Rekoñese Kristu nia pozisaun iha Maromak nia arranju

“HORIULUK kedas Maromak kria lalehan no rai”, no buat hotu neʼebé nia halo mak “diʼak tebes”. (Gén 1:1, 31) Jeová kria ema ho futuru neʼebé furak tebes. Maibé, bainhira ema kontra Maromak iha jardín Eden, neʼe halakon moris neʼebé kontente. Maski nuneʼe, Jeová nia hakarak ba mundu no ba ema la troka. Maromak fó sai katak Adão nia oan no bei-oan sira neʼebé halo tuir Maromak sei hetan salvasaun. Ema sei halaʼo fali adorasaun neʼebé loos, no Maromak sei halakon aat-naʼin hamutuk ho ninia hahalok aat hotu. (Gén 3:15) Iha tempu neʼebá, buat hotu sei sai “diʼak tebes” hanesan uluk. Jeová sei kumpre ida-neʼe liuhusi ninia Oan-Mane, Jesus Kristu. (1 João 3:8) Tan neʼe, importante tebes ba ita atu rekoñese Kristu nia pozisaun iha Maromak nia arranju.​—Após 4:12; Flp 2:9, 11.

KRISTU NIA KNAAR MAK SAIDA?

² Kuandu ita hanoin kona-ba Kristu nia pozisaun iha Maromak nia arranju, ita rekoñese katak Kristu iha knaar oioin. Kristu Jesus sai nuʼudar ema nia Salvadór, Amlulik Boot, Ulun ba kongregasaun Kristaun, no agora nia mós sai nuʼudar Liurai ba Maromak nia Ukun. Kuandu ita medita kona-ba knaar sira-neʼe, ida-neʼe bele halo ita hafolin liután Maromak nia arranju no haburas liután ita-nia domin ba Kristu Jesus. Bíblia esplika kona-ba knaar balu neʼebé nia halo.

³ Bainhira Kristu haklaken iha rai, ema komesa komprende katak só liuhusi nia deʼit mak ema bele hadame malu fali ho Maromak. (João 14:6) Nuʼudar Salvadór, Jesus fó ninia moris rasik hodi sosa fali ema barak. (Mt 20:28) Entaun, Jesus laʼós deʼit hatudu ezemplu diʼak kona-ba oinsá atu hatudu hahalok diʼak, maibé nia mós iha pozisaun neʼebé importante tebes atu kumpre Jeová nia hakarak ba ema. Liuhusi nia deʼit mak ita bele iha fali relasaun diʼak ho Maromak Jeová. (Após 5:31; 2 Kor 5:18, 19) Jesus nia mate no moris-hiʼas loke dalan ba ema hotu neʼebé halo tuir Maromak atu hetan bensaun ba nafatin liuhusi Maromak nia Ukun iha lalehan.

⁴ Nuʼudar Amlulik Boot, Jesus bele ‘hanoin no komprende ema nia fraku sira’ no nia fó ninia moris atu hamoos ema laran-metin sira-nia sala. Apóstolu Paulo esplika: “Ita iha amlulik boot neʼebé hanoin no komprende ita-nia fraku sira, tanba nia hetan ona koko iha buat hotu hanesan ita, maibé nia la iha sala.” Paulo mós anima ema neʼebé tau fiar ba Jesus Kristu atu hafolin arranju atu hadame malu fali ho Maromak. Paulo dehan: “Tan neʼe, mai ita hakbesik ba Maromak nia kadunan, Maromak neʼebé hatudu laran-diʼak neʼebé boot no mai ita halo orasaun hodi koʼalia nakloke, atu nuneʼe ita bele simu laran-sadiʼa no hetan ajuda iha tempu neʼebé loloos liuhusi Maromak nia laran-diʼak neʼebé boot.”​—Ebr 4:14-16; 1 João 2:2.

⁵ Jesus mós serbí nuʼudar Ulun ba kongregasaun Kristaun. Hanesan ninia dixípulu sira iha tempu uluk, ohin loron ita mós la presiza ema ida atu sai ita-nia ulun-naʼin. Jesus dirije ita liuhusi espíritu santu no mós liuhusi katuas sira neʼebé serbí nuʼudar bibi-atan. Mane sira-neʼe tenke hatán ba Jesus no mós ninia Aman iha lalehan kona-ba dalan neʼebé sira tau matan ba Maromak nia bibi sira. (Ebr 13:17; 1 Ped 5:2, 3) Jeová fó sai profesia kona-ba Jesus, hodi dehan: “Haree bá! Haʼu foti nia nuʼudar sasin ba nasaun sira, nuʼudar ulun-naʼin no ukun-naʼin ba nasaun sira.” (Isa 55:4) Jesus mós apoia profesia neʼe, hodi dehan: “Keta husik ema bolu imi ulun-naʼin, tanba imi-nia Ulun-Naʼin ida deʼit, neʼe mak Kristu.”​—Mt 23:10.

⁶ Jesus hanoin no hakarak ajuda ita, tan neʼe nia konvida ita: “Mai besik haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. Lori haʼu-nia ai-leba no aprende husi haʼu, tanba haʼu laran-maus no haraik an, no imi sei sente kmaan. Tanba haʼu-nia ai-leba fasil atu lori, no haʼu-nia naha kmaan.” (Mt 11:28-30) Tanba Jesus Kristu dirije no tau matan ba kongregasaun Kristaun ho laran-maus no iha dalan neʼebé fó kmaan mai ita, ida-neʼe hatudu duni katak nia mak “bibi-atan diʼak” neʼebé banati-tuir ninia Aman iha lalehan, Maromak Jeová.​—João 10:11; Isa 40:11.

⁷ Iha apóstolu Paulo nia karta primeiru ba ema Korinto, nia esplika kona-ba Jesus nia knaar ida tan, hodi dehan: “Nia tenke ukun nuʼudar liurai toʼo Maromak tau ona ninia inimigu hotu iha nia ain okos. Maibé bainhira Maromak halo ona buat hotu hakruʼuk ba ninia Oan-Mane, tuirmai Oan-Mane rasik mós sei hakruʼuk ba Maromak neʼebé halo buat hotu hakruʼuk ba nia, nuneʼe Maromak sei sai Ukun-Naʼin ba buat hotu.” (1 Kor 15:25, 28) Jesus mak Maromak nia kriasaun primeiru. Antes Jesus mai rai, nia halo serbisu nuʼudar Maromak nia “badaen neʼebé matenek”. (Prov 8:22-31) Kuandu Jesus iha rai, nia sempre halo tuir Maromak nia hakarak. Nia tahan tentasaun boot no laran-metin ba ninia Aman toʼo mate. (João 4:34; 15:10) Tan neʼe, Maromak halo ninia Oan-Mane moris-hiʼas ba lalehan no fó ba nia direitu atu sai Liurai ba Maromak nia Ukun. (Após 2:32-36) Nuʼudar Liurai, Kristu Jesus hetan knaar espesiál husi Maromak atu dirije anju rihun ba rihun neʼebé forsa boot hodi halakon ema nia ukun no hamoos buat aat hotu husi mundu neʼe. (Prov 2:21, 22; 2 Tes 1:6-9; Apok 19:11-21; 20:1-3) Iha tempu neʼebá, Maromak nia Ukun mesak deʼit ho Kristu nuʼudar Liurai mak sei ukun mundu tomak.​—Apok 11:15.

OINSÁ ATU REKOÑESE KRISTU NIA POZISAUN?

⁸ Jesus Kristu hatudu ezemplu neʼebé perfeitu ba ita. Maromak fó knaar ba nia atu tau matan ita. Nia hadomi ita no prontu atu ajuda ita. Maibé atu hetan benefísiu, ita presiza laran-metin nafatin ba Jeová no kontinua laʼo hamutuk ho ninia organizasaun.

⁹ Iha apóstolu sira-nia tempu, Jesus nia dixípulu sira rekoñese Kristu nia pozisaun iha Maromak nia arranju. Sira halo nuneʼe liuhusi serbisu hamutuk ho unidade no halo tuir Kristu nuʼudar sira-nia Ulun-Naʼin. Sira mós halo tuir Kristu nia matadalan neʼebé sira simu liuhusi espíritu santu. (Após 15:12-21) Apóstolu Paulo temi kona-ba unidade neʼe iha kongregasaun Kristaun, hodi dehan: “Koʼalia lia-loos no hatudu domin, atu nuneʼe ita bele sai boot iha buat hotu hodi sai hanesan Kristu, ita-nia ulun. Liuhusi nia mak parte ida-idak iha isin-lolon tomak tutan hamutuk ho didiʼak no apoia malu hodi fó buat neʼebé isin presiza. Kuandu parte ida-idak halo ninia serbisu ho loloos, ida-neʼe ajuda isin-lolon atu sai boot hodi isin-lolon tomak sai metin iha domin.”​—Éf 4:15, 16.

¹⁰ Bainhira ita hotu iha kongregasaun serbisu hamutuk no apoia Kristu nuʼudar Ulun, ita hotu sei sai maduru liu no hatudu domin ba malu. Domin mak “kesi ita hamutuk iha dalan neʼebé perfeitu”.​—João 10:16; Kol 3:14; 1 Kor 12:14-26.

¹¹ Akontesimentu sira iha mundu kumpre Bíblia nia profesia sira no neʼe hatudu ho klaru katak husi tinan 1914, Jesus Kristu simu ona podér nuʼudar Liurai ba Maromak nia Ukun. Agora daudaun, Jesus ukun iha ninia inimigu sira-nia leet. (Sal 2:1-12; 110:1, 2) Neʼe katak sá ba ema iha rai? Lakleur tan, Jesus sei kumpre ninia knaar nuʼudar Liurai ba liurai sira no Naʼi ba naʼi sira bainhira nia halaʼo Maromak nia tesi-lia ba ninia inimigu sira. (Apok 11:15; 12:10; 19:16) Tuirmai, Jeová sei salva ema neʼebé hamriik iha Kristu nia liman-loos, hodi tuir ninia promesa neʼebé nia fó sai iha tempu uluk bainhira ema kontra hasoru nia. (Mt 25:34) Ita hotu kontente tebes tanba rekoñese Kristu nia pozisaun iha Maromak nia arranju! Mai ita hotu kontinua halaʼo serbisu haklaken iha mundu tomak ho unidade hodi halo tuir Kristu nuʼudar ita-nia Ulun-Naʼin iha loron ikus sira-neʼe.