1 Laran-metin

NEʼE KATAK SÁ

Feen no laʼen neʼebé laran-metin ba malu haree sira-nia moris kaben nuʼudar relasaun neʼebé permanente, no neʼe halo sira sente seguru. Sira fiar katak maski hasoru susar, sira-nia pár sei laran-metin nafatin ba juramentu kaben nian.

Kaben-naʼin balu hamutuk nafatin tan deʼit atu halo família ka kolega sira kontente. Maibé diʼak liu haburas sentimentu laran-metin ho respeitu no domin atu bele moris hamutuk.

BÍBLIA NIA PRINSÍPIU: “Laʼen ida labele husik ninia feen.”​—1 Korinto 7:11.

“Se Ita hakarak laran-metin ba malu, labele sente an lalais. Husu deskulpa no fó perdua ba malu. Ita labele halo problema kiʼik sai fali problema boot toʼo sai razaun atu soe-malu.”​—Micah.

TANBASÁ IMPORTANTE

Bainhira hasoru problema, feen-laʼen neʼebé la laran-metin ba malu sei hanoin kedas: ‘Ita labele ona moris hamutuk’ no buka dalan atu soe-malu.

“Ema barak neʼebé deside atu kaben hanoin katak sira bele soe-malu deʼit se sira-nia moris kaben la kontente ona. Se ema hahú moris kaben nian ho hanoin hanesan neʼe, susar ba sira atu hatudu laran-metin ba malu.”​—Jean.

SAIDA MAK ITA BELE HALO

HUSU BA ITA-NIA AN

Bainhira diskute malu . . .

• Haʼu arrepende tanba kaben ho nia ka lae?

• Haʼu imajina kona-ba kaben fali ho ema seluk ka lae?

• Haʼu koʼalia liafuan sira hanesan: “Haʼu sei husik ó” ka “Haʼu sei buka fali ema seluk”?

Se Ita hatán sin ba pergunta ida ka liu, neʼe katak Ita presiza haburas laran-metin ba malu.

KOʼALIA HO ITA-NIA KABEN

• Ita-nia domin no respeitu ba malu sai menus ka lae? Se nuneʼe, tanbasá?

• Saida deʼit mak ita bele halo atu haburas ita-nia laran-metin ba malu?

SUJESTAUN

• Koko buat foun hodi hakerek liafuan domin ba Ita-nia kaben

• Hatudu katak Ita laran-metin hodi tau Ita-nia kaben nia foto iha meza serbisu

• Telefone Ita-nia kaben loron-loron bainhira Ita iha serbisu-fatin ka la hamutuk

BÍBLIA NIA PRINSÍPIU: “Buat neʼebé Maromak tau hamutuk, ema keta haketak.”​—Mateus 19:6.