Marsu

Katuas sira neʼebé hanoin ba futuru hakarak hakaʼas an atu uza sira-nia esperiénsia hodi hanorin fali irmaun joven sira. (Sal 71:17, 18) Katuas sira neʼebé fó treinu ba ema seluk sai hanesan bensaun ida ba Jeová nia bibi. Tanba hodi halo hanesan neʼe mak sira hametin kongregasaun. Treinu neʼebé sira fó ba irmaun seluk bele halo irmaun sira-neʼe prontu atu ajuda kongregasaun ohin loron hodi mantein unidade no serbí Jeová ho laran-metin. Liuliu durante tempu susar neʼebé atu mosu mai iha tempu terus boot nian. (Eze 38:10-12; Miq 5:5, 6) Tan neʼe, irmaun katuas doben sira, ami husu ba imi komesa agora ona atu gasta tempu hodi fó treinu ba ema seluk. Ami komprende katak imi-nia oráriu nakonu ona ho atividade importante sira husi kongregasaun. Karik imi presiza fahe uitoan tempu husi halaʼo atividade importante sira-neʼe hodi uza fali ba treinu ema seluk. (Ecle 3:1) Fó treinu ba ema seluk hanesan deʼit ho rai osan iha banku, no treinu neʼe sei sai buat diʼak ida ba kongregasaun tomak iha futuru. w15 15/4 1:8-10

Ita hatene katak Bíblia mak Maromak nia liafuan ba ema hotu. Maibé Bíblia bele ajuda ita ida-idak atu hakbesik ba Maromak Jeová ka lae? Bele! Bainhira ita lee no estuda Bíblia beibeik, ita presiza husu ba ita-nia an: ‘Haʼu sente oinsá kona-ba buat neʼebé haʼu lee? Oinsá mak haʼu rasik bele halo tuir liafuan neʼe iha haʼu-nia moris?’ Se ita halo buat hotu neʼe, neʼe katak ita husik Jeová mak koʼalia ba ita. Nuneʼe, ita sei sente besik liután ba Jeová nuʼudar ita-nia Belun diʼak neʼebé sempre ajuda ita. (Ebr 4:12; Tgo 1:23-25) Porezemplu, bainhira ita lee Jesus nia liafuan: “Keta haloot ba ó-nia an rikusoin iha rai,” ita sente oinsá? Se ita mak hakaʼas an daudauk atu tau uluk Jeová iha ita-nia moris, ita bele sente katak nia sei kontente ho ita no gaba ita. Maibé se ita sente katak ita presiza halo ita-nia moris simples no hakaʼas an liután atu serbí Maromak Jeová, neʼe katak Jeová mak fó-hatene ita kona-ba buat neʼebé ita presiza halo atubele hakbesik liután ba nia.—Mt 6:19, 20. w15 15/4 3:3-5

Hanesan ho Paulo, ita mós simu knaar atu haklaken “liafuan diʼak” no Jeová haree ita hotu nuʼudar ninia “maluk serbisu-naʼin”. (1 Tes 2:4; 1 Kor 3:9) Tan neʼe, se ita kontinua halaʼo ita-nia knaar neʼe ho badinas, ita bele fiar metin katak Jeová sei fó ba ita buat hotu neʼebé ita presiza. (Mt 6:33) No ida-neʼe sei halo ita sente laran-hakmatek nuʼudar ita hein ba Jeová atu hatán ba ita-nia orasaun. Mai ita hotu uza ita-nia tempu ohin loron atu hametin ita-nia relasaun diʼak ho Maromak Jeová. Se susar ruma kona ita no halo ita sente laran-susar, haree ida-neʼe nuʼudar oportunidade atu hakbesik liután ba Jeová. Mai ita lee no estuda Maromak nia Liafuan no hanoin didiʼak kona-ba buat neʼebé ita lee. Kontinua halo orasaun ba Jeová no haklaken ho badinas bá. Se ita halo buat hirak-neʼe hotu, ita bele fiar duni katak Jeová sei ajuda ita atu tahan susar saida deʼit neʼebé kona ita ohin loron no mós iha futuru. w15 15/4 4:17, 18

Se ita mak foti-an no la gosta ka sente katak ita mak diʼak liu ema seluk, neʼe bele halo ita koʼalia ka halo buat ruma ba ema hodi hakanek sira. Se ida-neʼe mak akontese iha kongregasaun laran, kongregasaun nia dame mós bele lakon. (Prov 12:18) Se ita sente katak ita mak diʼak liu ema seluk, diʼak atu hanoin-hetan katak “Jeová odi tebes ema neʼebé foti-an”. (Prov 16:5) Tan neʼe mak diʼak atu haree fali ita-nia an oinsá mak ita hanoin ka sente kona-ba ema seluk. Husu ba ita-nia an: ‘Haʼu hanoin ka sente katak haʼu-nia rasa, nasaun, ka kultura mak diʼak liu ema hotu nian ka lae?’ Se ita mak iha sentimentu hanesan neʼe, karik ita tenke hanoin-hetan katak ‘husi ema ida deʼit mak Maromak halo nasaun hotu’. (Após 17:26) Ita bele hatete katak ema hotu mak rasa ida deʼit tanba ema hotu mai husi Adão, ita hotu nia beiʼala. Tan neʼe, beik atu hanoin katak rasa ida diʼak ka aas liu fali rasa seluk. Tanba Satanás hakarak aproveita atu uza ita-nia rasa hodi estraga ita ema kristaun nia domin no unidade. (João 13:35) Atu bele luta manán hasoru Satanás, ita tenkesér luta mós atu la bele foti-an.—Prov 16:18. w15 15/5 2:8, 9

Ita kontente tanba Jeová promete katak ema kose-mina sira sei simu bensaun atu moris la bele mate tan iha lalehan, no “bibi seluk” sei moris ba nafatin iha rai. (João 10:16; 17:3; 1 Kor 15:53) Maski nuneʼe, Jeová komprende nafatin kona-ba ita-nia sentimentu bainhira ita hasoru susar ruma iha ita-nia moris ohin loron. Hanesan iha tempu uluk, bainhira Jeová haree ema Izraél moris terus iha rai-Ejitu, “ninia laran susar tebes”. (Isa 63:9) No bainhira ema judeu sira harii hela templu, inimigu sira kontra makaʼas sira no sira sai taʼuk tebes. Jeová komprende ka lae kona-ba sira-nia sentimentu neʼe? Maromak fó-hatene ba sira: “Sé deʼit neʼebé mak book imi book haʼu-nia matan-fuan.” (Zac 2:8) Hanesan ho inan nia domin ba ninia bebé, Jeová mós iha domin hanesan neʼe ba ninia povu no nia hakarak tebes atu ajuda sira. (Isa 49:15) Se ita komprende kona-ba ema nia sentimentu bainhira sira hasoru hela situasaun ruma, neʼe hatudu katak Ita mós banati-tuir Jeová nia domin.—Sal 103:13, 14. w15 15/5 4:2

Jesus koʼalia hanesan neʼe tanba ema kiak sei nunka lakon husi mundu neʼe ka lae? Lae. Jesus atu hatete deʼit katak se Satanás nia mundu aat neʼe mak sei hamriik nafatin, problema kiak mós sei nunka lakon. Ohin loron tanba kaan no korrupsaun mak halo ema rihun ba rihun hamlaha ka sai kiak. Maski nuneʼe, nia promete katak terus besik ona atu lakon ba nafatin! (Sal 72:16) Liuhusi Jesus nia milagre, ita bele haree duni katak nia hakarak uza ninia forsa atu halo diʼak ba ema hotu. (Mt 14:14-21) Oinsá ho ita? Maski ita la iha kbiit atu halo milagre hanesan Jesus, maibé ita bele uza ita-nia forsa tomak atu koʼalia ba ema kona-ba buat furak sira neʼebé Bíblia promete ona. No neʼe mak ita-nia responsabilidade nuʼudar Testemuña ba Jeová. (Rom 1:14, 15) Bainhira ita hanoin didiʼak ba buat furak sira neʼebé Jesus besik ona atu halo, ita-nia laran mós sai haksolok atu fó-hatene ema seluk, loos ka lae?—Sal 45:1; 49:3. w15 15/6 1:7, 10, 11

Tanba ita hafolin ita-nia relasaun ho Jeová, ita hakarak hakaʼas an atu halo nia kontente liuhusi ita-nia hahalok, no mós liuhusi buat neʼebé ita hanoin. Se ita-nia hanoin mak moos no santu, ita-nia laran mós sai moos. (Sal 24:3, 4; 51:6; Flp 4:8) Jeová komprende katak ita sala-naʼin, tan neʼe dala ruma ita iha hanoin neʼebé foʼer. Maibé ita rasik mós tenke komprende katak se ita husik hanoin neʼebé sala sai buras iha ita-nia neon, neʼe bele halo Jeová sai triste. (Gên 6:5, 6) Tan neʼe mak ita hakarak hakaʼas an atu kontrola ita-nia neon hodi moos nafatin. Dalan importante ida atu luta hasoru hanoin neʼebé foʼer mak halo orasaun beibeik ba Jeová. Se ita halo orasaun beibeik, Jeová mós sei hakbesik ita. Liuhusi ita-nia orasaun, Jeová sei fó ninia espíritu santu mai ita hodi ita iha forsa atu luta hasoru hanoin foʼer no sai moos nafatin. w15 15/6 3:4, 5

Iha orasaun Ami Aman Jesus haruka ita atu husu: “Fó ami ai-han” ba ohin nian, laʼós “fó haʼu-nia ai-han” ba ohin nian. Katuas área nian ida naran Victor husi rai-Áfrika hatete: “Ho laran, haʼu hatoʼo agradese beibeik ba Jeová tanba haʼu ho haʼu-nia feen la presiza preokupa kona-ba presiza loroloron nian. Ami la presiza preokupa katak aban hahán iha ka lae, ka sé mak atu selu osan aluga uma nian, tanba irmaun-irmán barak laran-diʼak tebes ba ami, loroloron sira mak tau matan ba ami. Haʼu-nia orasaun mak haʼu harohan atu sira neʼebé fó ajuda ami kontinua tau matan ba sira rasik nia moris ekonomia nian.” Karik ita la iha problema ho ai-han loroloron nian, maibé ita presiza hanoin kona-ba irmaun-irmán seluk neʼebé moris ho kiak ka sira neʼebé hasoru daudaun dezastre ruma. Ita tenkesér, laʼós halo orasaun deʼit, maibé mós fó ajuda ba sira. Porezemplu, karik ita bele ajuda sira se sira presiza buat ruma. Ita mós bele tau osan iha kaixa kontribuisaun beibeik ba serbisu mundu tomak, tanba ita hatene katak osan sira-neʼe sei uza didiʼak atu ajuda irmaun-irmán sira iha mundu tomak.—1 João 3:17. w15 15/6 5:4-6

Eskritura iha Isaías 60:17 fó sai nanis katak mudansa furak sei akontese ba Jeová nia organizasaun parte rai nian. Karik ba joven ka sira neʼebé foin simu lia-loos, sira lee ka rona deʼit kona-ba mudansa sira-neʼe. Maibé ba irmaun-irmán balu neʼebé kleur ona iha lia-loos, sira haree duni mudansa sira-neʼe ho sira-nia matan rasik. Neʼe halo sira fiar duni katak Jeová mak uza ninia Liurai foun Jesus Kristu hodi dirije hela ninia organizasaun neʼe! Bainhira ita rona ba irmaun-irmán sira konta kona-ba mudansa sira neʼebé sira haree ona, neʼe hametin liután ita-nia fiar ba Jeová. Maski foun ka kleur ona iha lia-loos, ita tenke fó sai ba ema seluk kona-ba Jeová nia organizasaun. Ita bele moris iha dame no unidade ho irmaun-irmán sira iha Satanás nia mundu aat neʼe neʼebé la iha domin, neʼe hanesan milagre ida! w15 15/7 1:12, 13

Funu Armajedón sei lori hahiʼi no fó glória ba Jeová nia naran santu. Toʼo ona tempu neʼebá, ema hotu neʼebé hanesan bibi-timur “sei lakon ba nafatin”. (Mt 25:31-33, 46) Mundu tomak sei la iha tan buat aat, no ema-lubun boot sei moris liu faze ikus husi terus boot nian. Hatene ona kona-ba saida mak atu akontese iha futuru, agora daudaun ita presiza halo saida? Jeová leno apóstolu Pedro hatete: “Tanba buat sira-neʼe hotu sei lakon iha dalan neʼe, imi tenke hanoin kona-ba imi-nia hahalok no buat neʼebé imi halo. Imi tenke iha hahalok santu no hatudu katak imi serbí Maromak ho laran-metin, nuʼudar imi hein no kontinua hanoin-hetan kona-ba Jeová nia loron neʼebé atu mai. . . . Neʼe duni, maluk doben sira, tanba imi hein hela buat sira-neʼe, hakaʼas an liután atu Maromak haree imi nuʼudar ema neʼebé moos, sala-laek, no iha dame laran.” (2 Ped 3:11, 12, 14) Tan neʼe, mai ita kaer metin ba adorasaun neʼebé moos hodi hasees an husi relijiaun falsu sira, no fó apoiu tomak ba Liurai Dame nian, Jesus Kristu. w15 15/7 2:17, 18

Jeová nia povu iha mundu tomak serbisu makaʼas atu harii Reuniaun-Fatin sira. Irmaun-irmán sira fó sira-nia tempu rasik mak atu halo dezeñu, harii, no hadiʼa Reuniaun-Fatin sira-neʼe. Husi 1 Novembru 1999, ita harii ona Reuniaun-Fatin foun maizumenus hamutuk 28.000. Neʼe hatudu katak iha mundu tomak, loroloron ita harii maizumenus Reuniaun-Fatin lima iha tinan 15 nia laran. Bainhira ita presiza Reuniaun-Fatin ida, Jeová nia organizasaun uza osan kontribuisaun hodi halo projetu neʼe no haruka irmaun-irmán neʼebé serbisu nuʼudar voluntáriu mai atu harii. Arranju neʼe halaʼo tuir prinsípiu husi Bíblia neʼebé dehan katak sira neʼebé iha resin sei ajuda sira neʼebé menus. (2 Kor 8:13-15) Rezultadu husi arranju neʼe mak, kongregasaun sira neʼebé uluk laiha kbiit atu harii sira-nia Reuniaun-Fatin, agora bele iha sira rasik nia fatin furak atu halaʼo adorasaun neʼebé moos. w15 15/7 4:9-11

Sinál sira neʼebé Jesus fó atu hatudu nia mai ona, neʼe atu ajuda ninia dixípulu atu atensaun hodi “matan-moris nafatin” iha sira-nia moris tomak. (Mt 24:27, 42) Loos duni, komesa husi tinan 1914, sinál sira ida-idak komesa sai loos. Ida-neʼe hatudu ho momoos mai ita katak ita moris hela iha tempu neʼebé “mundu neʼe atu hotu” ona. Hela deʼit tempu uitoan Satanás nia mundu aat neʼe sei remata. (Mt 24:3) Entaun, tanbasá mak ohin loron ema kristaun tenkesér hein nafatin? Tanba ita hakarak halo tuir Jesus Kristu nia mandamentu. No mós tanba ita komprende husi sinál sira katak Jesus ukun daudauk ona. Ita hakarak hein nafatin laʼós tanba fiar ba ema, maibé tanba ita iha evidénsia barak husi eskritura sira neʼebé hatudu katak mundu nia rohan besik ona, neʼe mak book ita atu neon-moos, matan-moris nafatin toʼo mundu nia rohan toʼo mai. w15 15/8 2:8, 9

Iha Maromak nia mundu foun, ita bele halo buat neʼebé ita gosta ka atividade halimar nian. Ita hatene ida-neʼe tanba Jeová kria ita ema ho hakarak neʼebé atu bele goza moris no goza tempu halimar nian. (Ecle 2:24) No Jeová mós promete katak nia sei “halo kontente buat hotu neʼebé moris nia hakarak”. Moris presiza duni atividade halimar nian no deskansa, maibé atividade sira-neʼe sei fó solok liután se buat neʼebé ita tau uluk mak ita-nia adorasaun ba Jeová. Toʼo mundu foun mós ita presiza halo nafatin hanesan neʼe. Tan neʼe mak ita tenke aprende oinsá atu goza tempu atu halo buat neʼebé ita rasik gosta maibé la haluha atu tau uluk Maromak nia Ukun iha moris, no atu kontinua tau atensaun ba bensaun espirituál sira neʼebé Jeová fó daudauk mai ita ohin loron! (Mt 6:33) Iha mundu foun ita sei hetan solok neʼebé ita nunka hetan iha moris agora nian. Tan neʼe mak mai ita hakaʼas an atu prepara an agora kedas ba moris neʼebé loloos. w15 15/8 3:17, 18

Bainhira Jesus moris iha rai, nia moris hamutuk ho ema sala-naʼin. Ninia inan-aman, alin sira no família sira hotu ema sala-naʼin. Tanba la perfeitu, ninia dixípulu sira mós iha hahalok foti-an no buka diʼak deʼit. Porezemplu, iha kalan antes nia mate, ninia dixípulu sira haksesuk malu makaʼas kona-ba “sé mak boot liu entre sira”. (Lc 22:24) Maski Jesus hatene katak sira la perfeitu, maibé nia nunka lakon esperansa katak loron ida ninia dixípulu sira sei sai ema maduru no sira sei hamutuk atu forma kongregasaun neʼebé iha unidade. Iha kalan neʼe duni mak Jesus halo orasaun ba Jeová iha lalehan atu fó bensaun ba ninia apóstolu sira-nia unidade. Jesus husu atu sira hotu bele sai ida deʼit, nia dehan: “Hanesan Ita, Aman, Ita ida deʼit ho haʼu no haʼu ida deʼit ho Ita, atu sira mós bele sai ida deʼit ho ita naʼin-rua, . . . atu nuneʼe sira bele sai ida deʼit hanesan Ita no haʼu ida deʼit.”—João 17:21, 22. w15 15/9 1:10, 11

Ita bele kompara anin no laloran neʼebé halo Pedro mout mak hanesan ho susar no tentasaun neʼebé ita hasoru ohin loron. Maibé, ho Jeová nia ajuda, maski anin no laloran boot mós ita bele hamriik metin hasoru sira. Karik ita sei hanoin-hetan laʼós tasi siʼak ka anin mak halo Pedro mout, maibé Bíblia hatete katak: “Kuandu nia haree anin-boot, nia sai taʼuk.” (Mt 14:24-32) Pedro lakon ninia fiar tanba ninia matan la hateke metin ba Jesus. Hanesan neʼe mós ho ita, se ita mak preokupa liu ho ita-nia problema sira, neʼe bele hamenus ita-nia fiar katak Jeová sei apoia ita. Ita presiza hatene katak ita-nia fiar bele sai fraku, tanba Bíblia hatete katak lakon fiar mak “sala neʼebé bele kaer metin ita”. (Ebr 12:1) Hanesan buat neʼebé akontese ba Pedro hatudu katak se ita preokupa liu ba buat neʼebé halo ita sees husi Jeová, neʼe bele halo ita-nia fiar sai fraku lalais. w15 15/9 3:1, 6, 7

Bainhira ita simu prezente ida, ita halo saida ho prezente neʼe? Dala barak ita hatudu ita-nia agradese uluk ba prezente neʼe, loos ka lae? Tuirmai, ita hakarak uza prezente neʼe ho kuidadu. Jeová sempre fó buat neʼebé ita presiza atu moris no kontente. Neʼe book ita hakarak hadomi fali nia, loos ka lae? Iha tinan atus ba atus nia laran, Jeová tau matan ho domin ba ema Izraél sira. Jeová fó bensaun barak tebes ba sira iha sira-nia presiza loroloron nian no mós iha dalan espirituál nian. (Deut 4:7, 8) Maibé, atu bele simu nafatin Jeová nia bensaun, sira presiza halo tuir Jeová nia Ukun-Fuan. Porezemplu, sira presiza hasaʼe beibeik husi sira-nia rai “buat diʼak liu hotu husi fuan primeiru” ba Jeová. (Êx 23:19) Hodi halo hanesan neʼe mak ema Izraél sira hatudu ba Jeová katak sira hafolin tebes Jeová nia domin no bensaun neʼebé nia fó ba sira.—Deut 8:7-11. w15 15/9 5:5, 6

Iha dalan saida deʼit mak ita haree ona Jeová nia liman ajuda ita-nia moris? Karik ita bele hanoin kona-ba ezemplu balu tuirmai neʼe. Primeiru, karik ita haree ona oinsá Jeová ajuda ita hetan lia-loos. Segundu, karik iha reuniaun, ita rona diskursu ida no ita hanoin: “Diskursu neʼe kona-loos haʼu!” Terseiru, karik ita haree oinsá Jeová hatán duni ba ita-nia orasaun. Kuatru, karik ita halo planu atu uza tempu barak liután hodi serbí Jeová, no nia ajuda ita hodi kumpre duni ita-nia planu neʼe. Kintu, karik tanba ita hakarak atu halo serbisu liután ba Jeová hodi rezigna an husi serbisu ruma no ita haree duni Jeová tau matan ba ita hodi tuir ninia liafuan neʼebé nia hatete: “Haʼu sei nunka fila kotuk ba ó.” (Ebr 13:5) Se ita mak hanoin didiʼak ba buat sira-neʼe, no iha “laran moos”, ita bele haree duni katak Jeová ajuda duni ita iha dalan oioin. “Laran moos” katak sá? Neʼe dehan katak ita tenke iha hanoin neʼebé moos no labele halo tan hahalok neʼebé sala. (2 Kor 4:2) Nuʼudar ita hametin liután ita-nia relasaun ho Jeová no hatudu hahalok neʼebé loos, ita mós bele haree oinsá Jeová uza ninia liman atu ajuda ita. w15 15/10 1:17, 19

Ema gregu balu neʼebé bá Jeruzalein haree tiha buat neʼebé Jesus halo, sira admira tebes, tan neʼe, sira bá husu apóstolu Filipe atu hasoru Jesus. Tuir loloos Jesus bele buka ema sira-neʼe atu apoia nia hodi ninia inimigu la bele oho nia, maibé nia la halo hanesan neʼe. Jesus fokus nafatin ba knaar importante seluk husi Maromak neʼebé nia atu halo. Tan neʼe bainhira nia esplika tiha ba André no Filipe katak lakleur tan nia sei mate, nia hatete ba sira: “Ema neʼebé hadomi nia moris sei lakon nia moris, maibé ema neʼebé odi ninia moris iha mundu neʼe sei salva nia moris hodi hetan moris rohan-laek.” Duké atu buka-hatene saida mak ema gregu sira hakarak, Jesus anima sira atu halo tuir ninia ezemplu no temi liafuan iha eskritura ba ohin. Ita fiar katak Filipe mós hatoʼo fali Jesus nia liafuan sira-neʼe ba ema gregu sira. (João 12:20-25) Maski Jesus lakohi husik buat seluk atu dada ninia atensaun hodi nia bele haklaken nafatin, maibé neʼe la dehan katak kalan loron Jesus nia hanoin mak serbisu deʼit. w15 15/10 3:13, 14

Jesus nia dixípulu sira haksesuk malu dala barak kona-ba sé mak boot liu, maibé Jesus la husik deʼit problema neʼe. Ho pasiénsia nia korrije beibeik sira. Nia halo ida-neʼe ho laran-diʼak no iha tempu no fatin neʼebé loos. (Mc 9:33-37) Hatudu domin ba Ita-nia oan hodi fó dixiplina ba sira. Dala ruma karik Ita presiza esplika deʼit ba sira tanbasá mak buat ruma neʼebé sira halo neʼe diʼak ka ladiʼak. Maibé oinsá se sira la halo tuir? (Prov 22:15) Se hanesan neʼe, banati-tuir Jesus nia ezemplu. Iha tempu no fatin neʼebé diʼak, korrije sira, fó treinu no fó matadalan ba sira ho laran-diʼak. Irmán ida iha rai-Áfrika Súl naran Elaine hanoin-hetan ninia inan-aman no dehan: “Sira nunka fó dixiplina haʼu ho hirus ka la fó-hatene haʼu tanbasá mak sira fó dixiplina mai haʼu.” Tanba ninia inan-aman halo ida-neʼe, nia sente nia inan-aman hadomi nia. w15 15/11 1:5, 6

Hanoin toʼok se Jeová mak la hadomi ema, ita-nia futuru sei sai hanesan saida? Ita bele fiar katak Diabu Satanás, maromak neʼebé la iha domin no hirus-teen sei kontinua atu book ema hodi ukun ema seluk hanesan nia halo daudauk. (2 Kor 4:4; 1 João 5:19; Apok 12:9, 12) Tan neʼe mak se laʼós Maromak nia domin, lalehan ho rai tomak sei la iha futuru neʼebé diʼak. Bainhira Diabu kontra Jeová nia ukun, nia mós lohi Adão no Eva hodi halo tuir nia. Nia hasaʼe lia kona-ba Maromak nia direitu atu ukun. Nia hatún Jeová katak Jeová nia ukun la loos, no ninia ukun mak diʼak liu fali ita-nia Kriadór nian. (Gên 3:1-5) Tan neʼe Jeová uza ninia matenek atu husik tempu uitoan ba Satanás, hodi nuneʼe nia bele hatudu katak lia neʼebé Satanás hasaʼe laloos. Istória hatudu duni katak Satanás ka ema nia ukun la bele lori bensaun ba ema. w15 15/11 3:3, 4

Hahalok haraik-an mak bele ajuda ita atu halo tuir matadalan ida husi Jesus nia liafuan, Jesus hatete: “Imi rona liafuan ba ema iha tempu uluk dehan: ‘Ó tenke hadomi ó-nia maluk no odi ó-nia inimigu.’ Maibé, haʼu hatete ba imi: Hadomi nafatin imi-nia inimigu no harohan ba sira neʼebé haterus imi, atu imi bele hatudu katak imi mak oan husi imi-nia Aman iha lalehan, tanba nia halo loro-matan saʼe ba ema aat no mós ema diʼak, no halo udan tun ba ema laran-loos no mós ema aat.” (Mt 5:43-45) Loos duni, atu ema trata ita iha dalan neʼebé diʼak ka ladiʼak, nuʼudar Jeová nia atan, ita tenkesér ‘hadomi nafatin ita-nia inimigu’. Iha ita-nia moris tomak ita hakarak hatudu katak ita hadomi Jeová no ita-nia maluk hotu. Porezemplu, se ema ida mak la gosta ita-nia mensajen, maibé loron ida nia presiza ita-nia ajuda, ita hakarak ajuda nia nafatin. w15 15/11 4:17, 19, 20

Maromak nia povu sira uza kbiit atu koʼalia hodi hahiʼi no koʼalia kona-ba Jeová ba ema seluk. Iha tinan hirak-neʼe Maromak nia povu mós uza didiʼak kbiit furak língua nian hodi tradús Bíblia atu ema seluk mós bele aprende kona-ba Jeová. Ohin loron iha Bíblia tradusaun oioin, maibé balu ladún tuir ona Bíblia orijinál nian. Tan neʼe mak Komisaun Bíblia Tradusaun Mundu Foun halo tuir matadalan tolu atu tradús Bíblia. Matadalan sira-neʼe mak (1) Atu halo santu Maromak nia naran hodi tau fali naran neʼe ba eskritura sira neʼebé uluk temi duni Maromak nia naran. (Mt 6:9) (2) Se bele, tradús tuir fali liafuan orijinál sira, maibé, se neʼe halo ema komprende sala ninia signifika, entaun tradús deʼit liafuan sira-neʼe signifika saida. (3) Uza liafuan neʼebé fasil ba ema atu komprende hodi ema hakarak lee.—Neem 8:8. w15 15/12 2:1, 2

Se trombeta nia lian mak laloos, neʼe sei lori dezastre boot ba tropa sira. Hanesan neʼe mós bainhira ita koʼalia, se ita mak koʼalia liafuan neʼebé la moos ka ema la komprende ita atu koʼalia saida, neʼe bele halo ema konfuzaun no halo ema komprende sala. (1 Kor 14:9) Bainhira koʼalia, ita mós tenke kuidadu atu la koʼalia loos deʼit ka la tetu didiʼak uluk. Jesus sempre uza liafuan neʼebé halo fasil ba ema atu komprende nia. Ezemplu ida mak kona-ba ninia diskursu neʼebé hakerek iha Mateus kapítulu 5 toʼo 7. Iha diskursu neʼe, Jesus nunka uza liafuan neʼebé atu halo ema gaba nia. Nia mós la uza liafuan neʼebé makaʼas ka liafuan neʼebé hakanek ema nia laran. Maibé, liafuan sira neʼebé nia uza mak moos, simples, no fasil ba rona-naʼin sira atu simu. Porezemplu, Jesus uza ezemplu kona-ba oinsá Jeová tau matan ba manu sira hodi ajuda ninia dixípulu sira atu la bele laran-taridu kona-ba presiza loroloron nian. Tuirmai, nia husu ba ninia rona-naʼin sira: “Imi mak folin-boot liu fali sira, loos ka lae?” (Mt 6:26) Jesus uza liafuan neʼebé simples no fasil atu komprende hodi book rona-naʼin sira-nia laran no anima sira. w15 15/12 3:13, 14

Hadomi malu nuʼudar maun-alin mak domin hanesan saida? Liafuan “domin” neʼebé Paulo uza foti husi lia-gregu, filadélfia, neʼe dehan katak “iha sentimentu domin no hanoin ba maun-alin ida”. Hadomi malu nuʼudar maun-alin mak domin neʼebé forte, no besik ba malu. Sentimentu domin neʼe mak baibain ema hatudu ba família ka belun neʼebé besik tebes. (João 11:36) Ita la finje deʼit atu sai irmaun-irmán, maibé ita mak irmaun-irmán duni. (Mt 23:8) Tan neʼe mak liafuan sira tuirmai neʼe esplika sentimentu neʼe iha dalan neʼebé diʼak tebes: “Hadomi malu tebetebes hanesan maun-alin. Buka uluk atu hatudu respeitu ba malu.” (Rom 12:10) Tanba iha domin neʼe no domin kristaun loos mak Maromak nia povu bele iha relasaun neʼebé besik ba malu. Ita ema kristaun neʼebé loos la fihir nasaun, ita simu ema hotu. (Rom 10:12) Nuʼudar irmaun no irmán, ita hotu simu hanorin husi Jeová atu hatudu domin ba malu.—1 Tes 4:9. w16.01 1:5, 6

Ita-nia domin ba Jesus bele book ita atu haklaken no hanorin ema kona-ba Bíblia ho laran. (Mt 28:19, 20; Lc 4:43) Iha tempu Memoriál, ita iha oportunidade atu bele hili foti pioneiru estra ho oras 30 ka 50. Ita bele halo nuneʼe ka lae? Irmaun faluk ida idade ona, nia tinan 84. Nia sente kusta atu foti pioneiru estra tanba ninia idade no saúde ladún diʼak. Maibé pioneiru barak hakarak ajuda nia. Sira lori karreta bá tula nia no sira hili fatin haklaken neʼebé fasil ba nia atu haklaken, tan neʼe nia kumpre duni ninia pioneiru estra ho oras 30. Ita mós bele halo tuir ezemplu neʼe ka lae atu ajuda ema seluk atu foti pioneiru estra iha tempu Memoriál nian? Dala ruma laʼós ita hotu bele foti pioneiru estra. Maski nuneʼe, ita hakarak hakaʼas an nafatin atu uza ita-nia tempu no forsa tomak hodi halo sakrifísiu barak liután atu hahiʼi Jeová. w16.01 2:7, 11

Se bibi seluk la hatene ema kose-mina sira neʼebé sei moris hela nia naran, oinsá mak sira bele “bá hamutuk” ho sira? Mai ita haree fali ba profeta Zacarias nia liafuan kona-ba mane naʼin-sanulu neʼe. Bíblia hatete katak sira sei “kaer metin duni ema judeu ida nia roupa, no hatete: ‘Ami hakarak bá hamutuk ho imi, tanba ami rona ona katak Maromak hamutuk ho imi’”. Maski iha neʼe temi “ema judeu ida”, maibé liafuan sira tuirmai uza “imi”. Neʼe dehan katak sira ema barak, laʼós ema ida deʼit. Tan neʼe mak la presiza koñese ema kose-mina ida-idak, maibé tenke hatene deʼit grupu neʼe sé hodi ita bele apoia sira. Eskritura sira nunka hatete atu ita tuir ema, maibé tuir Jesus deʼit nuʼudar ita-nia Ulun.—Mt 23:10. w16.01 4:4

Husi tempu neʼebé ita foin moris toʼo ita mate, ita hotu presiza domin. Ita hotu presiza atu iha relasaun neʼebé diʼak no besik ho ema seluk. Liuliu, ita presiza domin husi Maromak Jeová. Ema barak sente katak susar ba ita ema atu iha relasaun neʼebé besik no diʼak ho Maromak neʼebé Aas Liu Hotu. Maibé ita la hanoin hanesan neʼe. Tanbasá? Tanba Bíblia hatudu katak iha duni ema la perfeitu neʼebé sai ona Maromak nia belun. Sira-nia ezemplu diʼak tebes ba ita atu haburas relasaun ho Maromak, tanba iha relasaun ho Maromak mak buat neʼebé importante liu hotu iha ita-nia moris. Ezemplu ida mak kona-ba Abraão. (Tgo 2:23) Oinsá mak nia bele haburas relasaun diʼak ho Jeová? Liuhusi fiar. Tan neʼe mak Bíblia bolu Abraão nuʼudar “aman ba sira hotu neʼebé iha fiar”.—Rom 4:11. w16.02 1:1, 2

Maski Ezekias nia aman mak liurai neʼebé aat tebes iha rai-Judá, maibé Ezekias la hanesan neʼe, nia sai ema neʼebé diʼak tebes. (2 Reis 18:6) Nia hamoos fali Jeová nia templu, husu Jeová fó perdua ba povu sira-nia sala, no harahun hotu estátua sira. (2 Crôn 29:1-11, 18-24; 31:1) Bainhira Liurai Senaquerib husi rai-Asíria ameasa atu ataka Jeruzalein, Ezekias hatudu aten-brani no iha fiar neʼebé metin. Nia tau fiar ba Jeová atu proteje sira no nia mós hametin povu nia fiar liuhusi ninia liafuan no hahalok sira. (2 Crôn 32:7, 8) Ikusmai tanba nia hatudu hahalok foti-an, nia hetan konsellu, maibé nia hatudu haraik-an hodi hakribi ninia sala neʼe. (2 Crôn 32:24-26) Husi neʼe ita bele haree duni katak Ezekias nunka husik ninia aman nia hahalok sira atu estraga ninia moris. Nia hatudu katak nia mak Jeová nia belun. Ninia ezemplu neʼe diʼak tebes ba ita hotu atu banati-tuir, loos ka lae? w16.02 2:11

Laran-diʼak bele ajuda ita laran-metin ba Jeová no ema seluk. Porezemplu, karik ita iha evidénsia kona-ba irmaun ka irmán ida neʼebé monu ba sala boot. Karik tanba ema neʼe mak ita-nia kolega diʼak ka família ida, ita hakarak hatudu laran-metin ba nia. Maibé se ita mak taka deʼit ninia sala, neʼe bele halo ita la hatudu laran-metin ba Jeová, tanba ita tenke laran-metin ba Jeová liu fali laran-metin ba ema. Entaun, ita hakarak halo tuir Jeová hodi hatudu laran-diʼak ba ema neʼe. Husu ita-nia kolega ka família neʼe atu bá buka ajuda husi katuas kongregasaun sira. Se liu tiha tempu balu nia seidauk bá, ita rasik mak tenke bá fó-hatene katuas sira tanba neʼe envolve ita-nia laran-metin ba Jeová no ba ema neʼe. Se ita halo nuneʼe, ita hatudu katak ita laran-diʼak ba ita-nia kolega ka família neʼe tanba katuas sira sei ajuda nia atu iha fali relasaun diʼak ho Jeová, sira mós sei ajuda nia ho laran-maus no diʼak.—Lev 5:1. w16.02 4:14

Oinsá mak Ita ‘hatudu katak Ita serbí Maromak ho laran-metin’? Liuhusi atividade sira neʼebé Ita halo iha kongregasaun, hanesan tuir reuniaun sira no bá haklaken. No mós buat neʼebé Ita halo mesak-mesak, hanesan Ita rasik nia orasaun no estuda mesak. Ema neʼebé dedika ona ninia moris ba Jeová sei la hanoin katak atu halo buat sira-neʼe mak hanesan naha todan ida. Nia sei sente hanesan ho Liurai David neʼebé dehan: “Oh, haʼu-nia Maromak, atu halo Ita-nia hakarak mak buat neʼebé halo haʼu haksolok, no Ita-nia ukun-fuan iha haʼu-nia laran.” (Sal 40:8) Hanoin-hetan katak bainhira Ita dedika ona Ita-nia moris ba Jeová no hetan batizmu, Ita haburas ona Ita rasik nia relasaun ida ho Jeová. Tan neʼe mak Ita la bele depende ba inan-aman ka kolega sira mak atu determina Ita atu serbí Jeová. Liuhusi Ita-nia hahalok santu no hahalok laran-metin mak Ita hatudu katak Ita fiar duni lia-loos no hakarak halo tuir Jeová. Neʼe mak sinál neʼebé hatudu katak Ita laʼo ba oin daudauk atu hetan batizmu. w16.03 2:10, 12, 15

Moisés nia Ukun-Fuan sai hanesan protesaun ida ba ema Izraél husi nasaun viziñu sira-nia hahalok neʼebé la morál no husi relijiaun falsu sira. Bainhira nasaun Izraél halo tuir Maromak, sira mós hetan bensaun barak, maibé se sira lakohi halo tuir, sira rasik mak tenke moris ho konsekuénsia aat husi sira-nia hahalok hotu. (Deut 28:1, 2, 15) Iha razaun seluk tan tanbasá mak Jeová fó Ukun-Fuan ba ema Izraél. Neʼe atu prepara sira hodi hatene Jeová nia hakarak kona-ba Mesias ka Jesus Kristu. Ukun-Fuan neʼe fó-hanoin ba sira katak sira mak ema la perfeitu. No ajuda sira komprende katak sira presiza duni Jesus nia sakrifísiu, tanba Jesus nia raan perfeitu deʼit mak bele kasu sira-nia sala. (Gal 3:19; Ebr 10:1-10) Ukun-Fuan mós iha objetivu atu proteje Mesias nia liña jerasaun hodi ema Izraél bele koñese sé mak Mesias bainhira nia mosu mai. Loos duni, Ukun-Fuan mak sai “nuʼudar matadalan” temporáriu ida ba ema Izraél atu hein toʼo Kristu mosu mai. w16.03 4:6, 7