Ita iha duni razaun barak atu haksolok

BUAT hotu neʼebé Maromak kria, hanesan animál neʼebé kiʼik liu toʼo kriasaun neʼebé boot liu, hanesan fitun sira iha lalehan, laʼo ho diʼak. Ita la hakfodak kona-ba neʼe, tanba ita-nia Kriadór “laʼós Maromak runguranga nian”. (1 Kor 14:33) Dalan neʼebé Maromak halibur nia povu atu adora nia mós furak loos. Hanoin toʼok kona-ba buat neʼebé Maromak Jeová halo ona. Nia harii organizasaun ida hodi ema no anju rihun ba rihun, neʼebé iha liberdade atu hili, bele serbí nia iha dalan neʼebé loos no ho unidade. Ida-neʼe mak buat neʼebé kapás tebes, loos ka lae?

Iha tempu uluk, Israel nia sidade Jerusalém mak reprezenta parte husi Maromak nia organizasaun iha rai. Iha sidade neʼe, Maromak Jeová harii ninia templu, no tau liurai neʼebé nia hili. Ema Israel ida neʼebé sai nuʼudar dadur iha rai-Babilónia fó sai ninia hanoin kona-ba sidade santu Jerusalém, hodi dehan: “Husik haʼu-nia nanál belit metin ba haʼu-nia ibun leten, se haʼu la hanoin-hetan Ita, se haʼu la halo Jerusalém sai aas liu buat neʼebé fó ksolok boot mai haʼu.”—Sal 137:6.

Ita mós sente hanesan neʼe kona-ba Maromak nia organizasaun ohin loron ka lae? Organizasaun neʼe fó ksolok ba Ita liu fali buat seluk ka lae? Ita-nia oan sira hatene istória kona-ba Maromak nia organizasaun iha rai, no oinsá organizasaun neʼe laʼo ka lae? Sira hatene katak sira sai parte husi família ida iha mundu tomak husi Testemuña ba Jeová, no sira hafolin ida-neʼe ka lae? (1 Ped 2:17) Karik diʼak atu halo tuir matadalan sira tuirmai neʼe kuandu halaʼo ita-nia Adorasaun Família nian, hodi nuneʼe ita bele ajuda ita-nia família atu hatene no hafolin liután Maromak Jeová nia organizasaun.

Konta fali kona-ba “loron sira neʼebé liu kleur ona”

Tinan-tinan família sira iha Israel halibur hamutuk atu selebra Páskua. Kuandu festa neʼe foin hahú, Moisés esplika ba povu hodi dehan: “Aban-bainrua, kuandu ó-nia oan-mane husu ba ó, hodi dehan: ‘Neʼe katak sá?’ Entaun ó tenke dehan ba nia: ‘Ho liman neʼebé forsa, Jeová lori ita sai husi rai-Egiptu, husi uma atan nian.’” (Êx 13:14.) Sin, importante ba ema Israel atu la haluha buat neʼebé Maromak Jeová halo ba sira. Klaru katak aman barak iha Israel halo tuir Moisés nia ukun-fuan. Tinan barak depois neʼe, ema Israel ida halo orasaun hodi dehan: “Oh, Maromak, ho ami-nia tilun ami rona ona, ami-nia beiʼala sira rasik konta ona ba ami kona-ba buat neʼebé Ita halo iha sira-nia tempu, iha loron sira neʼebé liu kleur ona.”—Sal 44:1.

Ba joven sira ohin loron, istória kona-ba Testemuña ba Jeová neʼebé liu tinan 100 ona, karik ida-neʼe hanesan “loron sira neʼebé liu kleur ona”. Oinsá mak ita bele konta istória sira-neʼe iha dalan neʼebé book oan sira-nia laran? Atu halo ida-neʼe, inan-aman balu uza livru Saksi-Saksi Yehuwa—Pemberita Kerajaan Allah, Buku Tahunan, ka uza esperiénsia sira neʼebé hakerek iha ita-nia livru sira, no informasaun seluk kona-ba Testemuña ba Jeová nia istória, inklui DVD foun kona-ba Maromak nia povu iha tempu modernu. Ita mós bele ajuda ita-nia família atu sadere ba Maromak Jeová iha tempu susar hodi haree DVD sira neʼebé fó sai kona-ba oinsá ita-nia irmaun-irmán sira tahan hasoru susar iha rai-Rúsia durante tempu komunizmu, no mós iha rai-Alemaña durante tempu Nazí. Hodi uza buat sira-neʼe kuandu halaʼo Adorasaun Família nian, ida-neʼe bele hametin ita-nia oan sira-nia fiar hodi sira sai prontu atu tahan kuandu hasoru susar.

Maibé koʼalia deʼit kona-ba istória, karik bele halo oan sira sai baruk lalais. Tan neʼe, diʼak atu halo buat oioin atu oan sira la sai baruk. Porezemplu, karik ita bele husu ita-nia oan-mane atu hili rai ida, no buka-hatene oinsá lia-loos hahú iha rai neʼe, no haruka nia atu fó sai informasaun neʼebé nia hetan ba família. Ka, se iha ita-nia kongregasaun iha ema neʼebé serbí ho laran-metin ba tempu kleur ona, diʼak mós atu konvida sira atu hola parte iha ita-nia adorasaun família nian. Karik ita-nia oan-feto bele halo entrevista ho sira, hodi ita-nia família hotu bele rona kona-ba sira-nia esperiénsia. Ka, ita-nia oan sira bele pinta dezeñu kona-ba buat diʼak neʼebé mosu iha Maromak nia organizasaun, hanesan ema harii sukursál ida, ema tuir reuniaun boot internasionál ida, ka kona-ba oinsá ema uza mákina lian nian kuandu haklaken uma ba uma iha tempu uluk.

Oinsá parte ‘ida-ida serbisu hamutuk’

Apóstolu Paulo kompara kongregasaun kristaun ho ema nia “isin-lolon tomak [neʼebé] sai boot ba daudaun toʼo nia hetan nia ilas loloos iha domin; ba nia mak liman ain ida-ida serbisu hodi hametin an hamutuk”. (Ef 4:16) Hodi aprende kona-ba oinsá ita-nia isin-lolon serbisu hamutuk, ida-neʼe bele ajuda ita atu hafolin no respeitu ita-nia Kriadór. Nuneʼe mós, kuandu ita buka-hatene kona-ba oinsá kongregasaun iha mundu tomak serbisu hamutuk, ita sei hafolin duni “Maromak nia matenek [neʼebé] waʼin tebetebes”.—Ef 3:10.

Maromak Jeová fó sai kona-ba oinsá nia dirije ninia organizasaun, inklui parte lalehan nian. Porezemplu, nia fó-hatene ita katak nia fó sai informasaun ba Jesus Kristu no tuirmai Jesus “haruka nia anju atu fó-hatene ba nia atan João, no João fó sasin [kona-ba] Maromak nia liafuan”. (Apok 1:1, 2) Tanba Maromak fó sai kona-ba oinsá nia dirije parte husi ninia organizasaun iha lalehan, ita bele fiar katak nia mós hakarak ita atu komprende oinsá parte husi ninia organizasaun iha rai “serbisu hodi hametin an hamutuk”.

Porezemplu, se lakleur tan katuas área nian atu vizita ita-nia kongregasaun, diʼak atu koʼalia hamutuk ho ita-nia família kona-ba ninia knaar no bensaun neʼebé nia simu hodi halaʼo serbisu neʼe. Ita mós bele koʼalia kona-ba oinsá nia ajuda ita ida-idak. No iha mós buat seluk neʼebé ita bele koʼalia hamutuk, hanesan: Tansá importante atu hatama relatóriu serbisu haklaken nian? Oinsá Maromak nia organizasaun hetan osan? Oinsá mak Grupu Administradór halaʼo sira-nia serbisu, no oinsá sira fó ai-han espirituál iha tempu neʼebé loos?

Kuandu ita komprende didiʼak kona-ba oinsá Maromak Jeová dirije ninia organizasaun, ita bele hetan bensaun hanesan tuirmai neʼe: Ita sei hafolin liu ema sira neʼebé serbisu makaʼas atu ajuda ita serbí Maromak. (1 Tes 5:12, 13) Ita sei hetan laran-manas atu apoia arranju sira iha Maromak nia organizasaun. (Apos 16:4, 5) Ikusliu, ita-nia fiar ba sira neʼebé dirije ita sei sai metin liu nuʼudar ita haree oinsá sira halo arranju no halo desizaun hodi tuir Bíblia nia matadalan.—Ebr 13:7.

“Haree didiʼak ba ninia uma aas sira”

Bíblia dehan: “Imi marxa bá haleʼu Sião, no laʼo haleʼu nia, sura ninia fatin aas sira. Tau imi-nia laran ba ninia moru, haree didiʼak ba ninia uma aas sira, hodi nuneʼe imi bele konta fali ida-neʼe ba jerasaun neʼebé atu mai.” (Sal 48:12, 13) Ema neʼebé hakerek salmu neʼe fó laran-manas ba ema Israel atu haree didiʼak ba Jerusalém. Hanoin toʼok kona-ba oinsá família Israel sira sente kuandu sira laʼo rai dook atu bá sidade santu hodi tuir festa tinan-tinan nian no haree Maromak nia templu neʼebé furak. Klaru katak buat neʼebé sira haree book sira atu “konta fali ida-neʼe ba jerasaun neʼebé atu mai”.

Hanoin toʼok kona-ba liurai-feto husi Sabá, neʼebé foufoun ladún fiar kuandu nia rona ema fó-hatene nia kona-ba Salomão nia ukun no ninia matenek. Entaun, saida mak halo nia fiar katak buat neʼebé nia rona mak loos? Nia hatete: “Haʼu la tau fiar ba sira-nia liafuan sira toʼo haʼu mai, atu haʼu bele haree ho haʼu-nia matan rasik.” (2 Crôn 9:6) Sin, haree ho ita-nia “matan rasik” bele book duni ita-nia laran!

Oinsá mak ita bele ajuda ita-nia oan sira atu haree ho sira-nia “matan rasik” buat furak kona-ba Maromak Jeová nia organizasaun? Se iha sukursál ka Betel neʼebé besik ita-nia hela-fatin, diʼak atu hakaʼas an atu vizita. Porezemplu, kuandu Mandy no Bethany sei kiʼik, sira hela iha fatin neʼebé dook husi Betel maizumenus kilómetru 1.500. Maski nuneʼe, sira-nia inan-aman halo planu atu sira vizita Betel beibeik, liuliu kuandu sira komesa sai boot. Mandy no Bethany dehan: “Antes vizita Betel, ami hanoin katak Betel mak fatin ba ema neʼebé sériu deʼit, no ba ema neʼebé idade boot ona. Maibé neʼe la loos. Ami hasoru joven sira iha neʼebá, no sira halo serbisu makaʼas ba Maromak Jeová no sira kontente tebes! Ami haree katak Maromak Jeová nia organizasaun laʼós deʼit iha ami-nia hela-fatin, maibé iha mós iha fatin seluk. No tempu ida-idak neʼebé ami vizita Betel, ami sente besik liu ba Maromak Jeová no ida-neʼe book ami-nia laran atu serbí nia.” Hodi hatene diʼak liután kona-ba Maromak nia organizasaun book Mandy no Bethany atu serbí nuʼudar pioneiru, no sira mós hetan konvite atu serbí iha Betel ba tempu balu nuʼudar voluntáriu.

Ita mós iha dalan seluk atu “haree” Maromak Jeová nia organizasaun, dalan neʼe ema la hetan iha Israel antigu. Iha tempu modernu, Maromak nia povu simu DVD neʼebé fó sai buat barak kona-ba Maromak nia organizasaun. Porezemplu, DVD ho títulu hanesan: Saksi-Saksi Yehuwa—Diorganisasi utk Memberitakan Kabar Baik, Segenap Persekutuan Saudara-Saudara Kita, Sampai ke Ujung-Ujung Bumi, no Dipersatukan oleh Pengajaran Ilahi. Kuandu ita no ita-nia família haree serbisu makaʼas neʼebé irmaun sira halo iha Maromak nia organizasaun, hanesan sira neʼebé serbí iha Betel, serbí nuʼudar misionáriu, sai voluntáriu atu ajuda maluk sira neʼebé hetan dezastre, no sira neʼebé prepara reuniaun boot sira, ida-neʼe ajuda ita atu hafolin ita-nia maluk fiar-naʼin iha mundu tomak.

Kongregasaun ida-idak iha Maromak nia organizasaun halaʼo knaar importante atu haklaken lia-foun diʼak no apoia malu iha sira-nia área. Maski nuneʼe, diʼak mós atu uza tempu ho ita-nia família atu hanoin kona-ba “maluk sira iha mundu tomak”. Hodi halo nuneʼe sei ajuda ita no ita-nia oan sira atu nafatin ‘laran-metin iha fiar’, no hatene katak sira iha duni razaun barak atu haksolok.—1 Ped 5:9.

[Dezeñu iha pájina 18]

Maromak nia organizasaun Tópiku neʼebé diʼak atu estuda

Iha buat barak neʼebé bele ajuda ita atu aprende liután kona-ba istória husi Maromak Jeová nia organizasaun no oinsá organizasaun neʼe laʼo. Pergunta sira tuirmai bele ajuda ita:

☞ Oinsá no bainhira mak hahú arranju kona-ba serbisu atu vizita kongregasaun sira?—Saksi-Saksi Yehuwa—Pemberita Kerajaan Allah, pájina 222-227.

☞ Iha reuniaun boot iha tinan 1941, saida mak akontese iha “Loron Labarik nian”?—Saksi-Saksi Yehuwa—Pemberita Kerajaan Allah, pájina 86, 88.

☞ Oinsá mak Grupu Administradór halo desizaun?—“Memberikan Kesaksian yang Saksama tentang Kerajaan Allah”, pájina 108-114.