Tanbasá mak ema iha tempu antigu lakon mohu?
RAI-Nabeen mundiál laʼós dezastre naturais. Neʼe mak Maromak nia tesi-lia. Nia fó ona avizu, maibé ema barak lakohi rona. Tanbasá? Jesus esplika: “Iha tempu antes rai-nabeen, ema han-hemu, mane no feto sira kaben, toʼo loron neʼebé Noé tama ba ró laran. Sira la tau atensaun toʼo rai-nabeen akontese no halakon sira hotu.”—Mateus 24:38, 39.
Povu neʼebé organizadu no avansadu
Antes Rai-Nabeen, ema iha buat diʼak balu neʼebé mak ohin loron ita la iha. Porezemplu, ema hotu iha mundu tomak koʼalia língua ida deʼit. (Génesis 11:1) Klaru katak neʼe halo fasil ba ema ho abilidade neʼebé la hanesan atu serbisu hamutuk. Rezultadu mak fasil ba sira atu aprende oinsá atu halo arte oioin no mós siénsia. Laʼós neʼe deʼit, ema mós moris ba tempu kleur, entaun sira bele aumenta sira-nia koñesimentu kona-ba buat neʼebé sira aprende ona.
Ema balu dehan katak ema nia otas iha tempu neʼebá ladún naruk, no tinan sira neʼebé Bíblia temi mak refere ba fulan sira. Neʼe loos ka lae? Hanoin toʼok kona-ba Malalel. Bíblia dehan: “Bainhira Malalel tinan 65, nia sai aman ba Jared. . . . Malalel moris toʼo tinan 895, no nia mate.” (Génesis 5:15-17) Se tinan ida mak fulan ida, neʼe katak Malalel sai aman kuandu nia foin mak tinan lima! Neʼe la lójiku. Tuir loloos, ema iha tempu neʼebá moris ho kondisaun neʼebé besik perfeitu. Tan neʼe sira bele duni moris toʼo tinan atus ba atus. Sira bele kumpre saida deʼit?
Tinan atus ba atus antes Rai-Nabeen, populasaun iha mundu aumenta barak toʼo Adão nia oan-mane naran Caim bele harii sidade ida no hanaran neʼe Enoc. (Génesis 4:17) Iha tempu antes Rai-Nabeen, ema sai matenek atu halo serbisu oioin. Porezemplu, sira prodús “sasán husi riti no besi”. (Génesis 4:22) Neʼe katak ema mós uza sasán sira-neʼe atu halo konstrusaun, serbisu karpinteiru, suku hena, no agrikultura. Serbisu sira-neʼe hotu temi iha istória sira kona-ba ema primeiru neʼebé moris iha mundu.
Jerasaun ida-idak bele hanorin jerasaun tuirmai kona-ba buat neʼebé sira aprende ona no ema sai matenek liután atu halo serbisu oioin hanesan halo sasán sira husi besi, halo toʼos, hakiak animál sira, halo múzika no mós arte. Porezemplu, Jubal mak “beiʼala ba ema hotu neʼebé toka arpa no huu flauta”. (Génesis 4:21) Ema nia moris mak avansadu tebes. Maibé derrepente deʼit buat sira-neʼe para. Saida mak akontese?
Saida mak sala?
Maski iha buat diʼak barak, maibé ema neʼebé moris iha tempu antes Rai-Nabeen iha istória neʼebé aat tebes. Sira-nia beiʼala, Adão kontra hasoru Maromak. Caim neʼebé harii sidade primeiru oho ninia alin-mane rasik. Tan neʼe mak hahalok aat sai barak liután. Konsekuénsia husi Adão nia sala sai aat liután husi tempu ba tempu.—Roma 5:12.
Situasaun iha mundu sai aat loos, tan neʼe Jeová deside katak nia sei husik tan situasaun neʼe ba tinan 120 deʼit. (Génesis 6:3) Bíblia dehan: “Ema nia hahalok aat sai barak tebes iha rai no ema nia hanoin hotu iha laran mak aat deʼit iha tempu hotu. . . . Rai sai aat ona no nakonu ho violénsia.”—Génesis 6:5, 11.
Ikusmai, Maromak fó-hatene Noé ho espesífiku katak nia sei halakon ema hotu ho rai-nabeen neʼebé boot. (Génesis 6:13, 17) Maski Noé sai “haklaken-naʼin kona-ba justisa”, maibé ema barak la fiar katak buat hotu neʼebé haleʼu sira sei lakon mohu. (2 Pedro 2:5) Só ema naʼin-ualu deʼit mak rona ba avizu neʼe no hetan salvasaun. (1 Pedro 3:20) Tanbasá neʼe importante ba ita ohin loron?
Saida mak ita aprende?
Ita moris iha tempu neʼebé atu hanesan ho Noé nian. Ita rona beibeik notísias kona-ba hahalok aat sira hanesan terrorizmu, masakre, ema neʼebé oho arbiru ema barak ho kilat, no violénsia doméstika neʼebé aumenta barak liután. Mundu neʼe sai nakonu fali ho violénsia, no hanesan tempu uluk, iha mós avizu kona-ba tesi-lia neʼebé lakleur tan sei akontese. Jesus rasik dehan katak nia sei mai nuʼudar Juís neʼebé Maromak hili no nia sei haketak ema hanesan bibi-atan haketak bibi-malae husi bibi-timur. Jesus dehan katak ema sira neʼebé hetan tesi-lia nuʼudar ema aat “sei lakon ba nafatin”. (Mateus 25:31-33, 46) Maibé Bíblia dehan katak iha tempu neʼe, ema millaun ba millaun mak sei hetan salvasaun, neʼe mak ema-lubun boot neʼebé adora Maromak neʼebé loos. Iha mundu foun, ema sira-neʼe sei moris ho dame no seguru ba nafatin.—Miqueias 4:3, 4; Apokalipse 7:9-17.
Ema barak lakohi rona ba Bíblia nia avizu kona-ba Maromak nia tesi-lia. Apóstolu Pedro esplika katak ema sira hanesan neʼe lakohi haree didiʼak ba faktu sira. Pedro hakerek: “Iha loron ikus sira sei mosu gozadór sira neʼebé koʼalia aat . . . no dehan: ‘Nia promete katak nia sei mai fali, maibé nia iha neʼebé?’ . . . Ho neon, sira nega realidade katak horiuluk kedas lalehan iha ona, no rai neʼebé metin mosu sai husi bee no iha bee nia klaran tanba Maromak nia liafuan. No liuhusi buat sira-neʼe mak mundu iha tempu neʼebá lakon bainhira rai-nabeen taka mundu tomak. Maibé liuhusi liafuan neʼebé hanesan mak lalehan no mundu neʼebé iha agora deside tiha ona atu halakon ho ahi no rai hela toʼo loron tesi-lia nian no loron atu halakon ema aat.”—2 Pedro 3:3-7.
Ohin loron, ema ho laran-manas halo tuir Jesus nia mandamentu hodi fó avizu iha mundu tomak kona-ba loron tesi-lia nian neʼebé sei mai no mós liafuan diʼak kona-ba dame. (Mateus 24:14) Avizu neʼe mak sériu duni. Maromak neʼebé Kbiit Boot Liu Hotu sempre kumpre ninia liafuan sira.
Mundu neʼebé atu mai
Saida mak sei akontese depois Maromak halakon ema aat? Iha introdusaun husi Jesus nia Diskursu iha Foho, Jesus promete: “Ksolok ba sira neʼebé laran-maus, tanba sira sei simu rai nuʼudar liman-rohan.” Tuirmai nia hanorin ninia dixípulu sira atu halo orasaun ba Maromak: “Halo Ita-nia hakarak sai loos iha rai, hanesan iha lalehan.” (Mateus 5:5; 6:10) Sin, Jesus rasik hanorin katak ema sira neʼebé serbí Maromak ho laran-metin sei iha futuru neʼebé furak iha mundu. Jesus hatete katak iha tempu neʼebá “Maromak sei halo buat hotu sai foun”.—Mateus 19:28.
Entaun nuʼudar Ita kontinua hanoin kleʼan kona-ba futuru, keta husik gozadór sira halo Ita duvida ho Maromak nia avizu. Klaru, mundu neʼebé haleʼu ita haree hanesan avansadu loos no iha ona ba tinan barak. Maibé ita labele tau fiar ba buat sira-neʼe. Mundu neʼe hetan ona tesi-lia. Tan neʼe mak fiar metin ba buat neʼebé Pedro hakerek iha ninia karta nia rohan:
“Tanba buat sira-neʼe hotu sei lakon iha dalan hanesan neʼe, imi hanoin didiʼak bá imi tenke sai ema hanesan saida. Imi tenke hatudu hahalok santu no laran-metin ba Maromak, nuʼudar imi hein no hanoin-hetan nafatin kona-ba Jeová nia loron neʼebé atu mai. . . . Tanba imi hein hela buat sira-neʼe, hakaʼas an liután atu ikusmai Maromak haree imi nuʼudar ema neʼebé moos, sala-laek no iha dame ho Maromak. . . . Kontinua simu ita-nia Naʼi no Salvadór Jesus Kristu nia laran-diʼak neʼebé boot no koñesimentu kona-ba nia.” (2 Pedro 3:11, 12, 14, 18) Tan neʼe, aprende husi buat neʼebé akontese iha Noé nia tempu. Hakbesik ba Maromak. Aumenta liután koñesimentu kona-ba Jesus Kristu. Haburas ita-nia domin ba Maromak, no hola parte hamutuk ho ema millaun ba millaun neʼebé hili atu hetan salvasaun iha mundu neʼe nia rohan no tama ba mundu foun neʼebé sei mai.
[Dezeñu]
Husi tempu antes Rai-Nabeen, ema halo ona serbisu ho besi
[Dezeñu]
Futuru furak hein ona ita