SALOMÃO NIA KNANANUK
1 Salomão nia knananuk neʼebé diʼak liu hotu:+
3 Ó-nia mina-morin mak morin tebes.+
Ó-nia naran mak diʼak hanesan mina-morin neʼebé fui ona ba ema nia ulun.+
Tan neʼe mak feto joven sira hadomi ó.
4 Liurai lori ona haʼu ba ninia kuartu!
Lori haʼu bá hamutuk ho ó,* mai ita halai.
Mai ita kontente no haksolok tanba ó.
Mai ita koʼalia* kona-ba ó-nia domin, tanba neʼe diʼak liu fali tua-uvas.
Tan neʼe mak sira* hadomi ó.
5 Oh oan-feto sira husi Jeruzalein, haʼu isin-metan, maibé bonita,
Hanesan Kedar nia tenda sira,+ hanesan hena iha Salomão nia tenda.+
6 Keta hateke beibeik haʼu tanba haʼu isin-metan,
Tanba loro-matan mak kona haʼu.
Haʼu-nia maun sira* sai hirus ba haʼu;
Sira haruka haʼu atu tau matan ba toʼos-uvas sira,
Toʼo haʼu la tau matan ba haʼu-nia toʼos-uvas rasik.
7 Ó neʼebé haʼu hadomi tebes, fó-hatene mai haʼu,
Iha neʼebé mak ó tau matan ó-nia bibi-lubun,+
Iha neʼebé mak ó husik sira deskansa durante meiudia?
Tanbasá mak haʼu tenke sai hanesan feto neʼebé taka oin ho veu*
No laʼo iha ó-nia maluk nia bibi-lubun sira-nia leet?”
8 “Oh feto neʼebé bonita liu hotu, se ó la hatene,
Sai bá, laʼo tuir bibi sira-nia ain-fatin
No tau matan ba ó-nia bibi-timur sira besik bibi-atan sira-nia tenda.”
9 “Oh haʼu-nia doben, ó bonita hanesan kuda-inan entre Faraó* nia kuda-karreta sira.+
10 Ó-nia hasan haree furak ho buat murak sira,*
Ó-nia kakorok haree furak ho korrente sira.
11 Ami sei halo sasán murak* husi osan-mean,
No enfeita ho osan-mutin hodi fó ba ó.”
13 Ba haʼu, haʼu-nia doben mak hanesan mirra*+ iha bornál kiʼik laran
Neʼebé morin loos no rabat haʼu-nia hirus-matan durante kalan.
14 Ba haʼu, haʼu-nia doben mak hanesan ai-henna* nia funan+
Neʼebé moris iha toʼos-uvas iha En-Gedi.”+
15 “Oh haʼu-nia doben, ó bonita tebes.
Ó bonita tebes. Ó-nia matan hanesan manu-pombu nia matan.”+
16 “Oh haʼu-nia doben, ó bonitu tebes! Ó halo haʼu kontente.+
Ita-nia kama mak iha ai-tahan sira-nia leet.
17 Ita-nia uma* halo husi ai-sedru,
Ita-nia uma-kakuluk mak ai-juníperu.
2 “Haʼu-nia doben iha feto joven sira-nia leet mak hanesan
Ai-funan líriu neʼebé moris iha ai-tarak sira-nia leet.”
3 “Haʼu-nia doben iha mane joven sira-nia leet mak hanesan
Masán-hun neʼebé moris entre ai-hun sira iha ai-laran.
Haʼu hakarak tebes atu tuur iha ninia mahon,
No ninia ai-fuan mak midar tebes iha haʼu-nia ibun.
4 Nia lori haʼu ba fatin festa nian,*
No ema hotu bele haree katak nia hadomi deʼit haʼu.
5 Fó haʼu dose husi uvas-maran+ no mós masán
Atu fó kmaan no fó forsa mai haʼu,
Tanba haʼu hanoin tebes haʼu-nia doben toʼo sai fraku loos.
6 Ninia liman-karuk kona neineik haʼu-nia ulun,
No ninia liman-loos hakoʼak haʼu.+
7 Oh oan-feto sira husi Jeruzalein, haʼu haruka imi atu jura
Hodi bibi-rusa gazela+ no bibi-rusa inan sira iha rai-luan:
Keta koko atu fanu haʼu-nia domin se domin neʼe seidauk mosu.+
8 Haʼu rona haʼu-nia doben nia lian!
Haree bá! Nia mai daudaun ona,
Nia saʼe foho sira, no haksoit liu foho-oan sira.
9 Haʼu-nia doben hanesan bibi-rusa gazela ka bibi-rusa aman.+
Nia hamriik iha neʼebá, iha ami-nia moru kotuk,
Nia hateke liuhusi janela sira,
Sin, nia hateke liuhusi janela sira.
10 Haʼu-nia doben dehan mai haʼu:
‘Oh haʼu-nia doben, hamriik bá.
Haʼu-nia doben neʼebé bonita, mai tuir haʼu.
11 Haree bá! Tempu udan* liu tiha ona.
Udan para ona no la iha tan.
12 Ai-funan sira buras ona iha rai,+
Tempu toʼo ona atu aparu uvas-hun,+
No ema rona manu-lakateu nia lian iha ita-nia rai.+
13 Ai-figeira nia fuan primeiru tasak ona;+
Uvas-hun sira iha funan no sai morin ona.
Oh haʼu-nia doben, hamriik bá no mai.
Haʼu-nia doben neʼebé bonita, mai tuir haʼu.
14 Oh haʼu-nia manu-pombu, sai mai husi fatuk-kuak iha foho-lolon,+
Husi ó-nia subar-fatin iha fatuk boot sira,
Husik haʼu haree ó no rona ó-nia lian,+
Tanba ó-nia lian furak no ó-nia oin kapás loos.’”+
15 “Bá kaer asu-rapoza* sira,
Asu-rapoza oan neʼebé estraga toʼos-uvas,
Tanba ami-nia uvas sira funan daudaun.”
16 “Haʼu-nia doben mak haʼu-nian no haʼu mak ninian.+
Nia tau matan bibi sira+ iha ai-funan líriu nia leet.+
17 Antes anin huu no lalatak sira lakon,
Oh haʼu-nia doben, fila fali mai lalais,
Hanesan bibi-rusa gazela+ ka bibi-rusa aman ida+ iha foho sira neʼebé haketak ita.*
3 “Iha haʼu-nia kama leten durante kalan,
Haʼu sempre hanoin kona-ba ida neʼebé haʼu hadomi.+
Haʼu hakarak haree nia, maibé nia la iha.+
2 Haʼu sei hadeer no laʼo haleʼu sidade;
Haʼu sei buka ida neʼebé haʼu hadomi
Iha dalan sira no iha fatin públiku.
Haʼu buka nia, maibé haʼu la hetan nia.
3 Guarda sira neʼebé laʼo haleʼu sidade hetan haʼu.+
Haʼu husu sira: ‘Imi haree ida neʼebé haʼu hadomi ka lae?’
4 Haʼu foin laʼo liu sira
Haʼu hetan ida neʼebé haʼu hadomi.
Haʼu kaer metin nia, haʼu lakohi husik nia bá
Toʼo haʼu lori tiha nia ba haʼu-nia inan nia uma,+
Hodi tama ba kuartu laran husi feto neʼebé fó moris ba haʼu.
5 Oh oan-feto sira husi Jeruzalein, haʼu haruka imi atu jura
Hodi bibi-rusa gazela no bibi-rusa inan sira iha rai-luan:
Keta koko atu fanu haʼu-nia domin se domin neʼe seidauk mosu.”+
6 “Saida mak mosu mai husi rai-fuik neʼebé haree hanesan ahi-suar barak,
Neʼebé morin ho mirra no olíbanu,
No mós ho buat morin hotu neʼebé negósiu-naʼin sira faʼan?”+
7 “Haree bá! Neʼe mak Salomão nia kadeira.
Asuwaʼin naʼin-60 haleʼu kadeira neʼe,
Asuwaʼin husi Izraél,+
8 Sira hotu lori surik,
No hetan ona treinu kona-ba funu,
Sira ida-idak tara surik iha sira-nia knotak
Atu bele kontra hasoru buat neʼebé hamosu taʼuk durante kalan.”
9 “Neʼe mak Liurai Salomão nia kadeira*
Neʼebé nia halo ba ninia an rasik hodi uza ai sira husi Líbanu.+
10 Kadeira neʼe nia riin* sira, nia halo husi osan-mutin,
Kadeira neʼe nia kotuk no fatin tula liman nian halo husi osan-mean.
Fatin atu tuur halo husi hena kór-violeta husi bibi-malae fulun;
No oan-feto sira husi Jeruzalein
Enfeita kadeira neʼe nia laran ho domin.”
11 “Oh oan-feto sira husi Siaun, laʼo sai bá,
No hateke ba Liurai Salomão
Neʼebé uza koroa* kaben nian neʼebé ninia inan+ halo ba nia
Iha loron neʼebé nia kaben,
Iha loron neʼebé ninia laran haksolok.”
4 “Oh haʼu-nia doben, ó bonita tebes.
Ó bonita tebes.
Ó-nia matan hanesan manu-pombu nia matan iha ó-nia veu laran.
Ó-nia fuuk hanesan bibi-timur lubun
Neʼebé tun nadodon husi foho sira iha Gilead.+
2 Ó-nia nehan mutin hanesan bibi-malae lubun neʼebé ema foin tesi fulun,
Neʼebé bibi-atan fase moos ona,
Bibi-inan sira hotu hahoris oan-kaduak,
No sira-nia oan ida mós la lakon.
3 Ó-nia ibun-tutun hanesan kabas mean,
No ó-nia liafuan mak lori ksolok.
Ó-nia hasan* hanesan romaun rohan ida
Iha ó-nia veu laran.
4 Ó-nia kakorok+ hanesan David nia uma aas,*+
Neʼebé harii ho fatuk neʼebé hada kabeer
No iha uma aas neʼe mak ema tara eskudu rihun ida,
Eskudu kabuar hotu neʼebé asuwaʼin sira uza.+
5 Ó-nia susun rua hanesan bibi-rusa oan rua,
Bibi-rusa gazela nia oan-kaduak,+
Neʼebé han hela iha ai-funan líriu nia leet.”
6 “Antes anin huu no lalatak sira lakon,
Haʼu sei laʼo ba foho neʼebé iha mirra
No laʼo ba foho-oan neʼebé iha olíbanu.”+
8 Oh haʼu-nia noiva, mai tuir haʼu hodi sai husi Líbanu,
Mai tuir haʼu hodi sai husi Líbanu.+
Mai ita tun husi Amana* nia tutun,
Husi Senir nia tutun, Hermon nia tutun,+
Husi leaun nia fatin, husi leopardu nia foho sira.
9 Oh haʼu-nia alin, haʼu-nia noiva, ó halo haʼu-nia laran monu ona,+
Ó halo haʼu-nia laran monu bainhira ó hateke haʼu dala ida deʼit,
Ho parte ida deʼit husi ó-nia korrente iha ó-nia kakorok.
10 Oh haʼu-nia alin, haʼu-nia noiva, ó-nia domin mak furak tebes!+
Ó-nia dalan domin mak diʼak liu fali tua-uvas,+
No ó-nia mina-morin mak morin liu fali buat morin hotu!+
11 Oh haʼu-nia noiva, ó-nia ibun midar hanesan bani-been.+
Ó-nia nanál hanesan bani-been no susubeen,+
No ó-nia roupa nia morin hanesan morin husi ai-laran iha Líbanu.
12 Haʼu-nia alin, haʼu-nia noiva, hanesan jardín neʼebé xave metin,
Sin, jardín neʼebé xave metin, no hanesan bee-matan neʼebé taka metin.
13 Ó* hanesan jardín* neʼebé ninia ai-hun sira nakonu ho romaun fuan,
Ho ai-fuan sira neʼebé diʼak liu, ho ai-henna no ai-nardu sira,
14 Nakonu ho ai-nardu,+ ai-funan asafraun, duʼut-kana morin+ no ai-kanela,+
Ho ai-olíbanu, ai-mirra no ai-aloés,+
Hamutuk ho mina-morin hotu neʼebé diʼak liu.+
15 Ó hanesan bee-matan iha jardín, bee-posu neʼebé iha bee moos,
No mota sira neʼebé suli husi Líbanu.+
16 Hadeer bá, oh anin husi parte norte;
Tama mai, oh anin husi parte súl.
Huu neineik ba haʼu-nia jardín.
Husik ninia morin sai.”
“Husik haʼu-nia doben tama mai iha ninia jardín laran
No han ai-fuan neʼebé diʼak liu.”
5 “Oh haʼu-nia alin, haʼu-nia noiva,
Haʼu tama ona iha haʼu-nia jardín.+
Haʼu kuʼu ona haʼu-nia mirra no haʼu-nia bálsamu.*+
Haʼu han ona haʼu-nia bani-been husi bani nia fatin;
Haʼu hemu ona haʼu-nia tua-uvas no haʼu-nia susubeen.”+
“Oh ami-nia belun sira, han bá!
Hemu no sai lanu bá ho imi-nia dalan atu hatudu domin!”+
2 “Maski haʼu toba, maibé haʼu-nia laran hadeer hela.+
Haʼu rona lian husi haʼu-nia doben neʼebé dere odamatan!
‘Oh haʼu-nia alin, haʼu-nia doben, loke lai odamatan ba haʼu,
Haʼu-nia manu-pombu neʼebé perfeitu!
Tanba mahobeen habokon haʼu-nia ulun,
No haʼu-nia fuuk sai bokon ho mahobeen iha kalan.’+
3 Haʼu hasai ona haʼu-nia roupa.
Haʼu tenke tau fali roupa neʼe ka?
Haʼu fase ona haʼu-nia ain.
Haʼu tenke halo foʼer fali ka?
4 Haʼu-nia doben hasai ninia liman husi odamatan kuak,
No haʼu-nia laran sente la hakmatek tanba hanoin nia.
5 Haʼu hadeer atu loke odamatan ba haʼu-nia doben;
Mina-morin mirra suli iha haʼu-nia liman
No suli ba haʼu-nia liman-fuan,
No suli ba odamatan-tilun.
6 Haʼu loke odamatan ba haʼu-nia doben,
Maibé haʼu-nia doben fila kotuk no bá tiha ona.
Haʼu sente laran-triste bainhira nia bá.*
Haʼu buka nia, maibé haʼu la hetan.+
Haʼu bolu nia, maibé nia la hatán.
7 Guarda sira neʼebé laʼo haleʼu sidade hetan haʼu.
Sira baku haʼu, sira hakanek haʼu.
Guarda sira neʼebé hein moru foti tiha haʼu-nia veu* husi haʼu.
8 Oh oan-feto sira husi Jeruzalein, haʼu haruka imi atu jura:
Se imi hetan haʼu-nia doben,
Dehan ba nia katak haʼu hanoin tebes nia toʼo sai fraku loos.”
9 “Oh feto neʼebé bonita liu hotu,
Oinsá mak ó-nia doben diʼak liu fali feto seluk nia doben?
Oinsá mak ó-nia doben diʼak liu fali feto seluk nia doben,
Hodi ó haruka ami jura nuneʼe?”
10 “Haʼu-nia doben bonitu tebes no ninia kulit nabilan;*
Fasil atu haree nia iha ema naʼin-rihun sanulu nia leet.
11 Ninia ulun hanesan osan-mean, osan-mean neʼebé diʼak liu.
Ninia fuuk hanesan ai-palmeira sanak neʼebé book an bá-mai,*
No ninia fuuk metan hanesan manu-metan.
12 Ninia matan hanesan manu-pombu neʼebé besik mota sira,
Neʼebé hoban an iha susubeen,
No tuur besik kolan* neʼebé nakonu.
Ninia ibun hanesan ai-funan líriu, neʼebé suli ho mina-morin mirra.+
14 Ninia liman-fuan hanesan osan-mean, enfeita ho fatuk-krizólitu.
Ninia kabun hanesan marfín* neʼebé nabilan no enfeita ho fatuk-safira.
15 Ninia ain hanesan riin husi fatuk-mármore, neʼebé tau iha osan-mean diʼak liu nia leten.
Nia bonitu hanesan rai-Líbanu, no ain-aas hanesan ai-sedru.+
16 Ninia ibun midar tebes,
No buat hotu kona-ba nia mak kapás loos.+
Oh oan-feto sira husi Jeruzalein, neʼe mak haʼu-nia doben neʼebé haʼu hadomi.”
6 “Oh feto neʼebé bonita liu hotu,
Ó-nia doben bá tiha neʼebé?
Ó-nia doben fila ba dalan ida-neʼebé?
Husik ami bá buka nia hamutuk ho ó.”
2 “Haʼu-nia doben tun ona ba ninia jardín,
Jardín neʼebé iha bálsamu,*
Atu tau matan bibi sira iha jardín nia leet
No atu kuʼu ai-funan líriu.+
3 Haʼu-nia doben mak haʼu-nian,+
No haʼu mak ninian.
Nia tau matan bibi sira iha ai-funan líriu nia leet.”+
4 “Oh haʼu-nia doben,+ ó bonita tebes hanesan Tirza,*+
Hanesan Jeruzalein neʼebé furak tebes,+
No kmanek loos hanesan tropa neʼebé halibur haleʼu sinál funu nian.+
5 Keta hateke ba haʼu,+
Tanba ó-nia matan halo haʼu-nia fuan tuku-tuku.
Ó-nia fuuk hanesan bibi-timur lubun
Neʼebé tun nadodon husi foho sira iha Gilead.+
6 Ó-nia nehan mutin hanesan bibi-malae lubun
Neʼebé bibi-atan fase moos ona,
Bibi-inan sira hotu hahoris oan-kaduak,
No sira-nia oan ida mós la lakon.
7 Ó-nia hasan* hanesan romaun rohan ida
Iha ó-nia veu laran.
8 Iha liurai-feto naʼin-60 nia leet
No iha feen-kiʼik naʼin-80 nia leet,
No mós iha feto joven barak nia leet,+
9 Nia deʼit mak haʼu-nia manu-pombu,+ neʼebé perfeitu.
Nia mak oan-feto espesiál ba ninia inan.
Nia mak oan neʼebé ninia inan gosta liu.*
Feto joven sira haree nia, no fó sai katak nia kontente;
Liurai-feto no feen-kiʼik sira gaba nia.
10 ‘Feto neʼe mak sé? Nia nabilan* hanesan rai naroman,
Nia furak hanesan fulan-tomak,
Nia moos hanesan loro-matan nia naroman,
No kmanek loos hanesan tropa neʼebé forma hodi prontu atu bá funu.’”+
11 “Haʼu laʼo tun ba jardín neʼebé iha ai-nogeira sira+
Atu haree ai sira neʼebé foin buras iha besik mota,*
No atu haree se uvas sira-nia dikin* moris ona ka lae,
No haree se romaun sira funan ona ka lae.
12 Antes haʼu hatene,
Haʼu-nia hakarak lori tiha ona haʼu
Ba haʼu-nia ema sira neʼebé diʼak,* ba sira-nia kuda-karreta.”
13 “Oh feto husi Sulam, fila fali mai!
Fila fali mai,
Atu nuneʼe ami bele hateke ba ó!”
“Tanbasá mak imi hateke ba feto husi Sulam neʼe?”+
“Nia hanesan tropa grupu rua neʼebé dansa!”*
7 “Oh oan-feto neʼebé iha hahalok diʼak,
Ó-nia ain kapás tebes iha ó-nia sandálias!
Ó-nia kelen hanesan buat murak sira
Neʼebé badaen ida halo.
2 Ó-nia husar hanesan manko neʼebé kabuar.
Haʼu hein katak manko neʼe sempre iha tua-uvas.
Ó-nia kabun hanesan trigu butuk ida,
Neʼebé haleʼu ho ai-funan líriu.
3 Ó-nia susun rua hanesan bibi-rusa oan rua,
Bibi-rusa gazela nia oan-kaduak.+
4 Ó-nia kakorok+ hanesan uma aas* neʼebé halo husi marfín.+
Ó-nia inus hanesan uma aas* iha Líbanu,
Neʼebé hateke ba Damasku.
Ó-nia fuuk naruk neʼebé la kesi halo liurai laran-monu.*
6 Oh feto neʼebé haʼu hadomi, ó bonita tebes,
Ó furak tebes liu fali buat hotu neʼebé halo haʼu kontente!
7 Ó ain-aas hanesan ai-palmeira,
No ó-nia susun hanesan ai-palmeira nia fuan sira.+
8 Haʼu dehan: ‘Haʼu sei saʼe ai-palmeira
Atu kuʼu ninia fuan sira.’
Haʼu hein katak ó-nia susun sai hanesan uvas-fuan sira,
Ó-nia iis morin hanesan masán,
9 No ó-nia ibun hanesan tua-uvas neʼebé diʼak liu.”
“Haʼu hein katak tua-uvas neʼe sei tama iha haʼu-nia doben nia garganta ho didiʼak,
No kona sira neʼebé toba-dukur nia ibun.
10 Haʼu mak haʼu-nia doben nian,+
No nia hakarak deʼit haʼu.
12 Mai ita hadeer sedu no laʼo ba toʼos-uvas
Atu haree se uvas sira buras ona ka lae,
Se ninia funan sira loke ona ka lae,+
No haree se romaun-hun sira funan ona ka lae.+
Iha neʼebá mak haʼu sei hatudu haʼu-nia domin ba ó.+
Ai-fuan neʼebé foin kuʼu no mós ai-fuan neʼebé rai kleur ona,
Oh haʼu-nia doben, haʼu rai hela ai-fuan sira-neʼe ba ó.
8 “Se karik ó mak hanesan haʼu-nia maun,
Neʼebé susu haʼu-nia inan nia susun!
Se nuneʼe, kuandu haʼu hetan ó iha liʼur, haʼu sei reʼi ó,+
No la iha ema ida mak sei hakribi haʼu.
2 Haʼu sei dirije ó;
Haʼu sei lori ó ba haʼu-nia inan nia uma laran,+
Haʼu-nia inan neʼebé hanorin haʼu.
Haʼu sei fó tua-uvas neʼebé kahur ona ho buat morin oioin ba ó,
No fó sumu romaun neʼebé fresku ba ó.
3 Ninia liman-karuk sei kona neineik haʼu-nia ulun,
No ninia liman-loos sei hakoʼak haʼu.+
4 Oh oan-feto sira husi Jeruzalein, haʼu haruka imi atu jura:
Keta koko atu fanu haʼu-nia domin se domin neʼe seidauk mosu.”+
5 “Sé mak feto neʼebé mai daudaun husi rai-fuik,
No sadere an ba ninia doben?”
“Haʼu fanu ó iha masán-hun okos.
Iha neʼebá mak ó-nia inan sente moras tuur-ahi nian
Bainhira nia fó moris ba ó.
6 Tau haʼu iha ó-nia fuan hanesan sinál* ida,
Hanesan sinál iha ó-nia liman,
Tanba domin mak forte hanesan mate,+
Domin lakan makaʼas hanesan ahi neʼebé lakan makaʼas, ahi husi Jah.*+
Se mane ida fó ninia rikusoin hotu iha ninia uma laran atu troka ho domin,
Ema sei hakribi rikusoin sira-neʼe.”*
8 “Ami iha alin-feto ida neʼebé kiʼik,+
No ninia susun seidauk moris.
Saida mak ami sei halo ba ami-nia alin-feto
Iha loron neʼebé ema mai atu husu nia?”
9 “Se nia hanesan moru ida,
Ami sei harii tan moru husi osan-mutin iha ninia leten,
Maibé se nia hanesan odamatan ida,
Ami sei satan netik nia ho ai-kabelak husi ai-sedru.”
10 “Haʼu hanesan moru ida,
No haʼu-nia susun hanesan uma aas* sira.
Nuneʼe nia rasik bele haree katak haʼu mak
Hanesan feto ida neʼebé hetan dame.
11 Salomão iha toʼos-uvas+ iha Baal-Hamon.
Nia entrega toʼos-uvas neʼe ba atan sira atu tau matan.
Sira ida-idak lori ba nia osan-mutin rihun ida ba uvas-fuan sira-neʼe.
12 Haʼu iha toʼos-uvas neʼebé haʼu-nian rasik.
Oh Salomão, osan-mutin rihun ida mak ó-nian,
No osan-mutin atus rua mak ba sira neʼebé tau matan ó-nia uvas-fuan sira.”
13 “Ó neʼebé hela iha jardín sira,+
Belun sira hein hela atu rona ó-nia lian.
Husik haʼu rona ó-nia lian.”+
14 “Lalais, oh haʼu-nia doben,
Halai lalais hanesan bibi-rusa gazela+
Ka hanesan bibi-rusa aman*
Iha foho sira neʼebé nakonu ho bálsamu.”*
Orj., “Dada haʼu tuir ó”.
Ka “fó hahiʼi”.
Neʼe katak feto joven sira.
Orj., “inan nia oan-mane sira”.
Ka “veu triste nian”.
Neʼe mak títulu ba liurai sira iha rai-Ejitu.
Ka karik “entre ó-nia fuuk neʼebé sasin ona”.
Ka “halo argola”.
Orj., “nardu”. Haree “Mina-morin nardu” iha Glosáriu.
Haree Glosáriu.
Haree Glosáriu.
Ka “uma neʼebé boot”.
Orj., “uma tua-uvas nian”.
Ka “tempu malirin”.
Haree Glosáriu.
Ka “foho sira husi Beter”.
Neʼe mak kadeira espesiál neʼebé uza atu lori ema importante.
Neʼe refere ba riin neʼebé karik tonka hena iha kadeira nia leten hodi fó mahon ba liurai.
Karik neʼe refere ba koroa neʼebé halo husi ai-funan ka ai-tahan.
Ka “tilun-hun”.
Ka “torre”. Haree Glosáriu.
Ka “la iha noda; la iha sala”.
Ka “Antilíbanu”.
Ka karik “Ó-nia kulit”.
Ka “paraízu”.
Ka “ai-horis neʼebé morin”.
Ka karik “bainhira nia koʼalia”.
Ka “salenda”.
Orj., “mean”.
Ka karik “hanesan ai-palmeira nia fuan sira”.
Ka karik “bee-matan”.
Ka “ai-horis neʼebé morin”.
Haree Glosáriu.
Ka “iha ai-horis neʼebé morin”.
Ka “Sidade Furak”.
Ka “tilun-hun”.
Orj., “Nia mak ema neʼebé moos ba ida neʼebé fó moris ba nia”.
Orj., “hateke tun”.
Ka “uádi”. Haree Glosáriu.
Ka “tubun”.
Ka “neʼebé serbí ho hakarak rasik”. Ka karik “haʼu-nia ema-boot sira”.
Ka “dansa Manaim nian”.
Ka “torre”.
Ka “torre”.
Orj., “ó-nia ulun”.
Ka “kaer metin liurai”.
Feto sira han ai-fuan neʼe tanba sira hanoin katak neʼe bele ajuda sira atu sai isin-rua.
Ka “selus”.
Ka “laran-metin ba ema ida deʼit”.
Haree “Siol” iha Glosáriu.
“Jah” mak naran badak ba Jeová.
Ka karik “Ema sei hakribi nia”.
Ka “torre”.
Ka “bibi-rusa oan neʼebé aman”.
Ka “ai-horis neʼebé morin”.