Tanbasá ita bele fiar katak Bíblia mak loos?
IHA livru Battles of the Bible (Funu sira iha Bíblia) eis-prezidente ba rai-Izraél no profesór arkeolojia ida iha universidade iha Tel Aviv hatete:
“Bíblia fó sai informasaun neʼebé espesífiku kona-ba funu sira neʼebé akontese, no neʼe ajuda ita hatene katak istória sira-neʼe mak laʼós buat neʼebé inventa deʼit. Porezemplu, istória iha Juís kapítulu 6-8 kona-ba funu neʼebé Gideão halo hasoru tropa Midian no rai sira seluk, la hanesan ho istória neʼebé Homero hakerek kona-ba Funu Tróia. Homero la fó sai informasaun ho espesífiku, nia temi deʼit katak funu akontese besik tasi no iha sidade neʼebé moru haleʼu. Maibé istória kona-ba Gideão mak la hanesan. Bíblia fó sai informasaun espesífiku kona-ba funu neʼe akontese iha neʼebé no funu neʼe ninia lalaʼok mak oinsá, porezemplu Bíblia temi katak Gideão duni tuir inimigu ba kilómetru 60. Tanba informasaun mak espesífiku, ita bele hatene ho loloos funu akontese iha neʼebé no prova katak Bíblia nia istória mak loos duni.”
Ita bele aprende kona-ba Gideão nia funu hodi uza mapa sira iha broxura “Lihatlah Negeri yang Baik” iha pájina 18 no 19.a Istória neʼe komesa bainhira “ema Midian tomak, ema Amalec no ema husi área Leste halibur hamutuk atu halo funu. Sira hakur mota hodi bá Rai-Tetuk Jezreel.” Gideão bolu ema husi suku seluk atu mai ajuda. Funu hahú iha Bee-Matan Harod no foho-oan Moré, depois sira tun ba área Mota Jordaun nian. Gideão duni tuir sira toʼo Mota Jordaun nia sorin seluk no iha neʼebá mak ema Izraél manán inimigu sira.—Juís 6:33–8:12.
Mapa iha broxura “Lihatlah Negeri yang Baik” hatudu fatin sira neʼebé temi iha istória neʼe no rai iha neʼebá mak hanesan saida. Mapa seluk (pájina 15) hatudu suku Izraél nia baliza sira. Mapa rua neʼe bele ajuda ita fiar katak istória husi Bíblia mak loos.
Uluk Profesór Yohanan Aharoni hatete: “Atu bele komprende kona-ba fatin sira neʼebé temi iha Bíblia, ita presiza hatene didiʼak kona-ba jeografia no istória.”
[Nota-rodapé]
a Broxura neʼe husi Testemuña ba Jeová.
[Picture Credit Line on page 32]
Background map: Based on maps copyrighted by Pictorial Archive (Near Eastern History) Est. and Survey of Israel