Dezembru

Bíblia hatete katak Abraão mak Maromak nia belun. (Isa 41:8; Tgo 2:23) No só nia mesak deʼit mak Bíblia temi nuneʼe. Se nuneʼe, ita bele dehan katak Abraão mesak mak bele sai Jeová nia belun ka lae? Lae, tanba Bíblia hatete katak ita hotu bele sai Maromak nia belun. Iha Maromak nia Liafuan, ita bele lee kona-ba mane no feto barak mak hamtaʼuk Jeová, tau fiar ba nia, no sai ninia belun diʼak. Apóstolu Paulo mós koʼalia kona-ba “sasin barak”, sira mak ema husi fatin oioin neʼebé mós sai ona Maromak nia belun. (Ebr 12:1) Sira mós sai ona Jeová nia belun. Diʼak atu banati-tuir sira-nia fiar. (Ebr 6:11, 12) Se ita mak halo tuir sira, ita mós sei sai Jeová nia belun ba nafatin! w16.02 2:1, 2, 19

Hanoin toʼok katak ita-nia belun diʼak ida foin fó prezente karreta ida ba ita. Nia entrega karreta nia dokumentu ba Ita no nia dehan: “Haʼu mak sei kaer karreta nia xave, no haʼu mak sei lori karreta neʼe, laʼós ó.” Ita sei sente oinsá? Bainhira ema ida dedika ninia an ba Jeová, nia dehan ba Jeová: “Haʼu fó haʼu-nia moris ba Ita. Haʼu mak Ita-nian.” Tan neʼe mak Maromak Jeová iha direitu atu husu nia kumpre buat neʼebé nia promete ona ba Jeová. Maibé oinsá se ema neʼe komesa la halo tuir tan Jeová hodi namora subasubar ho ema neʼebé la adora Jeová? Ka oinsá se ema neʼe simu serbisu neʼebé halo nia laiha tempu atu bá haklaken ka tuir reuniaun sira semana-semana? Se nuneʼe, ema neʼe la kumpre ona ninia promete ba Jeová. Neʼe hanesan deʼit ho ema neʼebé fó prezente karreta ba ninia belun, maibé nia mak kaer xave karreta nian. Bainhira ita dedika an ba Jeová, ita dehan: “Haʼu-nia moris tomak ba Ita, laʼós tan ba haʼu-nia an.” Tan neʼe mak ita sempre hakarak halo tuir buat neʼebé Jeová hakarak ita atu halo, maski neʼe laʼós buat neʼebé ita rasik hakarak. Mai ita halo tuir Jesus nia ezemplu hanesan temi iha eskritura ba ohin. w16.03 1:16, 17

Maizumenus tinan 3.000 liubá, joven Eliseu simu konvite ida mai husi profeta Elias hodi sai ninia ajudante. Eliseu simu kedas konvite neʼe no serbí Elias ho laran-metin hodi halo serbisu simples. (2 Reis 3:11) Eliseu simu treinu husi Elias ba tinan neen. Tanba Elias nia serbisu iha Izraél besik remata ona, nia mós husu Eliseu para ona hodi lalika tuir tan nia atu sai ninia ajudante. Maibé Eliseu hakarak tebes hamutuk ho ninia mestre. Se ita mak irmaun joven ida, oinsá mak ita bele halo tuir Eliseu nia ezemplu? Simu deʼit knaar neʼebé sira fó ba Ita, maski knaar mak simples. Haree Ita-nia mestre nuʼudar belun ida. Hatudu agradese ba ajuda sira neʼebé nia fó ba Ita. Liután neʼe, halaʼo knaar sira ho didiʼak. Tanbasá mak halo hanesan neʼe importante? Tanba se Ita hatudu katak Ita mak ema neʼebé laran-metin no sempre kumpre hotu Ita-nia knaar sira, katuas sira mós bele haree katak Jeová hakarak uza duni Ita hodi fó tan responsabilidade seluk ba Ita iha kongregasaun laran.—Sal 101:6; 2 Tim 2:2. w15 15/4 2:13, 14

Saul hakarak Jónatas mak atu sai liurai, laʼós David. (1 Sam 20:31) Maibé Jónatas nia domin no laran-metin ba Jeová book nia hodi sai David nia belun no kaer metin ninia promete ba David. Neʼe duni, ita hakarak kaer metin ba ita-nia promete tanba ita-nia laran-metin ba Jeová. Porezemplu, se ita halo akordu ba negósiu ruma, maibé akordu neʼe ladún laʼo ho susesu, tanba ita-nia laran-metin ba Maromak no iha respeitu ba ninia Liafuan mak ita hakarak kaer metin nafatin ba buat neʼebé ita promete ona. No se ita mak iha problema iha kaben laran, ita hakarak laran-metin nafatin ba ita-nia kaben tanba neʼe hatudu laran-metin ba Jeová. (Mal 2:13-16) Mai ita mós hatudu laran-metin ba irmaun-irmán sira, maski dala ruma sira halo ita triste. Se ita laran-metin ba Jeová maski iha situasaun neʼebé susar, ita halo Jeová kontente. (Prov 27:11) Jeová sempre hanoin kona-ba ita-nia diʼak, tan neʼe ita hakarak hatudu laran-metin nafatin ba nia. w16.02 3:16, 17

Jeová hatene duni ita ida-idak nia kbiit no fraku. (Sal 103:14) Tan neʼe, nia fó mai ita kbiit natoon deʼit atubele tahan susar sira. Klaru katak dala ruma ita sente ita la bele tahan tan susar neʼebé ita hasoru. Maibé Jeová promete katak nia sei nunka husik ita hasoru susar neʼebé todan liu fali ita-nia kbiit atu tahan, no nia sei fó ‘dalan ba ita atu sai’. (1 Kor 10:13) Nuneʼe, ita bele sente kmaan hodi fiar metin katak Jeová komprende didiʼak ita-nia kbiit toʼo iha neʼebé. Se ita husu Jeová nia ajuda maibé nia la hatán kedas, mai ita hein ho pasiénsia bá. Keta haluha katak Jeová hakarak tebes ajuda ita, nia hatene ho loloos tempu neʼebé diʼak atu fó buat neʼebé ita husu, no nia mós hein ho pasiénsia. Bíblia hatete: “Jeová hein ho pasiénsia atu hatudu laran-diʼak ba imi no hatudu laran-sadiʼa ba imi. Tanba Jeová mak Maromak justisa nian.” w15 15/4 4:8, 9

Iha tempu Adorasaun Família nian sira bele pratika oinsá atu haklaken. Neʼe bele ajuda aumenta sira-nia matenek atu haklaken ba ema. No bainhira rona ema ida-idak iha família laran nia komentáriu kona-ba lia-loos iha tempu adorasaun, no haree oinsá sira hadomi tebes Jeová no hakarak halo nia kontente, ida-neʼe bele halo ema hotu iha família laran sai besik liu ba malu no iha unidade iha sira leet. Oinsá mak feen no laʼen bele serbisu hamutuk no apoia malu? Bainhira sira naʼin-rua hadomi Jeová no serbí nia hamutuk, sira sei haksolok no iha unidade iha sira-nia moris nuʼudar kaben-naʼin. Eskritura sira mós fó sai kona-ba feen-laʼen iha tempu uluk neʼebé hatudu domin ba malu hanesan Abraão no Sara, Isaac no Rebeka, no Elcana no Ana. Tan neʼe diʼak mós feen-laʼen sira ohin loron atu hatudu domin ba malu. (Gên 26:8; 1 Sam 1:5, 8) Bainhira feen no laʼen halo nuneʼe, sira sei iha unidade no hakbesik liután ba Aman Jeová.—Ecle 4:12. w16.03 3:12, 13

Satanas halo funu daudauk hasoru ema kose-mina iha rai no hasoru “bibi-seluk”. (João 10:16) Diabu nia planu mak, se nia sei iha oportunidade, nia hakarak tolan hotu Jeová nia povu antes ninia tempu badak neʼe remata. (Apok 12:9, 12) Ita bele luta manán hasoru nia ka lae? Bele! Tanba Bíblia hatete: “Kontra Diabu, no nia sei halai husi imi.” (Tgo 4:7) Ema balu goza ita se ita dehan katak Satanás iha. Tanba ba sira, Satanás no anju aat sira mak buat neʼebé ema inventa deʼit iha filme, iha livru, ka iha vídeo games. Sira dehan ema matenek ida nunka fiar ba buat sira hanesan neʼe. Satanás hirus ka lae se ema la fiar katak nia iha duni? Lae, tanba tuir loloos ida-neʼe mak nia gosta liu, atu nia bele bosok ema se ema la hatene katak nia iha.—2 Kor 4:4. w15 15/5 2:1, 2

Moisés nia inan-aman rasik mak hanorin nia kona-ba Jeová, no husi sira, nia aprende katak Jeová promete ona atu halo ema Izraél livre husi atan ba ema Ejitu no fó sira rai promete nian. (Gên 13:14, 15; Êx 2:5-10) Karik Moisés hanoin kleʼan tebes kona-ba Jeová nia promesa atu halo ema Izraél sira atu sai livre. Hanesan ho Maromak nia atan seluk, Moisés mós fiar katak Jeová sei halo ema livre husi mate. (Jó 14:14, 15; Ebr 11:17-19) Bainhira nia komprende katak Jeová hadomi tebes ema hotu, neʼe halo Moisés mós hadomi liután Jeová no tau fiar ba nia. Ida-neʼe ajuda nia serbí Jeová iha ninia moris tomak. (Deut 6:4, 5) Tan neʼe mak maski Liurai Ejitu nian hakarak oho nia, Moisés la taʼuk atu mate, tanba nia hatene katak iha futuru, Jeová sei fó bensaun ba nia.—Êx 10:28, 29. w15 15/5 3:11-13

Milagre primeiru neʼebé Jesus halo mak iha festa kazamentu ida iha Kaná, rai-Galileia. La hatene tanbasá, tua la toʼo ba bainaka sira neʼebé bá atu tuir kazamentu neʼe. Situasaun neʼe bele halo festa-naʼin moe tebes, tanba neʼe la hatudu laran-luak ba bainaka sira. Jesus nia inan, Maria mós bá tuir festa neʼe. Nia fó-hatene Jesus kona-ba problema ho tua neʼe. Nia halo hanesan neʼe karik tanba nia hatene katak Jesus iha forsa atu halo buat ruma. Tanba ba tinan barak ona nia hatene katak profesia barak mak koʼalia kona-ba ninia oan-mane neʼe. No nia hatene katak ninia oan neʼe sei hanaran “Oan-Mane husi Ida neʼebé Aas Liu Hotu”. (Lc 1:30-32; 2:52) Tuirmai, Jesus halo milagre ida hodi halo bee maizumenus litru 380 nakfila sai tua diʼak. (João 2:6-11) Husi neʼe ita bele haree katak Maria no Jesus hakarak duni atu ajuda festa-naʼin. Maibé Jesus halo milagre neʼe laʼós tanba neʼe mak ninia responsabilidade. Jesus hakarak ajuda tanba nia hanoin ema, no atu halo tuir ninia Aman nia laran-luak. w15 15/6 1:3

Antes Jesus saʼe ba lalehan, ninia apóstolu sira husu ba nia pergunta iha leten. Sira hakarak atu hatene bainhira loos mak Maromak harii ninia ukun, maibé Jesus la fó-hatene sira tempu, nia haruka sira atu fó atensaun deʼit ba haklaken, serbisu importante neʼebé sira presiza atu halo. (Após 1:7, 8) Maski nuneʼe, nia anima sira hein no harohan nafatin atu Maromak nia Ukun toʼo mai. Tan neʼe mak komesa husi apóstolu sira-nia tempu, ema kristaun kontinua halo orasaun atu husu Maromak nia Ukun toʼo mai. Bainhira tempu atu toʼo ona ba Jesus hahú ukun iha lalehan, Jeová ajuda ninia povu hodi hatene tinan saida mak Ukun neʼe hahú. Iha tinan 1876, Charles Taze Russell iha livru ida, fó sai katak tinan 1914 mak tinan importante ida. Iha livru neʼe, nia esplika katak “tinan hitu” neʼebé temi iha Daniel nia profesia no “tempu nasaun sira-nian” neʼebé Jesus temi mak tinan 1914.—Dan 4:16; Lc 21:24. w15 15/6 4:11, 12

Jesus mós sente laran-triste bainhira nia haree ema triste. Porezemplu, bainhira Lázaro mate, ninia família no maluk sira triste tebes, no kuandu Jesus haree sira, Jesus sai laran-triste no neon susar tebes toʼo nia tanis, maski nia hatene katak tuirmai nia atu fó moris-hiʼas ba Lázaro. (João 11:33-36) Jesus la moe atu hatudu ninia sentimentu neʼe iha ema barak nia oin, no ho ida-neʼe, ema hotu bele haree katak Jesus hadomi duni Lázaro ho ninia família. Hodi uza kbiit neʼebé Maromak fó ba nia hodi halo Lázaro moris fali, Jesus hatudu duni katak nia hanoin tebes ema! (João 11:43, 44) Bíblia hatete katak Jesus mak “Maromak nia ilas loloos”. (Ebr 1:3) Tan neʼe mak liuhusi Jesus nia milagre sira, ita bele hatene katak Jeová mós hakarak halakon terus, moras no mate husi ema nia moris. Lakleur tan Jeová no Jesus sei halo ema mate sira moris fali. Jesus dehan: “Oras sei toʼo mai kuandu ema hotu neʼebé iha rate laran sei . . . sai husi rate.”—João 5:28, 29. w15 15/6 2:13, 14

Ema iha relijiaun seluk hanoin sala katak bainhira ema mate no saʼe ba lalehan mak foin bele hahiʼi Maromak. Maibé Testemuña ba Jeová la hanoin hanesan neʼe, tanba agora iha rai mós ita presiza hahiʼi Jeová. Ita halo tuir duni ezemplu husi Jeová nia atan sira iha tempu uluk atu hahiʼi nia hanesan hakerek iha Salmo 99:1-3, 5. Tuirmai, Salmo neʼe hatete katak Moisés, Aarão, no Samuel fó apoia tomak ba Maromak nia arranju atu halaʼo adorasaun neʼebé loos. (Sal 99:6, 7) Ohin loron mós hanesan. Antes ema kose-mina saʼe ba lalehan atu sai amlulik hamutuk ho Jesus, sira fó apoia ho laran tomak hodi serbí Jeová iha templu espirituál nian iha rai. “Bibi-seluk” rihun ba rihun mós apoia ema kose-mina sira ho laran tomak. (João 10:16) Maski iha esperansa neʼebé la hanesan, maibé grupu rua neʼe fó glória ba Jeová husi ninia tula ain fatin ho laran ida deʼit. Tan neʼe, diʼak atu husu ba ita-nia an pergunta neʼe, ‘Haʼu apoia Jeová nia arranju ba adorasaun neʼebé loos ho laran tomak ka lae?’ w15 15/7 1:4, 5

Ema neʼebé adora Jeová sempre hakarak atu haree buat hotu neʼebé Bíblia fó-hatene nanis ka profesia sira sai loos. Isaías neʼebé fó-hatene nanis katak Jeová sei hadiʼa fali rai Judá, nia hatete: “Ksolok ba ema hotu neʼebé hein ba nia.” (Isa 30:18) Bainhira koʼalia kona-ba saida mak Jeová sei halo ba ninia povu, Miquéias dehan ba ninia an: “Haʼu sei hein nafatin ba Jeová.” (Miq 7:7) Ezemplu seluk tan mak tinan atus ba atus nia laran, Jeová nia atan sira hein la baruk atu haree profesia kona-ba Mesias ka Kristu sai loos. (Lc 3:15; 1 Ped 1:10-12) Maromak nia atan ohin loron mós hein atu haree profesia seluk kona-ba Mesias atu sai loos, tanba profesia balu seidauk sai loos. Porezemplu, lakleur tan Jeová sei uza Mesias nia Ukun atu halakon ema aat hodi susar iha mundu aat neʼe sei laiha tan, no nia mós sei salva ninia povu husi mundu neʼebé Satanás ukun daudauk neʼe. (1 João 5:19) Tan neʼe, mai ita hein ho matan-moris ba Jeová nia loron, tanba loron neʼe besik ona atu mai. w15 15/8 2:1, 2

Ba ema Izraél, Jeová haruka sira harii tabernákulu. (Êx 25:8) Ikusmai, sira harii fali templu ida hodi adora Jeová. (1 Reis 8:27, 29) Bainhira ema judeu fila husi Babilónia, sira uza sinagoga hodi halibur malu. (Mc 6:2; João 18:20; Após 15:21) Ema kristaun iha apóstolu sira-nia tempu halibur malu iha ema husi kongregasaun nia hela-fatin. (Após 12:12; 1 Kor 16:19) Ohin loron, iha mundu tomak Jeová nia povu uza Reuniaun-Fatin hodi estuda no adora Jeová. Jesus respeitu tebes Jeová nia templu iha Jeruzalein. Tanba ninia domin ba templu neʼe mak halo ninia dixípulu hanoin fali liafuan sira neʼebé hakerek iha eskritura ba ohin. (Sal 69:9) Ita la bele bolu Reuniaun-Fatin nuʼudar “Jeová nia uma” hanesan templu iha Jeruzalein. (2 Crôn 5:13; 33:4) Maibé Bíblia iha prinsípiu balu neʼebé bele ajuda ita ohin loron atu uza didiʼak no hatudu respeitu ba fatin adorasaun neʼe. w15 15/7 4:1, 2

Durante Kristu nia Ukun ba Tinan Rihun Ida nia laran, ita bele hatudu domin no fó perdua ba malu ka lae? Se ita aprende agora oinsá atu perdua malu ho laran no hadiʼa relasaun ho ema seluk, neʼe sei fasil liu ba ita atu halo tuir iha mundu foun. (Kol 3:12, 13) Karik moris iha mundu foun la dehan katak ita hakarak saida deʼit bele hetan kedas. Neʼe dehan katak iha tempu neʼebá ita presiza kontente ho situasaun saida deʼit mak ita iha. Tan neʼe mak Jeová hanorin hela ita atu hatudu hahalok sira neʼebé ita sei presiza iha mundu foun. Se ohin loron mak ita iha toman atu moris iha dalan neʼebé ita atu moris iha mundu foun, neʼe sei ajuda ita prepara an ba atu hatudu hahalok diʼak sira bainhira ita hetan ona moris rohan-laek. Neʼe mós sei ajuda ita atu hametin ita-nia fiar katak mundu foun neʼe iha tebes duni. (Ebr 2:5; 11:1) Se ita halo tuir, neʼe hatudu katak ita rasik hakarak duni atu moris iha mundu foun, mundu neʼebé ema hotu halo tuir Jeová. w15 15/8 3:11, 12

Bainhira ita atu sosa ai-fuan tasak iha merkadu, ita bele haree katak ai-fuan ida-idak medida la hanesan. Maibé ita hatene katak ai-fuan sira-neʼe tasak ona, tanba karik ita bele haree husi ninia kór ka buat seluk husi ai-fuan sira-neʼe. Hanesan neʼe mós ho ema kristaun ida-idak, balu mai husi rai neʼebé la hanesan, sira-nia idade la hanesan, hahalok ka kultura la hanesan, maibé ita bele hatene sira liuhusi hahalok kristaun neʼebé sira hatudu loroloron. Hahalok sira-neʼe mak hanesan saida? Jeová nia atan neʼebé maduru moris tuir Jesus nia ezemplu. (1 Ped 2:21) Entaun ba Jesus, hahalok saida mak importante tebes? Neʼe mak hadomi Jeová ho laran, moris, no neon tomak. No mós hadomi ema seluk hanesan nia an rasik. (Mt 22:37-39) Tan neʼe mak iha moris loroloron nian, ema kristaun neʼebé maduru sempre hatudu katak nia hanoin liu kona-ba ninia relasaun ho Jeová no oinsá mak nia bele uza tempu atu ajuda ema seluk. w15 15/9 1:3-5

Konxiénsia neʼebé diʼak laʼós deʼit atu fó avizu ba ita kona-ba la bele halo buat neʼebé sala, maibé mós book ita atu halo buat diʼak oioin. Buat diʼak hanesan haklaken husi uma ba uma ka haklaken iha dalan la formál sira. Apóstolu Paulo rekoñese duni nuneʼe, tan neʼe mak nia hatete: “Tuir loloos, se haʼu la fó sai liafuan diʼak neʼe, susar boot mai haʼu!” (1 Kor 9:16) Se ita mak halo tuir apóstolu Paulo nia ezemplu, ita-nia konxiénsia mós sei sente diʼak tanba ita hatene katak ita halo buat neʼebé diʼak. No bainhira ita haklaken ba ema, neʼe hanesan ita fanu ema nia konxiénsia. Sin, ita bele fó treinu ba ita-nia konxiénsia hodi estuda beibeik Maromak nia Liafuan, hanoin kleʼan no aplika buat neʼebé ita estuda. Se ita halo nuneʼe, ita sei haree katak konxiénsia mak prezente furak duni husi Jeová ba ita-nia moris loroloron nian! w15 15/9 2:16, 18

Hanoin toʼok kona-ba José, Moisés, no David. Iha sira-nia moris, sira hasoru susar oioin, maibé Bíblia hatete katak iha tempu neʼebé sira hasoru susar, Jeová sempre hamutuk ho sira. Bainhira ita lee kona-ba istória oinsá Jeová ajuda ninia atan sira hasoru susar no terus, no ikusmai nia uza sira atu halaʼo ninia hakarak sira, neʼe halo ita sente katak Jeová hanoin no hadomi duni ninia atan sira. Bainhira Jeová fó dixiplina, neʼe mós hatudu nia iha domin. Porezemplu, bainhira Jeová fó dixiplina ba ema neʼebé halo sala no ema neʼe arrepende husi ninia sala, Jeová sei “fó perdua neʼebé boot tebes” ba ema neʼe. (Isa 55:7) Liafuan “fó perdua neʼebé boot tebes” katak sá? Husi David nia liafuan tuirmai neʼe ita bele haree kona-ba Jeová nia perdua neʼebé ho laran-luak neʼe. Nia dehan: “Nia fó perdua ba ó-nia sala hotu, no kura ó-nia moras hotu. Nia salva fali ó-nia moris husi rai-kuak. No tau koroa ba ó ho domin neʼebé laran-metin no ho laran-sadiʼa.” (Sal 103:3, 4) Tan neʼe mak ita tenke rona ba Jeová nia konsellu sira, simu ninia dixiplina, no halo tuir kedas, tanba liuhusi dalan sira-neʼe mak Jeová hatudu ninia domin neʼebé kleʼan ba ita.—Sal 30:5. w15 15/9 4:13, 14

Marta preokupa liu ho prepara teʼin hahán diʼak ba Jesus no ida neʼe halo nia estrese no sai nervozu ho Maria. Jesus nota katak Marta preokupa liu, tan neʼe ho laran-diʼak nia hatete: “Marta, Marta, ó hanoin resin kona-ba buat barak.” Depois, Jesus fó-hanoin ba Marta katak hahán bikan ida deʼit mós toʼo ona. Maibé tanba Maria rona ba Jesus, nia gaba nia no dehan: “Maria hili buat neʼebé diʼak, no ema ida sei la foti ida-neʼe husi nia.” (Lc 10:38-42) Ba Maria, karik han liutiha, nia sei haluha saida mak sira han iha momentu neʼe, maibé nia nunka sei haluha kona-ba Jesus nia liafuan hodi gaba nia, ka lia-loos neʼebé nia rona husi Jesus. Liutiha tinan 60, apóstolu João hatete: “Jesus hadomi Marta no nia alin.” (João 11:5) João nia liafuan neʼe hatudu katak Marta rona duni Jesus nia konsellu no serbí Jeová iha ninia moris tomak. w15 15/10 3:3, 4

Ita iha razaun barak atu fiar duni katak Jeová ajuda daudaun ninia povu ohin loron. Ita lee dala barak ona kona-ba ema balu neʼebé halo tiha orasaun husu Jeová nia ajuda, tuirmai Jeová hatán duni sira-nia orasaun. (Sal 53:2) Iha rai-Filipinas, iha illa kiʼik ida, Allan haklaken hela husi uma ba uma no nia koʼalia ba feto ida. Derrepente feto neʼe tanis. Allan dehan: “Afinál iha dadeer-saan neʼe, feto neʼe halo hela orasaun ba Jeová atu husu nia haruka ninia Testemuña bá buka nia. Tanba Maromak hatán lalais ba ninia orasaun, neʼe kona tebes ninia laran toʼo halo nia tanis.” Husi tempu neʼe la toʼo tinan ida nia mós dedika ninia moris ba Jeová. Bainhira ema ida para husi ninia toman aat ruma hanesan la fuma tan, la uza tan droga, ka la haree tan pornografia, nia rekoñese duni katak Jeová mak ajuda nia hodi bele para husi buat sira-neʼe. Ema balu hatete katak sira koko dala barak atu para husi buat sira-neʼe ho sira-nia kbiit rasik, maibé susar tebes atu iha susesu. Bainhira sira husu Jeová nia ajuda, Jeová fó sira “kbiit neʼebé la hanesan baibain”, no neʼe ajuda duni sira halakon toman aat sira-neʼe.—Sal 37:23, 24. w15 15/10 1:10, 11

Ema balu hadeer sedu atu lee, medita, no halo orasaun. Balu halo iha tempu deskansa iha meiudia. Karik ita bele lee iha kalan ka antes ita toba. Balu mós gosta lee Bíblia iha dadeer-saan no antes atu toba sira lee tan. (Jos 1:8) Buat importante mak atu uza tempu hodi medita didiʼak kona-ba Maromak nia Liafuan loroloron. Bíblia hatete katak Maromak sei fó bensaun ba sira neʼebé mak medita no uza beibeik ninia Liafuan iha sira-nia moris. (Sal 1:1-3) Jesus mós hatete katak: “Ksolok ba sira neʼebé rona Maromak nia liafuan no halo tuir!” (Lc 11:28) Importante liu mak, bainhira ita medita kona-ba buat espirituál nian loroloron, ita sei fó glória ba Jeová, no nia mós sei haraik solok ba ita agora no moris ba nafatin iha mundu foun.—Tgo 1:25; Apok 1:3. w15 15/10 4:17, 18

Bainhira Jesus hatete ba ninia dixípulu katak ema sei oho nia, Pedro hatete ba Jesus atu la bele fó-malisan ba ninia an. Jesus hatene katak Pedro hadomi nia, maibé nia mós hatene katak dalan neʼebé Pedro hanoin mak sala. Oinsá mak Jesus ajuda nia no mós dixípulu sira seluk? Primeiru, nia korrije Pedro. Depois nia esplika saida mak sei akontese ba ema neʼebé la halo Maromak nia hakarak tanba hasoru situasaun susar. Jesus mós dehan katak Jeová sei fó bensaun ba ema neʼebé la hanoin an deʼit. (Mt 16:21-27) Pedro aprende duni husi buat neʼebé Jesus hanorin. (1 Ped 2:20, 21) Halo orasaun ba Jeová atu fó ba Ita matenek atu komprende saida mak Ita-nia oan joven presiza. (Sal 32:8) Karik Ita haree katak nia ladún kontente ona hanesan uluk, ka nia kritika irmaun-irmán sira iha kongregasaun. Karik Ita sente iha buat ruma neʼebé nia subar husi Ita. Se nuneʼe, la bele deskonfia kedas katak nia halo sala daudaun. Maibé, Ita mós la bele husik deʼit no hein katak problema neʼe sei rezolve rasik, tanba karik Ita presiza ajuda nia hametin ninia fiar. w15 15/11 2:12, 13

Domin neʼebé loos no unidade mak fó sasin katak Jeová nia atan sira mak halaʼo relijiaun neʼebé loos, tanba Jesus hatete: “Ho ida-neʼe mak ema hotu sei hatene katak imi haʼu-nia dixípulu sira, se imi iha domin ba malu.” (João 13:34, 35) No apóstolu João mós hatete: “Nuneʼe, ita bele hatene Maromak nia oan no Diabu nia oan liuhusi ida-neʼe: Ema hotu neʼebé iha toman atu halo hahalok laloos la mai husi Maromak, nuneʼe mós ho ema neʼebé la hadomi ninia maluk. Neʼe mak lia-menon neʼebé imi rona ona horiuluk kedas katak ita tenke hadomi malu.” (1 João 3:10, 11) Domin neʼebé halo ita iha unidade mak hatudu katak Testemuña ba Jeová mak ema kristaun neʼebé loos, ita mak ema neʼebé Jeová uza atu halo ninia hakarak hodi haklaken liafuan diʼak toʼo mundu tomak.—Mt 24:14. w15 15/11 4:10, 11

Tanba ema nia kultura no relijiaun ida-idak la hanesan, tan neʼe ita presiza uza matenek atu hili tempu neʼebé loos hodi koʼalia ba ema. Iha tempu saida tan mak ita presiza hili tempu neʼebé loos atu koʼalia? Karik dala ruma ema ida bele koʼalia liafuan ruma neʼebé bele hakanek ita. Iha situasaun hanesan neʼe, karik diʼak atu hanoin didiʼak uluk atu hatán fali ka lae. Se ita atu hatán fali liafuan ruma ba nia, karik ladiʼak atu koʼalia fali ba nia iha tempu neʼebé ita hirus daudauk, tanba selae ita bele koʼalia sai liafuan sira neʼebé ita lakohi koʼalia. (Prov 15:28) Hanesan neʼe mós bainhira ita atu koʼalia ba ita-nia família sira kona-ba lia-loos. Ita hakarak sira hotu atu hatene Jeová, maibé ita tenke tetu didiʼak situasaun no hatudu pasiénsia. Se ita koʼalia liafuan neʼebé diʼak iha tempu neʼebé loos, karik ita bele halo sira rona ita. w15 15/12 3:6, 8, 9

Bainhira ita atu deside kona-ba tratamentu ruma, ita presiza iha “hanoin neʼebé loos”. Neʼe importante tebes liuliu se tratamentu neʼe la hanesan baibain. Diʼak atu buka-hatene pergunta sira-neʼe: Ema neʼebé fó tratamentu neʼe ba ita bele esplika didiʼak oinsá tratamentu neʼe bele ajuda ka lae? Ninia esplikasaun neʼe rona hanesan buat ruma la loos uitoan ka lae? Doutór barak konkorda katak ida-neʼe bele kura ema ka lae? (Prov 22:29) Karik ema ida dehan katak iha rai ida ema seluk hetan ona ai-moruk neʼebé bele kura moras ruma, maibé doutór sira seidauk hatene kona-ba neʼe. Tan neʼe, husu ba ita-nia an, ‘Ema nia koʼalia neʼe, iha ona prova ka lae?’ Iha tan ema seluk neʼebé dehan katak sira-nia ai-moruk halo husi ai-tahan ka ai-abut ruma no iha forsa ka kbiit espesiál neʼebé bele kura. Se ita rona neʼe ita presiza kuidadu tebes tanba Maromak fó avizu ba ita atu labele uza “forsa masonik nian” ka “matan-dook” nia atividade.—Deut 18:10-12; Isa 1:13. w15 15/12 4:16

Husi Bíblia ita bele lee kona-ba Jeová nia atan barak mak nia fó ninia espíritu santu ba sira, maibé Bíblia la temi katak sira mós iha esperansa atu moris ba nafatin iha lalehan. Ezemplu ida mak kona-ba João Batista. Maski Jesus gaba tebes nia, maibé Jesus hatete katak João Batista sei la simu kolen iha lalehan. Ezemplu seluk mak kona-ba David. Nia mós ema neʼebé Jeová haraik espíritu santu. No nia hatene buat kleʼan barak kona-ba Jeová no Jeová mós leno nia hodi hakerek eskritura balu. (1 Sam 16:13; Mc 12:36) Maibé iha loron Pentekostes apóstolu Pedro hatete katak David “la saʼe ba lalehan”. (Após 2:34) Maski Jeová fó ninia espíritu santu ba ema sira-neʼe hodi halo buat oioin, maibé espíritu santu neʼe la fó sasin ba sira katak sira mós Jeová hili atu moris iha lalehan. Neʼe la dehan katak ema sira-neʼe la serve ka menus buat ruma, maibé tan deʼit esperansa neʼebé Jeová fó ba sira mak atu moris-hiʼas iha mundu foun, laʼós iha lalehan.—João 5:28, 29; Após 24:15. w16.01 3:16

Bainhira ita serbisu hamutuk ho ema neʼebé ita hadomi, neʼe halo ita hakbesik liután ba ema neʼe no ajuda ita koñese ema neʼe diʼak liután. Ita bele hatene ema neʼe nia planu mak saida no oinsá mak nia atu kumpre ninia planu sira-neʼe. Jesus mós serbisu hamutuk ho Jeová ba tinan barak tebes, tan neʼe mak sira-nia domin ba malu sai metin tebes. Sira sempre iha unidade no serbisu hamutuk hodi apoia malu. Iha Jesus nia orasaun, nia husu ba Jeová atu tau matan ba ninia dixípulu sira. Tanbasá? Jesus dehan: “Atu nuneʼe sira bele sai ida deʼit hanesan haʼu no Ita.” (João 17:11) Se ita mak moris tuir Jeová nia morál sira no hola parte iha serbisu haklaken, neʼe sei ajuda ita atu komprende liután kona-ba Jeová nia hahalok sira. Neʼe sei ajuda ita hatene tanbasá mak matenek atu tau fiar no halo tuir Jeová. No bainhira ita hakbesik ba nia, nia mós sei hakbesik ba ita. (Tgo 4:8) Ida-neʼe mós halo ita hakbesik ba ita-nia irmaun-irmán sira tanba ita iha susar, solok, no planu neʼebé hanesan. w16.01 5:9, 10

Noemi hakarak laʼo nafatin ba Izraél, ninia moris-fatin. Oinsá ho Rute? Nia bele hili dalan rua, primeiru, fila ba ninia rai-Moab, ka segundu bá hamutuk ho ninia banin-feto, Noemi, atu ba Belein. (Rute 1:1-8, 14) Tuir loloos ba Rute, neʼe la problema ba nia atu fila ba Moab. Ninia família sei simu fali nia hodi tau matan ba nia. Nia mós koñese ema Moab nia língua no kultura tanba neʼe mak ninia língua no kultura rasik. Maibé, se nia fila ho Noemi ba Belein, neʼe bele sai problema ida ba nia. Tan neʼe Noemi husu ba nia atu hela deʼit iha Moab, tanba Noemi taʼuk katak nia la bele buka laʼen foun ida ka uma ida ba Rute. Entaun, saida mak Rute deside atu halo? Orpa “fila fali ona ba ninia povu no ninia maromak sira”. (Rute 1:9-15) Rute mós hakarak atu fila fali ba ninia ema no ninia maromak falsu sira ka lae? Lae. w16.02 2:4, 5

Saul ho ninia soldadu 3.000 buka hela David iha Judeia nia rai-fuik maran atu oho nia. Maibé kalan ida, David ho ninia ema sira buka-hetan fatin neʼebé Saul ho ninia ema sira hela bá. Iha kalan neʼe sira hotu toba-dukur. Entaun, David ho Abisai laʼo nonook tama ba tenda laran no hetan Saul toba hela. Abisai bisibisi ba David: “Husik haʼu sona metin [Saul] ba rai ho diman dala ida deʼit, no haʼu sei la presiza halo neʼe ba dala rua.” Maibé David la fó lisensa ba Abisai atu halo nuneʼe. David hatete ba nia: “Keta halo aat ba nia, tanba sé mak bele foti nia liman hasoru ema neʼebé Jeová hili no la simu sala kona-ba neʼe? . . . Tuir Jeová nia hanoin, haʼu labele duni atu foti haʼu-nia liman hodi kontra hasoru ema neʼebé Jeová hili!” (1 Sam 26:8-12) Tanbasá mak David lakohi halo aat ba Saul? Tanba nia hatene katak dalan neʼebé nia trata Saul liga ho ninia laran-metin ba Jeová. Nia hatene katak Jeová mak hili Saul hodi sai ema Izraél nia liurai, tan neʼe nia tenke respeitu no la hanoin atu halo aat ba Saul. Ohin loron mós hanesan, se ita hakarak hatudu laran-metin ba Jeová, ita tenke hatudu respeitu ba ema sira neʼebé nia uza. w16.02 4:1, 2

Ita mak joven neʼebé hanoin hela atu hetan batizmu ka lae? Se nuneʼe, neʼe mak buat kmanek neʼebé Ita halo iha Ita-nia moris. Batizmu mak desizaun neʼebé sériu tebes. Liuhusi batizmu mak ita hatudu ba ema seluk katak ita dedika an ona ba Jeová. Neʼe katak ita promete ba Jeová ita sei serbí nia ba nafatin, no buat neʼebé importante liu iha ita-nia moris mak hodi halo tuir ninia hakarak. Tan neʼe mak atu hetan batizmu, importante atu sai maduru iha lia-loos. Ita rasik mak tenke halo desizaun neʼe, no Ita mós tenke komprende uluk dedikasaun katak sá. Oinsá se Ita sente katak ita seidauk prontu atu hetan batizmu? Ka karik Ita sente katak Ita prontu ona maibé Ita-nia inan-aman mak hanoin katak diʼak liu Ita hein toʼo Ita sai maduru uitoan mak bele hetan batizmu. Saida mak Ita tenke halo? Keta sente laran-tun. Diʼak atu uza tempu neʼe hodi hakaʼas an laʼo ba oin liután atu nuneʼe iha futuru Ita bele hetan batizmu. w16.03 2:1, 2

Iha irmaun ka irmán balu neʼebé sira-nia kaben laʼós Testemuña. Neʼe tanba antes sira aprende lia-loos, sira kaben ona. Iha situasaun sira hanesan neʼe, diʼak atu hakaʼas an hodi hametin moris kaben nian liuhusi halo tuir konsellu sira husi Bíblia. No mós ohin loron Satanás hakarak tebes atu sobu moris família nian. Tan neʼe mak importante tebes ba feen-laʼen sira neʼebé adora Jeová tenke serbisu hamutuk no apoia malu nafatin. Maski ita kaben kleur ona ka foin kaben, ita tenke kuidadu nafatin dalan neʼebé ita koʼalia no buat neʼebé ita halo atu moris kaben nian bele metin nafatin. Se Ita mak kaben ba tempu kleur ona, Ita bele sai nuʼudar ezemplu diʼak ba sira neʼebé foin kaben. Karik Ita bele konvida sira tuir Ita-nia adorasaun família nian. Neʼe sei ajuda sira atu haree katak kaben-naʼin sira presiza hatudu domin ba malu nafatin no iha unidade iha sira-nia moris kaben nian maski sira kaben kleur ona ka foin kaben.—Tito 2:3-7. w16.03 3:14, 15