Tuda fatuk ba Estevão

MANE neʼebé hakneʼak iha neʼe mak Estevão. Nia mak dixípulu ida neʼebé laran-metin ba Jesus. Maibé, haree toʼok saida mak akontese daudauk agora! Ema sira-neʼe tuda nia ho fatuk boot. Tansá mak sira odi Estevão toʼo halo buat aat hanesan neʼe? Mai ita haree hamutuk.

Maromak ajuda Estevão atu halo milagre furak tebes. Ema sira-neʼe la gosta ida-neʼe, no sira diskute ho nia kona-ba lia-loos neʼebé nia hanorin ba ema. Maibé, Maromak fó matenek boot ba Estevão, no Estevão hatudu katak ema sira-neʼe mak hanorin buat neʼebé falsu. Ida-neʼe halo sira hirus liután. Nuneʼe, sira kaer nia, no bolu ema mai atu koʼalia bosok kona-ba nia.

Amlulik boot husu ba Estevão: ‘Buat sira-neʼe loos ka lae?’ Estevão hatán hodi fó diskursu kapás husi Bíblia. Ikusliu, nia hatete katak tempu uluk kedas ema aat sira odi Jeová nia profeta sira. Tuirmai, nia hatete: ‘Imi hanesan deʼit ho ema aat sira-neʼe. Imi oho Maromak nia atan Jesus, no la halo tuir Maromak nia ukun-fuan.’

Naʼi-ulun relijiaun sira sai hirus tebetebes! Sira ruun nehan tan laran-hirus. Maibé, hafoin Estevão foti ninia ulun no hatete: ‘Haree bá! Haʼu haree Jesus hamriik iha Maromak nia sorin loos iha lalehan.’ Rona tiha neʼe, ema sira-neʼe taka sira-nia tilun ho liman, no duni Estevão. Sira kaer no dada nia sai husi sidade.

Iha neʼe, sira hasai sira-nia hatais liʼur no fó mane ida naran Saulo atu hein. Ó haree Saulo ka lae? Tuirmai, ema balu hahú tuda Estevão. Hanesan ó haree, Estevão hakneʼak no harohan ba Maromak: ‘Jeová, keta kastigu sira tan sira-nia hahalok aat.’ Nia hatene katak sira balu halo hanesan neʼe tanba naʼi-ulun relijiaun sira mak lohi. Hafoin Estevão mate.

Kuandu ema halo aat ruma ba ó: Ó koko atu halo aat fali ba sira? Ó husu Maromak atu halo aat ba sira? Neʼe laʼós buat neʼebé Estevão no Jesus halo. Sira laran-diʼak maski ema trata aat ba sira. Mai ita banati-tuir sira-nia ezemplu. Dezeñu iha pájina tomak