Esperansa bele ajuda ka lae?
DANIEL maski foin tinan sanulu deʼit, maibé tenke tahan hasoru moras kankru durante tinan ida. Doutór sira neʼebé tau matan ba nia rende an ona inklui ema sira neʼebé mak besik ho Daniel. Maski nuneʼe, Daniel la lakon ninia esperansa. Nia fiar katak loron ida nia sei sai peskizadór ida atu ajuda hetan ai-moruk neʼebé bele kura moras kankru. Nia hein namanas ba doutór espesialista ida atu mai no fó tratamentu ba ninia moras kankru neʼe. Maibé, doutór neʼe labele mai tanba klima neʼebé la diʼak. Neʼe halo Daniel laran-kraik tebes. No ba dala primeiru Daniel lakon hotu ninia forsa. Liutiha loron balu Daniel mós mate.
Doutora neʼebé halo peskiza kona-ba esperansa nia impaktu ba saúde mak konta kona-ba Daniel nia istória neʼe. Karik Ita mós rona ona istória seluk neʼebé atu hanesan. Porezemplu, ema ida neʼebé idade loos ona toba iha kama leten deʼit no besik ona atu mate maibé iha hakarak neʼebé makaʼas atu halo buat ruma, karik hein ba ema neʼebé nia hadomi tebes atu mai hasoru nia ka selebra aniversáriu ruma. Bainhira buat neʼebé nia hein akontese tiha, ikusmai nia mós mate. Tanbasá mak buat hanesan neʼe bele akontese? Esperansa bele duni sai nuʼudar forsa hanesan buat neʼebé ema balu fiar ka lae?
Matenek-naʼin barak kona-ba médiku mak dehan katak hanoin pozitivu no esperansa iha impaktu neʼebé boot ba ema nia moris no saúde. Maibé, laʼós ema hotu mak iha hanoin hanesan neʼe. Matenek-naʼin balu la aseita ho ideia sira hanesan neʼe no hanoin katak neʼe mak nuʼudar istória deʼit, laʼós liuhusi peskiza. Sira fiar katak ema hetan moras tan deʼit razaun fíziku nian.
Laʼós foin daudauk mak ema iha hanoin hanesan neʼe. Iha tempu antigu, ema husu matenek-naʼin husi Grésia naran Aristóteles kona-ba esperansa mak saida. Nia dehan: “Neʼe hanesan mehi deʼit.” No tinan barak liubá, ema boot ida husi Amérika naran Benjamin Franklin mós hatete: “Ema neʼebé moris ho esperansa sei mate la ho esperansa”.
Se nuneʼe, saida mak lia-loos kona-ba esperansa? Neʼe mak hanesan mehi deʼit neʼebé ema barak uza atu halo sira sente kontente ho buat neʼebé laʼós realidade ka lae? Ka iha razaun forte neʼebé hatudu katak esperansa mak buat neʼebé ita hotu presiza ba ita-nia saúde no ksolok, no buat neʼebé iha fundasaun metin no lori benefísiu?