ZACARIAS
1 Iha fulan-ualu tinan segundu husi Dário nia ukun,+ Jeová fó sai liafuan ba Berekias nia oan-mane profeta Zacarias,*+ Ido nia bei-oan, hodi dehan: 2 “Jeová sai hirus makaʼas hasoru imi-nia aman sira.+
3 “Hatete ba sira: ‘Jeová neʼebé ukun tropa lalehan nian dehan nuneʼe: “‘Fila fali mai haʼu’, Jeová neʼebé ukun tropa lalehan nian dehan, ‘no haʼu sei fila fali ba imi’,+ Jeová neʼebé ukun tropa lalehan nian mak dehan.”’
4 “‘Keta sai hanesan imi-nia aman sira, neʼebé profeta sira iha tempu uluk dehan ba sira: “Jeová neʼebé ukun tropa lalehan nian dehan nuneʼe: ‘Favór ida, husik tiha imi-nia hahalok aat sira no fila fali mai haʼu.’”’+
“‘Maibé sira la rona haʼu, no la tau atensaun ba haʼu’.+ Jeová mak dehan.
5 “‘Agora imi-nia aman sira iha neʼebé? No profeta sira-neʼe moris ba nafatin ka lae? 6 Maibé, haʼu-nia liafuan no lei sira, neʼebé haʼu fó sai ona liuhusi haʼu-nia atan profeta sira, sai loos duni ba imi-nia aman sira, loos ka lae?’+ Nuneʼe sira fila fali mai haʼu no dehan: ‘Jeová neʼebé ukun tropa lalehan nian halo ona ba ami tuir ami-nia dalan no hahalok sira, hanesan nia deside ona atu halo.’”+
7 Iha loron 24 fulan-11, katak fulan-Sebat,* iha tinan segundu husi Dário nia ukun,+ Jeová fó sai liafuan ba Berekias nia oan-mane profeta Zacarias, Ido nia bei-oan, hodi dehan: 8 “Haʼu haree vizaun ida iha kalan. Haʼu haree mane ida saʼe hela kuda mean ida, no nia para iha ai-murta nia leet neʼebé iha dalan kloot iha fatuk-leet. Iha ninia kotuk iha kuda sira ho kór-mean, kór-kafé no kór-mutin.”
9 Entaun haʼu dehan: “Haʼu-nia naʼi, sé mak sira neʼebé saʼe kuda neʼe?”
Anju neʼebé koʼalia ho haʼu hatán: “Haʼu sei hatudu ba ó sira mak sé.”
10 Tuirmai mane neʼebé para iha ai-murta nia leet dehan: “Sira mak Jeová nia atan neʼebé nia haruka atu laʼo bá-mai haleʼu mundu.” 11 No sira koʼalia ba Jeová nia anju neʼebé para iha ai-murta nia leet, hodi dehan: “Ami laʼo ona haleʼu mundu, no mundu tomak hakmatek no iha dame.”+
12 Entaun Jeová nia anju dehan: “Oh Jeová neʼebé ukun tropa lalehan nian, toʼo bainhira mak Ita sei hanetik Ita-nia laran-sadiʼa ba Jeruzalein no sidade sira iha rai-Judá?+ Ita hirus sira durante tinan 70 ona.”+
13 Jeová hatán ho laran-diʼak no ho liafuan neʼebé fó kmaan ba anju neʼebé koʼalia ho haʼu. 14 Tuirmai anju neʼe hatete ba haʼu: “Fó sai bá, hodi dehan: ‘Jeová neʼebé ukun tropa lalehan nian dehan nuneʼe: “Haʼu hadomi tebes Jeruzalein* no Siaun.+ 15 Haʼu sai hirus makaʼas ba nasaun sira neʼebé hakmatek,+ tanba uluk haʼu hirus haʼu-nia povu uitoan deʼit,+ maibé nasaun sira-neʼe aumenta tan susar ba haʼu-nia povu.”’+
16 “Tan neʼe Jeová dehan nuneʼe: ‘“Haʼu sei fila fali ba Jeruzalein ho laran-sadiʼa,+ no haʼu-nia uma sei harii iha sidade neʼe+ no ema sei dada tali atu sukat Jeruzalein”,+ Jeová neʼebé ukun tropa lalehan nian mak dehan.’
17 “Fó sai dala ida tan no dehan: ‘Jeová neʼebé ukun tropa lalehan nian dehan nuneʼe: “Haʼu-nia sidade sira-neʼe sei nakonu fali ho hahalok diʼak; no Jeová sei fó kmaan fali ba Siaun+ no hili fali Jeruzalein.”’”+
18 Tuirmai haʼu foti matan no haree iha dikur haat.+ 19 Entaun haʼu husu ba anju neʼebé koʼalia ho haʼu: “Neʼe saida?” Nia hatán: “Neʼe mak dikur* sira neʼebé halo namkari ema Judá,+ Izraél+ no Jeruzalein.”+
20 Tuirmai Jeová hatudu badaen naʼin-haat ba haʼu. 21 Haʼu husu: “Sira mai atu halo saida?”
Nia dehan: “Neʼe mak dikur sira neʼebé halo namkari ema Judá toʼo la iha ema ida mak bele foti ninia ulun. Badaen sira-neʼe sei mai atu halo dikur sira-neʼe taʼuk, atu halo tohar tiha nasaun sira-nia dikur, nasaun sira neʼebé foti sira-nia dikur hasoru rai-Judá, hodi halo ema Judá namkari.”
2 Tuirmai haʼu foti matan no haree mane ida neʼebé kaer hela tali sukat nian.+ 2 Entaun haʼu husu: “Ita atu bá neʼebé?”
Nia hatán: “Haʼu atu sukat Jeruzalein, atu haree ninia luan no naruk mak hira.”+
3 No anju neʼebé koʼalia ho haʼu laʼo bá, no anju ida seluk mai hasoru nia. 4 Tuirmai nia dehan ba anju neʼe: “Halai bá neʼebá no fó-hatene mane joven neʼe: ‘“Ema sei hela iha Jeruzalein+ hanesan knua neʼebé la iha moru, tanba ema no animál-hakiak hotu sei sai barak iha sidade neʼe.+ 5 Haʼu sei sai hanesan moru ahi neʼebé haleʼu sidade neʼe,+ no haʼu sei halo sidade neʼe nakonu ho haʼu-nia glória”, Jeová mak dehan.’”+
6 Jeová dehan: “Mai! Mai! Halai sai husi rai parte norte.”+
Jeová dehan: “Tanba haʼu halo imi namkari ona ba fatin hotu.”*+
7 “Siaun, mai! Ó neʼebé hela ho Babilónia nia oan-feto, halai sai bá.+ 8 Tanba Jeová neʼebé ukun tropa lalehan nian, neʼebé hetan ona glória, haruka haʼu ba nasaun sira neʼebé hadau imi-nia sasán,+ hodi dehan: ‘Ema naran deʼit neʼebé book imi, neʼe hanesan sira tuu haʼu-nia matan-fuan.+ 9 Tanba agora haʼu sei foti haʼu-nia liman hodi kontra sira, no ema neʼebé uluk serbí nuʼudar sira-nia atan sei foti sira-nia rikusoin.’+ Ho ida-neʼe, imi sei hatene duni katak Jeová neʼebé ukun tropa lalehan nian mak haruka haʼu mai.
10 Jeová dehan: “Oh Siaun nia oan-feto,+ haklalak ho haksolok bá, tanba haʼu mai daudaun,+ no haʼu sei hela iha ó-nia leet.+ 11 Iha loron neʼebá, nasaun barak sei apoia Jeová,+ no sira sei sai haʼu-nia povu, no haʼu sei hela iha ó-nia leet.” Ho ida-neʼe, ó sei hatene duni katak Jeová neʼebé ukun tropa lalehan nian mak haruka haʼu ba ó. 12 Jeová sei foti Judá nuʼudar ninia parte iha rai neʼebé santu, no nia sei hili fali Jeruzalein.+ 13 Oh ema hotu, nonook bá iha Jeová nia oin, tanba nia mai daudaun husi ninia hela-fatin neʼebé santu atu halo buat ruma.
3 Tuirmai nia hatudu ba haʼu amlulik boot Josué+ neʼebé hamriik iha Jeová nia anju nia oin, no Satanás+ hamriik iha Josué nia liman-loos atu kontra nia. 2 Entaun, Jeová nia anju dehan ba Satanás: “Oh Satanás,+ Jeová sei korrije ó, sin, haʼu hein katak Jeová, neʼebé hili ona Jeruzalein,+ sei korrije ó! Josué mak hanesan ai rohan neʼebé foti sai husi ahi neʼebé lakan hela, loos ka lae?”
3 Josué hatais hela roupa neʼebé foʼer tebes no hamriik iha anju nia oin. 4 Anju hatete ba sira neʼebé hamriik iha ninia oin: “Hasai tiha ninia roupa neʼebé foʼer.” Tuirmai anju dehan ba nia: “Haree bá, haʼu hamoos tiha ona ó-nia sala, no ó sei hatais fali roupa neʼebé diʼak.”*+
5 Entaun haʼu dehan: “Tau turbante* neʼebé moos iha ninia ulun.”+ Entaun sira tau turbante neʼebé moos iha ninia ulun no fó-hatais roupa neʼebé moos ba nia, no Jeová nia anju hamriik besik nia. 6 Tuirmai Jeová nia anju fó-hatene Josué: 7 “Jeová neʼebé ukun tropa lalehan nian dehan nuneʼe: ‘Se ó laʼo iha haʼu-nia dalan sira no kumpre ó-nia knaar iha haʼu-nia oin, ó sei serbí nuʼudar juís iha haʼu-nia uma+ no sei tau matan ba* haʼu-nia pátiu* sira. Haʼu sei husik ó mai beibeik iha haʼu-nia oin, hanesan sira neʼebé hamriik daudaun iha neʼe.’
8 “‘Oh amlulik boot Josué, favór ida rona bá, ó no ó-nia maluk sira neʼebé tuur iha ó-nia oin, tanba mane sira-neʼe sai nuʼudar sinál ida. Haʼu sei lori mai haʼu-nia atan+ neʼebé naran Ai-Tubun!+ 9 Haree fatuk neʼebé haʼu tau ona iha Josué nia oin! Fatuk ida iha matan hitu. Haʼu bahat letra iha fatuk neʼe, no iha loron ida nia laran haʼu sei hamoos tiha sala husi rai neʼe’,+ Jeová neʼebé ukun tropa lalehan nian mak dehan.
10 “Jeová neʼebé ukun tropa lalehan nian dehan: ‘Iha loron neʼebá, imi ida-idak sei konvida imi-nia maluk atu mai tuur iha imi-nia uvas-hun okos no iha imi-nia ai-figeira hun okos.’”+
4 Anju neʼebé koʼalia ho haʼu mai fali no fanu haʼu, hanesan fanu ema ida neʼebé toba-dukur loos. 2 Tuirmai nia husu haʼu: “Saida mak ó haree?”
Entaun haʼu hatán: “Haʼu haree ahi-oan fatin ida neʼebé halo husi osan-mean,+ no haree manko ida iha ninia leten. Iha ahi-oan hitu,+ sin, hitu, no ahi-oan sira-neʼe liga ba kanu kiʼik hitu. 3 No iha ahi-oan fatin nia sorin, iha ai-oliveira hun rua,+ ida iha manko nia sorin loos no ida iha sorin karuk.”
4 Tuirmai haʼu husu anju neʼebé koʼalia ho haʼu: “Haʼu-nia naʼi, buat sira-neʼe katak sá?” 5 Entaun anju neʼebé koʼalia ho haʼu husu fali mai haʼu: “Ó la hatene buat sira-neʼe katak sá?”
Haʼu hatán: “Haʼu la hatene, haʼu-nia naʼi.”
6 Tuirmai nia dehan mai haʼu: “Jeová dehan nuneʼe ba Zorobabel: ‘“Laʼós ho tropa nia forsa, ka ho ema nia kbiit,+ maibé ho haʼu-nia espíritu+ mak buat hotu neʼe sei sai loos”, Jeová neʼebé ukun tropa lalehan nian mak dehan. 7 Oh foho boot, ó neʼe sé? Ó sei sai rai-tetuk+ iha Zorobabel+ nia oin. Nia sei lori fatuk* neʼebé tau iha templu nia tutun no ema sei haklalak: “Furak tebes! Furak tebes!”’”
8 Jeová dehan tan mai haʼu: 9 “Ho Zorobabel nia liman rasik mak nia tau ona templu* neʼe nia fundasaun,+ no nia sei harii templu neʼe toʼo hotu.+ Ho ida-neʼe, imi sei hatene katak Jeová neʼebé ukun tropa lalehan nian mak haruka haʼu ba imi. 10 Keta hakribi loron neʼebé ema foin hahú halo buat kiʼik.+ Tanba sira sei haksolok no haree Zorobabel kaer tali-prumu* iha ninia liman. Matan hitu mós sei haree ida-neʼe. Matan hitu neʼe mak Jeová nia matan, neʼebé hateke ba mundu tomak.”+
11 Tuirmai haʼu husu ba nia: “Ai-oliveira hun rua neʼebé iha ahi-oan fatin+ nia sorin loos no sorin karuk katak sá?” 12 Haʼu husu nia ba dala segundu: “Haʼu haree sanak rua* iha ai-oliveira hun sira-neʼe neʼebé hasai mina kór osan-mean neʼebé suli ba manko laran liuhusi kanu osan-mean rua. Sanak rua neʼe katak sá?”
13 Nia husu fali mai haʼu: “Ó la hatene buat sira-neʼe katak sá?”
Haʼu hatán: “Haʼu la hatene, haʼu-nia naʼi.”
14 Nia dehan: “Sira reprezenta ema naʼin-rua neʼebé Maromak hili* ona no hamriik besik Naʼi ba mundu tomak.”+
5 Dala ida tan haʼu foti matan, no haree surat-tahan lulun ida semo daudaun. 2 Nia husu haʼu: “Saida mak ó haree?”
Haʼu hatán: “Haʼu haree surat-tahan lulun ida semo daudaun, ninia naruk metru sia no luan metru haat ho sentímetru 45.”*
3 Tuirmai nia dehan mai haʼu: “Neʼe mak malisan neʼebé sei habelar ba mundu tomak, tanba ema hotu neʼebé naʼok+ seidauk hetan kastigu, tuir malisan neʼebé hakerek ona iha surat-tahan neʼe nia sorin ida; no ema hotu neʼebé jura falsu+ mós seidauk hetan kastigu, tuir malisan neʼebé hakerek ona iha surat-tahan neʼe nia sorin seluk. 4 Jeová neʼebé ukun tropa lalehan nian dehan: ‘Haʼu haruka malisan neʼe, no neʼe sei tama ba naʼok-teen sira-nia uma no tama ba uma husi ema neʼebé jura falsu hodi haʼu-nia naran. No neʼe sei hela iha uma sira-neʼe nia laran no han tiha uma sira-neʼe no mós ninia ai no fatuk sira.’”
5 Tuirmai anju neʼebé koʼalia ho haʼu laʼo mai no dehan mai haʼu: “Favór ida, foti matan no haree saida mak sai mai.”
6 Entaun haʼu husu: “Saida mak neʼe?”
Nia hatán: “Neʼe mak fatin sukat efa nian* neʼebé sai mai.” Nia hatutan tan: “Ema aat sira iha mundu tomak haree hanesan neʼe.” 7 Haʼu haree fatin sukat neʼe nia matan kabuar neʼebé halo husi besi-makdadi,* no matan neʼe hiʼit saʼe tiha, no iha feto ida tuur iha fatin sukat neʼe nia laran. 8 Entaun anju neʼe dehan: “Feto neʼe nia naran mak Hahalok Aat.” Tuirmai nia soe fali feto neʼe ba fatin sukat neʼe nia laran, depois neʼe, nia taka fali kedas ninia matan neʼebé halo husi besi-makdadi.
9 Tuirmai haʼu hateke saʼe no haree feto naʼin-rua mai daudaun, sira semo iha anin. Sira iha liras hanesan manu-segoña nia liras. No sira hiʼit saʼe fatin sukat neʼe entre lalehan no rai. 10 Entaun haʼu husu anju neʼebé koʼalia ho haʼu: “Sira lori fatin sukat efa nian neʼe bá neʼebé?”
11 Nia hatán: “Sira lori ba rai-Sinear.*+ Iha neʼebá, sira sei harii uma ida ba feto neʼe. Bainhira uma neʼe halo hotu ona, sira sei tau nia iha neʼebá iha ninia fatin neʼebé loos.”
6 Dala ida tan haʼu foti matan no haree kuda-karreta haat halai mai daudaun husi foho rua nia leet, foho sira-neʼe husi riti. 2 Kuda mean sira mak dada kuda-karreta primeiru, no kuda metan sira mak dada kuda-karreta segundu.+ 3 Kuda mutin sira mak dada kuda-karreta terseiru, no kuda sira neʼebé makerek no kór oioin mak dada kuda-karreta ida ikus.+
4 Haʼu husu anju neʼebé koʼalia ho haʼu: “Haʼu-nia naʼi, neʼe saida?”
5 Anju neʼe hatán mai haʼu: “Neʼe mak espíritu haat*+ husi lalehan neʼebé hamriik ona iha Naʼi ba mundu tomak nia oin, no agora sira sai mai daudaun.+ 6 Kuda-karreta neʼebé kuda metan sira dada, halai daudaun ba rai parte norte.+ Kuda-karreta neʼebé kuda mutin sira dada, halai daudaun ba tasi sorin. No kuda-karreta neʼebé kuda makerek sira dada, halai daudaun ba rai parte súl. 7 No kuda sira ho kór oioin hakarak tebes atu laʼo haleʼu mundu tomak.” Tuirmai nia dehan: “Bá, laʼo haleʼu mundu tomak.” No sira komesa laʼo haleʼu mundu tomak.
8 Tuirmai nia bolu haʼu ho lian makaʼas, no dehan: “Haree bá, kuda sira neʼebé halai ba rai parte norte halo Jeová la hirus tan ba rai neʼe.”
9 Jeová dehan tan ba haʼu: 10 “Foti buat sira neʼebé Heldai, Tobias no Jedaias lori husi povu neʼebé sai dadur.* Iha loron neʼebá, ó tenke bá Sofonias nia oan-mane Josias nia uma, hamutuk ho mane sira-neʼe neʼebé mai husi Babilónia. 11 Ó tenke foti osan-mutin no osan-mean hodi halo koroa* ida no tau koroa neʼe iha Jeozadak nia oan-mane Josué nia ulun,+ neʼebé serbí nuʼudar amlulik boot. 12 No hatete ba Josué:
“‘Jeová neʼebé ukun tropa lalehan nian dehan nuneʼe: “Neʼe mak mane neʼebé naran Ai-Tubun.+ Nia sei moris iha ninia fatin, no nia sei harii fali Jeová nia templu.+ 13 Nia sei harii Jeová nia templu, no nia sei hetan dignidade. Nia sei tuur iha ninia kadunan hodi sai ukun-naʼin no mós amlulik,+ no nia sei halo knaar rua neʼe atu haburas dame.* 14 No koroa* neʼe sei rai nafatin iha Jeová nia templu hodi fó-hanoin ba Helem,* Tobias, Jedaias+ no Hem.* Hem mak Sofonias nia oan-mane. 15 No ema sira neʼebé hela iha fatin dook sei mai hodi hola parte atu harii Jeová nia templu.” Ho ida-neʼe, imi sei hatene katak Jeová neʼebé ukun tropa lalehan nian mak haruka haʼu ba imi. Neʼe sei akontese duni se imi rona ba Jeová, imi-nia Maromak, nia lian.’”
7 Tuirmai iha loron haat fulan-sia, neʼe katak fulan-Kislev,* iha tinan haat husi Liurai Dário nia ukun, Jeová fó sai liafuan ba Zacarias.+ 2 Povu iha Betel haruka Sarezer hamutuk ho Regem-Melec no ninia ema sira atu bá husu Jeová nia laran-sadiʼa.* 3 Sira bá hasoru amlulik sira iha Jeová nia uma,* Maromak neʼebé ukun tropa lalehan nian, no hasoru profeta sira, no dehan: “Ami tenke tanis iha fulan-lima+ no la han buat ida, hanesan ami halo ba tinan barak ona ka?”
4 Jeová neʼebé ukun tropa lalehan nian fó sai tan ninia liafuan ba haʼu, hodi dehan: 5 “Hatete ba povu hotu iha rai neʼe no ba amlulik sira: ‘Durante tinan 70+ bainhira imi halo jejún no tanis iha fulan-lima no iha fulan-hitu,+ imi halo duni jejún neʼe ba haʼu ka lae? 6 Bainhira imi han no hemu, imi halo neʼe ba imi-nia an deʼit, loos ka lae? 7 Tuir loloos, imi tenke halo tuir Jeová nia liafuan neʼebé uluk fó sai ona liuhusi profeta sira,+ bainhira ema sei hela ho hakmatek iha Jeruzalein no iha sidade sira neʼebé haleʼu Jeruzalein, no bainhira ema sei hela iha área Negeb no área Sefela.’”
8 Jeová fó sai tan ninia liafuan ba Zacarias: 9 “Jeová neʼebé ukun tropa lalehan nian dehan nuneʼe: ‘Tesi-lia ho loloos tuir justisa,+ no hatudu domin neʼebé laran-metin+ no laran-sadiʼa ba malu. 10 Keta lohi hodi hamatak feto-faluk ka oan-kiak,*+ ema estranjeiru+ ka ema kiak.+ No keta halo planu aat ba malu iha imi-nia laran.’+ 11 Maibé sira lakohi tau atensaun.+ Ho ulun-toos sira fila kotuk+ no taka tilun hodi la rona.+ 12 Sira halo sira-nia laran toos hanesan fatuk-diamante*+ no lakohi halo tuir ukun-fuan* no liafuan husi Jeová neʼebé ukun tropa lalehan nian, neʼebé nia fó sai ona liuhusi ninia espíritu ba profeta sira iha tempu uluk.+ Tan neʼe, Jeová neʼebé ukun tropa lalehan nian sai hirus makaʼas.”+
13 “Jeová neʼebé ukun tropa lalehan nian dehan: ‘Haʼu* la rona ba sira bainhira sira bolu haʼu,+ hanesan sira mós la rona mai haʼu bainhira haʼu bolu sira.+ 14 Ho anin-fuik mak haʼu halo sira namkari ba nasaun hotu neʼebé sira la hatene.+ Tuirmai sira-nia rai sai fuik, la iha ema ida mak laʼo liu ka fila fali,+ tanba sira halo sira-nia rai neʼebé furak sai fali fatin neʼebé halo ema taʼuk.’”
8 Jeová neʼebé ukun tropa lalehan nian fó sai tan ninia liafuan ba haʼu: 2 “Jeová neʼebé ukun tropa lalehan nian dehan nuneʼe: ‘Haʼu hadomi tebes Siaun,*+ no ho laran-nakali boot mak haʼu sei defende no proteje sidade neʼe.’”
3 “Jeová dehan nuneʼe: ‘Haʼu sei fila fali ba Siaun+ no hela iha Jeruzalein.+ Jeruzalein sei hanaran sidade lia-loos nian,*+ no Jeová neʼebé ukun tropa lalehan nian, nia foho, sei hanaran foho santu.’”+
4 “Jeová neʼebé ukun tropa lalehan nian dehan nuneʼe: ‘Katuas no ferik sira sei tuur fali iha Jeruzalein nia fatin públiku, sira ida-idak sei kaer ai-tonka tanba idade liu ona.+ 5 Labarik-mane no labarik-feto sira sei nakonu iha sidade neʼe nia fatin públiku hodi halimar.’”+
6 “Jeová neʼebé ukun tropa lalehan nian dehan nuneʼe: ‘Iha tempu neʼebá, maski povu restu sira haree katak ida-neʼe mak susar liu, maibé ida-neʼe mós susar liu ba haʼu ka lae?’ Jeová neʼebé ukun tropa lalehan nian mak dehan.”
7 “Jeová neʼebé ukun tropa lalehan nian dehan nuneʼe: ‘Haʼu sei salva haʼu-nia povu husi rai parte leste no rai parte oeste.*+ 8 Haʼu sei lori sira ba Jeruzalein no sira sei hela iha neʼebá.+ Sira sei sai haʼu-nia povu, no haʼu sei sai sira-nia Maromak+ neʼebé laran-metin* no laran-loos.’”
9 “Jeová neʼebé ukun tropa lalehan nian dehan nuneʼe: ‘Sai aten-brani bá,*+ oh imi neʼebé agora rona liafuan sira-neʼe husi profeta sira.+ Uluk profeta sira mós fó sai liafuan neʼebé hanesan iha loron neʼebé ema tau fundasaun atu harii fali uma ba Jeová neʼebé ukun tropa lalehan nian. 10 Tanba antes tempu neʼe, maski ema ka animál halo serbisu, maibé la simu kolen.+ No ema neʼebé halo viajen la sente seguru tanba inimigu, neʼe tanba haʼu halo ona ema hotu kontra malu.’
11 “Jeová neʼebé ukun tropa lalehan nian dehan: ‘Maibé agora haʼu sei la halo ba povu restu neʼe hanesan uluk haʼu halo ona.+ 12 Tanba sira sei kuda fini dame nian, uvas-hun sei fó fuan no rai sei fó rezultadu,+ no lalehan sei fó mahobeen. Haʼu sei halo povu restu neʼe atu simu buat sira-neʼe hotu nuʼudar liman-rohan.+ 13 Oh umakain Judá no umakain Izraél, hanesan uluk nasaun sira seluk temi imi-nia naran nuʼudar malisan,+ nuneʼe mós sira sei temi imi-nia naran nuʼudar bensaun tanba haʼu sei salva imi.+ Keta taʼuk!+ Sai aten-brani bá.’*+
14 “Tanba Jeová neʼebé ukun tropa lalehan nian dehan nuneʼe: ‘“Hanesan uluk haʼu deside ona atu fó-terus ba imi tanba imi-nia beiʼala sira halo haʼu hirus makaʼas”, Jeová neʼebé ukun tropa lalehan nian dehan, “no haʼu la troka haʼu-nia hanoin,*+ 15 nuneʼe mós agora haʼu deside ona atu halo diʼak ba Jeruzalein no ba umakain Judá.+ Keta taʼuk!”’+
16 “‘Imi tenke halo buat tuirmai neʼe: Koʼalia loloos ba malu,+ no tesi-lia iha imi-nia portaun sira tuir lia-loos atu bele haburas dame.+ 17 Keta halo planu aat ba malu iha imi-nia laran+ no keta jura falsu,*+ tanba haʼu odi buat sira-neʼe hotu’,+ Jeová mak dehan.”
18 Jeová neʼebé ukun tropa lalehan nian fó sai tan ninia liafuan ba haʼu: 19 “Jeová neʼebé ukun tropa lalehan nian dehan nuneʼe: ‘Tempu jejún iha fulan-haat,+ fulan-lima,+ fulan-hitu+ no fulan-sanulu+ sei sai nuʼudar tempu haksolok no kontente ba umakain Judá; neʼe mak tempu ba festa sira neʼebé haksolok.+ Tan neʼe, hadomi lia-loos no haburas dame bá.’
20 “Jeová neʼebé ukun tropa lalehan nian dehan nuneʼe: ‘Iha futuru povu oioin no ema husi sidade barak sei mai. 21 Ema sira neʼebé hela iha sidade ida sei bá koʼalia ho ema iha sidade seluk, hodi dehan: “Mai ita bá atu husu Jeová hatudu laran-sadiʼa* no mai ita ho laran buka Jeová neʼebé ukun tropa lalehan nian. Ami rasik mós sei bá neʼebá.”+ 22 No povu barak no nasaun forte sira sei mai toʼo Jeruzalein atu buka Jeová neʼebé ukun tropa lalehan nian,+ no atu husu Jeová hatudu laran-sadiʼa.’*
23 “Jeová neʼebé ukun tropa lalehan nian dehan nuneʼe: ‘Iha tempu neʼebá, mane naʼin-sanulu husi língua hotu husi nasaun oioin+ sei kaer metin mane Judeu ida nia roupa,* hodi dehan: “Ami hakarak bá hamutuk ho imi,+ tanba ami rona ona katak Maromak hamutuk ho imi.”’”+
9 Tuirmai neʼe mak avizu ida:
“Jeová fó sai liafuan hodi kontra rai-Hadrak,
No ninia liafuan liuliu kontra Damasku,*+
Tanba Jeová nia matan hateke ba ema hotu+
No ba Izraél nia suku hotu.
2 Nia fó sai liafuan kontra Hamat,+ neʼebé baliza ho rai neʼe,*
No fó sai liafuan kontra Tiro+ ho Sidon,+ tanba sira matenek liu.+
3 Tiro harii moru* ba nia an.
Sidade neʼe halibur osan-mutin barak hanesan rai-rahun
No osan-mean barak hanesan tahu iha dalan.+
4 Jeová sei hadau sidade neʼe nia rikusoin,
No halakon ninia tropa sira no soe tiha ba tasi;*+
No ahi sei han mohu sidade neʼe.+
5 Askelon sei haree ida-neʼe no sai taʼuk.
Gaza sei sente laran-susar tebes.
Ekron mós sei sente laran-susar, tanba ninia esperansa lakon ona.*
Liurai husi Gaza sei mate,
No ema sei la hela iha Askelon.+
6 Ema estranjeiru nia oan sira mak sei hela iha Asdod,
No haʼu sei halakon tiha ema Filístia nia hahalok foti an.+
7 Haʼu sei hasai tiha raan husi ninia ibun
No hasai tiha hahán neʼebé haʼu hakribi husi ninia nehan.
Ninia ema restu sira sei sai ita-nia Maromak nian.
Nia sei sai hanesan xefe* ida iha Judá,+
No Ekron sei sai hanesan ema Jebus.+
8 Haʼu sei hein nuʼudar guarda atu defende haʼu-nia uma,+
Atu nuneʼe la iha ema ida mak sei tama-sai.
Sira neʼebé fó-terus ema sei nunka laʼo liu tan,+
Tanba agora haʼu haree ona ho haʼu-nia matan.*
9 Oh Siaun nia oan-feto, haksolok tebes bá.
Oh Jeruzalein nia oan-feto, haklalak ho lian manán nian bá.
Haree bá! Ó-nia liurai mai daudaun hodi toʼo ba ó.+
Nia laran-loos no lori salvasaun,*
Nia haraik an+ no saʼe kuda-burru ida,
Nia saʼe kuda-burru aman, kuda-burru inan ida nia oan.+
10 Haʼu sei halakon tiha kuda-karreta funu nian husi Efraim
No halakon kuda husi Jeruzalein.
Haʼu sei halakon tiha tropa nia rama.
Nia sei haklaken dame ba nasaun sira;+
Nia sei ukun husi tasi ida toʼo tasi seluk
11 Kona-ba ó, oh Siaun,* liuhusi raan husi ó-nia aliansa
Mak haʼu sei haruka ó-nia ema dadur sira sai husi rai-kuak maran.+
12 Oh imi ema dadur sira, fila fali ba fatin seguru ho esperansa.+
Ohin haʼu fó sai ba Siaun, hodi dehan:
‘Oh Siaun, ó sei simu bensaun ba dala rua husi haʼu.+
13 Haʼu sei uza* Judá nuʼudar haʼu-nia rama-inan.
Haʼu sei tau Efraim ba haʼu-nia rama-inan,*
Oh Siaun, haʼu sei fanu ó-nia oan-mane sira
Atu kontra Grésia nia oan-mane sira,
No haʼu sei halo ó sai hanesan funu-naʼin nia surik.’
14 Jeová sei hatudu ho klaru katak nia hamutuk ho ninia povu,
No ninia rama-oan sei hana sai hanesan rai-lakan.
Jeová, Naʼi Ukun-Naʼin Boot Liu, sei huu dikur,+
No nia sei bá halo funu hasoru inimigu hanesan anin-fuik husi parte súl.
15 Jeová neʼebé ukun tropa lalehan nian sei defende sira,
Sira sei hemu no sai kontente, hanesan ema hemu tua-uvas;
Sira sei sai hanesan manko neʼebé nakonu,
Hanesan altár nia sikun sira.+
16 Jeová, sira-nia Maromak, sei salva sira iha loron neʼebá,
Tanba sira mak ninia povu, ninia bibi-lubun.+
Sira sei sai hanesan fatuk-murak sira iha koroa ida, neʼebé nabilan iha ninia rai.+
17 Ninia laran-diʼak mak boot tebes,+
No nia bonitu tebes!
Ai-han no tua-uvas foun
Sei halo mane joven no feto virjen sira sai forte.”+
10 “Husu ba Jeová atu fó udan.*
Jeová mak halo kalohan metan no anin-fuik,
Nia halo udan tun ba ema,+
No halo moris ai-horis sira iha rai-luan ba ema hotu.
2 Tanba estátua terafín* sira koʼalia ona lia-bosok;
Siʼikdór sira haree ona vizaun neʼebé la loos.
Sira koʼalia kona-ba mehi sira neʼebé folin-laek,
No koko atu fó kmaan, maibé neʼe saugati deʼit.
Tan neʼe mak povu sira sei laʼo-lemo hanesan bibi-malae.
Sira sei hetan susar tanba la iha bibi-atan.
3 Haʼu-nia hirus lakan makaʼas hasoru bibi-atan sira,
No haʼu sei tesi-lia hasoru ulun-naʼin* sira neʼebé hanehan povu;
Tanba Jeová neʼebé ukun tropa lalehan nian tau ona atensaun ba ninia bibi-lubun,+ ba umakain Judá,
Nia halo sira sai hanesan ninia kuda funu nian neʼebé forte no kmanek.
4 Ulun-naʼin* ida mai husi nia,
Ukun-naʼin ida neʼebé fó apoiu,* mai husi nia,
Tropa nia rama mai husi nia;
Xefe sira hotu mai husi nia, sira hotu hamutuk.
5 Sira sei sai hanesan funu-naʼin
Neʼebé sama tahu iha dalan bainhira halo funu.
Sira sei halo funu, tanba Jeová hamutuk ho sira.+
No inimigu nia tropa sira neʼebé saʼe kuda sei hetan moe.+
6 Haʼu sei halo Judá nia umakain sai kmanek liu,
No haʼu sei salva José nia umakain.+
Haʼu sei lori sira fila fali,
Tanba haʼu sei hatudu laran-sadiʼa ba sira.+
Sira-nia situasaun sei sai hanesan haʼu nunka husik sira.+
Haʼu mak Jeová, sira-nia Maromak, no haʼu sei hatán ba sira.
7 Ema Efraim sei sai hanesan funu-naʼin neʼebé kbiit boot,
No sira-nia laran sei haksolok hanesan ema hemu tua-uvas.+
Sira-nia oan-mane sei haree ida-neʼe no haksolok.
Sira-nia laran sei kontente tanba Jeová.+
8 ‘Haʼu sei hakfuʼik hodi bolu sira no halibur sira hamutuk,
Tanba haʼu sei salva* sira,+ no sira sei sai barak,
No kontinua sai barak liután.
9 Maski haʼu halo sira namkari iha povu sira-nia leet hanesan kari fini,
Maibé sira sei hanoin-hetan haʼu iha fatin sira neʼebé dook.
Sira ho sira-nia oan-mane sei hetan fali kbiit no fila fali mai.
10 Haʼu sei lori sira fila husi rai-Ejitu
No halibur fali sira husi rai-Asíria.+
Haʼu sei lori sira ba rai-Gilead+ no rai-Líbanu,
No iha neʼebá mós fatin sei la toʼo ba sira.+
11 Haʼu sei hakur liu tasi hodi fó susar ba tasi.
No haʼu sei baku monu laloran sira iha tasi.+
Bee kleʼan hotu iha Mota Nilo sei sai maran.
12 Haʼu, Jeová, mak sei halo sira sai kmanek liu,+
No sira sei laʼo tuir haʼu-nia naran’,+ Jeová mak dehan.”
11 “Oh Líbanu, loke ó-nia odamatan sira,
Atu nuneʼe ahi bele han ó-nia ai-sedru sira.
2 Oh ai-juníperu, tanis bá, tanba ai-sedru monu ona;
Ai-hun boot sira lakon ona!
Oh ai-karvallu iha Basan, tanis bá,
Tanba ai-laran neʼebé iha ai-hun barak lakon ona!
3 Rona bá! Bibi-atan sira tanis,
Tanba sira-nia glória lakon ona.
Rona bá! Leaun-aman sira hasai lian,
Tanba ai-laran sira iha Mota Jordaun nia ninin lakon ona.
4 “Jeová, haʼu-nia Maromak, dehan nuneʼe: ‘Bá tau matan bibi sira neʼebé ema deside ona atu oho.+ 5 Ema neʼebé sosa sira oho sira,+ maibé ema sira-neʼe la hetan kastigu. No ema neʼebé faʼan sira+ dehan: “Fó hahiʼi ba Jeová tanba haʼu sei sai riku.” No sira-nia bibi-atan sira la hatudu laran-sadiʼa ba sira.’+
6 “Jeová dehan: ‘Haʼu sei la hatudu tan laran-sadiʼa ba ema iha rai neʼe. Tanba haʼu sei halo sira hetan terus iha sira-nia viziñu nia liman no iha sira-nia liurai nia liman. Inimigu sei harahun rai neʼe, no haʼu sei la salva sira husi inimigu nia liman.’”
7 Nuneʼe haʼu komesa tau matan bibi sira neʼebé ema deside ona atu oho,+ haʼu halo nuneʼe ba imi-nia diʼak, oh bibi neʼebé ema haterus. Haʼu foti ai-tonka rua, no hanaran ai-tonka ida Laran-Diʼak no ida seluk Unidade,+ no haʼu komesa tau matan ba bibi sira. 8 No haʼu duni sai bibi-atan naʼin-tolu iha fulan ida nia laran, tanba haʼu lakon pasiénsia ho sira no sira mós odi haʼu. 9 No haʼu dehan: “Haʼu sei la kontinua atu tau matan ba imi. Husik ida neʼebé atu mate, mate bá. No ida neʼebé atu lakon, lakon bá. No sira neʼebé restu, husik sira han malu bá.” 10 Entaun haʼu foti haʼu-nia ai-tonka Laran-Diʼak+ no tesi ida-neʼe, haʼu hakotu aliansa neʼebé haʼu halo ona ho povu tomak. 11 Nuneʼe aliansa neʼe kotu ona iha loron neʼebá. Bibi sira iha bibi-lubun nia leet neʼebé ema haterus no neʼebé haree mai haʼu, sira hatene katak neʼe mak Jeová nia liafuan.
12 Tuirmai haʼu dehan ba sira: “Se imi hanoin katak neʼe diʼak, fó haʼu-nia kolen mai haʼu. Maibé se lae, imi rai hela ida-neʼe bá.” No sira selu* haʼu-nia kolen osan-mutin 30.+
13 Tuirmai Jeová dehan ba haʼu: “Soe neʼe ba osan-fatin tanba neʼe mak osan folin-boot neʼebé sira tau ba haʼu.”+ Entaun haʼu foti osan-mutin 30 neʼe no soe ba osan-fatin iha Jeová nia uma.+
14 Tuirmai haʼu tesi haʼu-nia ai-tonka Unidade ba pedasuk.+ Hodi halo nuneʼe, haʼu hakotu relasaun nuʼudar maun-alin entre Judá ho Izraél.+
15 No Jeová dehan ba haʼu: “Foti tiha sasán husi bibi-atan neʼebé folin-laek.+ 16 Tanba haʼu sei husik bibi-atan ida atu domina rai neʼe. Nia sei la tau matan ba bibi sira neʼebé lakon daudaun;+ nia sei la buka bibi-oan sira, la kura bibi neʼebé kanek,+ no la fó-han ba bibi sira neʼebé bele hamriik. Maibé, nia sei han bibi bokur sira-nia naʼan+ no lees bibi nia ain-kukun.+
17 Susar ba haʼu-nia bibi-atan neʼebé folin-laek,+ neʼebé husik hela bibi-lubun!+
Surik ida sei sona ninia liman no matan sorin loos.
Ninia liman sei sai maran hotu,
No ninia matan sorin loos sei sai delek.”*
12 Tuirmai neʼe mak avizu ida:
Jeová dehan: “Jeová fó sai ninia liafuan kona-ba Izraél.”
Nia mak nahe lalehan hanesan hena,+
Nia mak tau rai nia hun,+
No kria forsa moris nian* iha ema nia laran.
2 “Haʼu sei halo Jeruzalein sai nuʼudar kopu* ida neʼebé halo lanu ema hotu neʼebé hela haleʼu sira. Ema sei mai atu halo serku ba Judá no mós Jeruzalein.+ 3 Iha loron neʼebá, haʼu sei halo Jeruzalein sai nuʼudar fatuk todan ba ema hotu. Sira hotu neʼebé hiʼit ida-neʼe sei hetan kanek todan.+ Nasaun hotu iha mundu sei halibur hamutuk hodi kontra sidade neʼe.”+ 4 Jeová dehan: “Iha loron neʼebá, haʼu sei halo kuda hotu sai taʼuk no halo tropa neʼebé saʼe kuda sai bulak. Haʼu sei hateke nafatin ba umakain Judá, maibé haʼu sei halo ema nia kuda hotu sai delek. 5 No xefe* sira husi Judá sei hanoin iha sira-nia laran: ‘Ema neʼebé hela iha Jeruzalein mak ami-nia kbiit tanba Jeová neʼebé ukun tropa lalehan nian mak sira-nia Maromak.’+ 6 Iha loron neʼebá, haʼu sei halo xefe sira husi Judá sai hanesan sanan neʼebé nakonu ho ahi iha ai sira-nia leet no hanesan ahi-oan neʼebé lakan iha trigu neʼebé foin koʼa nia leet.+ Sira sei han mohu ema hotu neʼebé haleʼu sira iha sira-nia liman-loos no liman-karuk.+ Ema Jeruzalein sei hela fali iha sira-nia sidade rasik, iha Jeruzalein.*+
7 “Jeová sei salva uluk Judá nia tenda sira, atu nuneʼe glória* husi David nia umakain no glória* husi sira neʼebé hela iha Jeruzalein sei la boot liu fali ema Judá. 8 Iha loron neʼebá, Jeová sei defende ema neʼebé hela iha Jeruzalein.+ Iha loron neʼebá, ema neʼebé sidi* iha sira-nia leet sei sai forte hanesan David, no David nia umakain sei sai forte hanesan Maromak, hanesan Jeová nia anju neʼebé laʼo iha sira-nia oin.+ 9 Iha loron neʼebá, haʼu sei halakon duni nasaun sira hotu neʼebé mai kontra Jeruzalein.+
10 “Haʼu sei fakar sai haʼu-nia espíritu ba David nia umakain no ba ema neʼebé hela iha Jeruzalein. Haʼu sei simu sira no sira sei harohan mai haʼu. Sira sei hateke ba ema neʼebé sira sona ho diman,+ no sira sei tanis ba nia hanesan sira tanis ba oan-mane mesak neʼebé mate; no sira sei triste loos ba nia hanesan sira triste ba oan-mane primeiru neʼebé mate. 11 Iha loron neʼebá ema iha Jeruzalein sei tanis makaʼas, hanesan ema tanis iha Hadadrimon iha Rai-Tetuk Megido.+ 12 No ema iha rai neʼe sei tanis, família ida-idak sei tanis mesak. David nia família sei tanis mesak, no feto sira husi umakain neʼe sei tanis mesak. Natan nia família+ sei tanis mesak, no feto sira husi umakain neʼe sei tanis mesak. 13 Levi nia família+ sei tanis mesak, no feto sira husi umakain neʼe sei tanis mesak. Ema Simei nia família+ sei tanis mesak, no feto sira husi umakain neʼe sei tanis mesak. 14 Nuneʼe mós ho família seluk hotu, família ida-idak sei tanis mesak, no feto sira husi família sira-neʼe sei tanis mesak.
13 “Iha loron neʼebá, sei iha bee-posu ida neʼebé loke tiha ba umakain David no ba ema sira neʼebé hela iha Jeruzalein atu hamoos sala no buat foʼer sira.”+
2 Jeová neʼebé ukun tropa lalehan nian dehan: “Iha loron neʼebá, haʼu sei hamoos tiha estátua* sira-nia naran husi rai neʼe,+ no ema sei la hanoin-hetan tan sira. Haʼu sei hasai tiha profeta falsu sira+ no anju aat nia kbiit.* 3 Se mane ida fó sai tan profesia, ninia inan-aman rasik sei dehan ba nia: ‘Ó sei mate, tanba ó koʼalia ona lia-bosok hodi Jeová nia naran.’ No ninia inan-aman rasik sei sona borus nia tanba nia fó sai profesia.+
4 “Iha loron neʼebá, profeta ida-idak sei sai moe tanba ninia vizaun bainhira nia fó sai profesia, no sira sei la hatais roupa profeta nian husi animál fulun+ atu lohi ema. 5 Sira ida-idak sei dehan: ‘Haʼu laʼós profeta. Haʼu mak toʼos-naʼin, tanba mane ida sosa ona haʼu husi haʼu-nia tempu joven.’ 6 No se ema ruma husu sira ida: ‘Tanbasá mak iha kanek iha ó-nia isin-lolon?’,* nia sei hatán: ‘Haʼu hetan kanek neʼe iha haʼu-nia belun* nia uma.’”
Kontra mane neʼebé mak haʼu-nia belun.
Baku bibi-atan,+ no husik bibi-lubun* halai namkari bá;+
Haʼu sei foti haʼu-nia liman kontra ema sira neʼebé la iha folin.”
8 Jeová dehan: “Iha rai tomak,
Parte rua husi ema sei mate no lakon mohu tiha.
No parte terseiru sei husik hela atu moris.
9 Haʼu sei lori parte terseiru neʼe liuhusi ahi;
Haʼu sei hamoos sira hanesan ema hamoos osan-mutin,
No koko sira hanesan ema koko osan-mean.+
Sira sei bolu haʼu-nia naran,
No haʼu sei hatán ba sira.
Haʼu sei dehan: ‘Sira mak haʼu-nia povu’,+
No sira sei dehan: ‘Jeová mak ami-nia Maromak.’”
14 “Loron ida mai daudaun, neʼe mak Jeová nia loron, bainhira ema sei hadau ó-nia* sasán no fahe ba malu iha ó-nia leet. 2 Haʼu sei halibur nasaun hotu atu halo funu hasoru Jeruzalein. Sira sei manán sidade neʼe no hadau sasán iha uma laran no estraga feto sira. Ema balu iha sidade neʼe sei sai dadur,* maibé ema restu sei hela iha sidade neʼe.
3 “Jeová sei bá hodi halo funu hasoru nasaun sira-neʼe+ hanesan uluk nia luta iha loron funu nian.+ 4 Iha loron neʼebá, ninia ain sei hamriik iha Foho Oliveira nia leten,+ foho neʼebé besik Jeruzalein iha parte leste. No Foho Oliveira neʼe sei fera tiha iha klaran, husi parte leste* toʼo oeste,* no parte klaran sei sai rai-tetuk neʼebé luan tebes. Foho neʼe nia sorin ida muda ba parte norte, no sorin seluk muda ba parte súl. 5 Imi sei halai ba rai-tetuk iha haʼu-nia foho rua neʼe nia leet, tanba rai-tetuk neʼe sei toʼo Azel. Imi tenke halai, hanesan imi halai tanba rai-nakdoko iha tempu neʼebé Liurai Uzias ukun rai-Judá.+ No Jeová, haʼu-nia Maromak, sei mai hamutuk ho santu sira hotu.+
6 “Iha loron neʼebá, sei la iha naroman neʼebé furak+ no buat hotu sei la book an.* 7 Neʼe sei sai loron neʼebé espesiál, ema sei hatene loron neʼe nuʼudar Jeová nia loron.+ Iha tempu neʼebá, la iha loron no mós la iha kalan. No kalan sei iha nafatin naroman. 8 Iha loron neʼebá, bee moris nian+ sei suli sai husi Jeruzalein,+ bee sorin suli ba tasi parte leste*+ no sorin seluk suli ba tasi parte oeste.*+ Neʼe sei akontese iha tempu manas no iha tempu malirin. 9 No Jeová sei sai Liurai ba mundu tomak.+ Iha loron neʼebá, ema hotu sei adora Jeová deʼit+ no ema sei bolu deʼit ba ninia naran.*+
10 “Rai tomak sei sai hanesan área Araba,+ husi Geba+ toʼo Rimon+ iha Jeruzalein nia parte súl. Jeruzalein sei hamriik fali iha ninia fatin no ema sei hela fali iha laran,+ husi Portaun Benjamim+ toʼo Portaun Primeiru, toʼo Portaun Sikun, no husi Uma Aas* Hananel+ toʼo liurai nia fatin sama uvas nian.* 11 Ema sei hela iha sidade neʼe; Jeruzalein sei nunka rahun tan tanba kastigu,+ no ema iha sidade laran sei moris ho hakmatek.+
12 “Moras-peste neʼebé Jeová sei fó ba ema hotu neʼebé halo funu hasoru Jeruzalein mak tuirmai neʼe:+ Sira-nia isin sei sai dodok maski sira hamriik hela, sira-nia matan-fuan sei dodok iha matan laran, no sira-nia nanál sei dodok iha ibun laran.
13 “Iha loron neʼebá, Jeová sei halo sira hotu bilán no taʼuk tebes. Sira ida-idak sei kaer sira-nia belun, no sira sei kontra* malu.+ 14 Judá mós sei envolve iha funu iha Jeruzalein. Ema neʼebé manán sei halibur rikusoin husi nasaun hotu neʼebé haleʼu sira, halibur osan-mean, osan-mutin no roupa barak tebes.+
15 “Moras-peste hanesan neʼe sei kona kuda, kuda-mula,* kuda-kamelu, kuda-burru no animál-hakiak hotu neʼebé iha inimigu nia hela-fatin.
16 “Kona-ba ema restu husi nasaun sira hotu neʼebé mai kontra Jeruzalein, tinan-tinan sira mai toʼo Jeruzalein+ atu hakruʼuk ba* Liurai Jeová, Maromak neʼebé ukun tropa lalehan nian,+ no atu selebra Festa Barraka nian.*+ 17 Maibé se ema ruma husi nasaun ida iha mundu la mai toʼo Jeruzalein atu hakruʼuk ba Liurai Jeová neʼebé ukun tropa lalehan nian, udan sei la tun ba sira.+ 18 No se povu husi rai-Ejitu la mai no la tama iha sidade neʼe, sira sei la hetan udan. Maibé, sira sei hetan fali moras-peste neʼebé Jeová fó ba nasaun sira neʼebé la mai atu selebra Festa Barraka nian. 19 Neʼe mak kastigu neʼebé sei kona rai-Ejitu no mós nasaun hotu se sira la mai atu selebra Festa Barraka nian, tanba neʼe mak hahalok neʼebé sala.
20 “Iha loron neʼebá, liafuan: ‘Jeová mak Santu!’*+ sei hakerek iha kuda nia sinu. No sanan sira+ iha Jeová nia uma sei sai hanesan manko sira+ iha altár oin. 21 Sanan hotu iha Jeruzalein no iha rai-Judá sei sai santu no sai Jeová nian, nia mak Maromak neʼebé ukun tropa lalehan nian. Ema hotu neʼebé hasaʼe sakrifísiu sei mai no uza sanan balu atu daʼan naʼan. Iha loron neʼebá, sei la iha tan ema Kanaan* iha Jeová nia uma, Maromak neʼebé ukun tropa lalehan nian.”+
Naran neʼe katak “Jeová hanoin-hetan ona”.
Haree Ap. B15.
Ka “Haʼu laran-manas tebes ba Jeruzalein”.
Iha Bíblia dala barak animál nia dikur reprezenta nasaun nia kbiit ka ukun.
Orj., “ba anin haat husi lalehan”.
Ka “roupa neʼebé uza iha tempu espesiál”.
Haree Glosáriu.
Ka “sei hein”.
Haree Glosáriu.
Ka “fatuk ikus”.
Orj., “uma”.
Neʼe mak tali ho besi neʼebé kesi iha rohan. Ema uza ida-neʼe atu sukat se didin hamriik loos ka kleʼuk.
Neʼe katak sanak sira neʼebé iha oliveira-fuan.
Orj., “fui mina”. Haree “Fui mina” iha Glosáriu.
Orj., “ninia naruk kóvado 20 no luan kóvado 10”. Haree Ap. B14.
Orj., “Neʼe mak efa”. Neʼe refere ba fatin ka raga neʼebé uza atu sukat efa ida. Efa ida mak 22 L. Haree Ap. B14.
Haree Glosáriu.
Neʼe katak Babilónia.
Karik neʼe refere ba anju grupu haat.
Haree “Ezíliu” iha Glosáriu.
Ka “koroa kmanek”.
Ka “knaar nuʼudar ukun-naʼin no amlulik sei apoia malu”.
Ka “koroa kmanek”.
Neʼe mak Heldai neʼebé temi ona iha ver. 10.
Karik neʼe mak Josias neʼebé temi ona iha ver. 10.
Haree Ap. B15.
Ka “halo mamar Jeová nia oin”.
Ka “templu”.
Ka “labarik neʼebé la iha aman”.
Ka karik “fatuk neʼebé toos liu hotu”, hanesan ho fatuk-ezmeralda.
Ka “hanorin”.
Orj., “Nia”.
Ka “Haʼu laran-manas tebes ba Siaun”.
Ka “sidade laran-metin”.
Ka “husi rai neʼebé loro-matan saʼe no rai neʼebé loro-matan monu”.
Ka “tuir lia-loos”.
Ka “Imi-nia liman tenke sai forte”.
Ka “Imi-nia liman tenke sai forte”.
Ka “la sente triste”.
Ka “keta gosta juramentu falsu”.
Ka “atu halo mamar Jeová nia oin”.
Ka “atu halo mamar Jeová nia oin”.
Ka “roupa ninin”.
Ka “No ninia liafuan sei tun ba Damasku”.
Karik neʼe refere ba rai-Hadrak ka Damasku.
Ka “uma aas neʼebé seguru”.
Ka karik “halakon ninia tropa sira iha tasi”.
Ka “ninia esperansa hetan ona moe”.
Ka “xeik”. Neʼe refere ba xefe ba suku ida.
Karik neʼe katak Maromak haree ona ninia povu nia terus.
Ka “no nia manán ona; no nia hetan ona salvasaun”.
Neʼe katak Mota Eufrates.
Orj., “oh feto”.
Orj., “sama”.
Neʼe katak uza Efraim hanesan rama-oan ida.
Ka “fatuk tali-baku nian”.
Ka “udan ikus”. Udan neʼe komesa maizumenus fulan-Abríl nia klaran. Haree Ap. B15.
Ka “família nia maromak sira”. Haree “Terafín” iha Glosáriu.
Orj., “bibi-timur aman”.
Orj., “Uma aas iha moru nia sikun”. Liafuan “uma” kompara ho ema importante ida; xefe ida.
Orj., “pregu tenda nian”. Liafuan “pregu” kompara ho ema neʼebé fó apoiu; ukun-naʼin ida.
Ka “sosa fali”.
Orj., “ai-tonka liurai nian”.
Orj., “tetu”.
Ka “sei haree la moos”.
Ka “iis”. Haree “Ruah” iha Glosáriu.
Ka “manko”.
Ka “xeik”. Neʼe refere ba xefe ba suku ida.
Ka “ema sei hela fali iha Jeruzalein iha ninia fatin neʼebé loos”.
Ka “kmanek”.
Ka “kmanek”.
Ka “ema neʼebé fraku liu”.
Ka “ídolu”. Haree Glosáriu.
Ka “espíritu la moos”. Haree “Ruah” iha Glosáriu.
Orj., “kanek entre ó-nia liman”. Neʼe katak kanek iha hirus-matan ka iha kotuk.
Ka “ema sira neʼebé hadomi haʼu”.
Ka “bibi-malae sira”.
Neʼe katak sidade neʼebé temi iha ver. 2.
Haree “Ezíliu” iha Glosáriu.
Ka “lorosaʼe”.
Orj., “tasi”.
Neʼe hanesan sai toos tiha tanba malirin liu.
Neʼe katak Tasi Mate.
Neʼe katak Tasi Mediterráneu.
Orj., “Iha loron neʼebá Jeová mak ida deʼit, no ninia naran ida deʼit”.
Ka “Torre”. Haree Glosáriu.
Ka “liurai nia tua-fatin”.
Ka “ataka”.
Neʼe mak oan husi kuda-burru aman no kuda-inan.
Ka “adora”.
Ka “Festa Hela-Fatin Temporáriu”.
Ka “Hahalok santu mak Jeová nian”.
Ka karik “negósiu-naʼin”.