Vizita ba rai-Kamaroins

KARIK ema baka, ka pigmeu, mak ema primeiru neʼebé hela iha rai-Kamaroins. Tuirmai, iha tinan maizumenus 1500, ema portugés sira tama ba rai neʼe. Depois, tinan atus balu liutiha neʼe, ema fulani sira neʼebé tuir relijiaun Islám, manán no okupa rai-Kamaroins nia parte norte. Ohin loron, porsentu 40 husi ema neʼebé hela iha rai-Kamaroins mak bolu an nuʼudar kristaun. Porsentu 20 mak tuir relijiaun Islám, no porsentu 40 seluk mak tuir afrikanu sira-nia relijiaun.

Ema sira neʼebé hela iha área rurál mak ema neʼebé laran-luak. Kuandu bainaka mai, sira kumprimenta no konvida sira tama iha sira-nia uma. Sira mós prepara hahán no bee ba sira-nia bainaka. Se bainaka simu sira-nia laran-luak neʼe, neʼe halo sira kontente tebes. Maibé se bainaka la simu, sira haree ida-neʼe nuʼudar hahalok la hatudu respeitu.

Baibain kuandu Ita atu koʼalia ho sira, Ita hahú hodi kumprimenta sira-nia família hotu, no husu se sira hotu diʼak ka lae. Bele mós husu kona-ba sira-nia animál. Mane ida husi rai-Kamaroins, naran Joseph hatete: “Kuandu bainaka atu fila ona, la toʼo atu dehan, ‘Adeus’. Baibain, uma-naʼin laʼo hamaluk ninia bainaka nuʼudar ninia bainaka atu fila uma, no nuʼudar sira laʼo, sira kontinua koʼalia hamutuk. Liutiha tempu uitoan, uma-naʼin sei fó adeus ba nia bainaka no depois nia fila fali ba uma. Se uma-naʼin la halo ida-neʼe ba nia bainaka, bainaka bele sente katak uma-naʼin ladún hafolin nia.”

Kuandu han hamutuk, dala ruma ema balu neʼebé kolega diʼak han hamutuk iha bikan ida deʼit, dala ruma sira mós uza liman deʼit. Iha rai-Kamaroins, toman neʼe mak símbolu kona-ba unidade. Tuir loloos, dala ruma ema halo ida-neʼe se sira hakarak atu hadiʼa sira-nia relasaun ho ema seluk. Kuandu sira han hamutuk iha bikan ida deʼit, neʼe hanesan sira dehan ba malu: “Agora ita hadame malu ona.”