Pergunta husi lee-naʼin

Tanbasá mak Sansão bele kona mate-isin husi ema neʼebé nia oho no nafatin sai ema Nazireu?

Iha Izraél antigu, ema ida bele deside atu halo juramentu no sai ema Nazireu ba tempu balu.a Maibé iha buat balu neʼebé ema Nazireu labele halo. Porezemplu, “nia labele hakbesik ba ema nia mate-isin durante tempu hotu neʼebé nia haketak an ba Jeová. Maski ninia aman ka inan ka maun ka alin ka ninia feton mak mate, nia labele hafoʼer ninia an.” Maibé oinsá se ema ida “mate derrepente deʼit iha ninia sorin”? Hodi kaer mate-isin la ho neon, neʼe mós bele hafoʼer ninia an. Tan neʼe, Ukun-Fuan mós dehan katak “nia labele sura fali ninia loron uluk nian”. Nia tenke tuir serimónia hamoos sala nian, no hahú fali ninia juramentu husi primeiru.​—Números 6:6-12.

Maibé Sansão la hanesan ho ema Nazireu seluk. Antes nia moris, Jeová nia anju dehan ba Sansão nia inan: “Ó sei sai isin-rua no tuur-ahi oan-mane ida. Lámina ida labele kona ninia ulun, tanba oan neʼe sei sai ema Nazireu ida ba Maromak husi tempu neʼebé nia moris mai, no nia sei salva ema Izraél husi ema Filístia nia liman.” (Juís 13:5) Sansão rasik la deside atu halo juramentu neʼe. Jeová mak hili nia atu sai ema Nazireu no nia sei sai ema Nazireu iha ninia moris tomak. Mandamentu kona-ba labele kona mate-isin la aplika ba Sansão. Tanba se neʼe aplika ba nia, oinsá mak nia bele hahú fali ninia tempu nuʼudar ema Nazireu neʼebé hahú ona husi tempu neʼebé nia moris mai? Haree hanesan mandamentu ba ema neʼebé sai nuʼudar Nazireu durante sira-nia moris tomak la hanesan ho sira neʼebé deside atu sai nuʼudar ema Nazireu ba tempu balu deʼit.

Haree toʼok Jeová nia mandamentu espesífiku ba ema naʼin-tolu neʼebé nia hili atu sai nuʼudar ema Nazireu durante sira-nia moris tomak. Neʼe mak Sansão, Samuel, no João Batista. Hanesan ita hatene ona, Sansão labele tesi ninia fuuk. Antes Ana sai isin-rua Samuel, nia mós halo juramentu hodi dehan: “Ita-nia atan sei entrega oan neʼe ba Ita, oh Jeová, atu nuneʼe nia bele serbí Ita iha ninia moris tomak, no lámina ida sei la kona ninia ulun.” (1 Samuel 1:11) Kona-ba João Batista, Jeová nia anju hatete: “Nia labele hemu tua-uvas ka tua seluk.” (Lucas 1:15) Laʼós neʼe deʼit, “João hatais roupa neʼebé halo husi kuda-kamelu fulun no kesi sintu neʼebé halo husi animál kulit. Ninia ai-han mak gafañotu no bani-been husi ai-laran.” (Mateus 3:4) La iha mandamentu neʼebé bandu sira atu besik ho mate-isin.

Maski Sansão mak ema Nazireu, maibé nia mós juís neʼebé Jeová hili atu salva ema Izraél husi inimigu sira neʼebé hadau sira-nia sasán. (Juís 2:16) No atu kumpre knaar neʼe, nia tenke kona mate-isin. Iha akontesimentu ida, Sansão oho ema Filístia naʼin-30 no foti sira-nia roupa. Depois neʼe, nia oho inimigu barak tebes. Nia mós foti kuda-burru aman neʼebé foin mate nia hasan-ruin no oho mane naʼin-1.000 ho ida-neʼe. (Juís 14:19; 15:8, 15) Sansão halo buat sira-neʼe ho Jeová nia apoia no ajuda. Bíblia bolu Sansão nuʼudar mane neʼebé merese atu ita banati-tuir ninia fiar.​—Ebreu 11:32; 12:1.

Bíblia dehan katak Sansão lees leaun-aman “hanesan lees bibi-timur oan ba rua”. Neʼe katak ema iha tempu neʼebá toman atu halo ida-neʼe ka lae?

La iha evidénsia neʼebé hatudu katak ema iha toman atu lees bibi-timur nia oan ba rua iha Juís sira-nia tempu. Juís 14:6 hatete: “Jeová nia espíritu fó kbiit ba [Sansão], no nia lees leaun-aman neʼe fahe ba rua, hanesan ema ida lees bibi-timur oan ba rua ho ninia liman-tanan.” Liafuan sira-neʼe atu hatudu katak Sansão mak kbiit boot tebes.

Fraze “nia lees leaun-aman neʼe fahe ba rua” bele signifika buat rua. Primeiru, karik neʼe bele signifika Sansão lees leaun-aman nia ibun. Se neʼe mak liafuan neʼe nia signifikadu, entaun klaru katak ema mós iha kbiit atu lees bibi-timur oan iha dalan hanesan neʼe. Entaun liafuan neʼe atu hatudu katak Sansão iha kbiit boot tanba ba nia leaun-aman ida neʼebé forsa boot mak hanesan deʼit ho bibi-timur oan neʼebé fasil atu oho. Segundu, karik liafuan neʼe bele signifika Sansão lees leaun-aman hodi dada leaun nia ain toʼo kotu husi isin. Se nuneʼe, neʼe hatudu katak Jeová nia espíritu santu fó kbiit ba Sansão atu halo buat neʼebé baibain ema la iha kbiit atu halo. Maski ita la hatene ho loloos oinsá Sansão oho leaun-aman neʼe, maibé Juís 14:6 hatudu katak ho Jeová nia ajuda, fasil deʼit ba Sansão atu oho leaun ida neʼebé forsa boot hanesan fasil ba ema atu oho bibi-oan.

[Nota-rodapé]