmai neʼe: Iha fulan-Kislev* tinan 20 husi liurai* nia ukun, haʼu sei iha liurai nia palásiu* iha Susan.*+ 2 Iha tempu neʼebá haʼu-nia maun* Hanani+ mai hamutuk ho mane Judá seluk hodi hasoru haʼu, no haʼu husu ba sira kona-ba ema Judeu restu neʼebé sai livre ona husi dadur,+ no haʼu mós husu kona-ba Jeruzalein. 3 Sira hatán: “Ema neʼebé sai livre ona husi dadur no hela fali iha provínsia neʼebá,* sira-nia situasaun aat tebes no sira hetan moe boot.+ Sidade Jeruzalein nia moru rahun hela,+ no ninia portaun sira ahi han tiha ona.”+

4 Bainhira haʼu rona liafuan sira-neʼe, haʼu tuur kedas, haʼu komesa tanis no triste ba loron barak. Haʼu mós kontinua halo jejún+ no harohan ba Maromak lalehan nian. 5 Haʼu dehan: “Oh Jeová, Maromak lalehan nian, Maromak neʼebé boot no kmanek tebes,* neʼebé sempre kumpre Ita-nia aliansa no hatudu domin neʼebé laran-metin ba ema neʼebé hadomi Ita no halo tuir Ita-nia mandamentu sira,+ 6 favór ida, see tilun didiʼak mai haʼu no hateke ba haʼu hodi rona Ita-nia atan nia orasaun iha loron neʼe. Loron-kalan haʼu halo orasaun+ kona-ba Ita-nia atan ema Izraél, no iha tempu hanesan haʼu mós fó sai sala sira neʼebé povu Izraél halo ona hasoru Ita. Ami halo ona sala, haʼu no haʼu-nia aman nia umakain.+ 7 Ami halo duni hahalok aat hasoru Ita+ hodi la halo tuir Ita-nia mandamentu, ukun-fuan no desizaun sira neʼebé Ita fó sai ona ba Ita-nia atan Moisés.+

8 “Favór ida, hanoin-hetan liafuan* neʼebé Ita fó sai ona ba Ita-nia atan Moisés, hodi dehan: ‘Se imi la hatudu laran-metin, haʼu sei halo imi namkari iha povu sira-nia leet.+ 9 Maibé se imi fila fali mai haʼu hodi kumpre no halo tuir haʼu-nia mandamentu sira, maski imi namkari ba rai neʼebé dook tebes, haʼu sei halibur imi+ husi neʼebá no lori imi fila ba fatin neʼebé haʼu hili ona atu lori haʼu-nia naran.’+ 10 Sira mak Ita-nia atan no Ita-nia povu neʼebé Ita sosa fali ona ho Ita-nia kbiit boot no Ita-nia liman neʼebé forte.+ 11 Oh Jeová, favór ida, see tilun didiʼak ba Ita-nia atan neʼe nia orasaun no mós orasaun husi Ita-nia atan sira neʼebé hamtaʼuk Ita-nia naran. Favór ida, ohin fó susesu ba Ita-nia atan neʼe, no haʼu hein katak liurai sei hatudu laran-sadiʼa ba haʼu.”+

Iha tempu neʼebá haʼu mak toma konta ba liurai nia hemu.+

2 Iha fulan-Nisan* tinan 20+ husi Liurai Artaxerxes nia ukun,+ liurai hakarak atu hemu tua-uvas, entaun hanesan baibain haʼu foti tua-uvas no fó ba liurai.+ Maibé antes neʼe haʼu nunka hatudu oin murón hanesan neʼe iha liurai nia oin. 2 Nuneʼe liurai hatete mai haʼu: “Tanbasá mak ó-nia oin murón maski ó la moras? Entaun ó murón tanba laran-triste.” Rona tiha neʼe, haʼu sai taʼuk tebes.

3 Tuirmai haʼu dehan ba liurai: “Oh liurai, moris naruk bá! Oinsá mak haʼu la murón? Sidade neʼebé haʼu-nia beiʼala sira hakoi bá rahun hela, no ninia portaun sira ahi han ona.”+ 4 Entaun liurai husu ba haʼu: “Ó hakarak atu halo saida?” Ho ida-neʼe, haʼu halo kedas orasaun ba Maromak lalehan nian.+ 5 Tuirmai haʼu dehan ba liurai: “Se liurai kontente no hakarak hatudu laran-diʼak ba Ita-nia atan neʼe, haruka haʼu bá Judá, ba sidade neʼebé haʼu-nia beiʼala sira hakoi bá, atu nuneʼe haʼu bele harii fali sidade neʼe.”+ 6 Depois neʼe, liurai koʼalia ba haʼu, no liurai-feto tuur hela iha ninia sorin. Liurai dehan: “Ó sei halo viajen toʼo bainhira? Bainhira mak ó sei fila fali mai?” Entaun haʼu fó sai tempu ba nia,+ no liurai kontente ho ida-neʼe hodi haruka haʼu bá.+

7 Tuirmai haʼu dehan ba liurai: “Se neʼe monu loos ba liurai nia laran, entaun entrega karta ida ba haʼu atu fó ba governadór sira iha área Mota Eufrates nia sorin parte oeste,*+ hodi sira bele husik haʼu laʼo liu sira-nia rai toʼo Judá, 8 no mós fó karta ida ba Asaf neʼebé tau matan ba Liurai nia ai-hun sira,* atu nuneʼe nia bele fó ai ba haʼu hodi halo riin sira ba portaun husi Uma* Aas Seguru+ no ba sidade nia moru+ no ba uma neʼebé haʼu sei hela.” Entaun liurai entrega karta sira-neʼe ba haʼu+ tanba haʼu-nia Maromak ajuda haʼu.*+

9 Depois neʼe, haʼu toʼo ba governadór sira iha área Mota Eufrates nia sorin parte oeste* no entrega liurai nia karta ba sira. Liurai mós haruka xefe tropa nian no tropa neʼebé saʼe kuda hodi bá hamutuk ho haʼu. 10 Bainhira Sanbalat+ ema Horom no ema-boot* naran Tobias+ husi Ammon+ rona kona-ba neʼe, sira la kontente duni tanba ema ida mai atu halo buat diʼak ruma ba ema Izraél.

11 Liutiha tempu balu, haʼu toʼo iha Jeruzalein no hela iha neʼebá durante loron tolu. 12 Haʼu ho mane balu neʼebé hamutuk ho haʼu hadeer iha kalan, maibé haʼu la fó-hatene ema ida kona-ba buat neʼebé haʼu-nia Maromak tau ona iha haʼu-nia laran atu halo ba Jeruzalein, no ami la lori kuda-burru seluk só deʼit kuda-burru neʼebé haʼu saʼe. 13 Iha kalan neʼe haʼu sai liuhusi Portaun Foho-Leet,+ no laʼo liu bee-matan naran Samea Boot nia oin toʼo Portaun Ahi-Kadesan Butuk,+ no haʼu haree didiʼak Jeruzalein nia moru sira neʼebé rahun ona no ninia portaun sira neʼebé ahi han ona.+ 14 No haʼu liu Portaun Bee-Matan+ toʼo Liurai nia Kolan. Fatin neʼe kloot tebes ba haʼu-nia kuda-burru atu liu. 15 Maibé haʼu kontinua laʼo saʼe ba foho-leet*+ besik mota iha kalan neʼe, no haʼu haree didiʼak moru sira, depois neʼe, haʼu fila no tama liuhusi Portaun Foho-Leet, tuirmai haʼu fila fali.

16 Administradór sira+ la hatene haʼu bá neʼebé no saida mak haʼu halo, tanba haʼu seidauk fó sai buat ida ba ema Judeu, amlulik sira, ema-boot sira, administradór sira no serbisu-naʼin sira seluk. 17 Ikusmai haʼu dehan ba sira: “Imi bele haree katak ita iha susar laran, no haree oinsá Jeruzalein rahun hela no ninia portaun sira ahi han ona. Entaun mai ita harii fali moru Jeruzalein, atu bele halakon moe neʼe husi ita.” 18 Tuirmai haʼu konta ba sira kona-ba oinsá haʼu-nia Maromak ajuda ona haʼu+ no mós kona-ba liafuan sira neʼebé liurai fó sai ona ba haʼu.+ Ho ida-neʼe, sira dehan: “Mai ita harii fali sidade neʼe nia moru.” Nuneʼe sira prepara sira-nia an* hodi halo serbisu diʼak neʼe.+

19 Bainhira Sanbalat ema Horom no ema-boot* naran Tobias+ husi Ammon,+ no Gesem ema Arábia,+ rona kona-ba neʼe, sira komesa goza+ no hatudu katak sira odi ami. Sira dehan: “Imi halo saida? Imi kontra liurai ka?”+ 20 Maibé haʼu hatán: “Maromak lalehan nian mak sei halo ami hetan susesu,+ no ami neʼebé ninia atan sira sei hamriik no harii fali sidade nia moru. Imi la sai parte iha Jeruzalein, no imi la iha direitu no la hola parte iha Jeruzalein nia istória.”*+

3 Amlulik boot Eliasib+ no ninia maun-alin amlulik seluk harii Portaun Bibi.+ Sira halo santu portaun neʼe*+ no tau ninia odamatan sira. Sira halo santu moru neʼe toʼo Uma Aas* Mea,+ no toʼo Uma Aas* Hananel.+ 2 Mane Jerikó sira+ hadiʼa moru nia parte tuirmai. No Imri nia oan-mane Zakur mak hadiʼa moru nia parte tuirmai tan.

3 Hasena nia oan-mane sira hadiʼa Portaun Ikan;+ sira tau arus sira,+ tau ninia odamatan sira, xave-fatin sira, no ai-lolon sira. 4 Urijas nia oan-mane Meremot,+ Hakoz nia bei-oan, mak hadiʼa moru nia parte tuirmai; no Berekias nia oan-mane Mesulam,+ Mesezabel nia bei-oan, mak hadiʼa moru nia parte tuirmai tan; no Baana nia oan-mane Zadoc mak hadiʼa moru nia parte tuirmai tan. 5 Depois neʼe, ema Tekoa+ mak hadiʼa moru parte tuirmai, maibé sira-nia ema-boot sira lakohi haraik an hodi hola parte iha sira-nia ulun-naʼin nia serbisu.

6 Pasea nia oan-mane Joiada no Besodeias nia oan-mane Mesulam mak hadiʼa Portaun husi Sidade Antigu;+ sira tau arus sira no tau ninia odamatan sira, xave-fatin sira no ai-lolon sira. 7 Melatias ema Gibeão+ no Jadon ema Meronot mak harii moru nia parte tuirmai, no governadór husi área Mota Eufrates nia sorin parte oeste*+ mak ukun ema Gibeão no Mizpa.+ 8 Depois neʼe, Haraias nia oan-mane Uziel, badaen osan-mean, mak hadiʼa moru nia parte tuirmai tan; no Hananias neʼebé halo mina-morin mak hadiʼa moru nia parte tuirmai tan; no sira nahe fatuk iha Jeruzalein toʼo Moru Luan.+ 9 Depois neʼe, Hur nia oan-mane Refaias, ulun-naʼin ba sidade Jeruzalein nia área sorin, mak hadiʼa moru nia parte tuirmai. 10 Depois neʼe, Harumafe nia oan-mane Jedaias mak hadiʼa moru iha ninia uma oin rasik, no Hasabneias nia oan-mane Hatus mak hadiʼa moru nia parte tuirmai tan.

11 Harim nia oan-mane Malquias+ no Pahat-Moab nia oan-mane Hasub+ mak hadiʼa moru nia parte seluk,* no mós Uma Aas* Fornu.+ 12 Depois neʼe, Haloes nia oan-mane Salum, ulun-naʼin ba sidade Jeruzalein nia área sorin, hamutuk ho ninia oan-feto sira mak hadiʼa moru nia parte tuirmai tan.

13 Hanun no sira neʼebé hela iha Zanoa+ mak hadiʼa Portaun Foho-Leet;+ sira hadiʼa neʼe no tau ninia odamatan sira, xave-fatin sira no ai-lolon sira, no sira hadiʼa moru ho luan metru 445* toʼo Portaun Ahi-Kadesan Butuk.+ 14 Recab nia oan-mane Malquias, ulun-naʼin ba área Bet-Hakerem,+ mak hadiʼa Portaun Ahi-Kadesan Butuk; nia harii portaun neʼe no tau ninia odamatan sira, xave-fatin sira no ai-lolon sira.

15 Koloze nia oan-mane Salune, ulun-naʼin ba área Mizpa,+ mak hadiʼa Portaun Bee-Matan;+ nia harii portaun neʼe no tau ninia kakuluk, odamatan sira, xave-fatin sira no ai-lolon sira, no nia mós hadiʼa moru husi Kolan+ Sela* neʼebé besik Liurai nia Jardín+ toʼo Eskada+ neʼebé tun ba David nia Sidade.+

16 Depois neʼe, Azbuk nia oan-mane Neemias, ulun-naʼin ba Bet-Zur nia área sorin,+ mak hadiʼa moru neʼebé iha David nia Rate*+ oin toʼo kolan+ neʼebé ema mak halo no toʼo Uma Asuwaʼin.

17 Ema Levi mós halo serbisu hodi hadiʼa moru. Bane nia oan-mane Rehum mak sira-nia xefe. No Hasabias, ulun-naʼin ba Keila nia área sorin,+ mak hadiʼa moru nia parte tuirmai hodi reprezenta ninia área. 18 Depois neʼe, sira-nia maun-alin sira mak hadiʼa moru nia parte tuirmai tan. Henadad nia oan-mane Bavai, ulun-naʼin ba Keila nia área sorin, mak sira-nia xefe.

19 Depois neʼe, Jesua nia oan-mane Ezer,+ ulun-naʼin husi Mizpa, mak hadiʼa moru nia parte seluk neʼebé hateke ba dalan atu saʼe ba Armazén Rai Armas neʼebé iha Riin Apoia.+

20 Depois neʼe, Zabai+ nia oan-mane Baruc halo serbisu makaʼas hodi hadiʼa moru nia parte seluk, husi Riin Apoia toʼo portaun iha amlulik boot Eliasib+ nia uma.

21 Depois neʼe, Urijas nia oan-mane Meremot,+ Hakoz nia bei-oan, mak hadiʼa moru nia parte seluk, husi portaun iha Eliasib nia uma toʼo ninia uma sorin seluk.

22 Depois neʼe, amlulik sira, mane sira husi área Jordaun,*+ mak hadiʼa moru nia parte tuirmai. 23 No Benjamim ho Hasub mak hadiʼa moru iha sira-nia uma oin rasik. Depois neʼe, Maseias nia oan-mane Azarias, Ananias nia bei-oan, mak hadiʼa moru besik ninia uma rasik. 24 No Henadad nia oan-mane Binui mak hadiʼa moru nia parte seluk, husi Azarias nia uma toʼo Riin Apoia+ no toʼo moru sikun.

25 Depois neʼe, Uzai nia oan-mane Palal mak hadiʼa moru iha Riin Apoia nia oin, no mós uma aas* neʼebé liga ho Liurai nia Palásiu,+ katak uma aas iha leten neʼebé parte husi Guarda nia Pátiu.+ No Paros nia oan-mane Pedaias+ mak hadiʼa moru nia parte tuirmai.

26 Atan sira neʼebé halo serbisu iha templu*+ neʼebé hela iha Ofel+ mak hadiʼa moru toʼo Portaun Bee+ nia oin iha sorin parte leste no toʼo uma aas* neʼebé liga ho moru.

27 Depois neʼe, ema Tekoa+ mak hadiʼa moru nia parte seluk, husi uma aas* neʼe nia oin toʼo moru Ofel.

28 Amlulik sira mak hadiʼa moru iha Portaun Kuda+ nia leten, sira ida-idak hadiʼa moru iha sira-nia uma oin rasik.

29 Depois neʼe, Imer nia oan-mane Zadoc+ mak hadiʼa moru iha ninia uma oin rasik.

No Sekanias nia oan-mane Semaias neʼebé tau matan ba Portaun Leste+ mak hadiʼa moru nia parte tuirmai tan.

30 Depois neʼe, Selemias nia oan-mane Hananias no Zalaf nia oan númeru neen naran Hanun mak hadiʼa moru nia parte seluk.

No Berekias nia oan-mane Mesulam+ mak hadiʼa moru iha ninia uma* oin.

31 Depois neʼe, Malquias neʼebé nuʼudar membru ida ba grupu badaen osan-mean, mak hadiʼa moru toʼo uma ba atan sira neʼebé halo serbisu iha templu*+ no mós negósiu-naʼin sira, neʼebé besik Portaun Halibur no toʼo kuartu leten neʼebé iha moru sikun.

32 Badaen osan-mean no negósiu-naʼin sira mak hadiʼa moru entre kuartu leten iha moru sikun no Portaun Bibi.+

4 Bainhira Sanbalat+ rona katak ami harii daudaun moru, nia sai hirus no laran-nakali* tebes, no nia kontinua goza ema Judeu. 2 Iha ninia maun-alin sira-nia oin no iha tropa Samaria nia oin, nia dehan: “Saida mak ema Judeu sira neʼebé fraku neʼe halo? Sira bele halo neʼe mesak ka? Sira sei hasaʼe sakrifísiu ka? Sira sei halo hotu serbisu neʼe iha loron ida deʼit ka? Sira bele hetan fali fatuk diʼak sira husi buat neʼebé ahi han tiha no rahun ona ka?”+

3 Tobias+ ema Ammon,+ neʼebé hamriik iha ninia sorin dehan: “Se asu-rapoza* ida saʼe moru neʼebé sira harii daudaun, moru fatuk neʼe sei rahun tiha.”

4 Neemias dehan: “Oh ami-nia Maromak, rona bá, tanba sira hatún ami.+ Halo sira-nia liafuan goza nian kona fali sira,+ no entrega sira ba sira-nia inimigu nia liman, no halo sira sai dadur iha rai seluk. 5 Keta taka matan ba sira-nia sala no keta hamoos sira-nia sala husi Ita-nia oin,+ tanba sira koʼalia aat ema sira neʼebé harii moru.”

6 Entaun ami kontinua harii moru neʼe, nuneʼe moru hotu tutan hamutuk ona no harii aas toʼo klaran deʼit, no povu neʼe kontinua serbisu ho laran tomak.

7 Bainhira Sanbalat, Tobias+ ema Arábia,+ ema Ammon no ema Asdod+ rona katak serbisu atu hadiʼa moru Jeruzalein laʼo ho diʼak no moru kuak sira taka tiha ona, sira sai hirus tebes. 8 Sira halo planu hamutuk atu mai halo funu hasoru Jeruzalein no halo runguranga iha sidade laran. 9 Maibé ami harohan ba ami-nia Maromak no tau guarda atu hein loron-kalan hodi proteje ami husi sira.

10 Maibé povu Judá dehan: “Serbisu-naʼin sira la iha ona forsa, no sei iha foʼer barak loos atu soe. Ita sei nunka bele harii fali moru neʼe.”

11 Ami-nia inimigu sira mós kontinua dehan: “Antes sira hatene ka haree ita, ita sei tama ba sira-nia leet no oho sira no hapara serbisu neʼe.”

12 Bainhira ema Judeu neʼebé hela besik sira tama mai, ema Judeu sira-neʼe hatete beibeik* ba ami: “Sira sei mai ataka ita husi sorin-sorin.”

13 Haʼu tau mane balu iha moru kotuk iha fatin neʼebé nakloke no rai kleʼan. Haʼu tau sira tuir sira-nia família. Sira kaer surik, diman no rama. 14 Bainhira haʼu haree sira taʼuk, haʼu hamriik kedas no dehan ba ema-boot sira,+ administradór sira no ema seluk hotu: “Keta taʼuk ba sira.+ Hanoin-hetan Jeová, Maromak neʼebé boot no kmanek tebes.*+ Imi tenke halo funu hodi proteje imi-nia maun-alin sira, imi-nia oan-mane no oan-feto, imi-nia feen no imi-nia uma.”

15 Ami-nia inimigu rona katak ami hatene ona buat neʼebé sira atu halo ba ami no Maromak loos estraga ona sira-nia planu, entaun ami hotu serbisu fali atu harii moru. 16 Husi loron neʼe ba oin, haʼu-nia ema balu halo serbisu+ no ema seluk kaer diman, eskudu, rama, no uza roupa funu nian. Ulun-naʼin sira+ hamriik iha umakain Judá hotu nia kotuk, 17 katak ema Judá neʼebé harii moru. Ema sira neʼebé lori naha, sira halo serbisu ho liman ida no liman seluk kaer armas. 18 Kona-ba ema sira neʼebé harii moru, sira ida-idak kesi surik iha sira-nia knotak no halo serbisu neʼe, no ema neʼebé huu dikur+ hamriik iha haʼu-nia sorin.

19 Tuirmai haʼu dehan ba ema-boot sira, administradór sira no ema seluk hotu: “Serbisu neʼe todan no barak tebes, ita presiza serbisu dook malu iha moru nia parte hotu. 20 Bainhira imi rona dikur nia lian, imi tenke mai halibur hamutuk besik ami. Ita-nia Maromak sei halo funu ba ita.”+

21 Nuneʼe husi dadeer-saan toʼo kalan bainhira fitun sira mosu, ami balu kontinua serbisu maibé ema seluk kontinua kaer diman. 22 Iha tempu neʼebá haʼu dehan ba povu neʼe: “Mane ida-idak hamutuk ho ninia atan tenke hela kalan ida iha Jeruzalein nia laran, no tenke hein ita iha kalan no halo serbisu iha loron.” 23 Entaun haʼu no haʼu-nia maun-alin sira, haʼu-nia atan sira+ no guarda sira neʼebé hamutuk ho haʼu, ami la troka ami-nia roupa, no ami ida-idak kontinua kaer armas iha ami-nia liman-loos.

5 Maibé, povu neʼe no sira-nia feen halerik hodi kesar sira-nia maun-alin ema Judeu sira.+ 2 Sira balu dehan: “Ami iha oan-mane no oan-feto barak. Ami presiza hetan ai-han atu han no kontinua moris.” 3 Sira seluk dehan: “Ami entrega ami-nia toʼos, toʼos-uvas no ami-nia uma nuʼudar garantia atu hetan ai-han durante tempu hamlaha.” 4 Sira seluk tan dehan: “Ami fó ami-nia toʼos no toʼos-uvas nuʼudar garantia hodi empresta osan atu selu impostu ba liurai.+ 5 Ami mak isin no raan ida deʼit ho ami-nia maun-alin,* no ami-nia oan sira mak hanesan deʼit sira-nia oan. Maibé ami tenke entrega ami-nia oan-mane no oan-feto atu sai atan, no ami-nia oan-feto balu sai ona atan.+ Maski nuneʼe, ami la iha kbiit atu hapara situasaun neʼe, tanba ami-nia toʼos no toʼos-uvas sai ona ema seluk nian.”

6 Haʼu sai hirus tebes bainhira rona sira-nia halerik no sira-nia liafuan sira-neʼe. 7 Entaun haʼu hanoin kona-ba buat sira-neʼe iha haʼu-nia laran, no haʼu fó-sala ba ema-boot no administradór sira, hodi dehan: “Imi ida-idak husu osan-funan husi imi-nia maun-alin rasik.”+

Liután neʼe, haʼu arranja reuniaun boot ida tanba buat neʼebé sira halo. 8 Haʼu hatete ba sira: “Uluk ita sosa fali ita-nia maun-alin Judeu sira neʼebé faʼan ona ba nasaun sira seluk tuir ita ida-idak nia kbiit. Maibé agora imi sei faʼan fali imi-nia maun-alin rasik ka?+ Ita tenke sosa fali sira ka?” Rona tiha neʼe, sira hotu nonook, no la iha liafuan ida atu koʼalia. 9 Tuirmai haʼu dehan: “Buat neʼebé imi halo neʼe la diʼak. Ita tenke hamtaʼuk ita-nia Maromak*+ atu nuneʼe nasaun sira seluk, katak ita-nia inimigu sira, labele koʼalia aat ita, loos ka lae? 10 Haʼu rasik hamutuk ho haʼu-nia maun-alin sira no haʼu-nia atan sira fó-empresta osan no ai-han ba sira. Entaun favór ida, mai ita para ona fó-empresta ba sira hodi hetan funan.+ 11 Favór ida, ohin kedas fó fali sira-nia toʼos ba sira,+ sira-nia toʼos-uvas, toʼos-oliveira, uma, no mós fó fali osan-funan* husi osan, trigu, tua-uvas foun no mina neʼebé imi simu ona husi sira.”

12 Sira hatán: “Ami sei fó fali buat sira-neʼe ba sira no la husu sira atu selu fali buat ida. Ami sei halo tuir ho didiʼak liafuan neʼebé Ita-Boot hatete.” Entaun haʼu bolu amlulik sira no haruka mane sira-neʼe jura iha amlulik nia oin hodi kumpre promesa neʼe. 13 No mós, haʼu liki haʼu-nia roupa* no dehan: “Ba mane sira neʼebé la kumpre promesa neʼe, haʼu hein katak iha dalan hanesan neʼe mak Maromak loos sei liki sai sira husi sira-nia uma no husi buat hotu neʼebé sira-nian, no mós iha dalan hanesan neʼe mak nia sei liki sai sira toʼo la iha tan buat ida.” Rona tiha neʼe, kongregasaun* tomak dehan: “Amen!”* No sira hahiʼi Jeová, no povu neʼe halo tuir buat neʼebé sira promete.

14 Liután neʼe, hahú husi loron neʼebé Liurai Artaxerxes fó knaar mai haʼu atu sai governadór+ iha rai-Judá, haʼu ho haʼu-nia maun-alin sira la han ai-han neʼebé mak governadór nia direitu.+ Haʼu sai governadór iha tinan 20+ toʼo 32+ husi Liurai Artaxerxes nia ukun,+ neʼe hamutuk tinan 12. 15 Maibé governadór sira neʼebé uluk liu haʼu, fó todan ba povu neʼe tanba sira foti osan-mutin 40* husi povu atu sosa paun no tua-uvas loroloron, no sira-nia atan sira mós hanehan povu. Maibé haʼu la halo hanesan neʼe+ tanba haʼu hamtaʼuk Maromak.+

16 Liután neʼe, haʼu halo serbisu atu hadiʼa moru, no ami la foti ema nia toʼos ida.+ Haʼu-nia atan hotu halibur iha neʼebá atu halo serbisu. 17 Iha tempu neʼebá, ema Judeu no administradór sira hamutuk naʼin-150 han iha haʼu-nia meza, nuneʼe mós ho ema husi nasaun sira seluk neʼebé mai hasoru ami. 18 Loroloron haʼu haruka ema atu prepara karau ida, bibi-malae neen neʼebé diʼak liu no manu sira ba haʼu,* no kada loron sanulu ami mós hemu tua-uvas oioin neʼebé barak. Maski nuneʼe, haʼu la husu ai-han neʼebé mak governadór nia direitu, tanba povu halo ona serbisu neʼebé todan. 19 Oh haʼu-nia Maromak, keta haluha haʼu no fó bensaun ba haʼu tanba buat diʼak hotu neʼebé haʼu halo ona ba povu neʼe.+

6 Bainhira Sanbalat, Tobias,+ Gesem ema Arábia,+ no ami-nia inimigu sira seluk rona katak haʼu harii fali ona moru neʼe+ no la iha kuak ona, maski iha tempu neʼebá haʼu seidauk tau odamatan-tahan sira iha portaun,+ 2 Sanbalat no Gesem haruka kedas ema hodi lori lia-menon tuirmai neʼe mai haʼu: “Mai, mai ita marka tempu atu hasoru malu iha knua ida iha Rai-Tetuk Ono.”+ Maibé sira planu hamutuk atu oho haʼu. 3 Entaun haʼu haruka ema lori lia-menon ba sira, hodi dehan: “Haʼu halo hela serbisu ida neʼebé boot, no haʼu labele bá hasoru imi. Tanba se haʼu bá hasoru imi, serbisu hotu neʼe tenke para.” 4 Maibé sira haruka lia-menon neʼebé hanesan ba haʼu dala haat, no dala ida-idak haʼu hatán ba sira ho liafuan neʼebé hanesan.

5 Tuirmai Sanbalat haruka ninia atan ida hasoru haʼu hodi lori lia-menon neʼebé hanesan ba dala lima, no nia lori mós karta neʼebé loke hela iha ninia liman. 6 Liafuan sira iha karta neʼe dehan: “Lia-anin mosu iha nasaun sira-nia leet no Gesem+ mós dehan katak ó no ema Judeu sira halo planu atu kontra liurai.+ Tan neʼe mak imi harii moru neʼe. No tuir lia-anin neʼe, ó mak atu sai sira-nia liurai. 7 Ó mós hili ona profeta sira atu fó sai liafuan kona-ba ó iha Jeruzalein tomak, hodi dehan: ‘Iha liurai ida iha Judá!’ Agora ema sei fó-hatene ba ami-nia liurai. Entaun mai, mai ita koʼalia hamutuk kona-ba neʼe.”

8 Maibé haʼu haruka fali lia-menon ba nia, hodi dehan: “Liafuan sira neʼebé ó fó sai, la iha ida mak loos. Ó inventa deʼit liafuan sira-neʼe tuir ó-nia hanoin.”* 9 Sira hotu koko atu halo ami taʼuk, hodi dehan: “Sira-nia liman sei sai fraku atu halo serbisu neʼe, no sira sei la halo serbisu neʼe toʼo hotu.”+ Tan neʼe, agora haʼu harohan: “Hametin haʼu-nia liman bá.”+

10 Tuirmai, haʼu bá Delaias nia oan-mane Semaias nia uma, Metabel nia bei-oan, neʼebé sulan hela iha ninia uma. Nia dehan: “Mai ita marka tempu atu hasoru malu iha Maromak loos nia uma, iha templu laran, no mai ita taka templu nia odamatan sira tanba ema mai daudaun atu oho ó. Sira sei mai iha kalan atu oho ó.” 11 Maibé haʼu dehan: “Mane ida hanesan haʼu tenke halai subar ka? Mane ida hanesan haʼu bele tama ba templu no kontinua moris ka?+ Haʼu sei la tama!” 12 Depois neʼe, haʼu hatene katak laʼós Maromak mak haruka profeta neʼe, maibé Tobias no Sanbalat+ mak selu nia atu fó sai profesia neʼe hodi kontra haʼu. 13 Sira selu nia atu halo haʼu taʼuk no atu lasu haʼu hodi halo sala, hodi nuneʼe sira bele iha razaun atu estraga haʼu-nia naran diʼak hodi hamoe haʼu.

14 Oh haʼu-nia Maromak, keta haluha Tobias+ no Sanbalat no sira-nia hahalok aat sira-neʼe, no mós keta haluha profeta feto Noadia no profeta sira seluk neʼebé kontinua koko atu halo haʼu taʼuk.

15 Entaun ami hadiʼa hotu moru neʼe iha loron 25 fulan-Elul,* neʼe katak moru neʼe hadiʼa fali durante loron 52 deʼit.

16 Bainhira ami-nia inimigu sira hotu rona kona-ba neʼe no nasaun hotu neʼebé haleʼu ami haree ida-neʼe, sira hotu sai moe tebes,*+ no sira hatene katak ami-nia Maromak mak ajuda ami hodi halo hotu serbisu neʼe. 17 Iha tempu neʼebá ema-boot sira+ husi rai-Judá haruka karta barak ba Tobias, no nia hatán fali ba sira. 18 Ema Judá barak jura hodi apoia Tobias, tanba nia mak Ará nia oan-mane Sekanias nia mane-foun.+ Tobias nia oan-mane Jeoanan mós kaben ho Mesulam nia oan-feto. Mesulam mak Berekias nia oan-mane.+ 19 No mós, sira kontinua koʼalia buat diʼak kona-ba Tobias ba haʼu no tuirmai sira fó sai fali haʼu-nia liafuan ba Tobias. Depois neʼe, Tobias haruka beibeik karta sira atu halo haʼu taʼuk.+

7 Bainhira ami harii hotu moru,+ haʼu tau kedas ninia odamatan sira,+ tuirmai haʼu fó knaar ba guarda sira neʼebé hein portaun,+ kantadór sira+ no ema Levi sira.+ 2 Depois neʼe, haʼu hili haʼu-nia maun* Hanani+ atu tau matan ba Jeruzalein, hamutuk ho Hananias, xefe ba Uma Aas Seguru,+ tanba Hananias mak ema neʼebé haʼu bele fiar liu no nia hamtaʼuk Maromak+ liu fali ema seluk hotu. 3 Entaun haʼu dehan ba sira: “Labele loke portaun Jeruzalein nian toʼo loron manas ona, no antes guarda sira remata sira-nia knaar, sira tenke taka odamatan sira no xave. Fó knaar ba ema Jeruzalein sira atu sai guarda, sira ida-idak tenke hein iha fatin neʼebé deside ona ba sira no hein mós iha sira-nia uma oin rasik.” 4 Sidade neʼe luan no boot. Ema uitoan deʼit mak iha sidade laran,+ no ami seidauk harii fali uma sira.

5 Maibé haʼu-nia Maromak book haʼu-nia laran atu halibur ema-boot sira, administradór sira no povu neʼe, atu bele rejistu sira tuir sira-nia família.+ Tuirmai haʼu hetan livru kona-ba lista naran nian tuir liña jerasaun ba ema sira neʼebé mai uluk, no livru neʼe dehan:

6 Tuirmai neʼe mak ema Judeu sira neʼebé hela iha provínsia,* neʼebé fila fali ba Jeruzalein no rai-Judá. Sira mak jerasaun husi ema neʼebé Liurai Nabukodonozór+ lori ba rai-Babilónia nuʼudar dadur.*+ Maibé ikusmai sira fila fali ba sira ida-idak nia sidade.+ 7 Sira fila hamutuk ho Zorobabel,+ Jesua,+ Neemias, Azarias, Ramias, Nahamani, Mordecai, Bilsan, Misperet, Bigvai, Nehum no Baaná.

Númeru ba mane Izraél sira neʼebé fila mak tuirmai neʼe:+ 8 Paros nia oan-mane sira* hamutuk naʼin-2.172; 9 Sefatias nia oan-mane sira hamutuk naʼin-372; 10 Ará nia oan-mane sira+ hamutuk naʼin-652; 11 Pahat-Moab nia oan-mane sira,+ husi Jesua ho Joab nia umakain,+ hamutuk naʼin-2.818; 12 Elam nia oan-mane sira+ hamutuk naʼin-1.254; 13 Zatu nia oan-mane sira hamutuk naʼin-845; 14 Zakai nia oan-mane sira hamutuk naʼin-760; 15 Binui nia oan-mane sira hamutuk naʼin-648; 16 Bebai nia oan-mane sira hamutuk naʼin-628; 17 Asgad nia oan-mane sira hamutuk naʼin-2.322; 18 Adonikam nia oan-mane sira hamutuk naʼin-667; 19 Bigvai nia oan-mane sira hamutuk naʼin-2.067; 20 Adin nia oan-mane sira hamutuk naʼin-655; 21 Ater nia oan-mane sira, neʼebé husi Ezequias nia umakain, hamutuk naʼin-98; 22 Hasum nia oan-mane sira hamutuk naʼin-328; 23 Bezai nia oan-mane sira hamutuk naʼin-324; 24 Harif nia oan-mane sira hamutuk naʼin-112; 25 Gibeão nia oan-mane sira+ hamutuk naʼin-95; 26 mane sira husi Belein no Netofa hamutuk naʼin-188; 27 mane sira husi Anatot+ hamutuk naʼin-128; 28 mane sira husi Bet-Azmavet hamutuk naʼin-42; 29 mane sira husi Kiriat-Jearim,+ Kefira no Beerot+ hamutuk naʼin-743; 30 mane sira husi Ramá no Geba+ hamutuk naʼin-621; 31 Ema Mikmas sira+ hamutuk naʼin-122; 32 Ema Betel+ no ema Ai sira+ hamutuk naʼin-123; 33 mane sira husi Nebo ida seluk hamutuk naʼin-52; 34 Elam ida seluk nia oan-mane sira hamutuk naʼin-1.254; 35 Harim nia oan-mane sira hamutuk naʼin-320; 36 Jerikó nia oan-mane sira hamutuk naʼin-345; 37 Lod, Hadid ho Ono nia oan-mane sira+ hamutuk naʼin-721; 38 no Senaa nia oan-mane sira hamutuk naʼin-3.930.

39 Amlulik sira+ mak tuirmai neʼe: Jedaias nia oan-mane sira husi Jesua nia umakain, hamutuk naʼin-973; 40 Imer nia oan-mane sira hamutuk naʼin-1.052; 41 Pasur nia oan-mane sira+ hamutuk naʼin-1.247; 42 no Harim nia oan-mane sira+ hamutuk naʼin-1.017.

43 Ema Levi sira+ mak tuirmai neʼe: Jesua nia oan-mane sira husi Kadmiel nia umakain,+ husi Hodeva nia oan-mane sira, hamutuk naʼin-74. 44 Kantadór sira+ mak tuirmai neʼe: Asaf nia oan-mane sira+ hamutuk naʼin-148. 45 Guarda sira neʼebé hein portaun+ mak tuirmai neʼe: Salum nia oan-mane sira, Ater nia oan-mane sira, Talmon nia oan-mane sira, Akub nia oan-mane sira,+ Hatita nia oan-mane sira no Sobai nia oan-mane sira, hamutuk naʼin-138.

46 Atan sira neʼebé halo serbisu iha templu*+ mak tuirmai neʼe: Ziha nia oan-mane sira, Hasufa nia oan-mane sira, Tabaot nia oan-mane sira, 47 Keros nia oan-mane sira, Sia* nia oan-mane sira, Padon nia oan-mane sira, 48 Lebana nia oan-mane sira, Hagaba nia oan-mane sira, Salmai nia oan-mane sira, 49 Hanan nia oan-mane sira, Gidel nia oan-mane sira, Gahar nia oan-mane sira, 50 Reaias nia oan-mane sira, Rezin nia oan-mane sira, Nekoda nia oan-mane sira, 51 Gazam nia oan-mane sira, Uza nia oan-mane sira, Pasea nia oan-mane sira, 52 Besai nia oan-mane sira, Meunim nia oan-mane sira, Nefusesim* nia oan-mane sira, 53 Bakbuk nia oan-mane sira, Hakufa nia oan-mane sira, Harur nia oan-mane sira, 54 Baslite nia oan-mane sira, Mehida nia oan-mane sira, Harsa nia oan-mane sira, 55 Barkos nia oan-mane sira, Sísera nia oan-mane sira, Tema nia oan-mane sira, 56 Nezia nia oan-mane sira no Hatifa nia oan-mane sira.

57 Salomão nia atan sira-nia oan-mane+ mak tuirmai neʼe: Sotai nia oan-mane sira, Soferet nia oan-mane sira, Perida nia oan-mane sira, 58 Jaala nia oan-mane sira, Darkon nia oan-mane sira, Gidel nia oan-mane sira, 59 Sefatias nia oan-mane sira, Hatil nia oan-mane sira, Pokeret-Hazerbaim nia oan-mane sira no Amon nia oan-mane sira. 60 Atan hotu neʼebé halo serbisu iha templu*+ no Salomão nia atan sira-nia oan-mane hamutuk naʼin-392.

61 Tuirmai neʼe mak ema sira neʼebé sai husi rai Tel-Mela, Tel-Harsa, Kerub, Adon no Imer, maibé sira labele prova katak sira-nia aman nia umakain no beiʼala sira mak ema Izraél:+ 62 Delaias nia oan-mane sira, Tobias nia oan-mane sira no Nekoda nia oan-mane sira hamutuk naʼin-642. 63 Amlulik sira mak tuirmai neʼe: Habaias nia oan-mane sira, Hakoz nia oan-mane sira+ no Barzilai nia oan-mane sira. Ema bolu sira Barzilai nia oan-mane sira tanba sira-nia beiʼala kaben ho Barzilai+ ema Gilead nia oan-feto. 64 Sira buka sira-nia umakain nia naran iha lista naran nian, maibé la hetan, tan neʼe sira labele sai amlulik.*+ 65 Governadór*+ hatete ba sira katak sira labele han ai-han neʼebé santu liu hotu+ toʼo hetan amlulik ida neʼebé kaer Urim no Tumim.*+

66 Kongregasaun tomak neʼe sura hamutuk naʼin-42.360.+ 67 Neʼe la sura ho sira-nia atan-mane no atan-feto sira+ neʼebé hamutuk naʼin-7.337. Sira mós iha kantadór* mane no feto hamutuk naʼin-245.+ 68 Sira-nia kuda hamutuk 736, kuda-mula* hamutuk 245, 69 kuda-kamelu hamutuk 435, no kuda-burru hamutuk 6.720.

70 Ulun-naʼin balu husi Izraél nia umakain sira fó kontribuisaun ba serbisu neʼe.+ Governadór* fó kontribuisaun ba osan-fatin iha templu hamutuk osan-mean kilograma ualu ho balu,* manko 50 no amlulik nia unuk hamutuk 530.+ 71 No ulun-naʼin balu husi Izraél nia umakain fó kontribuisaun ba osan-fatin hodi uza iha serbisu neʼe hamutuk osan-mean kilograma 168* no osan-mutin kilograma 1.254.* 72 Povu sira seluk fó osan-mean kilograma 168, osan-mutin kilograma 1.140* no amlulik nia unuk hamutuk 67.

73 No amlulik sira, ema Levi, guarda sira neʼebé hein portaun, kantadór sira,+ povu balu, atan sira neʼebé halo serbisu iha templu* no ema Izraél restu,* sira hotu hela iha sira ida-idak nia sidade.+ Bainhira tama ona fulan-hitu,+ ema Izraél sira hela metin ona iha sira-nia sidade.+

8 Tuirmai povu hotu ho hanoin ida deʼit halibur hamutuk iha fatin públiku iha portaun neʼebé hanaran Portaun Bee+ nia oin. Sira hatete ba Ezras,+ neʼebé nuʼudar eskriba ida, atu lori mai Moisés nia Ukun-Fuan+ neʼebé Jeová fó ba ema Izraél.+ 2 Entaun iha loron primeiru fulan-hitu,+ amlulik Ezras lori Ukun-Fuan neʼe mai iha kongregasaun+ nia oin, katak mane, feto no ema hotu neʼebé bele rona no komprende. 3 Husi dadeer-saan toʼo meiudia, Ezras lee ho lian makaʼas liafuan husi Ukun-Fuan neʼe+ iha fatin públiku iha portaun neʼebé hanaran Portaun Bee nia oin, nia lee ba mane, feto, no ema hotu neʼebé bele komprende; no povu neʼe rona ho didiʼak+ ba livru Ukun-Fuan neʼe. 4 Ezras, neʼebé nuʼudar eskriba, hamriik iha palku neʼebé halo husi ai hodi uza iha tempu neʼebá; no ema sira neʼebé hamriik iha ninia liman-loos mak Matitias, Sema, Anaias, Urias, Hilquias no Maseias; no iha ninia liman-karuk mak Pedaias, Misael, Malquias,+ Hasum, Has-Badana, Zacarias no Mesulam.

5 Ezras hamriik iha fatin neʼebé aas liu povu hotu no loke livru neʼe iha povu nia oin. Bainhira nia loke livru neʼe, povu hotu hamriik. 6 Tuirmai Ezras fó hahiʼi ba Jeová Maromak neʼebé loos, Maromak neʼebé kmanek, no povu hotu hatán: “Amen!* Amen!”+ no foti saʼe sira-nia liman. Tuirmai sira hakneʼak no hakruʼuk ho oin ba rai iha Jeová nia oin. 7 Ema Levi sira naran Jesua, Bane, Serebias,+ Jamin, Akub, Sabetai, Hodias, Maseias, Kelita, Azarias, Jozabad,+ Hanan no Pelaias, sira esplika Ukun-Fuan ba povu+ neʼebé hamriik hela. 8 Sira kontinua lee ho lian makaʼas liafuan husi livru neʼe, husi Maromak loos nia Ukun-Fuan, hodi esplika informasaun neʼe ho didiʼak no esplika liafuan sira-neʼe katak sá; nuneʼe sira ajuda povu neʼe atu komprende buat neʼebé lee ona ba sira.+

9 Neemias neʼebé nuʼudar governadór* iha tempu neʼebá, ho Ezras+ neʼebé nuʼudar amlulik no eskriba, no mós ema Levi neʼebé hanorin povu, koʼalia ba povu hotu, hodi dehan: “Ohin mak loron santu ba Jeová, imi-nia Maromak.+ Keta triste ka tanis.” Tanba antes neʼe povu hotu tanis bainhira sira rona liafuan husi Ukun-Fuan neʼe. 10 Nia hatete ba sira: “Bá, han ai-han neʼebé diʼak liu no hemu buat neʼebé midar. Haruka ai-han balu+ ba ema sira neʼebé la iha ai-han ruma; tanba loron neʼe mak loron santu ba ita-nia Naʼi, no keta sente triste tanba Jeová nia ksolok mak imi-nia fatin seguru.”* 11 Ema Levi mós halo kalma povu hotu, hodi dehan: “Nonook bá! Tanba loron neʼe mak loron santu, tan neʼe keta sente triste.” 12 Nuneʼe povu hotu bá hodi han no hemu. Sira haruka ai-han balu ba ema seluk no kontinua haksolok tebes,+ tanba sira komprende ona liafuan neʼebé fó sai tiha ba sira.+

13 Iha loron segundu, ulun-naʼin sira ba Izraél nia umakain, amlulik sira, no ema Levi halibur hamutuk haleʼu Ezras, neʼebé nuʼudar eskriba, atu bele komprende liután liafuan sira husi Ukun-Fuan neʼe. 14 Tuirmai sira hetan liafuan iha Ukun-Fuan neʼebé Jeová fó sai ona liuhusi Moisés, neʼebé dehan katak ema Izraél tenke hela iha barraka* durante tempu festa nian iha fulan-hitu,+ 15 no katak sira tenke fó sai avizu+ iha sira-nia sidade tomak no iha Jeruzalein tomak, hodi dehan: “Bá área foho nian hodi foti ai-sanak sira neʼebé iha tahan barak, neʼe katak ai-sanak husi ai-oliveira, ai-piñu, ai-murta no ai-palmeira, no husi ai sira seluk atu halo barraka, hodi tuir buat neʼebé hakerek ona.”

16 Entaun povu neʼe bá foti ai-sanak sira-neʼe no lori mai hodi halo barraka ba sira-nia an rasik, sira ida-idak halo barraka iha sira-nia uma-leten, no mós iha sira-nia uma liʼur, iha pátiu* husi Maromak loos nia uma,+ iha fatin públiku husi portaun neʼebé hanaran Portaun Bee,+ no iha fatin públiku husi portaun neʼebé hanaran Portaun Efraim.+ 17 Nuneʼe povu* hotu neʼebé fila ona husi dadur, harii barraka no hela iha barraka laran, tanba husi Nun nia oan-mane Josué+ nia tempu toʼo loron neʼe, ema Izraél sira seidauk halo hanesan neʼe, entaun iha ksolok boot tebes iha loron neʼe.+ 18 Loron ida-idak sira lee Maromak loos nia Ukun-Fuan,+ husi loron primeiru toʼo loron ikus. Sira halaʼo festa durante loron hitu no halaʼo reuniaun espesiál iha loron ualu hodi tuir ukun-fuan sira.+

9 Iha loron 24 fulan neʼe ema Izraél sira halibur hamutuk; sira halo jejún, hatais hena karón* no tau rai-rahun ba sira-nia an.+ 2 Tuirmai Izraél nia jerasaun haketak an husi ema estranjeiru hotu,+ no sira hamriik hodi fó sai sira rasik nia sala no sira-nia aman nia sala.+ 3 Depois neʼe, ba oras tolu sira hamriik iha sira-nia fatin no lee ho lian makaʼas liafuan husi sira-nia Maromak Jeová nia livru Ukun-Fuan;+ no ba oras tolu tan sira fó sai sira-nia sala no hakruʼuk ba Jeová, sira-nia Maromak.

4 Jesua, Bane, Kadmiel, Sebanias, Buni, Serebias,+ Bane no Kenani hamriik iha ema Levi nia palku,+ no sira halerik ho lian makaʼas ba Jeová, sira-nia Maromak. 5 No ema Levi sira, Jesua, Kadmiel, Bane, Hasabneias, Serebias, Hodias, Sebanias no Petaias dehan: “Hamriik bá no fó hahiʼi ba Jeová, imi-nia Maromak, ba nafatin.+ Oh Maromak, husik sira fó hahiʼi ba Ita-nia naran kmanek, neʼebé aas liu fali bensaun sira no liafuan hahiʼi nian hotu.

6 “Ita deʼit mak Jeová;+ Ita halo lalehan, sin, lalehan neʼebé aas liu no ninia tropa sira hotu, Ita halo rai no buat hotu iha rai, Ita halo tasi no buat hotu iha tasi laran. Ita proteje sira hotu atu bele kontinua moris, no tropa lalehan nian hakruʼuk ba Ita. 7 Ita mak Jeová, Maromak neʼebé loos, Maromak neʼebé hili Abram,+ no lori nia sai husi Ur,+ ema Kaldeia nia rai no Ita troka ninia naran sai Abraão.+ 8 Ita haree katak nia hatudu hahalok laran-metin iha Ita-nia oin,+ tan neʼe Ita halo aliansa ho nia atu fó rai ba nia, rai husi ema Kanaan, ema Hetes, ema Amoreu, ema Perizeu, ema Jebus no ema Girgaseu, no atu fó rai sira-neʼe ba ninia bei-oan sira.+ Ita kumpre Ita-nia promesa tanba Ita halo hahalok loos.

9 “Nuneʼe Ita haree ami-nia beiʼala sira-nia terus iha rai-Ejitu,+ no Ita rona sira-nia halerik iha Tasi Mean. 10 Tuirmai Ita hatudu sinál no halo milagre hasoru Faraó* no ninia atan sira no povu hotu iha ninia rai,+ tanba Ita hatene katak sira sai foti an*+ no ulun-toos hodi fó-terus ba ami-nia beiʼala sira. No Ita halo Ita-nia naran sai boot toʼo ohin.+ 11 Ita fahe tasi iha sira-nia oin hodi nuneʼe sira bele hakur tasi neʼe iha rai maran,+ no ema neʼebé duni sira, Ita soe tiha ba tasi kleʼan hanesan soe fatuk ba tasi neʼebé siʼak.+ 12 Iha loron Ita dirije sira ho kalohan,* no iha kalan Ita dirije sira ho ahi,* atu fó naroman ba dalan neʼebé sira tenke laʼo bá.+ 13 Ita tun ba Foho Sinai+ hodi koʼalia ho sira husi lalehan+ no fó sai Ita-nia desizaun neʼebé loos, lei lia-loos nian,* ukun-fuan neʼebé diʼak no mandamentu ba sira.+ 14 Ita hanorin sira atu halaʼo Ita-nia Sábadu santu,+ no Ita fó mandamentu, lei no ukun-fuan ba sira liuhusi Ita-nia atan Moisés. 15 Ita fó ai-han ba sira husi lalehan bainhira sira hamlaha.+ Ita hasai bee husi fatuk boot bainhira sira hamrook.+ Ita haruka sira atu tama hodi foti rai neʼebé Ita jura ona* atu fó ba sira.

16 “Maibé ami-nia beiʼala sira hatudu hahalok foti an*+ no sai ulun-toos,+ no sira lakohi rona ba Ita-nia mandamentu sira. 17 Sira lakohi rona;+ sira la hanoin-hetan hahalok kmanek barak neʼebé Ita hatudu ona iha sira-nia leet, no sira sai ulun-toos no hili ulun-naʼin ida hodi lori sira fila fali ba rai-Ejitu atu sai nuʼudar atan.+ Maibé Ita mak Maromak neʼebé prontu atu fó perdua, laran-diʼak no laran-sadiʼa, la hirus lalais no nakonu ho domin neʼebé laran-metin,*+ no Ita la husik hela sira.+ 18 Maski sira mós halo estátua karau-oan ba sira-nia an rasik no dehan: ‘Neʼe mak imi-nia Maromak neʼebé lori imi sai husi rai-Ejitu’,+ no sira halo buat aat barak hodi la hatudu respeitu, 19 maski nuneʼe, Ita hatudu laran-sadiʼa neʼebé boot hodi la husik sira iha rai-fuik.+ Ita la hasai kalohan* husi sira-nia leten atu dirije sira iha loron, ka ahi* iha kalan atu fó naroman ba dalan neʼebé sira tenke laʼo bá.+ 20 Ita fó Ita-nia espíritu* ba sira hodi fó sira matenek,+ Ita mós la hanetik maná ba sira,+ no Ita fó bee ba sira bainhira sira hamrook.+ 21 Durante tinan 40 Ita fó ai-han ba sira iha rai-fuik.+ Sira la falta buat ida. Sira-nia roupa mós la sai bosan,+ no sira-nia ain la sai bubu.

22 “Ita entrega nasaun sira no povu ba sira, no fahe sira-nia rai parte ba parte hodi fó ba sira,+ nuneʼe sira foti Sihon nia rai,+ neʼe katak liurai husi Hesbon nia rai,+ no mós Liurai Og husi Basan nia rai.+ 23 Ita halo sira-nia oan sai barak hanesan fitun sira iha lalehan.+ Tuirmai Ita lori sira tama ba rai neʼebé Ita promete ona ba sira-nia beiʼala, katak sira sei tama no foti rai neʼe.+ 24 Sira-nia oan sira tama no foti duni rai neʼe.+ Ita manán ema Kanaan iha sira-nia oin,+ katak ema neʼebé hela iha rai neʼe, no Ita entrega ema Kanaan ho ninia liurai ba sira-nia liman, nuneʼe ema Izraél bele halo ba sira tuir ema Izraél nia hakarak. 25 Sira manán sidade sira neʼebé iha moru aas+ no rai neʼebé bokur,*+ no sira foti uma sira neʼebé nakonu ho sasán diʼak oioin, tanke* neʼebé keʼe tiha ona, toʼos-uvas, toʼos-oliveira+ no ai-hun barak neʼebé fó fuan. Entaun sira han toʼo bosu no sai bokur, no sira tuur ho kontente tanba Ita-nia laran-diʼak neʼebé boot.

26 “Maibé, sira la halo tuir no kontra Ita,+ no fila kotuk ba Ita-nia Ukun-Fuan.* Sira oho Ita-nia profeta sira neʼebé fó avizu ba sira atu lori sira fila ba Ita, no sira halo buat aat barak hodi la hatudu respeitu ba Ita.+ 27 Tan neʼe mak Ita entrega sira ba inimigu nia liman,+ neʼebé kontinua haterus sira.+ Maibé sira halerik ba Ita iha tempu susar nia laran, no Ita rona sira husi lalehan; no tanba Ita-nia laran-sadiʼa neʼebé boot, Ita sempre fó salvadór sira atu salva sira husi inimigu nia liman.+

28 “Maibé bainhira sira sai livre ona, sira sempre halo fali kedas buat aat iha Ita-nia oin,+ no Ita husik sira ba sira-nia inimigu neʼebé hanehan* sira.+ Tuirmai sira fila fali no halerik hodi husu ajuda ba Ita,+ no Ita rona sira husi lalehan no salva sira beibeik tanba Ita-nia laran-sadiʼa neʼebé boot.+ 29 Maski Ita fó avizu beibeik atu lori sira fila fali hodi halo tuir Ita-nia Ukun-Fuan, sira hatudu hahalok foti an* no lakohi rona ba Ita-nia mandamentu sira;+ no sira halo sala kontra Ita-nia lei, neʼebé sei fó moris ba ema neʼebé halo tuir lei neʼe.+ Maibé sira ho ulun-toos fila kotuk hodi kontra Ita, no sira lakohi rona ba Ita. 30 Ita hatudu pasiénsia ba sira+ durante tinan barak no Ita kontinua fó avizu ba sira ho Ita-nia espíritu liuhusi Ita-nia profeta sira, maibé sira lakohi rona. Ikusmai Ita entrega sira ba ema neʼebé hela haleʼu sira.+ 31 Ho Ita-nia laran-sadiʼa neʼebé boot, Ita la halakon sira hotu+ ka husik sira, tanba Ita mak Maromak neʼebé laran-diʼak no laran-sadiʼa.+

32 “Agora, oh ami-nia Maromak, Maromak neʼebé forte no kmanek tebes,* Maromak neʼebé kumpre ninia aliansa no hatudu domin neʼebé laran-metin;+ favór ida, labele haree liu deʼit susar neʼebé kona ami, ami-nia liurai, ami-nia ulun-naʼin sira,+ ami-nia amlulik sira,+ ami-nia profeta sira,+ ami-nia beiʼala sira, no Ita-nia povu hotu husi liurai Asíria nia tempu+ toʼo ohin loron. 33 Ita hatudu hahalok loos maski buat hotu neʼe kona ona ami, tanba Ita hatudu hahalok laran-metin; maibé ami mak halo hahalok aat.+ 34 Kona-ba ami-nia liurai, ulun-naʼin, amlulik no beiʼala, sira hotu la halo tuir Ita-nia Ukun-Fuan no la rona ba Ita-nia mandamentu ka konsellu neʼebé fó avizu ba sira. 35 Uluk bainhira sira ukun hela no haksolok ho buat diʼak barak neʼebé Ita fó ona ba sira no sira iha rai neʼebé luan no bokur* neʼebé Ita entrega ba sira, sira la serbí Ita+ no la husik sira-nia hahalok aat. 36 Tan neʼe mak agora ami sai nuʼudar atan+ iha rai neʼebé Ita fó ba ami-nia beiʼala sira atu han ai-han neʼebé moris iha rai neʼe no goza buat diʼak hotu iha rai neʼe. 37 Tanba ami-nia sala sira mak Ita entrega rai neʼe nia ai-han neʼebé barak ba liurai sira neʼebé Ita hili atu ukun ami.+ Sira ukun ami-nia isin no ami-nia animál-hakiak sira tuir sira-nia hakarak, no ami iha susar boot nia laran.

38 “Tanba buat sira-neʼe hotu, ami hakerek ona akordu neʼebé metin,+ no ami-nia ulun-naʼin sira, ema Levi no amlulik sira mak halo neʼe vale liuhusi selus.”*+

10 Mane sira neʼebé halo vale dokumentu neʼe ho sira-nia selus+ mak tuirmai neʼe:

9 No mós ema Levi sira mak tuirmai neʼe: Jesua Azanias nia oan-mane, Binui husi família Henadad, Kadmiel+ 10 no sira-nia maun-alin sira, Sebanias, Hodias, Kelita, Pelaias, Hanan, 11 Mika, Reob, Hasabias, 12 Zakur, Serebias,+ Sebanias, 13 Hodias, Bane no Beninu.

14 Povu nia ulun-naʼin sira mak tuirmai neʼe: Paros, Pahat-Moab,+ Elam, Zatu, Bane, 15 Buni, Asgad, Bebai, 16 Adonias, Bigvai, Adin, 17 Ater, Ezequias, Azur, 18 Hodias, Hasum, Bezai, 19 Harif, Anatot, Nebai, 20 Magpias, Mesulam, Hezir, 21 Mesezabel, Zadoc, Jadua, 22 Pelatias, Hanan, Anaias, 23 Oseias, Hananias, Hasub, 24 Haloes, Pilha, Sobek, 25 Rehum, Hasabna, Maseias, 26 Ahias, Hanan, Anan, 27 Maluke, Harim no Baaná.

28 Povu sira seluk halo juramentu, inklui amlulik sira, ema Levi, guarda ba portaun sira, kantadór sira, atan sira neʼebé halo serbisu iha templu,* no ema hotu neʼebé haketak an ona husi ema neʼebé hela haleʼu sira hodi sira bele halo tuir Maromak loos nia Ukun-Fuan,+ hamutuk ho sira-nia feen, oan-mane no oan-feto sira, katak sira hotu neʼebé iha koñesimentu no bele komprende.* 29 Sira hotu hamutuk ho sira-nia maun-alin, sira-nia ema-boot sira, no sira hotu halo juramentu ida neʼebé inklui mós malisan ba sira-nia an, atu halo tuir Maromak loos nia Ukun-Fuan neʼebé nia fó ona liuhusi ninia atan Moisés, no atu halo tuir ho didiʼak ita-nia Naʼi Jeová nia mandamentu hotu, ninia desizaun no ninia ukun-fuan sira. 30 Ita sei la fó ita-nia oan-feto ba ema neʼebé hela haleʼu ita, no ita sei la foti sira-nia oan-feto ba ita-nia oan-mane sira.+

31 Se ema sira iha rai neʼe lori sira-nia sasán no ai-han oioin atu faʼan iha loron Sábadu, ita sei la sosa buat ida husi sira iha loron Sábadu+ ka iha loron santu ida.+ Ita mós sei la foti ai-han husi toʼos iha tinan hitu+ no la husu ema atu selu hotu debe neʼebé seidauk selu.+

32 No mós, ami halo ukun-fuan ba ami-nia an katak ami ida-idak tenke fó osan-mutin grama haat* tinan-tinan atu apoia serbisu iha ami-nia Maromak nia uma,*+ 33 no mós apoia atu halo buat tuirmai neʼe: paun santu,+ sakrifísiu trigu* nian neʼebé hasaʼe beibeik,+ sakrifísiu sunu nian iha loron Sábadu+ no sakrifísiu ba fulan-foun sira,+ no festa sira tuir sira-nia tempu,+ buat santu, sakrifísiu sala nian+ atu bele hamoos ema Izraél nia sala, no atu apoia serbisu hotu iha ami-nia Maromak nia uma.

34 No mós, ami dada sorteiu* atu deside bainhira mak umakain ida-idak husi amlulik sira, ema Levi no povu neʼe tenke lori ai-sunu ba ita-nia Maromak nia uma tinan-tinan, atu sunu iha ami-nia Maromak Jeová nia altár, hodi tuir buat neʼebé hakerek ona iha Ukun-Fuan.+ 35 Ami mós deside katak tinan-tinan, ami sei lori ai-han primeiru husi ami-nia toʼos no mós lori ai-fuan primeiru husi ai-hun sira hotu ba Jeová nia uma,+ 36 no ami mós sei lori ami-nia oan-mane primeiru no ami-nia animál-hakiak nia oan primeiru,+ no mós karau ho bibi nia oan primeiru hodi tuir buat neʼebé hakerek ona iha Ukun-Fuan. Ami sei lori buat sira-neʼe ba ami-nia Maromak nia uma, ba amlulik sira neʼebé serbí iha ami-nia Maromak nia uma.+ 37 No mós, ami sei lori trigu uut* husi trigu primeiru neʼebé ami koʼa,+ ami-nia kontribuisaun, ai-fuan primeiru husi ai-hun oioin,+ tua-uvas foun no mina;+ ami tenke fó buat sira-neʼe ba amlulik hodi tau iha armazén* iha ami-nia Maromak nia uma;+ ami sei lori porsentu sanulu husi rezultadu iha ami-nia toʼos atu fó ba ema Levi,+ tanba ema Levi mak halibur porsentu sanulu husi toʼos iha ami-nia sidade hotu.

38 Amlulik husi Arão nia jerasaun tenke hamutuk ho ema Levi kuandu ema Levi halibur porsentu sanulu; no ema Levi tenke fó porsentu sanulu husi porsentu sanulu neʼe, atu fó ba ami-nia Maromak nia uma+ hodi tau iha kuartu* sira iha armazén laran. 39 Tanba ema Izraél sira no Levi nia oan-mane sira tenke lori kontribuisaun ba armazén* sira-neʼe, katak kontribuisaun+ hanesan trigu, tua-uvas foun no mina.+ Iha armazén sira-neʼe iha sasán sira neʼebé uza iha fatin sagradu, no mós iha neʼebá iha amlulik sira neʼebé halaʼo sira-nia knaar, iha mós guarda sira neʼebé hein portaun, no kantadór sira. Ami sei la haluha serbisu iha ami-nia Maromak nia uma.+

11 Iha tempu neʼebá povu nia ulun-naʼin sira hela iha Jeruzalein;+ maibé kona-ba povu sira seluk, sira dada sorteiu*+ hodi hili umakain ida kada umakain sanulu atu hela iha sidade santu Jeruzalein, no umakain sia restu hela iha sidade sira seluk. 2 Liután neʼe, povu haraik bensaun ba mane hotu neʼebé ho hakarak rasik hela iha Jeruzalein.

3 Tuirmai neʼe mak ulun-naʼin ba provínsia* sira neʼebé hela iha Jeruzalein. Maibé ema Izraél sira seluk, amlulik sira, ema Levi, atan sira neʼebé halo serbisu iha templu,*+ no Salomão nia atan sira-nia oan,+ sira hotu hela iha sidade sira seluk iha Judá, sira ida-idak hela iha sira-nia rai iha sira-nia sidade.+

4 No mós, iha ema Judá no ema Benjamim balu neʼebé hela iha Jeruzalein. Mane sira husi Judá mak Uzias nia oan-mane Ataias. Uzias mak Zacarias nia oan-mane, Zacarias mak Amarias nia oan-mane, Amarias mak Sefatias nia oan-mane, Sefatias mak Malalel nia oan-mane, Malalel mak Peres nia oan-mane;+ 5 no Baruc nia oan-mane Maseias. Baruc mak Koloze nia oan-mane, Koloze mak Hazaias nia oan-mane, Hazaias mak Adaias nia oan-mane, Adaias mak Joarib nia oan-mane, Joarib mak Zacarias nia oan-mane, Zacarias mak husi Selá nia umakain. 6 Peres nia jerasaun hotu neʼebé hela iha Jeruzalein hamutuk naʼin-468.

7 Tuirmai neʼe mak mane sira husi Benjamim: Mesulam nia oan-mane Saleu.+ Mesulam mak Joed nia oan-mane, Joed mak Pedaias nia oan-mane, Pedaias mak Kolias nia oan-mane, Kolias mak Maseias nia oan-mane, Maseias mak Itiel nia oan-mane, Itiel mak Jesaias nia oan-mane; 8 no tuir Saleu mak Gabai no Salai, sira hotu hamutuk mane naʼin-928. 9 Zikri nia oan-mane Joel mak sira-nia ulun-naʼin, no Hasenua nia oan-mane Judá mak tuur iha pozisaun segundu hodi tau matan ba sidade neʼe.

10 Amlulik sira neʼebé hela iha Jeruzalein mak tuirmai neʼe: Joarib nia oan-mane Jedaias; Jakin;+ 11 Hilquias nia oan-mane Seraias. Hilquias mak Mesulam nia oan-mane, Mesulam mak Zadoc nia oan-mane, Zadoc mak Meraiot nia oan-mane, Meraiot mak Ahitub nia oan-mane.+ Seraias mak ulun-naʼin ida iha Maromak loos nia uma; 12 no sira-nia maun-alin sira neʼebé halo serbisu iha Maromak nia uma hamutuk naʼin-822; no Jeroam nia oan-mane Adaias. Jeroam mak Pelalias nia oan-mane, Pelalias mak Amzi nia oan-mane, Amzi mak Zacarias nia oan-mane, Zacarias mak Pasur nia oan-mane,+ Pasur mak Malquias nia oan-mane; 13 no ninia maun-alin sira neʼebé nuʼudar ulun-naʼin ba sira-nia umakain hamutuk naʼin-242; no Azarel nia oan-mane Amasai. Azarel mak Azai nia oan-mane, Azai mak Mesilemot nia oan-mane, Mesilemot mak Imer nia oan-mane; 14 no sira-nia maun-alin sira neʼebé kbiit boot no aten-brani, hamutuk naʼin-128; no Zabdiel mak sira-nia ulun-naʼin. Zabdiel mak oan-mane husi família neʼebé naran-boot.

15 Ema Levi neʼebé hela iha Jeruzalein mak tuirmai neʼe: Hasub nia oan-mane Semaias.+ Hasub mak Azrikam nia oan-mane, Azrikam mak Hasabias nia oan-mane, Hasabias mak Buni nia oan-mane; 16 no Sabetai+ ho Jozabad+ neʼebé ulun-naʼin sira ba ema Levi mak tau matan ba serbisu iha Maromak loos nia uma liʼur; 17 no Miqueias nia oan-mane Matanias.+ Miqueias mak Zabdi nia oan-mane, Zabdi mak Asaf nia oan-mane.+ Matanias mak xefe ba kantadór sira, nia dirije kanta hahiʼi nian durante orasaun;+ no Babukias neʼebé nuʼudar asistente iha ninia maun-alin sira-nia leet; no Samua nia oan-mane Abda. Samua mak Galal nia oan-mane, Galal mak Jedutum nia oan-mane.+ 18 Ema Levi hotu neʼebé hela iha sidade santu hamutuk naʼin-284.

19 Guarda neʼebé hein portaun sira mak Akub, Talmon,+ no sira-nia maun-alin sira neʼebé kontinua hein iha portaun, sira hamutuk naʼin-172.

20 Ema Izraél sira seluk, amlulik sira, ema Levi, hela iha Judá nia sidade sira seluk, sira ida-idak hela iha sira-nia rai.* 21 Atan sira neʼebé halo serbisu iha templu*+ hela iha sidade Ofel.+ Ziha ho Gispa mak ulun-naʼin ba atan sira neʼebé halo serbisu iha templu.

22 Ulun-naʼin ba ema Levi iha Jeruzalein mak Bane nia oan-mane Uzi. Bane mak Hasabias nia oan-mane, Hasabias mak Matanias nia oan-mane, Matanias mak Mika nia oan-mane,+ Mika mak husi Asaf nia jerasaun neʼebé nuʼudar kantadór. Uzi mak tau matan ba serbisu iha Maromak loos nia uma. 23 Liurai halo ukun-fuan kona-ba kantadór+ hodi sira bele simu buat neʼebé sira presiza loroloron. Nia halo ona arranju neʼebé metin. 24 Mesezabel nia oan-mane Petaias mak nuʼudar liurai nia konsellu-naʼin* ba povu nia problema hotu. Mesezabel mak husi Zerá nia umakain, Zerá mak Judá nia oan-mane.

25 Tuirmai neʼe mak lista ba povu Judá balu nia hela-fatin hamutuk ho sira-nia toʼos sira: Kiriat-Arba+ no ninia sidade kiʼik sira,* Dibon no ninia sidade kiʼik sira, Jekabzeel+ no ninia knua sira, 26 Jesua, Molada,+ Bet-Pelet,+ 27 Hazar-Sual,+ Beer-Seba no ninia sidade kiʼik sira,* 28 Ziklag,+ Mekoná no ninia sidade kiʼik sira,* 29 En-Rimom,+ Zora+ no Jarmut, 30 Zanoa,+ Adulam no ninia knua sira, Lakis+ no ninia toʼos sira, no Azeka+ no ninia sidade kiʼik sira.* Sira hela iha Beer-Seba toʼo Foho-Leet Hinom.+

31 Ema Benjamim sira hela iha Geba,+ Mikmas, Ai, Betel+ no sira-nia sidade kiʼik sira,* 32 Anatot,+ Nob,+ Ananias, 33 Hazor, Ramá,+ Gitaim, 34 Hadid, Zeboim, Nebalat, 35 Lod no Ono,+ área neʼebé hanaran rai-tetuk badaen. 36 No ema Levi nia grupu balu husi rai-Judá hela iha rai-Benjamim.

12 Amlulik no ema Levi sira neʼebé saʼe ba Jeruzalein hamutuk ho Sealtiel+ nia oan-mane Zorobabel,+ no Jesua+ mak tuirmai neʼe: Seraias, Jeremias, Ezras, 2 Amarias, Maluke, Hatus, 3 Sekanias, Rehum, Meremot, 4 Ido, Ginetoi, Abias, 5 Mijamin, Madias, Bilga, 6 Semaias, Joarib, Jedaias, 7 Saleu, Amok, Hilquias, no Jedaias. Mane sira-neʼe mak ulun-naʼin ba amlulik sira no sira-nia maun-alin sira iha Jesua nia tempu.

8 Ema Levi sira mak Jesua, Binui, Kadmiel,+ Serebias, Judá, no Matanias+ neʼebé dirije knananuk agradese nian hamutuk ho ninia maun-alin sira. 9 Sira-nia maun-alin sira mak Babukias no Uni neʼebé hamriik iha sira-nia oin hodi halo serbisu* nuʼudar guarda. 10 Jesua nia oan-mane mak Joiaquim, Joiaquim nia oan-mane mak Eliasib,+ no Eliasib nia oan-mane mak Joiada.+ 11 Joiada nia oan-mane mak Jonatan, no Jonatan nia oan-mane mak Jadua.

12 Iha Joiaquim nia tempu, amlulik sira, neʼebé ulun-naʼin ba sira-nia aman nia umakain mak tuirmai neʼe: mane neʼebé reprezenta Seraias+ mak Meraias, mane neʼebé reprezenta Jeremias mak Hananias; 13 mane neʼebé reprezenta Ezras+ mak Mesulam; mane neʼebé reprezenta Amarias mak Jeoanan; 14 mane neʼebé reprezenta Maluki mak Jonatan; mane neʼebé reprezenta Sebanias mak José; 15 mane neʼebé reprezenta Harim+ mak Adna; mane neʼebé reprezenta Meraiot mak Helkai; 16 mane neʼebé reprezenta Ido mak Zacarias; mane neʼebé reprezenta Gineton mak Mesulam; 17 mane neʼebé reprezenta Abias+ mak Zikri; mane neʼebé reprezenta Miniamim . . . ;* mane neʼebé reprezenta Moadias mak Piltai; 18 mane neʼebé reprezenta Bilga+ mak Samua; mane neʼebé reprezenta Semaias mak Jeonatan; 19 mane neʼebé reprezenta Joarib mak Matenai; mane neʼebé reprezenta Jedaias+ mak Uzi; 20 mane neʼebé reprezenta Salai mak Kalai; mane neʼebé reprezenta Amok mak Eber; 21 mane neʼebé reprezenta Hilquias mak Hasabias; mane neʼebé reprezenta Jedaias mak Netanel.

22 Sira halo lista ba ulun-naʼin husi Levi nia umakain no amlulik sira, hahú husi Eliasib nia tempu, Joiada nia tempu, Joanan nia tempu, no Jadua+ nia tempu, toʼo Liurai Dário, ema Pérsia, nia tempu.

23 Ema Levi sira neʼebé ulun-naʼin ba sira-nia aman nia umakain, sira-nia naran hakerek ona iha livru istória kona-ba tempu neʼebá, toʼo Eliasib nia oan-mane Joanan nia tempu. 24 Ulun-naʼin sira ba ema Levi mak Hasabias, Serebias, no Kadmiel+ nia oan-mane Jesua,+ no sira-nia maun-alin sira hamriik iha sira-nia oin atu fó hahiʼi no fó agradese tuir mandamentu husi Maromak loos nia atan David,+ no sira hamriik tuituir malu tuir sira-nia grupu guarda nian. 25 Matanias,+ Babukias, Obadias, Mesulam, Talmon, no Akub+ mak guarda sira neʼebé hamriik hodi hein portaun sira,+ no hein armazén sira neʼebé besik portaun. 26 Mane sira-neʼe halaʼo knaar durante Jesua+ nia oan-mane Joiaquim nia tempu, Joiaquim mak Jozadak nia bei-oan, no mós durante governadór Neemias nia tempu, no durante amlulik Ezras+ neʼebé mós nuʼudar eskriba nia tempu.

27 Bainhira atu inaugura moru Jeruzalein, sira buka ema Levi no lori sira husi fatin hotu neʼebé sira hela hodi mai iha Jeruzalein atu bele selebra tempu inaugurasaun neʼe ho haksolok, ho knananuk agradese nian,+ no ho simbala, instrumentu neʼebé iha talin, no arpa. 28 Kantadór* nia oan-mane sira halibur hamutuk husi área neʼebé besik,* husi área hotu neʼebé haleʼu Jeruzalein, husi ema Netofa+ nia knua sira, 29 husi Bet-Gilgal+ no husi Geba+ ho Azmavet+ nia toʼos sira, tanba kantadór sira harii ona knua ba sira-nia an rasik haleʼu Jeruzalein. 30 Amlulik sira ho ema Levi hamoos sira-nia an, no sira hamoos povu neʼe,+ no hamoos portaun sira+ no moru neʼe.+

31 Tuirmai haʼu lori Judá nia ulun-naʼin sira bá iha moru leten. Depois neʼe, haʼu organiza kantadór sira neʼebé fó agradese ba Maromak iha grupu boot rua, no mós fahe povu ba grupu rua, hodi sira bele laʼo tuir kantadór sira. Kantadór grupu ida laʼo ba sorin loos iha moru leten hodi bá portaun neʼebé hanaran Portaun Ahi-Kadesan Butuk.+ 32 Osaias no Judá nia ulun-naʼin balu laʼo tuir iha sira-nia kotuk, 33 hamutuk ho Azarias, Ezras, Mesulam, 34 Judá, Benjamim, Semaias, no Jeremias. 35 Amlulik nia oan-mane balu laʼo tuir sira ho trombeta:+ Jonatan nia oan-mane Zacarias. Jonatan mak Semaias nia oan-mane, Semaias mak Matanias nia oan-mane, Matanias mak Micaias nia oan-mane, Micaias mak Zakur nia oan-mane, Zakur mak Asaf nia oan-mane;+ 36 Zacarias hamutuk ho ninia maun-alin sira Semaias, Azarel, Milalai, Gilalai, Maai, Netanel, Judá, no Hanani, no sira lori mós Maromak loos nia atan David nia instrumentu múzika;+ no Ezras+ neʼebé serbí nuʼudar eskriba, laʼo iha sira-nia oin. 37 Iha portaun neʼebé hanaran Portaun Bee-Matan,+ sira laʼo loos deʼit ba oin hodi saʼe eskada+ iha David nia Sidade+ liuhusi moru leten, no bá toʼo fatin ida iha David nia Uma leten no kontinua ba portaun neʼebé hanaran Portaun Bee+ neʼebé iha parte leste.

38 Kantadór grupu ida seluk neʼebé fó agradese, laʼo ba dalan seluk,* no haʼu laʼo tuir sira hamutuk ho povu balu, no ami laʼo iha moru leten hodi liu uma aas neʼebé hanaran Uma Aas* Fornu+ no kontinua ba fatin neʼebé hanaran Moru Luan.+ 39 Ami laʼo saʼe ba portaun neʼebé hanaran Portaun Efraim+ no kontinua ba portaun neʼebé hanaran Portaun husi Sidade Tuan+ no laʼo ba portaun neʼebé hanaran Portaun Ikan.+ Ami laʼo liu uma aas neʼebé hanaran Uma Aas* Hananel,+ liu Uma Aas Mea, no kontinua ba portaun neʼebé hanaran Portaun Bibi;+ no ami para iha portaun neʼebé hanaran Portaun Guarda.

40 Liutiha tempu balu kantadór grupu rua neʼebé fó agradese, toʼo iha Maromak loos nia uma oin; nuneʼe mós haʼu no administradór balu neʼebé hamutuk ho haʼu toʼo iha fatin neʼe, 41 hamutuk ho amlulik Eliaquim, Maseias, Miniamim, Micaias, Elioenai, Zacarias, no Hananias, neʼebé lori trombeta, 42 no mós Maseias, Semaias, Eleazar, Uzi, Jeoanan, Malquias, Elam, no Ezer. Kantadór sira kanta ho lian makaʼas no Izraias mak sira-nia ulun-naʼin.

43 Iha loron neʼebá sira hasaʼe sakrifísiu barak tebes ho haksolok,+ tanba Maromak loos halo sira haksolok tebes iha Jeruzalein. Feto ho labarik sira mós haksolok,+ tan neʼe mak ema neʼebé hela iha fatin dook bele rona sira-nia lian.+

44 Iha loron neʼebá mane balu simu knaar atu tau matan ba armazén sira+ neʼebé rai kontribuisaun,+ no rai ai-fuan primeiru+ no mós porsentu sanulu+ husi toʼos sira. Sira tenke hatama buat oioin neʼebé halibur husi toʼos iha sidade sira iha armazén sira-neʼe hodi tuir Ukun-Fuan+ neʼebé fó sai ona kona-ba amlulik no ema Levi.+ Ema iha rai-Judá haksolok tanba amlulik no ema Levi sira halaʼo sira-nia serbisu. 45 Hodi tuir mandamentu husi David ho ninia oan-mane Salomão, sira komesa halo sira-nia serbisu no kumpre sira-nia obrigasaun ba sira-nia Maromak atu hamoos ema ho sasán hotu, nuneʼe mós kantadór no guarda sira neʼebé hein portaun komesa halo sira-nia serbisu. 46 Tanba uluk iha David no Asaf nia tempu, iha dirijente* sira ba kantadór no sira halo arranju kona-ba knananuk hahiʼi no agradese nian ba Maromak.+ 47 No iha Zorobabel+ nia tempu ho Neemias nia tempu, ema Izraél hotu fó ai-han ba kantadór sira+ no guarda sira neʼebé hein portaun+ hodi tuir sira-nia presiza loroloron. Sira mós haketak ai-han ba ema Levi sira,+ no ema Levi sira haketak ai-han neʼebé sira simu hodi fó ba Arão nia jerasaun.

13 Iha loron neʼebá sira lee Moisés nia livru ba povu,+ no liafuan iha livru laran dehan katak ema Ammon no ema Moab+ labele sai parte ba Maromak loos nia kongregasaun,+ 2 tanba uluk sira la fó paun no bee ba ema Izraél sira, maibé sira selu Balám hodi fó-malisan ba ema Izraél.+ Maski nuneʼe, ita-nia Maromak troka malisan hodi sai fali bensaun.+ 3 Bainhira sira rona Ukun-Fuan neʼe, sira haketak kedas ema estranjeiru ho sira-nia oan hotu husi ema Izraél.+

4 Maibé antes tempu neʼe, amlulik neʼebé tau matan ba armazén* sira iha ita-nia Maromak nia uma*+ mak Eliasib,+ no nia iha família ida naran Tobias.+ 5 Eliasib prepara armazén boot* ba Tobias. Fatin neʼe uluk uza atu tau sakrifísiu trigu* nian, olíbanu, templu nia sasán sira no porsentu sanulu husi trigu, tua-uvas foun no mina,+ neʼebé tenke fó ba ema Levi,+ kantadór sira no guarda sira neʼebé hein portaun. Armazén sira-neʼe mós uluk uza nuʼudar fatin atu tau kontribuisaun neʼebé fó ba amlulik sira.+

6 Durante tempu neʼe haʼu la hela iha Jeruzalein, tanba haʼu fila fali ba liurai iha tinan 32+ husi Liurai Artaxerxes+ husi Babilónia nia ukun; no liutiha tempu balu haʼu husu lisensa ba liurai atu fila ba Jeruzalein. 7 Tuirmai haʼu toʼo iha Jeruzalein no haree hahalok aat neʼebé Eliasib+ halo hodi ajuda Tobias;+ tanba Eliasib prepara armazén ida ba Tobias neʼebé iha pátiu* husi Maromak loos nia uma. 8 Neʼe halo haʼu la kontente duni, entaun haʼu soe sai Tobias nia sasán hotu ba armazén* nia liʼur. 9 Depois neʼe, haʼu haruka sira hamoos armazén* sira-neʼe; no haʼu tau fali sasán sira husi Maromak loos nia uma,+ no mós tau fali sakrifísiu trigu nian no olíbanu+ iha armazén sira-neʼe.

10 No mós haʼu haree katak povu la fó parte neʼebé ema Levi tenke simu,+ entaun ema Levi no kantadór sira neʼebé halo serbisu iha templu, fila fali atu halo sira ida-idak nia toʼos.+ 11 Tan neʼe, haʼu siʼak administradór sira,+ hodi dehan: “Tanbasá mak imi husik hela deʼit serbisu iha Maromak loos nia uma?”+ Tuirmai haʼu halibur sira hamutuk no fó fali sira-nia knaar ba sira. 12 Nuneʼe ema Judá hotu lori mai porsentu sanulu+ husi trigu, tua-uvas foun no mina hodi tau iha armazén sira.+ 13 Tuirmai haʼu hili amlulik Selemias, Zadoc neʼebé nuʼudar eskriba, no Pedaias ema Levi hodi tau matan ba armazén sira-neʼe, no Zakur nia oan-mane Hanan, neʼebé nuʼudar Matanias nia bei-oan, mak sira-nia ajuda-naʼin, tanba ema bele tau fiar ba mane sira-neʼe. Sira simu knaar atu fahe buat sira-neʼe ba sira-nia maun-alin sira.

14 Oh haʼu-nia Maromak, keta haluha haʼu+ kona-ba ida-neʼe, no keta haluha haʼu-nia hahalok domin neʼebé laran-metin neʼebé haʼu hatudu ona ba Ita-nia uma no serbisu sira neʼebé halo iha neʼebá.+

15 Iha tempu neʼebá haʼu haree ema Judá halo serbisu iha fatin sama uvas nian iha loron Sábadu.+ Sira lori mai trigu barak no tula iha kuda-burru leten, no mós lori mai tua-uvas, uvas-fuan, figeira-fuan, no lori buat barak tan mai iha Jeruzalein iha loron Sábadu.+ Entaun iha tempu neʼebá haʼu fó avizu ba sira atu labele faʼan ai-han iha loron Sábadu.* 16 Ema Tiro neʼebé hela iha sidade neʼe lori ikan no sasán oioin atu faʼan, no sira faʼan ba povu Judá no Jeruzalein iha loron Sábadu.+ 17 Entaun haʼu siʼak Judá nia ema-boot sira no dehan ba sira: “Tanbasá mak imi halo buat aat sira-neʼe hodi hafoʼer loron Sábadu? 18 Neʼe mak buat neʼebé imi-nia beiʼala sira halo, tan neʼe mak ita-nia Maromak lori susar ba ita no mós ba sidade neʼe, loos ka lae? Agora imi halo Maromak hirus makaʼas liután ba ema Izraél tanba hafoʼer ninia loron Sábadu.”+

19 Entaun antes loron Sábadu bainhira rai-nakaras ona, haʼu fó mandamentu atu taka odamatan sira iha Jeruzalein. Haʼu mós hatete katak sira labele loke portaun toʼo loron Sábadu liutiha, no haʼu tau haʼu-nia atan balu iha portaun atu nuneʼe ema labele lori tama sasán atu faʼan iha loron Sábadu. 20 Entaun ema neʼebé halo negósiu no faʼan sasán oioin, sira hela iha sidade Jeruzalein nia liʼur ba kalan ida ka kalan rua. 21 Tuirmai haʼu fó avizu ba sira, hodi dehan: “Tanbasá mak imi toba kalan iha moru nia oin? Se imi halo dala ida tan, haʼu sei kaer imi.” Husi tempu neʼe ba oin sira la mai tan iha loron Sábadu.

22 Haʼu mós hatete ba ema Levi sira katak sira tenke hamoos beibeik sira-nia an iha Maromak nia oin, no mai hodi hein portaun sira atu bele halo santu loron Sábadu.+ Oh haʼu-nia Maromak, keta haluha haʼu-nia hahalok diʼak, no hatudu laran-sadiʼa ba haʼu tuir Ita-nia domin ho laran-metin neʼebé boot.+

23 No mós iha tempu neʼebá haʼu haree ema Judeu neʼebé kaben ona ho* feto sira husi Asdod,+ Ammon, no Moab.+ 24 Sira-nia oan-mane balu koʼalia ema Asdod nia língua no balu tan koʼalia nasaun sira seluk nia língua, maibé la iha ema ida mak hatene koʼalia ema Judeu nia língua. 25 Tan neʼe haʼu siʼak sira, fó-malisan no baku mane balu.+ Haʼu fokit sai sira-nia fuuk no haruka sira jura hodi Maromak nia naran, hodi dehan: “Imi labele fó imi-nia oan-feto ba sira-nia oan-mane, no imi labele simu sira-nia oan-feto sira atu sai imi-nia feen ka imi-nia oan-mane sira-nia feen.+ 26 Tanba buat sira-neʼe mak Liurai Salomão husi Izraél halo sala, loos ka lae? Iha nasaun sira-nia leet la iha liurai ida hanesan nia;+ ninia Maromak hadomi nia,+ tan neʼe Maromak hili nia nuʼudar liurai ba Izraél tomak. Maibé ninia feen husi nasaun seluk halo nia monu ba sala.+ 27 Tanbasá mak imi halo sala boot neʼe hodi kaben ho feto husi rai seluk? Imi la hatudu hahalok laran-metin ba ita-nia Maromak!”+

28 Joiada+ nia oan-mane ida, neʼebé nuʼudar amlulik boot Eliasib+ nia bei-oan, sai ona mane-foun ba Sanbalat,+ ema Horom. Tan neʼe, haʼu duni sai nia husi haʼu-nia oin.

29 Oh haʼu-nia Maromak, keta haluha sira tanba sira hafoʼer ona knaar amlulik nian, no hafoʼer aliansa neʼebé halo ona ho amlulik+ no ema Levi sira.+

30 Haʼu hamoos sira hodi halo sira livre husi ema estranjeiru sira-nia hahalok aat. Haʼu fó knaar ba amlulik no ema Levi sira hodi halo sira ida-idak nia serbisu,+ 31 no haʼu halo arranju atu povu lori ai+ mai tuir tempu neʼebé deside ona no lori ai-han primeiru husi sira-nia toʼos.

Oh haʼu-nia Maromak, favór ida, keta haluha haʼu.*+