Dezembru

Se ita la kontrola ita-nia liafuan, neʼe bele lori problema barak. Porezemplu, se Ita hasoru irmaun ka irmán ida neʼebé hela iha rai neʼebé governu bandu serbisu haklaken, Ita sei husu nia atu konta kona-ba serbisu haklaken iha ninia rai ka lae? Klaru katak Ita iha motivu diʼak. Ita hadomi irmaun-irmán sira no hakarak hatene sira-nia situasaun. Ita mós hakarak halo orasaun espesífiku kona-ba sira. Maibé, neʼe mak tempu atu kontrola ita-nia liafuan no nonook deʼit. Se ita obriga ema atu fó sai informasaun segredu, ita la hatudu domin ba ema neʼe no ba irmaun-irmán sira neʼebé iha konfiansa katak ema neʼe sei rai didiʼak segredu sira. Ita hotu lakohi duni atu aumenta susar ba irmaun-irmán sira neʼebé hela iha rai neʼebé governu bandu serbisu haklaken. Nuneʼe mós, irmaun-irmán sira-neʼe sei la fó sai oinsá sira halaʼo serbisu haklaken ka halo atividade Kristaun nian seluk. w20.03 p. 21-22 par. 11-12

Maromak nia objetivu mak laʼós atu ema mate. Maibé atu bele moris ba nafatin, Adão no Eva tenke halo tuir Jeová. Nia fó mandamentu simples ba sira hodi dehan: “Ai-hun koñesimentu kona-ba buat diʼak no aat, ó labele han ninia fuan, tanba iha loron neʼebé ó han ai-fuan neʼe, ó sei mate duni.” (Gén 2:16, 17) Depois neʼe, Satanás hamosu problema. Nia uza samea hodi koʼalia ba Eva liafuan neʼebé temi iha eskritura ba ohin. Triste katak Eva fiar lia-bosok neʼe no han ai-fuan neʼe. Ikusmai, ninia laʼen mós han ai-fuan neʼe. (Gén 3:6) Ho ida-neʼe, sala no mate tama iha mundu. (Rom 5:12) Adão no Eva mate hanesan Maromak hatete ona ba sira. Maibé Satanás la para atu lohi ema kona-ba mate. Ikusmai, nia komesa hanorin lia-bosok seluk. Lia-bosok ida mak hanorin katak maski ema nia isin mak mate, maibé ninia klamar sei kontinua moris. Lia-bosok neʼe lohi ona ema rihun ba rihun toʼo ohin loron.​—1 Tim 4:1. w19.04 p. 14-15 par. 3-4

Labarik sira seidauk hatene ho didiʼak oinsá atu halo desizaun ka rekoñese perigu no hasees an. Tan neʼe, fasil loos ba ema atu lohi no abuza sira. Ema neʼebé abuza labarik bosok labarik ho liafuan sira hanesan, labarik mak sala, labarik tenke rai ­segredu kona-ba buat neʼebé akontese ona, ema sei la rona no ajuda sira se sira fó sai kona-ba neʼe, ka hahalok seksuál entre ema boot no labarik mak normál. Lia-bosok sira-neʼe bele estraga labarik sira-nia kbiit atu hanoin, no presiza tinan barak atu labarik sira komprende katak buat sira-neʼe mak lia-bosok. Labarik sira-neʼe sei sai boot ho sentimentu katak sira la iha folin ka la merese atu hetan domin no kmaan. Agora ita komprende tanbasá vítima ba abuzu seksuál terus ba tinan barak. Ita moris iha loron ikus sira, no ema sei “la hadomi malu” no mós “ema aat . . . sei sai aat liután”.​​—2 Tim 3:1-5, 13. w19.05 p. 15 par. 7-8

Iha dalan saida deʼit mak Jesus hanorin? Primeiru, nia hanorin ema liuhusi ninia liafuan. Ninia liafuan iha kbiit tanba fó sai lia-loos kona-ba Maromak, objetivu ba moris, no Maromak nia Ukun mak dalan ida deʼit atu halakon ema nia terus. (Lc 24:19) Jesus mós hanorin liuhusi ninia ezemplu. Liuhusi dalan neʼebé nia halaʼo ninia moris, nia hatudu ba ninia dixípulu sira oinsá atu halaʼo sira-nia moris. (João 13:15) Bainhira mak Jesus hanorin? Nia hanorin durante ninia serbisu haklaken iha rai. (Mt 4:23) Nia mós hanorin ninia dixípulu sira lakleur depois nia hetan moris-hiʼas. Porezemplu, nia mosu ba dixípulu maizumenus naʼin-500 no fó mandamentu ba sira atu ‘hanorin ema sai dixípulu’. (Mt 28:19, 20; 1 Kor 15:6) Nuʼudar ulun ba kongregasaun, Jesus kontinua hanorin ninia dixípulu sira depois nia fila fali ba lalehan. Porezemplu, maizumenus iha tinan 96 EC, Kristu dirije apóstolu João atu anima no fó konsellu ba ema Kristaun kose-mina sira.​—Kol 1:18; Apok 1:1. w19.05 p. 3 par. 4-5

Ohin loron, ema barak serbisu makaʼas atu hetan sira-nia presiza. Ita-nia irmaun-irmán barak mós presiza serbisu makaʼas atu bele sustenta sira-nia família. Irmaun-irmán balu presiza uza oras barak atu bá-mai serbisu-fatin. Irmaun-irmán seluk halo serbisu todan atu bele sustenta sira-nia família. Kuandu serbisu remata, sira sente kole tebetebes. Tanba kole demais sira la iha tan forsa atu estuda mesak. Tuir loloos, ita tenke buka tempu atu bele estuda didiʼak Maromak nia Liafuan no mós ita-nia publikasaun sira. Neʼe importante tebes se ita hakarak atu iha relasaun diʼak ho Maromak no moris ba nafatin. (1 Tim 4:15) Ema balu hadeer sedu no estuda bainhira tempu hakmatek no sira-nia neon sei fresku hela. Ema seluk uza minutu balu iha kalan atu estuda no medita bainhira la iha buat seluk dada sira-nia atensaun. w19.05 p. 26 par. 1-2

Mudansa hanesan neʼe la akontese derrepente deʼit. Ita presiza “hakaʼas an ho kbiit tomak” ba tempu kleur. (2 Ped 1:5) Ita tenke hakaʼas an atu troka ita-nia hanoin no laran. Hakat importante primeiru mak orasaun. Ita presiza halo orasaun hanesan David: “Oh Maromak, fó laran neʼebé moos ba haʼu, no fó espíritu foun no neon metin ba haʼu.” (Sal 51:10) Ita tenke rekoñese katak ita presiza troka ita-nia dalan atu hanoin no husu Jeová nia ajuda. Hakat importante segundu mak hanoin kleʼan. Bainhira ita lee Maromak nia Liafuan loroloron, ita presiza buka tempu atu hanoin kleʼan kona-ba ita-nia hanoin no sentimentu neʼebé ita presiza troka. (Sal 119:59; Ebr 4:12; Tgo 1:25) Ita tenke buka-hatene se ita-nia hanoin no sentimentu hetan ona influénsia ka lae husi mundu nia filozofia. Ita presiza rekoñese ita-nia fraku sira no tuirmai hakaʼas an atu hadiʼa fraku sira-neʼe. w19.06 p. 8 par. 1; p. 10 par. 10; p. 12 par. 11-12

Bainhira halo desizaun ruma, determina tempu neʼebé Ita hakarak atu halo tuir Ita-nia desizaun no labele troka tempu neʼe. Keta hein toʼo tempu diʼak mak foin komesa halo tuir Ita-nia desizaun, tanba karik Ita sei nunka hetan tempu diʼak. (Ecle 11:4) Labele husik buat neʼebé ladún importante atu dada Ita-nia atensaun toʼo Ita la iha tempu ka forsa atu halo buat neʼebé importante liu. (Flp 1:10) Se bele, hili tempu neʼebé ema sei la atrapalla Ita. Fó-hatene ema seluk katak Ita presiza tempu atu fokus. Diʼak atu taka Ita-nia telefone no labele haree Ita-nia e-mail ka média sosiál durante tempu neʼe. Rezultadu husi Ita-nia desizaun mak hanesan ho fatin neʼebé Ita planu atu vizita. Se Ita hakarak tebes atu toʼo fatin ida, neʼe sei motiva Ita atu kontinua Ita-nia viajen maski dalan taka no presiza uza dalan seluk. Nuneʼe mós, se Ita fokus ba rezultadu husi Ita-nia desizaun, Ita sei la rende an lalais bainhira buat ruma hanetik Ita.​—Gal 6:9. w19.11 p. 30 par. 17-18

Saida mak razaun importante liu atu hetan batizmu? Hodi estuda didiʼak Bíblia, Ita aprende buat barak kona-ba Jeová, hanesan ninia hahalok no dalan sira. Buat neʼebé Ita aprende kona-ba nia book Ita-nia laran no halo Ita hadomi tebes nia. Ita-nia domin ba Jeová mak razaun importante liu atu hetan batizmu. Razaun seluk atu hetan batizmu mak Ita aprende ona lia-loos husi Bíblia no Ita fiar ida-neʼe. Hanoin toʼok Jesus nia liafuan bainhira nia fó mandamentu atu hanorin ema sai dixípulu. (Mt 28:19, 20) Jesus dehan katak ema tenke hetan batizmu “hodi Aman, Oan no espíritu santu nia naran”. Neʼe katak sá? Neʼe katak Ita tenke fiar ho laran tomak lia-loos husi Bíblia ­kona-ba Jeová, ninia Oan-Mane Jesus, no ­espíritu santu. Lia-loos sira-neʼe importante tebes no bele book duni Ita-nia laran. w20.03 p. 9 par. 8-9

Jeová laʼós deʼit haruka anju sira atu fó avizu ba Lot maibé mós ajuda Lot halai sai husi dezastre iha Sodoma. (Gén 19:12-14, 17) Hanesan neʼe mós, karik ita presiza fó avizu ba ita-nia irmaun ka irmán se nia halo buat ruma neʼebé lori susar ba nia. Maski karik nia neineik atu aplika Bíblia nia konsellu neʼebé nia simu, ita presiza hatudu pasiénsia. Banati-tuir anju naʼin-rua nia ezemplu. Duké rende an atu ajuda no hadook an husi ita-nia irmaun ka irmán, ita tenke kontinua buka dalan atu ajuda nia. (1 João 3:18) Karik ita presiza ajuda nia aplika konsellu diʼak neʼebé nia simu, ida-neʼe hanesan ita kaer ninia liman atu ajuda nia. Jeová la tau fokus ba Lot nia fraku sira. Jeová book apóstolu Pedro atu hakerek katak Lot mak mane neʼebé laran-loos. (Sal 130:3) Ita bele ka lae banati-tuir dalan neʼebé Jeová haree Lot? Se ita tau fokus ba irmaun-irmán sira-nia hahalok diʼak, ida-neʼe ajuda ita atu hatudu pasiénsia liután ba sira. Karik neʼe sei book sira atu simu ita-nia ajuda. w19.06 p. 21 par. 6-7

Se governu bandu ita-nia adorasaun, karik Ita hanoin katak Ita presiza muda ba rai seluk atu bele serbí Jeová ho livre. Neʼe mak Ita rasik nia desizaun no ema seluk labele halo desizaun neʼe ba Ita. Antes halo desizaun, karik diʼak atu hanoin uluk esperiénsia husi ema Kristaun iha apóstolu sira-nia tempu bainhira ema fó-terus ba sira. Dixípulu sira iha Jeruzalein muda ba Judeia, Samaria, Fenísia, Xipre no Antiokia. (Mt 10:23; Após 8:1; 11:19) Maibé bainhira ema fó-terus dala ida tan ba ema Kristaun iha apóstolu sira-nia tempu, apóstolu Paulo deside atu la muda husi área neʼebé ema kontra serbisu haklaken. (Após 14:19-23) Saida mak ita bele aprende husi istória sira-neʼe? Ulun ba família ida-idak tenke halo desizaun kona-ba muda ka lae. Antes deside, nia tenke halo orasaun no hanoin kona-ba ninia família nia situasaun, no mós hanoin kona-ba buat diʼak ka aat neʼebé bele akontese. Ita labele tesi-lia ba ema seluk nia desizaun. w19.07 p. 10 par. 8-9

Jesus haruka ita atu ‘bá no hanorin ema husi nasaun hotu atu sai ninia dixípulu’. (Mt 28:19) Ita presiza hanorin estudante kona-ba saida mak Jesus hakarak atu ninia dixípulu sira halo, no mós ajuda estudante atu hatene oinsá atu halaʼo moris nuʼudar ema Kristaun loos. Ita tenke pasiénsia atu ajuda estudante nuʼudar nia koko atu aplika Bíblia nia prinsípiu sira. Ema balu konsege troka sira-nia hanoin no toman durante fulan balu deʼit. Maibé ema seluk presiza tempu kleur. Esperiénsia husi misionáriu ida iha rai-Perú hatudu tanbasá diʼak atu hatudu pasiénsia. Misionáriu neʼe dehan: “Haʼu estuda ona livru rua hamutuk ho estudante Bíblia ida naran Raúl. Maibé nia presiza halo tan mudansa barak. Ninia moris kaben nian runguranga, nia toman atu tolok, no ninia oan sira sente susar atu respeitu nia. Maski nuneʼe nia tuir reuniaun beibeik, entaun haʼu kontinua vizita atu ajuda nia no ninia família. Tinan tolu liutiha mak nia kumpre kritéria atu hetan batizmu.” w19.07 p. 15 par. 3; p. 19 par. 15-17

Hanoin toʼok kona-ba buat hotu neʼebé apóstolu Paulo halo bainhira nia hakerek karta ba ema Filipe. Momentu neʼe nia hela iha uma ida iha Roma nuʼudar dadur. Nia labele sai husi uma atu bá haklaken. Maibé, nia kontinua okupadu atu haklaken ba ema neʼebé vizita nia no hakerek karta ba kongregasaun sira neʼebé dook. Paulo hatene katak, hanesan Kristu, nia tenke hakaʼas an toʼo rohan. Tan neʼe nia kompara ema Kristaun nia moris hanesan halai-taru. (1 Kor 9:24-27) Ema neʼebé halai-taru kontinua fokus atu halai toʼo rohan no la husik buat ruma dada ninia atensaun. Porezemplu, ema neʼebé halai-taru iha sidade karik halai liuhusi dalan neʼebé iha loja barak no mós buat seluk neʼebé bele dada ninia atensaun. Tuir Ita-nia hanoin, ema neʼebé halai-taru sei para atu haree ba sasán sira iha loja ka lae? Se nia hakarak manán, nia sei la halo ida-neʼe. Iha halai-taru atu manán moris, ita mós tenke hasees an husi buat neʼebé bele dada ita-nia atensaun. Se ita tau fokus ba ita-nia kolen no hakaʼas an atu serbí Jeová hanesan Paulo, ita sei simu kolen. w19.08 p. 3 par. 4; p. 4 par. 7

Bainhira ita deside atu serbí Maromak, ita halo mudansa iha ita-nia moris no ita-nia fiar. Karik ita-nia família sente susar atu simu mudansa sira-neʼe. Dala barak, buat primeiru neʼebé sira nota mak ita la apoia tan sira atu selebra loron-boot relijiaun nian no mós la hola parte tan iha polítika. Foufoun, karik ita-nia família balu sai hirus ba ita. (Mt 10:35, 36) Maibé ita labele rende an. Se ita para atu ajuda sira komprende ita-nia fiar, neʼe hanesan ita tesi-lia ona katak sira la merese atu simu moris rohan-laek. Jeová la fó ita knaar atu tesi-lia, nia fó ona knaar neʼe ba Jesus. (João 5:22) Se ita hatudu pasiénsia, karik ikusmai ita-nia família sei rona ba ita. Ita presiza hatudu laran-diʼak maibé nafatin kaer metin ba ita-nia desizaun, maski ita tenke tahan susar. (1 Kor 4:12b) Karik presiza tempu atu ita-nia família komprende katak serbí Jeová mak importante tebes ba ita. w19.08 p. 17 par. 10, 13; p. 18 par. 14

Bainhira Ita hanoin fali susar neʼebé uluk Ita hasoru, karik Ita hanoin: “Haʼu rekoñese katak haʼu tahan susar neʼe laʼós ho haʼu-nia kbiit rasik.” Karik Ita tahan ona moras todan ka ema neʼebé Ita hadomi mate. Bainhira Ita hanoin kona-ba susar sira-neʼe, Ita sente katak Ita konsege tahan susar ba loron ida-idak tanba Jeová nia espíritu santu fó Ita “kbiit neʼebé la hanesan baibain”. (2 Kor 4:7-9) Ita mós presiza espíritu santu atu ajuda ita tahan influénsia aat husi mundu neʼe. (1 João 5:19) Liután neʼe, ita presiza kbiit atu “kontra anju aat sira”. (Éf 6:12) Jeová nia espíritu santu ajuda ita hodi fó ita kbiit ka forsa atu kumpre ita-nia responsabilidade hotu maski hasoru susar. Apóstolu Paulo sente katak nia bele kontinua serbí Jeová no kumpre ninia serbisu haklaken maski hasoru susar tanba nia sadere ba “Kristu nia kbiit”.​—2 Kor 12:9. w19.11 p. 8 par. 1-3

Bíblia deʼit mak esplika ho loloos saida mak Jesus halo ona ba Ita. Haburas domin ba Jesus sei ajuda Ita hadomi Jeová liután. Tanbasá? Tanba Jesus haleno ninia Aman nia hahalok ho perfeitu. Tan neʼe, bainhira Ita aprende liután kona-ba Jesus, Ita sei komprende no hafolin Jeová liután. Hanoin kona-ba dalan neʼebé Jesus hatudu laran-sadiʼa ba sira neʼebé ema seluk hakribi, hanesan ema kiak, moras, ka fraku. Hanoin mós kona-ba konsellu diʼak neʼebé Jesus fó ba Ita no oinsá Ita-nia moris sai diʼak liu tanba halo tuir konsellu sira-neʼe. (Mt 5:1-11; 7:24-27) Ita-nia domin ba Jesus sei sai boot liután bainhira Ita hanoin kleʼan kona-ba sakrifísiu neʼebé Jesus halo ona atu ita bele hetan perdua ba ita-nia sala. (Mt 20:28) Bainhira Ita komprende ­katak Jesus prontu atu mate ba Ita, neʼe bele book Ita atu ­arrepende an no husu perdua ba Jeová. (Após 3:19, 20; 1 João 1:9) Bainhira Ita hadomi Jesus no Jeová, neʼe sei book Ita atu hakarak halibur hamutuk ho ema neʼebé hadomi mós sira. w20.03 p. 5-6 par. 10-12

Irmaun ida bele komesa hanoin katak nia deʼit mak bele halaʼo knaar ruma. Ka irmán ida bele hanoin: ‘Haʼu-nia laʼen bele halaʼo knaar neʼe diʼak liu fali irmaun seluk!’ Maski nuneʼe, se Ita mak haraik an duni, Ita sei la hanoin hanesan neʼe. Ita bele aprende husi buat neʼebé Moisés halo kuandu ema seluk hetan knaar ruma. Moisés hafolin ninia knaar atu dirije povu Izraél. Maibé bainhira Jeová husik ema seluk serbí hamutuk ho Moisés, saida mak Moisés halo? Nia la sai laran-moras. (Núm 11:24-29) Nia ho haraik an simu ema seluk nia ajuda atu tesi-lia ba povu sira. (Éx 18:13-24) Neʼe diʼak ba nasaun Izraél tanba sira iha mane barak liu neʼebé bele tesi-lia. Neʼe hatudu mai ita katak Moisés hanoin liu kona-ba ajuda ema seluk duké hanoin liu atu simu priviléjiu barak. Neʼe ezemplu kapás tebes! Hanoin-hetan katak se ita hakarak Jeová uza ita, haraik an mak importante liu duké ita-nia matenek. w19.09 p. 5-6 par. 13-14

Ita la hatene ho loloos nasaun sira sei fó sai razaun saida bainhira ataka Babilónia Boot. Karik sira sei dehan katak relijiaun sira hanetik dame no sempre mete ho polítiku. Ka karik sira sei dehan katak relijiaun sira halibur rikusoin no rai barak liu. (Apok 18:3, 7) Bainhira nasaun sira ataka relijiaun falsu, karik sira sei la halakon ema hotu neʼebé sai membru ba relijiaun sira-neʼe. Maibé karik halakon deʼit relijiaun sira. Bainhira relijiaun sira-neʼe lakon ona, ninia membru sira karik sei rekoñese katak ulun-naʼin relijiaun sira lohi ona sira. No membru sira-neʼe mós karik sei dehan katak sira la iha ligasaun tan ho relijiaun sira-neʼe. Atu halakon Babilónia Boot, sei akontese ba tempu badak deʼit. (Apok 18:10, 21) Jeová promete atu “habadak tempu” terus boot atu nuneʼe “ema sira neʼebé nia hili ona” no relijiaun loos sei la lakon.​—Mc 13:19, 20. w19.10 p. 15 par. 4-5

Inan sira, kuandu Ita sei kiʼik karik Ita-nia inan-aman hirus beibeik no koʼalia liafuan kroʼat. Tan neʼe, karik Ita hanoin katak normál atu trata oan iha dalan hanesan neʼe. Maski Ita aprende ona kona-ba Jeová nia matadalan sira, maibé karik Ita sente susar atu kalma nafatin no hatudu pasiénsia ba Ita-nia oan kuandu sira nakar, liuliu se Ita kole. (Éf 4:31) Iha tempu hanesan neʼe, importante atu sadere liután ba Jeová liuhusi orasaun. (Sal 37:5) Inan seluk sente susar atu hatudu domin ba sira-nia oan. Razaun ida mak tanba sira la hetan domin husi sira-nia inan-aman. Se Ita sai boot iha família hanesan neʼe, Ita la presiza hatudu hahalok hanesan Ita-nia inan-aman. Inan neʼebé hakruʼuk ba Jeová karik presiza aprende oinsá atu hatudu domin ba ninia oan. Karik susar ba nia atu troka. Maibé nia bele halo mudansa, no neʼe sei lori benefísiu ba nia no mós ba ninia família. w19.09 p. 18-19 par. 19-20

Ema neʼebé adora Jeová maibé uza mós tempu barak no hakaʼas an atu sai riku iha mundu neʼe mak hanesan ema neʼebé koko atu serbí patraun naʼin-rua. Nia la adora Jeová mesak deʼit. Antes tinan 100 EC, ema Kristaun iha kongregasaun iha sidade Laodiseia gaba an hodi dehan: “Haʼu riku, haʼu halibur ona rikusoin no la presiza tan buat seluk.” Maibé tuir Jeová no Jesus, ema sira-neʼe “la kontente, kuitadu liu, kiak, matan-delek no isin-tanan”. Jesus fó konsellu ba sira laʼós tanba sira riku, maibé tanba sira-nia domin ba rikusoin estraga sira-nia relasaun diʼak ho Jeová. (Apok 3:14-17) Se ita sente katak hakarak atu buka rikusoin sai buras iha ita-nia laran, ita tenke hadiʼa ida-neʼe lalais. (1 Tim 6:7, 8) Se lae, ita sei komesa hadomi rikusoin no Jeová sei la simu ita-nia adorasaun. Nia ‘hakarak ita atu adora nia mesak deʼit’.​​—Deut 4:24. w19.10 p. 27 par. 5-6

Liafuan Gregu neʼebé tradús nuʼudar “book” bele signifika “lori; dirije”. Lucas neʼebé hakerek livru Apóstolu, uza liafuan Gregu neʼebé besik atu hanesan bainhira esplika kona-ba ró neʼebé anin “lori”. (Após 27:15) Matenek-naʼin ida kona-ba Bíblia dehan katak apóstolu Pedro uza fraze neʼebé halo ema hanoin kona-ba halo viajen ho ró bainhira nia hatete katak espíritu santu mak “dirije” ema atu hakerek Bíblia. Pedro nia liafuan neʼe hatudu katak hanesan anin lori ró atu bele kumpre ninia viajen, nuneʼe mós espíritu santu dirije ema sira neʼebé hakerek Bíblia atu kumpre sira-nia knaar. Matenek-naʼin neʼe mós dehan katak ema sira neʼebé hakerek Bíblia mak hanesan ró neʼebé loke ona ninia laan. Sira prontu atu halo serbisu neʼebé espíritu santu dirije sira atu halo. Jeová halo ninia parte. Nia fó “anin” ka espíritu santu. Ema sira neʼebé hakerek Bíblia mós halo sira-nia parte. Sira husik espíritu santu dirije sira. No ohin loron, ita bele kompara espíritu santu ho anin. Anin neʼebé huu ba diresaun neʼebé loos bele lori ró toʼo fatin ho seguru maski laloran boot. Nuneʼe mós, espíritu santu bele ajuda ita kontinua serbí Jeová toʼo mundu foun maski ita hasoru susar. w19.11 p. 9 par. 7-9

Dala ruma ita sente laran-kraik. Maibé ita labele hanoin beibeik kona-ba ita-nia problema sira. Se lae, karik ita sei haluha buat diʼak hotu neʼebé Jeová promete ona ba ita. (Apok 21:3, 4) Sentimentu laran-kraik bele hamenus ita-nia forsa no halo ita rende an. Hanoin toʼok oinsá irmán ida iha Estadus Unidus mantein ninia fiar nuʼudar nia tau matan ba ninia laʼen neʼebé moras todan. Nia hakerek karta, hodi dehan: “Dala ruma ami-nia situasaun halo ami estrese no laran-kraik, maibé ami iha esperansa. Haʼu agradese tebes ba buat hotu neʼebé Jeová fó ona ba ami atu hametin ami-nia fiar no atu anima ami. Ami presiza duni matadalan no anima. Neʼe ajuda ami atu kontinua serbí Jeová no tahan susar.” Irmán neʼe nia esperiénsia hanorin ita katak ita bele manán hasoru laran-kraik. Oinsá? Haree Ita-nia susar sira nuʼudar koko husi Satanás. Iha konfiansa katak Jeová sei fó kmaan ba Ita. No hafolin ai-han espirituál neʼebé nia fó. w19.11 p. 16 par. 9-10

Importante ba katuas kongregasaun sira atu halo tuir Bíblia nia prinsípiu. Katuas ida komprende katak nia labele fó sai ba ninia feen informasaun privadu kona-ba ema seluk iha kongregasaun. Se nia fó sai segredu, neʼe sei estraga ninia naran diʼak no ema sei la konfia tan nia. Ema sira neʼebé simu responsabilidade iha kongregasaun labele “laran-makerek” ka bosok. (1 Tim 3:8, nota) Neʼe katak sira labele lohi ema seluk ka konta ema nia vida. Se katuas ida hadomi ninia feen, nia sei la hatodan ninia feen ho informasaun neʼebé ninia feen la presiza hatene. Feen bele ajuda ninia laʼen atu kontinua iha naran diʼak hodi la obriga ninia laʼen atu koʼalia kona-ba informasaun neʼebé segredu. Bainhira feen halo tuir konsellu neʼe, nia sei apoia ninia laʼen no mós hatudu respeitu ba ema sira neʼebé fó sai informasaun segredu ba ninia laʼen. No importante liu mak nia halo Jeová kontente tanba nia haburas dame no unidade iha kongregasaun laran.​—Rom 14:19. w20.03 p. 22 par. 13-14

Iha tinan 1512 AEC, bainhira ema Izraél harii tenda santu iha Foho Sinai nia hun, Moisés mak dirije serimónia atu entrega podér ba Arão no ninia oan-mane sira atu serbí nuʼudar amlulik. (Éx 40:17; Lev 9:1-5) Oinsá Jeová hatudu katak nia simu amlulik foun sira-neʼe? Bainhira Arão no Moisés haraik bensaun ba povu, Jeová hatún ahi hodi han mohu sakrifísiu neʼebé sei iha altár leten. (Lev 9:23, 24) Ahi husi lalehan hatudu saida? Liuhusi ahi neʼe, Jeová hatudu katak nia apoia Arão no ninia oan-mane sira atu sai amlulik. Bainhira ema Izraél haree ho klaru katak Jeová apoia amlulik sira, ema Izraél komprende katak sira mós presiza apoia amlulik sira. Tanbasá neʼe importante mai ita? Tanba amlulik sira iha Izraél antigu reprezenta amlulik sira neʼebé diʼak liu neʼe mak, naʼin-144.000 neʼebé sei serbí hamutuk ho Kristu iha lalehan. (Ebr 4:14; 8:3-5; 10:1) Ita la duvida katak Jeová dirije no haraik bensaun barak ba ninia organizasaun ohin loron. w19.11 p. 23 par. 13; p. 24 par. 14, 16

Bainhira iha Korinto, apóstolu Paulo hela ho Áquila no Priscila. No Paulo “halo serbisu hamutuk” ho sira tanba sira mós halo tenda. Maski Paulo serbisu “loron no kalan”, maibé neʼe la dehan katak nia serbisu la para. Dala ruma, nia para husi ninia serbisu atu halo tenda, hanesan iha loron Sábadu. Loron neʼe sai nuʼudar oportunidade ba nia atu haklaken ba ema Judeu neʼebé mós la serbisu iha loron Sábadu. (Após 13:14-16, 42-44; 16:13; 18:1-4) Paulo presiza serbisu, maibé nia buka tempu atu hola parte beibeik “atu haklaken liafuan diʼak husi Maromak”. (Rom 15:16; 2 Kor 11:23) Nia mós anima ema seluk atu haklaken beibeik. ­Paulo dehan katak Áquila no Priscila mak ninia “maluk serbisu-naʼin iha Kristu Jesus”. (Rom 12:11; 16:3) Paulo anima ema Kristaun iha Korinto atu “sai badinas nafatin iha Naʼi nia serbisu”. (1 Kor 15:58; 2 Kor 9:8) Jeová mós dirije apóstolu Paulo atu hakerek: “Se ema ida lakohi serbisu, keta fó hahán ba nia atu han.”​—2 Tes 3:10. w19.12 p. 5 par. 12-13

Jeová kria mane no feto primeiru ho hakarak atu iha oan. Maibé sé mak presiza deside se feen-laʼen atu iha oan ka lae no bainhira mak iha oan? Iha kultura balu, ema hanoin katak mane no feto neʼebé foin kaben tenke iha oan kedas. Sira-nia família no ema seluk karik koko obriga sira atu iha oan lalais. Irmaun ida husi Ázia naran Jethro hatete: “Iha kongregasaun, irmaun-irmán sira neʼebé iha oan obriga feen-laʼen seluk atu iha oan.” Irmaun seluk husi Ázia naran Jeffrey hatete: “Ema balu hatete ba feen-laʼen neʼebé la iha oan katak la iha ema ida mak sei tau matan ba sira bainhira sira sai ferik-katuas.” Maibé tuir loloos, feen-laʼen ida-idak mak tenke deside se sira hakarak iha oan ka lae tanba ida-neʼe mak sira-nia responsabilidade. (Gal 6:5, nota) La sala atu família no belun sira hakarak feen-laʼen foun atu sente kontente. Maibé ema hotu presiza hanoin-hetan katak neʼe mak feen-laʼen nia desizaun.​—1 Tes 4:11. w19.12 p. 22 par. 1-3

Ita sente susar atu haree Jeová nuʼudar Ita-nia Aman ka lae? Ema balu sente katak sira kiʼik deʼit no la importante se kompara ho Jeová. Sira duvida se Maromak Kbiit Boot Liu Hotu hanoin duni sira ida-idak. Maibé, ita-nia Aman domin nian lakohi ita atu sente hanesan neʼe. Nia fó ita moris no nia hakarak ita atu iha relasaun diʼak ho nia. Depois fó sai tiha lia-loos sira-neʼe, apóstolu Paulo esplika ba ninia rona-naʼin sira iha Atenas katak Jeová “la dook husi ita ida-idak”. (Após 17:24-29) Maromak hakarak ita ida-idak atu koʼalia ba nia hanesan oan ida koʼalia ba ninia aman neʼebé hadomi nia no tau matan ba nia. Ema balu tan karik sente susar atu haree Jeová nuʼudar Aman tanba sira-nia aman rasik la hatudu domin ka laran-diʼak ba sira. Irmán ida hatete: “Haʼu-nia aman trata aat haʼu. Bainhira haʼu komesa estuda Bíblia, susar tebes ba haʼu atu sente besik ba Aman iha lalehan.” Ita mós sente hanesan neʼe ka lae? Se nuneʼe, keta laran-kraik, tanba Ita mós bele haree Jeová nuʼudar Aman neʼebé diʼak liu. w20.02 p. 3 par. 4-5

Jesus hanorin ita katak maski ita idade ona, Jeová hafolin buat hotu neʼebé ita bele halo iha ninia serbisu, maski ita sente buat neʼebé ita bele halo ladún iha folin. (Sal 92:12-15; Lc 21:2-4) Tan neʼe, tau fokus ba buat neʼebé Ita bele halo. Porezemplu, Ita bele koʼalia kona-ba Jeová, halo orasaun kona-ba irmaun-irmán sira, no anima ema seluk atu laran-metin nafatin. Jeová haree Ita nuʼudar ninia maluk serbisu-naʼin, laʼós tanba buat neʼebé Ita bele halo, maibé tanba Ita prontu atu halo tuir nia. (1 Kor 3:5-9) Ita agradese tebes tanba adora Maromak Jeová neʼebé hafolin tebes ninia atan sira! Nia kria ita atu halo ninia hakarak, no adorasaun neʼebé loos halo ita-nia moris kontente liu. (Apok 4:11) Maski mundu haree ita nuʼudar buat neʼebé folin-laek, maibé Jeová hafolin ita. (Ebr 11:16, 38) Bainhira ita sente laran-kraik tanba moras, problema ekonomia, ka idade ona, mai ita hanoin-hetan katak la iha buat ida mak bele haketak ita husi ita-nia Aman lalehan nia domin.​—Rom 8:38, 39. w20.01 p. 18 par. 16; p. 19 par. 18-19

Ita bele kontra hasoru laran-moras liuhusi haburas hahalok haraik an no sente kontente ho buat neʼebé ita iha. Bainhira ita-nia laran nakonu ho hahalok diʼak sira-neʼe, la iha fatin ba laran-moras. Haraik an sei ajuda ita atu la hanoin katak ita mak diʼak liu. Ema neʼebé haraik an la sente katak nia merese atu hetan buat barak liu fali ema seluk. (Gal 6:3, 4) Ema neʼebé sente kontente ho buat neʼebé nia iha, la kompara ninia an ho ema seluk. (1 Tim 6:7, 8) Bainhira ema ida haraik an no sente kontente ho buat neʼebé nia iha, nia sei haksolok hamutuk ho ema neʼebé hetan buat diʼak. Ita presiza Maromak nia espíritu santu atu bele ajuda ita hasees an husi laran-moras no haburas fali hahalok haraik an no sente kontente ho buat neʼebé ita iha. (Gal 5:16; Flp 2:3, 4) Jeová nia espíritu santu bele ajuda ita buka-hatene ita-nia hanoin no motivu. Ho Maromak nia ajuda, ita bele troka hanoin neʼebé aat ho hanoin neʼebé pozitivu.​—Sal 26:2. w20.02 p. 15 par. 8-9

Dedikasaun mak juramentu ida neʼebé Jeová hakarak Ita atu kumpre. Entaun, hakbesik nafatin ba Ita-nia kongregasaun. Irmaun-irmán sira iha kongregasaun mak Ita-nia família espirituál. Tuir beibeik reuniaun sira bele hametin Ita-nia relasaun diʼak ho sira. Lee no medita kona-ba Maromak nia Liafuan loroloron. (Sal 1:1, 2) Uza tempu atu hanoin kleʼan kona-ba buat neʼebé Ita lee. Hodi halo nuneʼe, liafuan sira-neʼe sei book Ita-nia laran. Ita mós presiza “harohan beibeik”. (Mt 26:41) Ita-nia orasaun husi laran sei halo Ita hakbesik liután ba Jeová. “Kontinua buka uluk Maromak nia Ukun.” (Mt 6:33) Ita bele halo nuneʼe liuhusi tau uluk serbisu haklaken iha Ita-nia moris. Hodi haklaken beibeik, Ita-nia fiar sei metin nafatin. Susar naran deʼit neʼebé Ita hasoru iha sistema aat neʼe mak “ba tempu uitoan deʼit no kmaan”. (2 Kor 4:17) Maibé, Ita-nia dedikasaun no batizmu sei loke dalan ba Ita atu moris kontente agora no hetan “moris neʼebé loloos” iha futuru. Klaru katak Ita presiza halo sakrifísiu. Maibé sakrifísiu sira-neʼe la saugati.​—1 Tim 6:19. w20.03 p. 13 par. 19-21

Se Ita-nia estudante Bíblia la halo mudansa iha ninia moris, karik Ita presiza husu ba Ita-nia an: ‘Haʼu presiza para estuda ho nia ka lae?’ Antes halo desizaun, husu ba Ita-nia an: ‘Haʼu-nia estudante Bíblia laʼo ba oin tuir ninia situasaun ka lae?’ ‘Nia komesa “halo tuir” buat neʼebé nia aprende ka lae?’ (Mt 28:20) Triste tanba estudante balu mak hanesan ema Izraél iha Ezequiel nia tempu. Jeová hatete ba Ezequiel: “Ba sira, ó mak hanesan ema neʼebé kanta knananuk domin nian ho lian furak, no toka instrumentu neʼebé iha talin ho matenek. Sira sei rona ó-nia liafuan, maibé la iha ema ida mak halo tuir.” (Eze 33:32) Karik susar atu fó-hatene ita-nia estudante katak ita sei para estuda ho nia. Maibé, “tempu hela uitoan deʼit ona”. Duké gasta tempu barak atu estuda ho ema neʼebé la laʼo ba oin, ita presiza buka ema neʼebé hatudu katak nia “prontu atu simu lia-loos neʼebé lori ba moris rohan-laek”.​—Após 13:48. w20.01 p. 6 par. 17; p. 7 par. 20

Dala barak Kristaun falsu la hanorin lia-loos husi Bíblia katak loron ida ema neʼebé laran-metin sei hela ba nafatin iha rai. (2 Kor 4:3, 4) Relijiaun Kristaun barak hanorin katak ema diʼak hotu sei bá lalehan bainhira sira mate. Maibé iha grupu kiʼik ida neʼebé la hanorin ida-neʼe. Grupu neʼe mak Estudante Bíblia neʼebé halo Watch Tower hahú husi tinan 1879. Sira komprende katak Maromak sei halo fali paraízu iha rai no ema millaun ba millaun neʼebé laran-metin sei moris iha rai, laʼós iha lalehan. Maibé, sira presiza tempu atu komprende ho klaru sé mak sai parte ba ema-lubun boot neʼe. Estudante Bíblia mós komprende husi Eskritura katak iha grupu neʼebé Maromak “sosa tiha ona husi rai” atu ukun hamutuk ho Jesus iha lalehan. (Apok 14:3) Grupu neʼe iha ema Kristaun naʼin-144.000 neʼebé serbí Maromak ho laran-manas no laran-metin kuandu sei iha rai. w19.09 p. 27 par. 4-5