Oinsá mak aman sira bele besik nafatin ho sira-nia oan-mane?

“APÁ, oinsá mak apá hatene buat barak hanesan neʼe?” Ita-nia oan-mane halo Ita hakfodak hodi husu pergunta hanesan neʼe ka lae? Iha tempu neʼe, karik Ita sente kontente loos nuʼudar aman ida. Maibé buat neʼebé halo Ita kontente liu mak se Ita-nia oan halo tuir Ita-nia konsellu no hetan rezultadu diʼak.a—Provérbios (Amsal) 23:15, 24.

Maibé, nuʼudar tempu liu daudaun, Ita-nia oan-mane hafolin nafatin Ita ka lae? Ka nuʼudar nia sai boot, nia ladún hafolin Ita ona? Oinsá mak Ita bele iha relasaun besik nafatin ho Ita-nia oan husi nia kiʼik toʼo nia sai boot? Ita sei koʼalia uluk kona-ba susar sira neʼebé aman hasoru.

Susar tolu neʼebé aman sira hasoru

1. TEMPU LA IHA: Iha rai barak, aman mak buka moris hodi tau matan ba família. Tanba serbisu loron tomak, dala barak sira la hamutuk ho família iha uma. Iha rai balu, aman sira gasta tempu uitoan deʼit hamutuk ho sira-nia oan. Porezemplu, relatóriu ida husi rai-Fransa hatudu katak aman sira gasta tempu maizumenus minutu 12 deʼit iha loron ida atu tau matan ba sira-nia oan.

HANOIN KONA-BA NEʼE: Ita uza oras hira hamutuk ho Ita-nia oan-mane? Durante semana ida ka rua tuirmai, koko toʼok atu hakerek oras neʼebé Ita uza hamutuk ho nia. Karik Ita sei hakfodak hodi haree katak Ita ladún gasta tempu barak ho Ita-nia oan.

2. LA HETAN EZEMPLU DIʼAK: Mane balu ladún gasta tempu barak ho sira-nia aman rasik kuandu sira kiʼik. Mane ida naran Jean-Marie, neʼebé hela iha rai-Fransa hatete: “Kuandu haʼu kiʼik, haʼu ladún ransu malu ho haʼu-nia aman.” Oinsá ida-neʼe kona Jean-Marie? Nia hatete: ‘Ida-neʼe hamosu problema ba ami. Porezemplu, susar mai haʼu atu koʼalia hamutuk ho haʼu-nia oan-mane sira kona-ba buat neʼebé importante.’ No maski mane balu hatene didiʼak sira-nia aman, maibé sira-nia relasaun ho sira-nia aman ladún besik malu. Mane ida naran Philippe, tinan 43, hatete: “Susar ba haʼu-nia aman atu hatudu domin mai haʼu. Tan neʼe, haʼu tenke hakaʼas an atu hatudu domin ba haʼu-nia oan-mane.”

HANOIN KONA-BA NEʼE: Ita sente katak Ita-nia relasaun ho Ita-nia aman rasik kona dalan neʼebé Ita haboot Ita-nia oan-mane ka lae? Dala ruma Ita haree katak Ita halo tuir Ita-nia aman nia toman balu neʼebé diʼak no ladún diʼak ka lae? Iha dalan saida deʼit mak Ita halo ida-neʼe?

3. LADÚN IHA KONSELLU NEʼEBÉ DIʼAK: Iha rai balu, ema hanoin katak aman nia responsabilidade atu haboot oan sira ladún importante. Luca, neʼebé boot iha rai-Europa hatete: ‘Iha fatin neʼebé haʼu sai boot, ema sente katak feen deʼit mak iha knaar atu tau matan ba labarik sira.’ Iha kultura seluk, sira hanoin katak aman nia knaar mak atu fó dixiplina makaʼas deʼit. Porezemplu, George neʼebé sai boot iha rai-Áfrika, hatete: “Tuir haʼu-nia kultura, aman sira la halimar hamutuk ho sira-nia oan tanba sira hanoin ida-neʼe sei hamenus aman nia kbiit nuʼudar ulun. Tan neʼe, sempre susar ba haʼu atu kontente hamutuk ho haʼu-nia oan.”

HANOIN KONA-BA NEʼE: Iha Ita-nia área, aman sira-nia knaar mak saida? Sira hanoin katak atu haboot oan sira mak feen nia knaar deʼit ka lae? Aman sira bele hatudu domin ba sira-nia oan-mane ka lae? Ka tuir Ita-nia kostume, baibain aman la halo ida-neʼe?

Se Ita mak aman ida neʼebé hasoru problema sira hanesan neʼe, saida mak Ita bele halo atu hetan susesu? Hanoin kona-ba ideia balu tuirmai neʼe.

Komesa kuandu oan sei kiʼik

Oan-mane sira baibain gosta tebes atu banati-tuir sira-nia aman. Tan neʼe, kuandu Ita-nia oan sei kiʼik, diʼak atu aproveita oportunidade neʼe. Oinsá mak Ita bele halo nuneʼe? No oinsá mak Ita bele fó tempu atu hamutuk ho Ita-nia oan?

Se bele, diʼak atu envolve Ita-nia oan-mane iha Ita-nia atividade loroloron nian. Porezemplu, se Ita dasa rai, bele fó ai-saar kiʼik ida ba nia hodi nia mós bele ajuda. Klaru katak nia sei kontente tebes atu serbisu iha ninia aman nia sorin, ema neʼebé nia hadomi tebes! Karik ida-neʼe han tempu uitoan maibé hodi halo nuneʼe, Ita sei hametin Ita-nia relasaun ho nia, no nia mós bele haburas toman diʼak atu halo serbisu. Iha tempu uluk, Bíblia fó laran-manas ba aman sira atu envolve sira-nia oan iha atividade loroloron nian no uza tempu neʼe atu koʼalia ba sira no hanorin sira. (Deuteronômio [Ulangan] 6:6-9) Konsellu neʼe mós diʼak ba ohin loron.

Maski diʼak atu halo serbisu hamutuk, maibé dala ruma diʼak mós atu fó tempu hodi halimar hamutuk. Tanba ida-neʼe laʼós deʼit halo Ita no Ita-nia oan sente kontente, maibé mós bele ajuda Ita-nia oan iha dalan seluk. Porezemplu, iha informasaun balu neʼebé hatudu katak kuandu aman sira halimar ho sira-nia oan, ida-neʼe bele ajuda oan atu sai aten-brani.

Kuandu aman no oan halimar hamutuk, ida-neʼe bele ajuda sira iha dalan importante liu. Matenek-naʼin ida naran Michel Fize hatete: “Liuhusi halimar mak oan-mane ida baibain koʼalia ho ninia aman.” Kuandu aman no oan halimar, aman bele hatudu domin ba nia oan liuhusi ninia liafuan no hahalok. Se nia halo nuneʼe, nia mós sei hanorin nia oan oinsá atu hatudu domin. Aman ida neʼebé hela iha rai-Alemaña, naran André hatete: “Kuandu haʼu-nia oan sei kiʼik, ami sempre halimar hamutuk. Haʼu hakoʼak nia no nia aprende atu hatudu fali domin mai haʼu.”

Tempu atu toba mós fó oportunidade diʼak ba aman ida atu hametin ninia relasaun ho nia oan. Diʼak atu lee beibeik istória ba nia no rona kuandu nia konta kona-ba buat hotu neʼebé akontese ba nia iha loron neʼe. Se Ita halo nuneʼe, neʼe bele ajuda nia atu koʼalia nafatin ho Ita kuandu nia sai boot.

Halo buat neʼebé imi naʼin-rua gosta

Mane joven balu karik ladún hatudu interese kuandu aman koko atu koʼalia ho sira. Se Ita-nia oan haree hanesan nia lakohi atu fó resposta ba Ita-nia pergunta sira, lalika hanoin katak nia lakohi koʼalia ona ba Ita. Se Ita troka dalan neʼebé Ita koʼalia ho nia, karik nia sei sente kontente atu koʼalia nakloke ho Ita.

Aman ida neʼebé hela iha rai-Fransa, naran Jacques, dehan katak dala ruma nia sente susar atu koʼalia ho ninia oan, Jérôme. Maibé duké obriga ninia oan atu koʼalia, nia koko dalan seluk, neʼe mak atu tebe bola hamutuk. Aman neʼe hatete: “Depois ami halo desportu, ami tuur hamutuk iha duʼut no deskansa uitoan. Iha tempu sira hanesan neʼe nia koʼalia nakloke mai haʼu. Tanba ami naʼin-rua mesak deʼit hamutuk, haʼu sente katak ida-neʼe halo ami-nia relasaun sai metin liu.”

Oinsá se Ita-nia oan-mane la gosta halo desportu? Aman ida naran André hanoin fila fali tempu sira neʼebé nia hamutuk ho nia oan haree ba fitun sira. André hatete: “Ami gosta tuur iha kadeira iha kalan neʼebé malirin. Ami hatais faru-manas no hemu xá, no hateke ba lalehan. Ami koʼalia kona-ba Ida neʼebé kria fitun sira-neʼe, no kona-ba buat neʼebé kona ami-nia moris rasik no mós kona-ba buat naran deʼit.”—Isaías (Yesaya) 40:25, 26.

Maibé oinsá se Ita la gosta halo buat neʼebé Ita-nia oan gosta? Se nuneʼe, karik Ita bele husik Ita rasik nia hakarak. (Filipe 2:4) Aman ida naran Ian neʼebé hela iha Áfrika Súl hatete: “Haʼu gosta desportu, maibé haʼu-nia oan, Vaughan, la gosta. Nia gosta aviaun no komputadór. Entaun, haʼu hakaʼas an atu hatudu interese ba buat sira-neʼe. Haʼu lori nia ba fatin pameran aviaun nian no ami uza komputadór hodi finje sai pilotu. Haʼu sente katak tanba ami uza tempu atu halimar hamutuk, ida-neʼe ajuda Vaughan atu koʼalia nakloke ho haʼu.”

Ajuda oan haburas fiar-an

“Apá, haree toʼok!” Ita-nia oan-mane hatete ida-neʼe ba Ita kuandu nia foin aprende atu halo buat foun ka lae? Se agora nia joven ona, nia nafatin hatudu sai katak nia hakarak Ita atu gaba nia ka lae? Karik lae. Maibé atu nia bele sai ema boot neʼebé bele foti desizaun ho matenek, nia presiza duni gaba husi Ita.

Hanoin toʼok kona-ba ezemplu neʼebé Maromak Jeová rasik hatudu kona-ba ninia oan-mane ida. Kuandu Jesus atu hahú ninia knaar espesiál iha rai, Maromak fó sai ninia domin ba nia hodi dehan: “Ida-neʼe mak Haʼu-nia Oan doben, neʼebé fó ksolok mai Haʼu.” (Mateus 3:17; 5:48) Tuir loloos, Ita iha responsabilidade atu fó dixiplina no hanorin Ita-nia oan. (Efeso 6:4) Maibé Ita mós buka ka lae oportunidade atu fó sai Ita-nia ksolok ba Ita-nia oan kuandu nia hatete ka halo buat neʼebé diʼak?

Susar ba mane balu atu fó sai no hatudu sira-nia domin. Karik neʼe tanba sira sai boot iha família neʼebé inan-aman sempre buka deʼit sira-nia sala duké gaba buat diʼak neʼebé sira halo. Se Ita sai boot iha família hanesan neʼe, Ita presiza hakaʼas an atu ajuda Ita-nia oan-mane haburas hahalok fiar-an. Oinsá mak Ita bele halo nuneʼe? Luca, neʼebé temi tiha ona, sempre halo serbisu iha uma laran hamutuk ho ninia oan-mane Manuel neʼebé tinan 15. Luca hatete: “Dala ruma haʼu husu Manuel atu komesa halo serbisu mesak no fó-hatene nia katak se nia presiza, haʼu bele ajuda. Dala barak nia bele halo serbisu neʼe mesak. Ida-neʼe halo nia sente kontente no sai fiar-an tebes. Kuandu nia halo buat ruma ho susesu, haʼu gaba nia. Se nia halo buat ruma neʼebé ladún tuir haʼu-nia hakarak, haʼu nafatin fó-hatene nia katak haʼu hafolin ninia hakaʼas-an.”

Atu Ita-nia oan-mane bele haburas hahalok fiar-an, diʼak mós ba Ita atu ajuda nia kumpre planu sira neʼebé importante iha ninia moris. Maibé oinsá se nia neineik atu kumpre planu sira-neʼe? Ka oinsá se nia hili planu balu neʼebé diʼak maibé laʼós tuir buat neʼebé Ita hakarak ba nia? Se nuneʼe, karik Ita presiza troka Ita-nia hanoin. Jacques, neʼebé temi tiha ona, hatete: “Haʼu koko atu ajuda haʼu-nia oan halo planu sira neʼebé nia bele kumpre. Maibé haʼu mós presiza haree katak planu sira-neʼe mak ninian, laʼós haʼu-nian. Haʼu mós tenke hanoin nafatin katak planu sira neʼebé nia halo, nia presiza kumpre tuir ninia kbiit.” Sin, Ita sei ajuda Ita-nia oan atu hetan susesu se Ita rona ba ninia hanoin, gaba nia ba buat diʼak neʼebé nia halo, no fó laran-manas ba nia atu la rende an atu kumpre ninia planu sira.

Ita hatene katak Ita-nia relasaun ho Ita-nia oan dala ruma sei hetan susar balu. Maibé ikusmai, Ita-nia oan karik sei hakarak besik nafatin ho Ita. Sin, tuir loloos, se mak lakohi besik nafatin ho ema neʼebé sempre ajuda nia?

[Nota–rodapé]