Haboot oan ne’ebé laran-di’ak iha mundu ne’ebé ema hanoin an de’it

LORON-LORON ema iha oportunidade barak atu hatudu laran-diʼak ba ema seluk. Maski nuneʼe, ema barak hanoin deʼit sira-nia an rasik. Ita haree ida-neʼe akontese iha fatin hotu. Porezemplu, ema la moe atu bosok no bobar lia ba ema seluk, ema neʼebé lori karreta hanoin deʼit sira-nia an hodi hakarak atu buka uluk deʼit, ema balu tolok, no seluk la bele kontrola hirus.

Ida-neʼe mós akontese iha família laran. Porezemplu, kaben-naʼin balu soe sira-nia kaben tan deʼit sira sente katak sira merese atu hetan fali kaben seluk neʼebé diʼak liu. Maski inan-aman balu ladún hatene, maibé dala ruma sira mós kuda iha sira-nia oan nia laran hahalok hanoin an deʼit. Oinsá? Hodi fó buat hotu neʼebé oan hakarak, no nunka fó dixiplina ba sira.

Maski nuneʼe, inan-aman barak fó treinu ba sira-nia oan atu hanoin uluk kona-ba ema seluk nia diʼak duké sira-nia an rasik. No ida-neʼe lori buat diʼak ba sira. Labarik sira neʼebé iha toman atu hatudu laran-diʼak ba ema seluk, sira sei kontente liu no bele hetan kolega barak neʼebé diʼak. Tanbasá? Tanba Bíblia hatete: “Diʼak liu fó liu fali simu.”—Apostolu 20:35.

Se Ita mak inan ka aman, oinsá mak Ita bele ajuda Ita-nia oan atu hatudu laran-diʼak ba ema seluk, no atu ema barak nia hahalok hanoin an deʼit labele kona sira? Hanoin toʼok kona-ba buat tolu tuirmai neʼe neʼebé bele book Ita-nia oan atu haburas hahalok hanoin an deʼit, no haree saida mak Ita bele halo atu sees husi buat hirak-neʼe.

1 Gaba demais

Problema. Ohin loron, joven barak komesa serbisu hodi hanoin katak sira sei hetan susesu, maski sira la hakaʼas an. Joven seluk hanoin katak sira sei simu pozisaun neʼebé aas iha sira-nia serbisu, maski sira seidauk hatene oinsá atu halo serbisu neʼe ho didiʼak. Joven seluk tan hanoin katak sira mak ema espesiál liu no merese atu ema seluk haree sira nuʼudar ema neʼebé importante, no kuandu ema seluk la haree sira hanesan neʼe, sira sai laran-kanek.

Oinsá mak problema neʼe mosu? Dala ruma, ema bele hanoin liu kona-ba ninia an deʼit tanba dalan neʼebé nia inan-aman haboot nia. Porezemplu, husi tinan balu liubá, ema komesa hanoin katak inan-aman sira tenke gaba sira-nia oan atu oan neʼe bele sente diʼak. Maibé inan-aman balu halo ida-neʼe demais liu. Ema balu hanoin katak se gaba uitoan labarik mak diʼak ba nia, entaun gaba nia beibeik mak diʼak liu fali. No sira la bele duni hirus ba sira-nia oan maski hirus uitoan deʼit, selae neʼe sei halo oan laran-tun. No se oan sira sai laran-tun, neʼe sei halo ema hanoin katak Ita mak inan ka aman neʼebé la diʼak. Tan neʼe, inan-aman sira hakaʼas an tebes atu la halo sira-nia oan sente la diʼak kona-ba sira-nia an.

Tanba ema nia hanoin hanesan neʼe, halo inan-aman sira mós komesa atu gaba hela deʼit sira-nia oan. Maski oan la halo buat ruma ka halo buat kiʼik deʼit neʼebé diʼak, maibé inan-aman gaba nia demais. Maibé iha parte seluk, inan-aman la halo buat ida kuandu sira-nia oan halo sala neʼebé boot. Inan-aman sira-neʼe hanoin katak, atu oan bele sente fiar-an, inan-aman presiza husik deʼit kuandu oan halo sala, no gaba oan neʼe iha tempu hotu. Inan-aman sira hanoin katak ida-neʼe importante liu fali duké hanorin oan atu halo rasik buat ruma neʼebé diʼak, hodi sira bele sente diʼak ho sira rasik nia hahalok neʼebé loos.

Saida mak Bíblia hatete? Bíblia apoia katak kuandu oan halo buat ruma neʼebé diʼak tebes, diʼak atu gaba sira. (Mateus 25:19-21) Maibé se gaba oan tan deʼit ita hakarak halo sira sente diʼak, karik neʼe sei halo sira atu iha hanoin neʼebé laloos kona-ba sira-nia an. Bíblia hatete ho klaru: “Ema ida hanoin karik katak nia ema-boot, wainhira loloos nia folin la iha, nia bosok deʼit nia an.” (Galasia 6:3) Ho razaun neʼebé diʼak, Bíblia hatete ba inan-aman sira: “Keta dada an atu fó dixiplina ba Ita-nia oan. Maski Ita baku nia ho ai-sanak, nia sei la mate.”a—Provérbios (Amsal) 23:13.

Saida mak Ita bele halo? Fó dixiplina ba Ita-nia oan kuandu presiza, no gaba nia se nia halo duni buat ruma neʼebé diʼak. Labele gaba Ita-nia oan tan deʼit Ita hakarak nia atu sente diʼak kona-ba ninia an. Tanba halo hanesan neʼe sei la ajuda duni nia. Livru ida (Generation Me) hatete katak atu labarik bele sente fiar-an neʼebé loos, nia presiza atu aprende liután no haburas ninia matenek ruma. Se ema sempre dehan ba nia katak nia mak ema importante maski la iha razaun ruma, neʼe sei la ajuda nia atu sente fiar-an.

“Keta hanoin katak imi an di’ak liu fali buat ne’ebé loos; maibé hanoin loloos.”—Roma 12:3

2 Proteje demais

Problema. Joven barak mak komesa serbisu maski sira seidauk prontu atu hasoru problema sira neʼebé mosu. Maski ema kritika sira uitoan deʼit, maibé neʼe halo joven balu laran-tun tebes. Joven seluk hakarak simu deʼit serbisu neʼebé sira rasik gosta. Porezemplu, iha livru ida (Escaping the Endless Adolescence), Dr. Joseph Allen koʼalia kona-ba joven ida neʼebé nia halo entrevista atu serbisu, joven neʼe hatete ba nia: “Haʼu rona katak parte balu iha serbisu neʼe halo ita sai baruk, maibé haʼu lakohi duni atu sai baruk.” Dr. Allen hakerek: “Joven neʼe la komprende katak serbisu hotu iha parte balu neʼebé sei halo ita sai baruk. Oinsá mak nia tinan 23 ona, maibé nia seidauk hatene kona-ba neʼe?”

Oinsá mak problema neʼe mosu? Husi tinan balu liubá, inan-aman barak sente katak sira presiza proteje sira-nia oan husi susar naran deʼit neʼebé oan hasoru, maski neʼe mak kiʼik deʼit. Porezemplu, se oan la liu ezame, inan-aman balu bá koʼalia ho mestre ka mestra atu husu fó nafatin ba sira-nia oan valór neʼebé diʼak. Se oan estraga ema nia sasán ruma, inan-aman mak selu fali. No, se oan para ona ho nia namora, inan-aman balu hatete ba oan katak laʼós nia mak halo sala maibé duun deʼit ba ninia namora.

Maski inan-aman hotu hakarak proteje sira-nia oan, maibé se Ita proteje sira demais, neʼe hanesan Ita dehan ba sira katak sira la presiza simu responsabilidade ba sira-nia hahalok. Livru ida (Positive Discipline for Teenagers) hatete katak, kuandu inan-aman mak halo deʼit buat hotu ba sira-nia oan, oan joven sira la bele aprende oinsá atu tahan hasoru situasaun susar. Tuir loloos, oan joven sira sei sai ema neʼebé hanoin an deʼit no hakarak sira-nia inan-aman no mós ema hotu atu fó buat neʼebé sira hakarak.

Saida mak Bíblia hatete? Ema hotu hasoru susar iha sira-nia moris. Tuir loloos, Bíblia hatete: “Tempu no akontesimentu neʼebé mosu derrepente deʼit, kona ema hotu.” (Eclesiastes [Pengkhotbah] 9:11) Neʼe inklui mós ema diʼak sira. Porezemplu, apóstolu Paulo hasoru susar oioin nuʼudar nia halaʼo serbisu haklaken. Maibé, hodi tahan hasoru susar hirak-neʼe, neʼe lori buat diʼak ba nia. Nia hatete: “Haʼu hatene moris ho sasán neʼebé haʼu iha. . . . Haʼu hanorin tiha haʼu-nia an atu moris ho rua neʼe: hamlaha eh bosu; iha sasán waʼin eh iha sasán uitoan deʼit.”—Filipe 4:11, 12.

Saida mak Ita bele halo? Hodi hanoin kona-ba buat neʼebé Ita-nia oan bele halo no la bele halo, hakaʼas an atu halo tuir Bíblia nia matadalan iha Galasia 6:5 neʼebé hatete: “Ida-ida sei lori nia todan rasik.” Se Ita-nia oan estraga ema seluk nia sasán, karik diʼak liu atu haruka nia selu ho ninia osan rasik. Se Ita-nia oan la liu ezame, karik ida-neʼe hatudu katak nia tenke hakaʼas an no prepara an didiʼak ba ninia ezame tuirmai. Se Ita-nia oan para ona ho nia namora, diʼak atu fó kmaan ba nia. Maibé iha tempu neʼebé diʼak, ajuda nia atu hanoin kona-ba pergunta hanesan neʼe: “Haʼu-nia esperiénsia neʼe hatudu katak haʼu presiza hadiʼa haʼu-nia hahalok ruma ka lae?” Kuandu inan-aman la proteje demais sira-nia oan no husik sira atu hakaʼas an rezolve sira-nia problema rasik, neʼe sei hametin sira no ajuda sira atu sente fiar-an.

“Ema ida-ida haree nia hahalok bá. Nia hahalok di’ak karik, nia bele gaba an.”—Galasia 6:4

3 Fó sasán barak demais

Problema. Kuandu iha entrevista ho joven balu, porsentu 81 mak fiar katak ‘atu sai riku’ mak importante liu fali duké ajuda ema seluk. Maibé, hakaʼas an atu hetan sasán no osan barak, la fó kontente neʼebé loos. Tuir loloos, relatóriu hatudu katak ema neʼebé buka deʼit sasán no osan, sira iha moris neʼebé ladún kontente, estrese liu, no fasil ba sira atu hetan moras.

Oinsá mak problema neʼe mosu? Joven balu, moris iha família neʼebé hakarak iha rikusoin barak. Livru ida (The Narcissism Epidemic) hatete: “Inan-aman hakarak halo sira-nia oan kontente, no oan sira hakarak iha sasán barak. Tan neʼe, inan-aman sira sosa sasán ba sira-nia oan. No sasán neʼe halo duni oan kontente, maibé ba tempu uitoan deʼit. Tuirmai, sira hakarak fali sasán seluk tan.”

Ita bele haree katak sira neʼebé halo iklan halo neʼe ho didiʼak, hodi nuneʼe book joven sira atu sosa sasán neʼebé sira hatudu. Iklan sira fó ideia hanesan neʼe: ‘Ita merese atu hetan sasán neʼebé jeitu liu hotu.’ Joven barak simu ideia neʼe no agora sira debe osan barak, tanba sira la bele selu buat neʼebé sira hanoin sira “merese atu hetan”.

Saida mak Bíblia hatete? Bíblia rekoñese katak ita ema presiza duni osan. (Eclesiastes 7:12) Maibé, Bíblia mós fó avizu kona-ba neʼe dehan: “Domin ba osan mak buat aat hotu nia hun; iha ema balun neʼebé, tan tuir nia, . . . fó ba sira-nia [an] kanek boot oioin.” (1 Timoteo 6:10) Bíblia fó-hatene mai ita katak diʼak atu ita kontente ona ho sasán sira neʼebé ita iha, laʼós atu uza ita-nia moris hodi buka sasán no osan deʼit.—1 Timoteo 6:7, 8.

“Ema ne’ebé hakarak sai riku hetan babeur barak; sira hetan sira an ho hakarak beik no perigozu oioin.”—1 Timoteo 6:9

Saida mak Ita bele halo? Nuʼudar inan-aman, Ita presiza haree didiʼak Ita-nia hanoin kona-ba osan no buat neʼebé bele sosa ho osan. Hanoin nafatin kona-ba buat neʼebé importante liu, no ajuda Ita-nia oan mós atu hanoin hanesan neʼe. Livru neʼebé temi ona uluk (The Narcissism Epidemic) hatutan tan: “Inan-aman no oan sira bele koʼalia hamutuk kona-ba sasán no osan, no bele hanoin, ‘Bainhira mak diʼak atu sosa sasán sira neʼebé iha diskon? Maibé bainhira mak ladiʼak atu sosa sasán sira hanesan neʼe?’ . . . ‘Uluk Ita sosa sasán ruma tan deʼit ema seluk dehan katak Ita tenke sosa ida-neʼe ka lae?’”

Kuidadu atu la fó deʼit sasán sira hodi rezolve problema iha família laran. Livru ida (The Price of Privilege) hatete katak kuandu ita uza sasán nuʼudar dalan atu rezolve problema, neʼe sei la ajuda duni. Problema sira presiza rezolve hodi uza matenek no hanoin didiʼak, laʼós hodi fó deʼit sasán sira.